110.0026.25.02.97
ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԿՐԹՈՒԹՅԱՆ ԵՎ ԳԻՏՈՒԹՅԱՆ ՆԱԽԱՐԱՐՈՒԹՅՈՒՆ
Հ Ր Ա Մ Ա Ն
25 փետրվարի 1997 թ., N 26-Մ
«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ՔՈԼԵՋՆԵՐԻ ԵՎ ՄԻՋՆԱԿԱՐԳ ՄԱՍՆԱԳԻՏԱԿԱՆ ՈՒՍՈՒՄՆԱԿԱՆ ՀԱՍՏԱՏՈՒԹՅՈՒՆՆԵՐԻ ՄԱՆԿԱՎԱՐԺԱԿԱՆ ԵՎ ՂԵԿԱՎԱՐ ԱՇԽԱՏՈՂՆԵՐԻ ԱՏԵՍՏԱՎՈՐՄԱՆ ԿԱՆՈՆԱԴՐՈՒԹՅՈՒՆԸ» ՀԱՍՏԱՏԵԼՈՒ ՄԱՍԻՆ
1. Հաստատել «Հայաստանի Հանրապետության պետական քոլեջների և միջնակարգ մասնագիտական ուսումնական հաստատությունների մանկավարժական և ղեկավար աշխատողների ատեստավորման կանոնադրությունը» (կցվում է):
2. Ուժը կորցրած ճանաչել Հայաստանի Հանրապետության բարձրագույն կրթության և գիտության նախարարության կոլեգիայի 1994 թ. ապրիլի 29-ի «Հայաստանի Հանրապետության միջնակարգ մասնագիտական ուսումնական հաստատությունների ղեկավար աշխատողների և մանկավարժական կազմի ատեստավորման կանոնադրությունը հաստատելու մասին» n 109 որոշումը:
|
Նախարար |
Ա. Պետրոսյան |
|
«ՀԱՍՏԱՏՈՒՄ ԵՄ» |
Կ Ա Ն Ո Ն Ա Դ Ր ՈՒ Թ Յ ՈՒ Ն
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ՔՈԼԵՋՆԵՐԻ ԵՎ ՄԻՋՆԱԿԱՐԳ ՄԱՍՆԱԳԻՏԱԿԱՆ ՈՒՍՈՒՄՆԱԿԱՆ ՀԱՍՏԱՏՈՒԹՅՈՒՆՆԵՐԻ ՄԱՆԿԱՎԱՐԺԱԿԱՆ ԵՎ ՂԵԿԱՎԱՐ ԱՇԽԱՏՈՂՆԵՐԻ ԱՏԵՍՏԱՎՈՐՄԱՆ
Գրանցված է
Հայաստանի Հանրապետության
արդարադատության նախարարության կողմից
10 ապրիլի 1997 թ.
Գրանցման N 12970013
Սույն կանոնադրությունը ընդունվում է ՀՀ վարչապետի 1996 թ. փետրվարի 1-ի «Հայաստանի Հանրապետության կրթության և գիտության նախարարության կանոնադրությունը և կառուցվածքը հաստատելու մասին» N 36 որոշմամբ հաստատված ՀՀ կրթության և գիտության նախարարության կանոնադրության 5-րդ կետի «խ» ենթակետի համաձայն:
I. ԸՆԴՀԱՆՈՒՐ ԴՐՈՒՅԹՆԵՐ
1. Քոլեջի և միջնակարգ մասնագիտական ուսումնական հաստատության (այսուհետև` ՄՄՈՒՀ) մանկավարժական և ղեկավար աշխատողների ատեստավորումը նրանց մասնագիտական որակավորման մակարդակի համալիր գնահատումն է, որն անց է կացվում համապատասխան հանձնաժողովի կողմից` կոլեգիալության և հրապարակայնության սկզբունքների հիման վրա:
2. Ատեստավորումը նպատակ ունի պարզելու քոլեջի և ՄՄՈՒՀ-ի մանկավարժական և ղեկավար աշխատողներից յուրաքանչյուրի համապատասխանությունն իր զբաղեցրած պաշտոնի համար ՀՀ կրթության և գիտության նախարարության կողմից հաստատված ու ՀՀ սոցիալական ապահովության նախարարության հետ համաձայնեցված տարիֆաորակավորման բնութագրին, իսկ ավելի բարձր պաշտոնի հավակնելու դեպքում` այդ պաշտոնի համար սահմանված վերոհիշյալ տարիֆաորակավորման բնութագրին:
3. Ատեստավորման ենթակա են քոլեջի և ՄՄՈՒՀ-ի բոլոր մանկավարժական և ղեկավար աշխատողները:
4. Ատեստավորումն անց է կացվում պարտադիր սկզբունքով յուրաքանչյուր 3 տարին մեկ: Որոշ դեպքերում ատեստավորումը կարող է անցկացվել նաև արտահերթ.
- մանկավարժական աշխատողների համար` համապատասխան վերադաս պետական կառավարման մարմնի համաձայնությամբ,
- ղեկավար աշխատողների համար` համապատասխան վերադաս պետական կառավարման մարմնի ղեկավարի հրամանով:
5. Ատեստավորման ենթակա չեն.
- տվյալ քոլեջում կամ ՄՄՈՒՀ-ում մինչև մեկ տարի տվյալ պաշտոնում աշխատող անձինք,
- տվյալ քոլեջում կամ ՄՄՈՒՀ-ում մինչև երեք տարի աշխատող այն անձինք, որոնք անցել են աշխատանքի այդ ուսումնական հաստատությունում` բուհ-ը, քոլեջը կամ ՄՄՈՒՀ-ն ավարտելուց անմիջապես հետո,
-տվյալ քոլեջում կամ ՄՄՈՒՀ-ում աշխատող հղի և մինչև 3 տարեկան երեխա ունեցող կանայք: Հղիության և ծննդաբերության կամ երեխային խնամելու համար արձակուրդում գտնվող կանայք ենթակա են ատեստավորման` աշխատանքի դուրս գալուց հետո մեկ տարի անց:
6. Ատեստավորումն անց է կացվում ՀՀ աշխատանքային օրենսդրության և սույն կանոնադրության համապատասխան:
II. ԱՏԵՍՏԱՎՈՐՈՂ ՀԱՆՁՆԱԺՈՂՈՎՆԵՐԻ ԿԱԶՄԸ ԵՎ ԱՏԵՍՏԱՎՈՐՄԱՆ ԿԱՐԳԸ
7. Քոլեջի և ՄՄՈՒՀ-ի ղեկավար աշխատողների (տնօրենի, փոխտնօրենների, մասնաճյուղի վարիչի) ատեստավորումն անցկացվում է ըստ գերատեսչական ենթակայության, վերադաս պետական կառավարման մարմնի ատեստավորող հանձնաժողովի կողմից: Հանձնաժողովի կազմը բաղկացած է հանձնաժողովի նախագահից (վերադաս պետական կառավարման մարմնի ղեկավարի տեղակալ), նախագահի տեղակալից (ուսումնական հաստատությունները կառավարող ստորաբաժանման պետ), հանձնաժողովի քարտուղարից, ճյուղային արհմիության ներկայացուցչից և անդամներից (7-9 մարդ): Ատեստավորող հանձնաժողովի կազմը հաստատվում է վերադաս պետական կառավարման մարմնի ղեկավարի կողմից:
8. Մանկավարժական աշխատողների (դասատուների, ուսումնական գործընթացի հետ առնչվող այլ աշխատակիցների) ատեստավորումն անցկացնում է քոլեջի և ՄՄՈՒՀ-ի խորհրդի կողմից երաշխավորված և տնօրենի հրամանով հաստատված հանձնաժողովը, որի կազմում ընդգրկվում են քոլեջի և ՄՄՈՒՀ-ի առավել փորձառու և որակյալ աշխատակիցներ, համապատասխան ճյուղի մասնագետ, տվյալ ուսումնական հաստատության արհմիութենական կազմակերպության նախագահը: Քոլեջի և ՄՄՈՒՀ-ի ատեստավորող հանձնաժողովի նախագահն է տվյալ հաստատության տնօրենը:
Ատեստավորման աշխատանքներին կարող է մասնակցել նաև համապատասխան վերադաս պետական կառավարման մարմնի ներկայացուցիչը:
9. Քոլեջի և ՄՄՈՒՀ-ի ղեկավար աշխատողների ատեստավորումն անցկացվում է համաձայն ատեստավորող հանձնաժողովի կազմած և համապատասխան վերադաս պետական կառավարման մարմնի ղեկավարի կողմից հաստատված ժամանակացույցի: Մանկավարժական աշխատողների ատեստավորումն անցկացվում է համաձայն տվյալ քոլեջի կամ ՄՄՈՒՀ-ի տնօրենի կողմից հաստատված ժամանակացույցի, որը փակցվում է ուսումնական հաստատությունում ի տես բոլորի:
10. Ատեստավորումից առնվազն մեկ ամիս առաջ ատեստավորվողը ղեկավարի հրամանով տեղյակ է պահվում իր ատեստավորման ժամկետի մասին:
11. Քոլեջի կամ ՄՄՈՒՀ-ի ղեկավար աշխատողների ատեստավորման գործընթացը սկսելուց ոչ ուշ, քան երկու շաբաթ առաջ ուսումնական հաստատությունները կառավարող ստորաբաժանման պետի կողմից յուրաքանչյուր ատեստավորվողի համար լրացվում է ատեստավորման թերթիկ (ձևը կցվում է): Ատեստավորման թերթիկում տրվում են ատեստավորվողի աշխատանքի համառոտ բնութագիրը և գնահատականը, ինչպես նաև առաջարկություն նրա ատեստավորման մասին` համաձայն սահմանված ձևի (տե'ս 15 կետը): Ատեստավորվողի աշխատանքի համառոտ բնութագրում նշվում է նրա աշխատանքի որակի, մակարդակի, աշխատանքին ստեղծագործական մոտեցման, կազմակերպչական ընդունակությունների մասին:
Ատեստավորման թերթիկին կարող են կցվել այլ փաստաթղթեր, որոնք առավել լիովին բնութագրում են ատեստավորվողի աշխատանքային գործունեությունը:
12. Քոլեջի կամ ՄՄՈՒՀ-ի մանկավարժական աշխատողների ատեստավորման գործընթացը սկսելուց առաջ ուսումնական հաստատության տնօրենի կողմից յուրաքանչյուր ատեստավորվողի համար լրացվում է ատեստավորման թերթիկ (ձևը կցվում է): Ատեստավորման թերթիկում տրվում են ատեստավորվողի աշխատանքի համառոտ բնութագիրը և գնահատականը, ինչպես նաև առաջարկություն նրա ատեստավորման մասին` համաձայն սահմանված ձևի (տե'ս 15 կետը): Ատեստավորվողի աշխատանքի համառոտ բնութագրում նշվում է նրա աշխատանքի որակի, մակարդակի, աշխատանքին ստեղծագործական մոտեցման, կազմակերպչական ընդունակությունների, մանկավարժական վարպետության, ուսումնամեթոդական աշխատանքի, ուսուցման տեխնիկական միջոցների օգտագործման և այլ հարցերի մասին: Ատեստավորման թերթիկին կարող են կցվել այլ փաստաթղթեր, որոնք առավել լիովին բնութագրում են ատեստավորվողի աշխատանքային գործունեությունը:
13. Ատեստավորումից մեկ շաբաթ առաջ ատեստավորվողին ատեստավորող հանձնաժողովի քարտուղարը ծանոթացնում է նրա ատեստավորման թերթիկի բովանդակության հետ: Եթե ատեստավորվողը համաձայն չէ իր աշխատանքին տրված բնութագրին և գնահատականին, ապա նրան իրավունք է տրվում գրավոր դիմում ներկայացնել ատեստավորող հանձնաժողովին: Այդ դիմումը հաշվի է առնվում ատեստավորող հանձնաժողովի կողից տվյալ աշխատակցին ատեստավորելու ընթացքում:
14. Ատեստավորման ընթացքում ատեստավորող հանձնաժողովը լսում է հանձնաժողովի քարտուղարի հաղորդումը ատեստավորվողի մասին, քննարկում նրա վերաբերյալ նյութերը: Անհրաժեշտության դեպքում ատեստավորվողին տրվում են այլ հարցեր` նրա մասին ամբողջական պատկերացում կազմելու համար:
15.Քոլեջի և ՄՄՈՒՀ-ի մանկավարժական և ղեկավար աշխատողների ատեստավորման արդյունքների հիման վրա յուրաքանչյուր ատեստավորված աշխատակցի համար հանձնաժողովը որոշում է կայացնում հետևյալ ձևակերպումներից որևէ մեկով. «Համապատասխանում է զբաղեցրած պաշտոնին», «Չի համապատասխանում զբաղեցրած պաշտոնին», «Համապատասխանում է զբաղեցրած պաշտոնին` նշված թերությունները վերացնելու պայմանով»: Վերջին դեպքում ատեստավորվողին տրվում են իր աշխատանքային գործունեությունը բարելավելու վերաբերյալ հանձնարարականներ և ժամկետ, դրանք կատարելու համար: Վերջինիս արդյունքները կարող են հիմք հանդիսանալ տվյալ աշխատակցի արտահերթ ատեստավորման համար:
Դասատուների ատեստավորման արդյունքների հիման վրա որոշվում է նաև նրանց համապատասխանությունը դասատուների համար տարիֆաորակավորման բնութագրերով սահմանված երեք տարակարգերից մեկին` «դասատու», «ավագ դասատու», «առաջատար դասատու»:
16. Ատեստավորող հանձնաժողովն իրավասու է ատեստավորման գործընթացն իրականացնել ըստ սահմանված կարգի` առանց ատեստավորվողի ներկայության, եթե վերջինս բացակայում է անհարգելի պատճառով:
17. Ատեստավորման հանձնաժողովի նիստերն համարվում են իրավազոր, եթե դրանց մասնակցում են հանձնաժողովի անդամների առնվազն 2/3-ը: Ատեստավորվողի մասին որոշումն ընդունվում է փակ գաղտնի քվեարկությամբ և ձայների պարզ մեծամասնությամբ: «Կողմ» և «դեմ» ձայների հավասարության դեպքում ատեստավորվողը ճանաչվում է զբաղեցրած պաշտոնին և տարակարգին համապատասխան: Դասատուների տարակարգը բարձրացվում է «կողմ» ձայների գերակշռության դեպքում:
18. Ատեստավորման արդյունքները (գնահատականն ու հանձնարարականները) գրանցվում են յուրաքանչյուր ատեստավորվողի ատեստավորման թերթիկներում, որոնք ստորագրվում են հանձնաժողովի անդամների կողմից: Ատեստավորման թերթիկը կցվում է ատեստավորվողի անձնական գործին:
19. Քոլեջի կամ ՄՄՈՒՀ-ի աշխատակիցներն ատեստավորումից անմիջապես հետո տեղյակ են պահվում ատեստավորման արդյունքների մասին:
20. Ծախսերը, որոնք կապված են ատեստավորվողին ատեստավորող հանձնաժողովին ներկայանալու համար, վճարվում են գործուղումների համար նախատեսված կարգով:
III. ԱՏԵՍՏԱՎՈՐՄԱՆ ԱՐԴՅՈՒՆՔՆԵՐԻ ԻՐԱԿԱՆԱՑՄԱՆ ԿԱՐԳԸ
21. Վերադաս պետական կառավարման մարմնի ատեստավորող հանձնաժողովի ներկայացրած եզրակացության հիման վրա վերադաս պետական կառավարման մարմնի ղեկավարի հրամանով որոշում է կայացվում քոլեջների և ՄՄՈՒՀ-ների ղեկավար աշխատողներին զբաղեցրած պաշտոնում թողնելու, հանձնարարականներ տալու, պաշտոնից ազատելու կամ նրանց համաձայնությամբ այլ աշխատանքի փոխադրելու մասին:
22. Քոլեջների և ՄՄՈՒՀ-ների ատեստավորող հանձնաժողովի ներկայացրած եզրակացության հիման վրա տնօրենի հրամանով որոշում է կայացվում քոլեջի և ՄՄՈՒՀ-ի յուրաքանչյուր դասատուի զբաղեցրած պաշտոնում թողնելու և «դասատու», «ավագ դասատու», կամ «առաջատար դասատու» տարակարգերից մեկը շնորհելու, հանձնարարականներ տալու, պաշտոնից ազատելու, նրա համաձայնությամբ այլ աշխատանքի փոխադրելու մասին:
Նմանատիպ որոշումներ են կայացվում ուսումնական գործընթացի հետ առնչվող ատեստավորված այլ աշխատակիցների վերաբերյալ` համաձայն նրանց համար նախատեսված տարիֆաորակավորման բնութագրերի:
23. Ատեստավորող հանձնաժողովի որոշումն ատեստավորվողի պաշտոնի բարձրացմանն արժանացած կամ զբաղեցրած պաշտոնին չհամապատասխանելու մասին մեկ ամսվա ընթացքում իրականացվում է համապատասխան պաշտոնատար անձանց հրամաններով:
24. Քոլեջի և ՄՄՈՒՀ-ի ղեկավար աշխատողների ատեստավորման արդյունքների հետ անհամաձայնության մասին գանգատները ներկայացվում են մեկ ամսվա ընթացքում` ատեստավորող հանձնաժողովին:
Մանկավարժական աշխատողների ատեստավորման արդյունքների հետ անհամաձայնության մասին գանգատները մեկ ամսվա ընթացքում ներկայացվում են ատեստավորող հանձնաժողովին, իսկ նրա որոշումը ուժի մեջ թողնելու դեպքում` վերադաս պետական կառավարման մարմնին: Ատեստավորման արդյունքները գանգատարկող աշխատողների մասին որոշումները կայացվում են գանգատարկման օրից հետո մեկ ամսվա ընթացքում:
25. Ատեստավորման հետ կապված վեճերը լուծվում են աշխատանքային վեճերի լուծման կարգի մասին ՀՀ օրենսդրությանը համապատասխան:
ՀՀ ԿՐԹՈՒԹՅԱՆ ԵՎ ԳԻՏՈՒԹՅԱՆ ՆԱԽԱՐԱՐՈՒԹՅՈՒՆ
| _______________________________________________________ Ուսումնական հաստատության անվանումը
ԱՏԵՍՏԱՎՈՐՄԱՆ ԹԵՐԹԻԿ
____ _____________199__ թ.
ՆԱԽԱԳԱՀ` _________________ (______________)
ՀԱՆՁՆԱԺՈՂՈՎԻ ԱՆԴԱՄՆԵՐ` _________________ (______________)
_________________ (______________)
_________________ (______________)
_________________ (______________)
_________________ (______________)
_________________ (______________)
_________________ (______________)
_________________ (______________)
_________________ (______________)
_________________ (_____________)
ՀԱՆՁՆԱԺՈՂՈՎԻ ՔԱՐՏՈՒՂԱՐ` _________________ (_____________) |
ՀՀ ԿՐԹՈՒԹՅԱՆ ԵՎ ԳԻՏՈՒԹՅԱՆ ՆԱԽԱՐԱՐՈՒԹՅՈՒՆ
|
ԱՏԵՍՏԱՎՈՐԱՆ ԹԵՐԹԻԿ
___ ______________ 199_ թ.
ՆԱԽԱԳԱՀ` _________________ (______________)
ՀԱՆՁՆԱԺՈՂՈՎԻ ԱՆԴԱՄՆԵՐ` _________________ (______________)
ՀԱՆՁՆԱԺՈՂՈՎԻ ՔԱՐՏՈՒՂԱՐ` _____________ (____________) |
| Փոփոխող ակտ | Համապատասխան ինկորպորացիան |
|---|
| Փոփոխող ակտ | Համապատասխան ինկորպորացիան |
|---|