115.0097.20.07.98

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ

ՍՈՑԻԱԼԱԿԱՆ ԱՊԱՀՈՎՈՒԹՅԱՆ ՆԱԽԱՐԱՐՈՒԹՅՈՒՆ

Հ Ր Ա Մ Ա Ն

20.07.1998 թ.

N 97-Պ

ԱՇԽԱՏԱՆՔԻ ՏԵՂԱՎՈՐՄԱՆ ԾԱՌԱՅՈՒԹՅՈՒՆՆԵՐ ՄԱՏՈՒՑՈՂ ՈՉ ՊԵՏԱԿԱՆ ՁԵՌՆԱՐԿՈՒԹՅՈՒՆՆԵՐԻ ԳՈՐԾՈՒՆԵՈՒԹՅԱՆ ԹՈՒՅԼՏՎՈՒԹՅԱՆ (ԼԻՑԵՆԶԻԱՅԻ) ՏՐՄԱՆ ԿԱՐԳԻ ՄԱՍԻՆ

«Բնակչության զբաղվածության մասին» ՀՀ օրենքի 16 հոդվածին և ՀՀ կառավարության 1997 թ. նոյեմբերի 3-ի «ՀՀ Նախարարների խորհրդի 1991 թ. մարտի 5-ի թիվ 161 որոշման մեջ լրացում կատարելու մասին» թիվ 483 որոշման համապատասխան, Հայաստանի Հանրապետությունում և այլ պետություններում աշխատանքի տեղավորման ծառայություններ մատուցող ոչ պետական ձեռնարկությունների գործունեության լիցենզավորման գործընթացի կանոնակարգման նպատակով`

Հրամայում եմ

1. Հաստատել «Աշխատանքի տեղավորման ծառայություններ մատուցող ոչ պետական ձեռնարկությունների գործունեության թույլտվության (լիցենզիայի) տրման կարգը» (կցվում է):

2. Աշխատանքի և զբաղվածության վարչությանը`

- սույն հրամանը սահմանված կարգով ներկայացնել ՀՀ արդարադատության նախարարություն պետական գրանցման:

Նախարար`

Գ. Եգանյան

Հաստատված է Հայաստանի Հանրապետության սոցիալական ապահովության նախարարի 1998 թ. հուլիսի 20-ի թիվ 97-Պ հրամանով

Կ Ա Ր Գ

ԱՇԽԱՏԱՆՔԻ ՏԵՂԱՎՈՐՄԱՆ ԾԱՌԱՅՈՒԹՅՈՒՆՆԵՐ ՄԱՏՈՒՑՈՂ ՈՉ ՊԵՏԱԿԱՆ ՁԵՌՆԱՐԿՈՒԹՅՈՒՆՆԵՐԻ ԳՈՐԾՈՒՆԵՈՒԹՅԱՆ ԹՈՒՅԼՏՎՈՒԹՅԱՆ (ԼԻՑԵՆԶԻԱՅԻ) ՏՐՄԱՆ

Սույնով սահմանվում է Հայաստանի Հանրապետությունում և այլ պետություններում աշխատանքի տեղավորման ծառայություններ մատուցող ոչ պետական ձեռնարկությունների (այսուհետև` ձեռնարկություն) գործունեության թույլտվության (այսուհետև` լիցենզիա) տրման կարգը:

I. ԸՆԴՀԱՆՈՒՐ ԴՐՈՒՅԹՆԵՐ

1. Աշխատանքի տեղավորման գործունեության համար լիցենզիա տալիս է Հայաստանի Հանրապետության սոցիալական ապահովության նախարարությունը (այսուհետև` նախարարություն):

2. Լիցենզիա տալու համար գանձվում է պետական տուրք «Պետական տուրքի մասին» Հայաստանի Հանրապետության օրենքով սահմանված կարգով և չափով:

3. Լիցենզիայի գործողության ժամկետը երեք տարի է:

4. Լիցենզիայի գործունեության ժամկետը լրանալու դեպքում ձեռնարկությանը տրվում է նոր լիցենզիա` ընդհանուր հիմունքներով:

5. Ձեռնարկության լուծարման դեպքում լիցենզիան կորցնում է իր իրավաբանական ուժը:

6. Ձեռնարկության իրավաբանական հասցեի, կազմակերպական իրավական տեսակի փոփոխման, ինչպես նաև հիմնադիր փաստաթղթերում փոփոխություններ կամ լրացումներ կատարվելու դեպքում նախարարությունը ձեռնարկության գրավոր դիմումի հիման վրա 15-օրյա ժամկետում տալիս է լիցենզիայի վերաձևակերպման տարբերակը: Նման դեպքերում, մինչև լիցենզիայի վերաձևակերպումը, ձեռնարկությունը իր գործունեությունը իրագործում է նախկին լիցենզիայի հիման վրա:

7. Լիցենզիայի կորցնելու դեպքում նախարարությունը ձեռնարկության գրավոր դիմումի հիման վրա կորցրած լիցենզիան ճանաչում է անվավեր և 15-օրյա ժամկետում տալիս է կորցրած լիցենզիայի կրկնօրինակը, դրա վրա կատարելով «Կրկնօրինակ» նշագրումը:

8. Նախարարությունը կարող է մերժել լիցենզիա տալը, եթե հայտատուն ներկայացրել է փաստաթղթեր, որոնք չեն համապատասխանում Հայաստանի Հանրապետության օրենսդրությանը և սույն կարգի պահանջներին:

9. Աննպատակահարմարության շարժառիթներով թույլտվության մերժումը արգելվում է:

10. Մերժման մասին որոշման պատճենը ստանալուց հետո 30 օրվա ընթացքում ձեռնարկությունը իրավունք ունի այն բողոքարկել դատարանում:

II. ԼԻՑԵՆԶԻԱՅԻ ՀԱՄԱՐ ՊԱՀԱՆՋՎՈՂ ԱՆՀՐԱԺԵՇՏ ՓԱՍՏԱԹՂԹԵՐԸ ԵՎ ՏՐՄԱՆ ԸՆԹԱՑԱԿԱՐԳԸ

11. Լիցենզիա ստանալու համար ձեռնարկությունը նախարարություն է ներկայացնում հետևյալ փաստաթղթերը.

ա) գործունեության իրականացման հայտ,

բ) օրենսդրությամբ սահմանված ձեռնարկության հիմնադիր փաստաթղթերի պատճեններ,

գ) պետական գրանցման վկայականի պատճեն,

դ) հաշվի համարը, սպասարկող բանկի հասցեն և ռեկվիզիտները,

ե) հարկային տեսչությունում գրանցված հարկ վճարողի հաշվառման համարը հաստատող տեղեկանք,

զ) լիցենզիա ստանալու համար պետական տուրքի վճարման անդորրագիր:

12. Փաստաթղթերի ընդունումը կատարվում է գրանցամատյանում համապատասխան գրանցում կատարելու միջոցով:

13. Նշված փաստաթղթերը ներկայացնելու պահից 15-օրյա ժամկետում նախարարությունը պարտավոր է որոշում կայացնել լիցենզիա տալու կամ մերժելու վերաբերյալ: Լիցենզիա տալու կամ մերժելու մասին որոշումը երեք աշխատանքային օրվա ընթացքում տրվում է հայտատուին:

III. ԼԻՑԵՆԶԻԱ ՍՏԱՑԱԾ ՁԵՌՆԱՐԿՈՒԹՅԱՆ ՊԱՐՏԱԿԱՆՈՒԹՅՈՒՆՆԵՐԸ

14. Լիցենզիա ստացած ձեռնարկությունը պարտավոր է.

ա) վճար գանձել աշխատանքի տեղավորմանը միջնորդելու ծառայության համար` գործատուի և քաղաքացու միջև աշխատանքային պայմանագրի կնքումից հետո,

բ) ներկայացնել քաղաքացիներին հավաստի տեղեկություններ թափուր աշխատատեղերի, աշխատանքի պայմանների, աշխատանքի վարձատրության վերաբերյալ, իսկ այլ երկրներում աշխատանքի տեղավորման առաջարկության դեպքում նաև սոցիալ-աշխատանքային հարցերով կնքված միջպետական համաձայնագրերի, այդ երկրների սոցիալ-աշխատանքային հարաբերությունները կարգավորող հիմնական օրենսդրական նորմերի, տվյալ երկրի մուտքի և ելքի պայմանների մասին,

գ) ծանոթացնել սույն կարգին աշխատանքի տեղավորման հարցերով դիմող յուրաքանչյուր անձի,

դ) պահպանել քաղաքացիների և գործատուների միջև իրենց մասնակցությամբ կնքված աշխատանքային պայմանագրերի պատճենները,

ե) նախարարություն տեղեկություններ ներկայացնել աշխատանքի տեղավորման անձանց մասնագիտական, կրթական, սեռա-տարիքային կազմի, աշխատանքի վայրի և բնույթի, ինչպես նաև աշխատանքային պայմանագրի գործողության ժամկետի մասին` յուրաքանչյուր եռամսյակի ավարտից հետո` 10 օրվա ընթացքում,

զ) նախարարության կողմից ուսումնասիրությունների ընթացքում ձեռնարկությունը պարտավոր է ուսումնասիրություն իրականացնող անձանց ներկայացնել բոլոր անհրաժեշտ փաստաթղթերը, ինչպես նաև տալ համապատասխան պարզաբանումներ իր գործունեության առանձին հարցերի կապակցությամբ,

է) 5-օրյա ժամկետում գրավոր դիմել նախարարություն լիցենզիայի կորցնելու, իրավաբանական հասցեի, ձեռնարկության հիմնադիր փաստաթղթերում փոփոխությունների կամ լրացումների մասին:

IV. ԼԻՑԵՆԶԻԱՆԵՐԻ ՀԱՇՎԱՌՈՒՄԸ

15. Նախարարությունը սահմանված կարգով իրականացնում է լիցենզիաների հաշվառում գրանցամատյանում, որտեղ նշվում եմ`

ա) ձեռնարկության լրիվ անվանումը, նրա ղեկավարի անունը, ազգանունը,

բ) իրավաբանական հասցեն,

գ) կազմակերպական-իրավական տեսակը,

դ) պետական գրանցման վկայականի համարը,

ե) բանկային հաշվի համարը,

զ) հարկ վճարողի հաշվառման համարը, 

է) լիցենզիայի հերթական համարը,

ը) լիցենզիա տալու ամսաթիվը և գործողության համարը,

թ) պետական տուրքի գումարի չափը և բանկային անդորրագրի համարը,

ժ) հայտի մերժման, լիցենզիայի գործողության կասեցման կամ լիցենզիայի չեղյալ համարելու դեպքերում` պատճենը:

16. Լիցենզիաների հաշվառման գրանցամատյանը կարվում և կնքվում է, բոլոր էջերը համարակալվում են:

V. ՎԵՐԱՀՍԿՈՂՈՒԹՅՈՒՆԸ ՍՈՒՅՆ ԿԱՐԳԻ ՊԱՀԱՆՋՆԵՐԻ ԿԱՏԱՐՄԱՆ ՆԿԱՏՄԱՄԲ, ԼԻՑԵՆԶԻԱՅԻ ԳՈՐԾՈՂՈՒԹՅԱՆ ԿԱՍԵՑՈՒՄԸ ԵՎ ՉԵՂՅԱԼ ՀԱՄԱՐԵԼԸ

17. Ձեռնարկությունը իր գործունեության իրականացնելու ողջ ժամանակահատվածում պարտավոր է պահպանել լիցենզիայի տրման ժամանակ ներկայացված պահանջները:

18. Ձեռնարկության կողմից լիցենզիայի գործողության պայմանների նկատմամբ վերահսկողությունը իրականացվում է նախարարության կողմից` ձեռնարկության համապատասխան գործունեության ուսումնասիրությունների միջոցով:

19. Ձեռնարկության գործունեության ուսումնասիրության մասին որոշումը ընդունվում է նախարարության կողմից` իր նախաձեռնությամբ, ինչպես նաև իրավաբանական կամ ֆիզիկական անձանց դիմումների (բողոքների) հիման վրա: Ուսումնասիրության մասին ձեռնարկությանը գրավոր ծանուցվում է այն սկսելու օրվանից առնվազն 3 օր առաջ:

20. Լիցենզավորված ձեռնարկության գործունեության ուսումնասիրման արդյունքում հայտնաբերված խախտումների վերաբերյալ կազմվում է արձանագրություն երկու օրինակից, որը ստորագրվում է նախարարության ներկայացուցչի և ձեռնարկության ղեկավարի կողմից: Արձանագրության մեկ օրինակը թողնվում է ձեռնարկությունում:

21. Նախարարությունը իրավունք ունի մինչև 45 օր ժամկետով կասեցնել տրված լիցենզիայի գործողությունը, եթե.

ա) լիցենզավորման համար ներկայացված փաստաթղթերում ի հայտ են եկել իրականությանը չհամապատասխանող տեղեկություններ,

բ) ձեռնարկության կողմից կատարվել են սույն կարգի խախտումներ:

22. Ձեռնարկությունը պարտավոր է լիցենզիայի գործողության կասեցված ժամկետում վերացնել խախտումները և այդ մասին գրավոր տեղեկացնել նախարարությանը, որի հիման վրա նախարարությունը կարող է վերականգնել լիցենզիայի գործողությունը:

23. Լիցենզիայի գործողության կասեցման կամ նրա վերականգնված որոշման մասին ձեռնարկությանը գրավոր ծանուցվում է որոշում կայացնելուց հետո` 3 օրվա ընթացքում:

24. Ձեռնարկությանը տրված լիցենզիան նախարարության կողմից չեղյալ է համարվում, եթե.

ա) մեկ տարվա ընթացքում կրկնակի կասեցվել է լիցենզիայի գործողությունը,

բ) այդ մասին գրավոր դիմել է ձեռնարկությունը:

25. Լիցենզիան չեղյալ համարելու մասին որոշումը հրապարակվում է մամուլում:

26. Լիցենզիան չեղյալ համարելու մասին որոշում ընդունելու պահից ձեռնարկությունը զրկվում է աշխատանքի տեղավորման գործունեություն իրականացնելու իրավունքից: