«Գրանցված է»
ՀՀ արդարադատության
նախարարության կողմից
8 դեկտեմբերի 2003 թ.
Պետական գրանցման թիվ 10603371

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԳՅՈՒՂԱՏՆՏԵՍՈՒԹՅԱՆ ՆԱԽԱՐԱՐ

21 նոյեմբերի 2003 թ. ք. Երևան

N 190-Ն

Հ Ր Ա Մ Ա Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԳՅՈՒՂԱՏՆՏԵՍՈՒԹՅԱՆ ՆԱԽԱՐԱՐՈՒԹՅԱՆ ԳՈՐԾԱՎԱՐՈՒԹՅԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Հայաստանի Հանրապետության գյուղատնտեսության նախարարությունում գործավարությունը Հայաստանի Հանրապետության կառավարության 2002 թ. հունիսի 20-ի «Հայաստանի Հանրապետության կառավարության գործավարության կարգը հաստատելու մասին» N 890-Ն որոշմամբ սահմանված կարգին համապատասխանեցնելու նպատակով

Հրամայում եմ`

1. Հաստատել Հայաստանի Հանրապետության գյուղատնտեսության նախարարության գործավարության կարգը` համաձայն հավելվածի:

2. Սույն հրամանի կատարման հսկողությունը վերապահել աշխատակազմի ղեկավար` Կ. Միքայելյանին:

Նախարար

Դ. Լոքյան

Հավելված ՀՀ գյուղատնտեսության նախարարի 2003 թ. նոյեմբերի 11-ի N 190-Ն հրամանի

Կ Ա Ր Գ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԳՅՈՒՂԱՏՆՏԵՍՈՒԹՅԱՆ ՆԱԽԱՐԱՐՈՒԹՅԱՆ ԳՈՐԾԱՎԱՐՈՒԹՅԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով սահմանվում է Հայաստանի Հանրապետության գյուղատնտեսության նախարարության գործավարության կարգը:

2. Հայաստանի Հանրապետության գյուղատնտեսության նախարարության գործավարության կազմակերպումն իրականացնում է գյուղատնտեսության նախարարության աշխատակազմը (այսուհետ` աշխատակազմ):

3. Աշխատակազմի կառուցվածքային և առանձնացված ստորաբաժանումներում գործավարության կազմակերպման և վարման համար պատասխանատու է ստորաբաժանման ղեկավարը:

4. Գաղտնի գործավարությունը իրականացվում է «Պետական և ծառայողական գաղտնիքի մասին» Հայաստանի Հանրապետության օրենքի և Հայաստանի Հանրապետության կառավարության 1997 թ-ի դեկտեմբերի 30-ի հ. 626 որոշմամբ հաստատված հրահանգի պահանջներին համապատասխան:

II. ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԳՅՈՒՂԱՏՆՏԵՍՈՒԹՅԱՆ ՆԱԽԱՐԱՐՈՒԹՅՈՒՆՈՒՄ ՍՏԱՑՎԱԾ ԹՂԹԱԿՑՈՒԹՅԱՆ ԸՆԴՈՒՆՈՒՄԸ, ԳՐԱՆՑՈՒՄՆ ՈՒ ՇԱՐԺԸ

5. Հայաստանի Հանրապետության գյուղատնտեսության նախարարության աշխատակազմում (այսուհետ` աշխատակազմ) ստացված ամբողջ պաշտոնական և ոչ պաշտոնական թղթակցությունն` այդ թվում նաև էլեկտրոնային փոստով հաղորդված, ընդունվում և գրանցվում է աշխատակազմի վարչատնտեսական վարչության ընդհանուր բաժնում` ապարատածրագրային միջոցով, զուգահեռ` նաև մատյանների օգնությամբ, որտեղ արտացոլվում են փաստաթղթի համառոտ բովանդակությունը, շարժը, կատարման ընթացքը: Գրանցված փաստաթղթի առաջին էջի ներքևի աջ անկյունում դրվում է դրոշմակնիք, որի վրա նշվում են մտից գրանցման համարը և ամսաթիվը:

Ստացված փաստաթղթի մտից գրանցման համարը բաղկացած է ընդհանուր բաժնի դասակարգիչներով թղթակցին տրված պայմանանիշից և նրա հերթական համարից:

6. Բաժնում բացվում են ստացված բոլոր ծրարները (նաև էլեկտրոնային), բացի «Անձամբ» մակագրությամբ ծրարներից: «Անձամբ» մակագրությամբ ծրարները չեն գրանցվում և փակ վիճակում հանձնվում են հասցեատիրոջը:

7. Բաժնի աշխատողները պարտավոր են ծրարը բացելիս ստուգել փաստաթղթերի առկայությունը (ներառյալ հավելվածները), առդիր թերթերի քանակը, փաստաթղթերի համարները համեմատել ծրարների վրա նշվածների հետ:

Փաստաթղթերի կամ ֆայլերի բացակայության կամ վնասված լինելու դեպքում կազմվում է ակտ 3 օրինակից, որոնցից մեկը մնում է ընդհանուր բաժնում, երկրորդը կցվում է փաստաթղթին, իսկ երրորդը` ուղարկվում է այն կազմակերպություն, որտեղից ստացվել է ծրարը:

Եթե ծրարում հայտնաբերվում են սխալմամբ դրված փաստաթղթեր, դրանք նոր ծրարներով ուղարկվում են ըստ պատկանելության` փաստաթղթերին կցելով այն ծրարները, որոնցով դրանք ստացվել են` անհրաժեշտության դեպքում տեղյակ պահելով այն կազմակերպությանը, որտեղից ստացվել է ծրարը:

8. Ծրարները (նաև էլեկտրոնային), որոնցով ստացվել է թղթակցությունը, պահպանվում և փաստաթղթերին են կցվում այն դեպքում, երբ միայն ծրարի միջոցով կարելի է պարզել ուղարկողի հասցեն կամ, եթե ծրարի վրա փոստային դրոշմակնիքի ամսաթիվը նշանակություն ունի տվյալ նյութի ուղարկման ու ստացման ժամանակը որոշելու համար:

9. Մտից փաստաթղթերը, որոնք ստացվում են Հայաստանի Հանրապետության գյուղատնտեսության նախարարության (այսուհետ` նախարարության) համակարգչային ցանցով, պետք է հաստատված լինեն ուղարկողի կամ համապատասխան պաշտոնատար անձի էլեկտրոնային թվային ստորագրությամբ: Ստացված էլեկտրոնային օրինակն անհրաժեշտության դեպքում վերծանվում է և տեղական «լոկալ» համակարգչային ցանցով ուղարկվում հասցեատիրոջը:

10. Փաստաթղթերի այն էլեկտրոնային օրինակները, որոնք հաստատված չեն էլեկտրոնային թվային ստորագրությամբ, բացի հաստատող և պատրաստող անձանց պաշտոններից ու ազգանուններից, լրացուցիչ պետք է պարունակեն ուղարկող օպերատորի ազգանունը, բայց այդ դեպքում փաստաթուղթը կունենա միայն պատճենի կարգավիճակ:

11. Նախարարության համակարգի ընկերությունների կողմից աշխատակազմի կառուցվածքային և առանձնացված ստորաբաժանումներին հասցեագրված տեղեկատվական բնույթի փաստաթղթերի վրա, եթե դրանք ներկայացնելու անհրաժեշտությունը չի բխում որևէ հանձնարարականի կատարման պահանջներից, դրվում է դրոշմակնիք` նշելով միայն մուտքի ամսաթիվը, որից հետո դրանք ստորագրությամբ հանձնվում են հասցեատերերին:

12. Հայաստանի Հանրապետության Նախագահից, Հայաստանի Հանրապետության Ազգային ժողովից, Հայաստանի Հանրապետության կառավարությունից ստացված նյութերը և «Շտապ» թղթակցությունն անհապաղ գրանցվում և հանձնվում են զեկուցման: Մյուս թղթակցությունը հասցեատերերին է տրվում տվյալ աշխատանքային օրվա ընթացքում սույն կարգին համապատասխան:

13. Հայաստանի Հանրապետության գյուղատնտեսության նախարարությանը և Նախարարին հասցեագրված և մուտքագրված գրությունները, նամակները, դիմումները, բողոքները և մյուս փաստաթղթերը գրանցումից հետո ուղարկվում են քարտուղարության գործավարության բաժին:

14. Գործավարության բաժինը ստացած թղթակցությունը գրանցում է ապարատածրագրային միջոցով, զուգահեռ նաև մատյաններում նշելով` ընդհանուր բաժնի դասակարգիչներով թղթակցին տրված պայմանանիշը, ամսաթիվը, համարը և ներկայացնում աշխատակազմի ղեկավարին:

15. Աշխատակազմի ղեկավարը գործավարության բաժնից ստացված թղթակցությունը և նախարարի ստորագրմանը ներկայացվող փաստաթղթերը նախապատրաստում է տվյալ օրը նախարարին զեկուցելու համար:

16. Հայաստանի Հանրապետության գյուղատնտեսության նախարարի (այսուհետ` նախարարի) տեղակալներին հասցեագրված թղթակցությունը ընդհանուր բաժնի կողմից գրանցվում է բաժնի դասակարգիչներով, համաձայն սույն կարգի:

17. Նախարարի տեղակալներին ամրակցված ռեֆերենտները մինչև տվյալ օրվա ժամը 15⁰⁰-ն, ընդհանուր բաժնում գրանցամատյաններում ստորագրելուց հետո, ընդունում են նախարարի տեղակալներին հասցեագրված թղթակցությունը:

Ռեֆերենտները ստացված թղթակցությունը գրանցում են իրենց գրանցամատյաններում` նշելով ընդհանուր բաժնի դասակարգիչներով թղթակցին տրված պայմանանիշը, ամսաթիվը, համարը և ներկայացնում նախարարի տեղակալներին:

18. Նախարարի կողմից ընթացք տրված թղթակցությունն աշխատակազմի ղեկավարի ցուցումով գործավարության բաժինը գրանցում է ապարատածրագրային միջոցով` նշելով մակագրությունը և հանձնում ընդհանուր բաժին:

Ընդհանուր բաժինը գրանցամատյանում նշում է մակագրությունը և սույն կարգով սահմանված գործելակարգով հանձնում հասցեատերերին:

19. Նախարարի տեղակալների կողմից ընթացք տրված թղթակցությունը ռեֆերենտները գրանցում են գրանցամատյաններում` նշելով մակագրությունը և ստորագրությամբ հանձնում հասցեագրված ստորաբաժանման գործավարությունը իրականացնող մասնագետին:

20. Աշխատակազմի ստորաբաժանումների գործավարությունը իրականացնող մասնագետները ստացված թղթակցությունը գրանցում են ստորաբաժանման գրանցամատյանում` նշելով ընդհանուր բաժնի դասակարգիչներով թղթակցին տրված պայմանանիշը, ամսաթիվը, համարը, մակագրությունը և հանձնում ստորաբաժանման պետին, վերջինիս կողմից ընթացք տրված փաստաթղթերը` գրանցամատյանում համապատասխան նշումներ կատարելուց հետո, ստորագրությամբ հանձնում են անմիջական կատարողներին` մատյանում արտացոլելով փաստաթղթաշրջանառությունը ստորաբաժանման ներսում:

21. Աշխատակազմի աշխատողները պատասխանատու են իրենց մոտ գտնվող փաստաթղթերի պահպանության համար և պարտավոր են խնամքով վերաբերվել դրանց: Չի թույլատրվում աշխատակազմում ստացված փաստաթղթի բնագրային տեքստում որևէ նշում կատարել:

22. Արձակուրդ գնալիս, երկարատև գործուղման մեկնելիս, կամ այլ պատճառներով բացակայելիս, աշխատողը պարտավոր է իր մոտ եղած անավարտ գործերի փաստաթղթերը հանձնել իրեն փոխարինողին կամ անմիջական ղեկավարին:

23. Ստորաբաժանումներում փաստաթղթերին մակագրությանը համապատասխան ընթացք տալուց հետո` թղթակցությունը պահվում է ըստ փաստաթղթի տեսակի առանձնացված գործերում:

24. Աշխատակազմում փաստաթղթերի քննարկման համար սահմանվում են հետևյալ ժամկետները`

- լրացուցիչ ուսումնասիրություններ չպահանջող հարցեր` մինչև 5 օր

- լրացուցիչ ուսումնասիրություններ, քննարկումներ պահանջող հարցեր` մինչև 10 օր:

III. ՀՀ ԳՅՈՒՂԱՏՆՏԵՍՈՒԹՅԱՆ ՆԱԽԱՐԱՐԻ ԵՎ ՆԱԽԱՐԱՐՈՒԹՅԱՆ ԱՇԽԱՏԱԿԱԶՄԻ ՂԵԿԱՎԱՐԻ ՀՐԱՄԱՆՆԵՐԻ ՆԱԽԱՊԱՏՐԱՍՏՈՒՄԸ, ՁԵՎԱԿԵՐՊՈՒՄԸ ԵՎ ԱՌԱՔՈՒՄԸ

25. Աշխատակազմի կառուցվածքային և առանձնացված ստորաբաժանումները նախապատրաստում են նախարարի և աշխատակազմի ղեկավարի` ըստ իրավասության սահմանների, հրամանների նախագծեր հիմնավորված, միմյանց չկրկնող և արդեն լուծում ստացած հարցերին սկզբունքորեն նոր լուծում տալու կամ նոր ընդունված օրենսդրության պահանջներին համապատասխանեցնելու նպատակով:

26. Հրամանի նախագիծ նախապատրաստվում է`

- հարցի մանրամասն ուսումնասիրությունից հետո, հստակ բովանդակությամբ, պարտադիր կարգով նշելով հրամանի վերնագիրը, աշխատանքների ծավալները և կատարման ժամկետները,

- նախագիծը չպետք է հակասի նախկինում արձակված հրամաններին, իսկ գործողության մեջ գտնվող հրամանի որևէ կետի փոփոխման դեպքում, նախագծում պետք է տրվի դրա անհրաժեշտության հիմնավորումը:

27. Նախարարի հրամանի նախագիծ նախապատրաստող ստորաբաժանման ղեկավարը նախագիծն առաջին հերթին համաձայնեցնում է հարցին առնչվող և հանձնարարականներ ստացող ստորաբաժանումների պետերի հետ, որից հետո այն ներկայացնում օրենսդրության և իրավաբանական վարչության պետին` գործող օրենսդրությանը համապատասխանության ապահովման, ընդհանուր բաժնի պետին` խմբագրման, այնուհետև աշխատակազմի ղեկավարի և նախարարի տեղակալների հետ համաձայնեցնելուց հետո համապատասխան նշագրերով հանձնում աշխատակազմի ղեկավարին` նախարարի ստորագրմանը ներկայացնելու համար, ինչպես նաև հետևում է, որ նշագրերի տակ գրվեն ամսաթիվը, նշագիր տվողի պաշտոնը, անվանատառերը ազգանունը նաև էլեկտրոնային պատճենների միշտ ձևավորված լինելը:

28. Նախարարության աշխատակազմի ղեկավարի հրամանի նախագիծ նախապատրաստող ստորաբաժանման ղեկավարը նախագիծը համաձայնեցնում է հարցին առնչվող և հանձնարարականներ ստացող ստորաբաժանումների պետերի հետ, այնուհետև ներկայացնում օրենսդրության և իրավաբանական վարչության պետին` օրենսդրությանը համապատասխանության ապահովման, ընդհանուր բաժնի պետին` խմբագրման համար, որից հետո համապատասխան նշագրերով ներկայացնում աշխատակազմի ղեկավարին` ստորագրման:

29. Հրամանի նախագծի բովանդակության նկատմամբ առարկության դեպքում նշագրողի կողմից առանձին թղթի վրա տրվում է առարկության հիմնավորումը և կցվում հրամանի նախագծին:

30. Ընդհանուր բաժինը նախագիծը սահմանված կարգին համապատասխան նախապատրաստված չլինելու դեպքում այն վերադարձնում է նախապատրաստող ստորաբաժանմանը` լրամշակման:

31. Հրամանի նախագծի հիմնավորվածության, արժանահավատության և ամբողջականության համար պատասխանատվություն է կրում այն նախապատրաստող ստորաբաժանման ղեկավարը:

32. Հրամանները տպագրվում են համապատասխան ձևաթղթերի վրա:

33. Նախարարի և աշխատակազմի ղեկավարի հրամանները գրանցվում են ընդհանուր բաժնում համապատասխան գրանցամատյաններում, դրանց տալով հերթական համարներ, նշելով ամսաթիվը, ամիսը, տարեթիվը: Յուրաքանչյուր տարվա համար հրամանների համարակալումները սկսվում են հունվար ամսվա առաջին հրամանից և ավարտվում տվյալ տարվա դեկտեմբերի վերջին հրամանով:

34. Ընդհանուր բաժինը կազմակերպում է հրամանների բազմացումը և հասցեատերերին առաքումը, համաձայն հրամանը նախապատրաստող ստորաբաժանման պետի կողմից լրացված հասցեաթերթի: Հրամանի պատճենները կնքվում են ընդհանուր բաժնի կնիքով:

35. Հրամաններում ուղղումներ կատարվում են բացառապես ակնհայտ տեխնիկական վրիպակների դեպքում` աշխատակազմի ղեկավարի գրավոր ցուցումով և առաքվում սկզբնական հասցեատերերին:

36. Նախարարի և աշխատակազմի ղեկավարի հրամանները ընդհանուր բաժնում մշակվում են և սահմանված կարգով հանձնվում արխիվ պահպանության:

37. Նախարարի, նախարարի տեղակալների և աշխատակազմի ղեկավարի մոտ անցկացվող խորհրդակցությունների արձանագրությունների պատճենները կնքվում են ընդհանուր բաժնի կնիքով:

Նշված արձանագրությունների բնօրինակները պահվում են հարցը նախապատրաստող ստորաբաժանումում:

IV. ՀՀ ԿԱՌԱՎԱՐՈՒԹՅԱՆ ՔՆՆԱՐԿՄԱՆ ՀԱՄԱՐ ՀԱՐՑԵՐԻ ՆԱԽԱՊԱՏՐԱՍՏՈՒՄԸ

38. Հայաստանի Հանրապետության կառավարության քննարկմանն են ներկայացվում Հայաստանի Հանրապետության Սահմանադրությամբ և օրենքներով նրա իրավասությանը վերապահված հարցեր, որոնք բխում են Հայաստանի Հանրապետության կառավարության կողմից հաստատված Հայաստանի Հանրապետության կառավարության գործունեության միջոցառումների ծրագրից, ինչպես նաև հրատապ լուծում պահանջող հարցեր:

39. Հայաստանի Հանրապետության կառավարության քննարկմանը ներկայացվող հարցի հիմնավորվածության, դրա որակի, ներկայացված նյութերի արժանահավատության և ամբողջականության համար պատասխանատվություն է կրում հարցը նախապատրաստող ստորաբաժանման ղեկավարը:

40. Հայաստանի Հանրապետության կառավարության քննարկմանը ներկայացվող Հայաստանի Հանրապետության օրենքների և Հայաստանի Հանրապետության Ազգային ժողովի որոշումների նախագծերը պետք է համապատասխանեն «Իրավական ակտերի մասին» Հայաստանի Հանրապետության օրենքին:

41. Հայաստանի Հանրապետության կառավարության քննարկմանը ներկայացվող հարցերին առնչվող փաստաթղթերում հստակ նշվում է, թե գործող օրենսդրության որ ակտերում և դրանց որ մասերում է առաջարկվում փոփոխություններ կամ լրացումներ կատարել, կամ որ ակտերի գործողությունն է անհրաժեշտ դադարեցնել: Նման դեպքերում հարցի հետ ներկայացվում է համապատասխան ակտերի մեջ փոփոխություններ և լրացումներ կատարելու մասին նախագիծ:

42. Համապատասխան ստորաբաժանման ղեկավարը Հայաստանի Հանրապետության կառավարության քննարկման համար հարցը պետք է նախապատրաստի Հայաստանի Հանրապետության կառավարության 2002 թ. հունիսի 20-ի թիվ 890-Ն որոշման 26-րդ կետի պահանջներին համապատասխան, ըստ որի Հայաստանի Հանրապետության կառավարություն ներկայացվող օրենքների և իրավական այլ ակտերի նախագծերի փաթեթը ներառում է.

ա) առաջադրվող նախագիծը` նախարարի ուղեկցական գրությամբ, նշագրերով,

բ) նախագծի ընդունման հիմնավորումը,

գ) ներկայացվող հարցի կապակցությամբ լրացուցիչ ֆինանսական միջոցների պահանջի անհրաժեշտությունը, ինչպես նաև Հայաստանի Հանրապետության պետական բյուջեի եկամուտներում և ծախսերում սպասվելիք փոփոխությունների վերաբերյալ տեղեկանքը,

դ) տվյալ նախագծի ընդունման առնչությամբ ընդունվելիք այլ իրավական ակտերի նախագծերը կամ նախագծի ընդունման առնչությամբ այլ իրավական ակտերի ընդունման անհրաժեշտության բացակայության մասին տեղեկանքը,

ե) օրենքի նախագծի ներկայացման դեպքում` Հայաստանի Հանրապետության Ազգային ժողովի այն որոշումների ցանկը, որոնցով ընդունվելիք օրենքի կարգավորման ոլորտում Հայաստանի Հանրապետության կառավարությանը տրվել է օրենքի ուժ ունեցող որոշումներ ընդունելու լիազորություն կամ տեղեկանք` դրանց բացակայության մասին,

զ) հասցեաթերթիկ կատարողի կողմից ստորագրված և այն պետական մարմինների և կազմակերպությունների նշումով, որոնց ուղարկվելու է իրավական ակտը:

43. Հարցը նախապատրաստող ստորաբաժանման ղեկավարը նախագծերի փաթեթի համապատասխանությունը օրենսդրությանն ապահովելու նպատակով այն ներկայացնում է օրենսդրության և իրավաբանական վարչության պետին:

44. Օրենսդրության և իրավաբանական վարչության պետը 3-օրյա ժամկետում ուսումնասիրում է ներկայացված փաստաթղթերը ու դրանց համապատասխանությունը գործող օրենսդրությանը և օրենքներին հավաստում է նշագրով:

45. Հայաստանի Հանրապետության օրենքների և իրավական այլ ակտերի նախագծերի փաթեթը Հայաստանի Հանրապետության կառավարություն է ներկայացվում Հայաստանի Հանրապետության կառավարության որոշմամբ սահմանված կարգով Հայաստանի Հանրապետության շահագրգիռ նախարարությունների հետ 5-օրյա, այնուհետև Հայաստանի Հանրապետության արդարադատության նախարարության հետ` 15-օրյա ժամկետներում համաձայնեցնելուց հետո: Եթե վերը նշված ժամկետներում նախագծի վերաբերյալ առարկություններ և առաջարկություններ չեն ստացվում, ապա նախագիծն առանց դրանց կարող է ներկայացվել Հայաստանի Հանրապետության կառավարություն: Նախագծերի վերաբերյալ Հայաստանի Հանրապետության արդարադատության նախարարության և շահագրգիռ նախարարությունների առարկությունները և առաջարկությունները կցվում են իրավական ակտերի նախագծերին:

46. Ստորաբաժանման ղեկավարն ապահովում է Հայաստանի Հանրապետության արդարադատության նախարարության, ինչպես նաև շահագրգիռ այլ նախարարությունների առարկությունների և առաջարկությունների հիման վրա նախագծի լրամշակումը:

47. Նախարարության աշխատակազմի ղեկավարը.

ա) հետևում է, որ Հայաստանի Հանրապետության կառավարություն ներկայացվեն Հայաստանի Հանրապետության շահագրգիռ նախարարությունների, անհրաժեշտության դեպքում պետական կառավարման և տարածքային կառավարման մարմինների հետ համաձայնեցված նախագծեր,

բ) հետևում է Հայաստանի Հանրապետության կառավարության քննարկման նախատեսված հարցերի սահմանված ժամկետներին նախապատրաստման նկատմամբ,

գ) հսկողություն է սահմանում Հայաստանի Հանրապետության կառավարություն ներկայացվող նախագծերի Հայաստանի Հանրապետության Նախագահի 2002 թ. մարտի 16-ի ՆՀ-1064 հրամանագրով սահմանված Հայաստանի Հանրապետության կառավարության գործունեության կարգի պահանջներին համապատասխանության նկատմամբ:

48. Աշխատակազմի կառուցվածքային և առանձնացված ստորաբաժանումները Հայաստանի Հանրապետության կառավարության քննարկմանը ներկայացրած յուրաքանչյուր իրավական ակտի նախագծի համար կազմում են գործ (օգտագործելով համապատասխան թղթապանակ), որի մեջ զետեղում են նախագծի, ուղեկցական նամակի և նախագծին կցված բոլոր փաստաթղթերի պատճենները:

V. ՀՀ ԳՅՈՒՂԱՏՆՏԵՍՈՒԹՅԱՆ ՆԱԽԱՐԱՐՈՒԹՅՈՒՆՈՒՄ ԹՂԹԱԿՑՈՒԹՅԱՆ ՔՆՆԱՐԿՈՒՄԸ ԵՎ ՀՍԿՈՂՈՒԹՅԱՆ ԻՐԱԿԱՆԱՑՈՒՄԸ

49. Աշխատակազմի ղեկավարը Հայաստանի Հանրապետության Նախագահի աշխատակազմից, Հայաստանի Հանրապետության կառավարությունից, Հայաստանի Հանրապետության Ազգային ժողովից, Հայաստանի Հանրապետության նախարարներից և տարածքային կառավարման մարմիններից ստացված փաստաթղթերի մասին նույն օրը զեկուցում է նախարարին:

50. Պետական այլ մարմիններից և պաշտոնական այլ անձանցից, տեղական ինքնակառավարման մարմիններից նախարարի տեղակալներին և աշխատակազմի առանձնացված ստորաբաժանումների պետերին հասցեագրված թղթակցությանը և նախարարի կողմից լուծում չպահանջող մյուս փաստաթղթերին ընթացք է տրվում օրենսդրությամբ սահմանված կարգով:

51. Աշխատակազմում ստացված թղթակցության կապակցությամբ նախարարը մակագրության ձևով հանձնարարականներ է տալիս իր տեղակալներին, աշխատակազմի ղեկավարին և աշխատակազմի կառուցվածքային և առանձնացված ստորաբաժանումների պետերին:

52. Փաստաթղթերը նախարարին զեկուցելու համար նախապատրաստելու, համապատասխան մակագրություններով հանձնարարականներ կատարողներին գրառելու գործընթացը կազմակերպում է աշխատակազմի ղեկավարը` գործավարության բաժնի միջոցով:

53. Աշխատակազմում ստացված թղթակցության հանձնարարականների, ինչպես նաև նախարարի հանձնարարականների կատարումն ապահովելու նպատակով մակագրությունում նախատեսվում են ժամկետներ, որոնք ենթակա են կատարման նշված ժամկետներում:

54. Աշխատակազմի ստորաբաժանումների պետերը յուրաքանչյուր ամիս` մինչև տվյալ ամսվա 30-ը, տեղեկատվություն են ներկայացնում նախարարի տեղակալներին` ըստ խնամարկման ոլորտների, և աշխատակազմի ղեկավարին` ստորաբաժանման կողմից հանձնարարականների, ինչպես նաև նախարարի հրամանների կատարման ընթացքի և դրանց կատարման ապահովման ուղղությամբ ձեռնարկված միջոցների մասին:

55. Հանձնարարականների կատարման ժամկետը կարող է երկարաձգել միայն նախարարը` փոխնախարարների և աշխատակազմի ղեկավարի առաջարկությամբ:

56. Եթե հանձնարարականը տրվել է միաժամանակ մի քանի կատարողների, ապա հանձնարարականի կատարման պատասխանատուն առաջին հասցեատերն է, որի անվան դիմաց գրառված է «հավաք» նշումը:

Հանձնարարական ստացած մյուս կատարողները պարտավոր են կատարման վերաբերյալ պատասխանատու կատարողին առաջարկություններ, առարկություններ և անհրաժեշտ այլ նյութեր ներկայացնել այն հաշվով, որպեսզի վերջինս հնարավորություն ունենա հանձնարարողների կողմից սահմանված ժամկետում կատարելու հանձնարարականը: Եթե հանձնարարականում բացակայում է «հավաք» նշումը, ապա դրանում նշված պատասխանատու կատարողները կարծիքներ ներկայացնում են հանձնարարությունը տվող պաշտոնատար անձին: Հանձնարարականը համարվում է կատարված, եթե լուծված են դրանում բարձրացված բոլոր հարցերը կամ դրա վերաբերյալ տրվել է ըստ էության պատասխան:

57. Աշխատակազմի ղեկավարը պարբերաբար քննության է առնում Հայաստանի Հանրապետության կառավարության, Հայաստանի Հանրապետության վարչապետի որոշումների և Հայաստանի Հանրապետության կառավարության գործունեության ծրագրով նախատեսված հանձնարարականների, ինչպես նաև նախարարի հրամանների կատարման արդյունքները և միջոցներ ձեռնարկում թերությունները վերացնելու համար:

58. Նախարարության կառուցվածքային և առանձնացված ստորաբաժանումների պետերը հանձնարարականի կատարումը հավաստող նյութերը ներկայացնում են աշխատակազմի ղեկավարին և նրա ցուցումով փաստաթուղթը հանվում է հսկողությունից:

VI. ԵԼԻՑ ԹՂԹԱԿՑՈՒԹՅԱՆ ՁԵՎԱԿԵՐՊՈՒՄԸ

59. Աշխատակազմում ելից փաստաթղթերը ստորագրվում են նախարարի, նախարարի տեղակալների և աշխատակազմի ղեկավարի կողմից:

60. Ստորագրության ներկայացվող նամակին կցվում է երկրորդ օրինակը` նախագիծը պատրաստող ստորաբաժանման պետի նշագրով:

61. Նամակների տեքստի տակ, որոնց կցվում են լրացուցիչ նյութեր` նշվում է կցվող նյութի անվանումը, ամսաթիվը, համարը և թերթերի թիվը:

62. Այն դեպքում, երբ նամակները ուղարկվում են որպես համակարգի կազմակերպություններից ստացված գրությունների պատասխաններ հասցեատիրոջ անվան տակ վերևի ձախ անկյունում նշվում են այդ գրության ամսաթիվը և համարը:

63. Նամակի ելից համարը կազմված է պայմանանիշից և համարից: Ելից համարը գրվում է տեքստի վերջում:

64. Աշխատակազմի կառուցվածքային և առանձնացված ստորաբաժանումները ելից փաստաթղթերը, որոնք ստորագրվել են նախարարի տեղակալների կողմից նախքան ընդհանուր բաժին առաքման հանձնելը, պետք է ներկայացնեն աշխատակազմի ղեկավարին` նշագրման:

65. Հասցեատերերի ստորագրությունները և առաքվող թղթակցության ցանկերը օրենսդրությամբ սահմանված կարգով պահվում են ընդհանուր բաժնում:

VII. ՔԱՂԱՔԱՑԻՆԵՐԻ ԱՌԱՋԱՐԿՈՒԹՅՈՒՆՆԵՐԻ, ԴԻՄՈՒՄՆԵՐԻ ԵՎ ԲՈՂՈՔՆԵՐԻ ՔՆՆԱՐԿՈՒՄԸ ԵՎ ԸՆԹԱՑՔ ՏԱԼԸ

66. Քաղաքացիների կողմից ստացված առաջարկությունները, դիմումները, բողոքները ստացման օրը գրանցվում են քարտուղարությունում:

67. Նախարարի, նախարարի տեղակալների և աշխատակազմի ղեկավարի կողմից քաղաքացիների անհատական ընդունելության ժամանակ նրանց գրավոր առաջարկությունները, դիմումները ու բողոքները նույնպես ենթակա են գրանցման, օրենքով սահմանված կարգով:

68. Կոլեկտիվ առաջարկության, դիմումի և բողոքի ստացման դեպքում գրանցվում է ընդգծված ազգանունը, իսկ դրա բացակայության դեպքում` առաջին ազգանունը:

69. Անանուն նամակները գրանցման ենթակա չեն և ոչնչացվում են օրենքով սահմանված կարգով: Միևնույն անձից միևնույն հարցով քննարկման համար տարբեր հասցեներով ուղարկված և նախարարությունում ստացված առաջարկությունները, դիմումները, բողոքները հաշվի են առնվում առաջին առաջարկության, դիմումի ու բողոքի գրանցման պայմանանիշով, ավելացնելով հերթական համարը` կոտորակի ձևով:

70. Ստացված առաջարկությունները, դիմումներն ու բողոքները ընդհանուր բաժնում գրանցումից հետո հանձնվում են գործավարության բաժին` այն աշխատակազմի ղեկավարին ներկայացնելու համար:

71. Որոշ առաջարկություններ, դիմումներ ու բողոքներ աշխատակազմի ղեկավարի հանձնարարությամբ ընդհանուր բաժնի կողմից կարող են ուղարկվել համակարգի այն պետական մարմիններին, հիմնարկներին և կազմակերպություններին, որոնց անմիջական իրավասությանն է պատկանում տվյալ հարցի լուծումը, կամ որոնց անմիջական ենթակայությամբ գործում է պաշտոնատար անձը, որի գործողությունը բողոքարկվում է` դիմողին ուղարկելով դրա մասին ծանուցում:

72. Ստացված առաջարկությունները, դիմումները, բողոքները Հայաստանի Հանրապետության գյուղատնտեսության նախարարի, նախարարի տեղակալների կամ աշխատակազմի ղեկավարի մակագրություններով տրվում են կատարողներին:

73. Նամակների քննարկման արդյունքների մասին գրավոր կամ դիմողի համաձայնությամբ բանավոր տեղեկացվում է դրանց հեղինակներին: Այս նպատակով պատասխանը նախապատրաստվում է 3 օրինակից, մեկը պահվում է համապատասխան ստորաբաժանումում, երկուսը` հանձնվում ընդհանուր բաժին: Առաջին օրինակը համապատասխան պաշտոնատար անձի ստորագրությամբ ուղարկվում է դիմողին, երկրորդ օրինակը պատասխանը պատրաստող ստորաբաժանման պետի նշագրով կցվում է գործին:

74. Ուսումնասիրությունից և վերջնական քննարկումից հետո քաղաքացիների առաջարկությունները, դիմումներն ու բողոքները իրենց բոլոր նյութերի հետ միասին վերադարձվում են ընդհանուր բաժին` ստորագրությամբ ու ամսաթվի նշումով և «գործին» մակագրությամբ:

75. Ընդհանուր բաժինը յուրաքանչյուր նամակի համար կազմում է գործ, բաղկացած` առաջարկության, դիմումի և բողոքի բնօրինակից, պատասխանից և դրա հետ կապված այլ փաստաթղթերից:

VIII. ՓԱՍՏԱԹՂԹԵՐԻ ՊԱՀՊԱՆՈՒՄԸ

76. Աշխատակազմի արխիվ են հանձնվում նախորդ տարվա մշտական և ժամանակավոր պահպանման ենթակա գործավարության բոլոր փաստաթղթերը, համաձայն ընդհանուր բաժնի կողմից ներկայացրած անվանակարգի` «Արխիվ» նշագրով:

77. Արխիվում փաստաթղթերի պահպանումն իրականացվում է «Հայաստանի Ազգային արխիվային ֆոնդի մասին» Հայաստանի Հանրապետության օրենքի պահանջներին համապատասխան:

78. Անհրաժեշտության դեպքում, արխիվից կարելի է օգտվել` գործերը դուրս բերել կամ դրանցից փաստաթղթեր պատճենահանել աշխատակազմի ղեկավարի կամ քարտուղարության պետի թույլտվությամբ:

79. Արխիվը պահպանության համար փաստաթղթերն ընդունում է ըստ ցանկերի և գործերի պայմանանիշերի: Ընդհանուր բաժնի` արխիվի վարիչը, գործերի ընդունման համար ստորագրում է ցանկերի բոլոր օրինակների վրա, նշում գործերի ընդունման ամսաթիվը և քանակը: Ցանկի մեկ օրինակը տրվում է գործերը հանձնողին, մյուսը մնում է արխիվում:

80. Մշտական և ժամանակավոր պահպանման ենթակա գործավարության բոլոր փաստաթղթերի` համաձայն ընդհանուր բաժնի կողմից ներկայացրած անվանակարգի, էլեկտրոնային պատճենները տեղադրվում են տվյալների շտեմարանում: