«Գրանցված է»
ՀՀ արդարադատության
նախարարության կողմից
5 դեկտեմբերի 2000 թ.
Պետական գրանցման թիվ 11000145

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿՐԹՈՒԹՅԱՆ ԵՎ ԳԻՏՈՒԹՅԱՆ ՆԱԽԱՐԱՐՈՒԹՅՈՒՆ

Հ Ր Ա Մ Ա Ն

ՀՀ ՄԻՋԻՆ ՄԱՍՆԱԳԻՏԱԿԱՆ ՊԵՏԱԿԱՆ ՈՒՍՈՒՄՆԱԿԱՆ ՀԱՍՏԱՏՈՒԹՅՈՒՆՆԵՐՈՒՄ ՀԵՌԱԿԱ ՁԵՎՈՎ ՈՒՍՈՒՑՈՒՄ ԿԱԶՄԱԿԵՐՊԵԼՈՒ ՄԱՍԻՆ

Ղեկավարվելով «Կրթության մասին» ՀՀ օրենքի 12 հոդվածի 1-ին և 37 հոդվածի 9-րդ կետերով, հիմք ընդունելով ՀՀ կառավարության 18.05.2000թ. «Հեռակա ձևով մասնագիտական միջին և բարձրագույն կրթության, ինչպես նաև դիպլոմավորված մասնագետի կրթական ծրագրով ուսուցանվող մասնագիտությունների ցանկերը հաստատելու մասին» թիվ 242 որոշումը.

ՀՐԱՄԱՅՈՒՄ ԵՄ.

1. Հաստատել Հայաստանի Հանրապետության միջին մասնագիտական պետական ուսումնական հաստատությունների հեռակա ձևով ուսուցման 2000 թվականի ընդունելության տեղերն ըստ մասնագիտությունների (հավելված 1):

2. Հաստատել Հայաստանի Հանրապետության միջին մասնագիտական պետական ուսումնական հաստատությունների հեռակա ձևով ուսուցման 2000 թվականի ընդունելության կանոնները (հավելված 2):

3. Մասնագիտական կրթության վարչությանը` միջոցներ ձեռնարկել միջին մասնագիտական ուսումնական հաստատություններին հեռակա ուսուցման ուսումնամեթոդական օգնություն կազմակերպելու ուղղությամբ:

4. Սույն հրամանի կատարման վերահսկողությունը հանձնարարել նախարարի տեղակալ Ա. Ավետիսյանին:

ՀՀ ՄԻՋԻՆ ՄԱՍՆԱԳԻՏԱԿԱՆ ՊԵՏԱԿԱՆ ՈՒՍՈՒՄՆԱԿԱՆ ՀԱՍՏԱՏՈՒԹՅՈՒՆՆԵՐԻ ՀԵՌԱԿԱ ՁԵՎՈՎ ՈՒՍՈՒՑՄԱՆ 2000 ԹՎԱԿԱՆԻ ԸՆԴՈՒՆԵԼՈՒԹՅԱՆ ՏԵՂԵՐՆ ԸՍՏ ՄԱՍՆԱԳԻՏՈՒԹՅՈՒՆՆԵՐԻ

ՀԱՎԵԼՎԱԾ 2 Հայաստանի Հանրապետության կրթության և գիտության նախարարության 2000 թվականի նոյեմբերի 16-ի թիվ 382-Մ հրամանի

ԿԱՆՈՆՆԵՐ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՄԻՋԻՆ ՄԱՍՆԱԳԻՏԱԿԱՆ ՊԵՏԱԿԱՆ ՈՒՍՈՒՄՆԱԿԱՆ ՀԱՍՏԱՏՈՒԹՅՈՒՆՆԵՐԻ ՀԵՌԱԿԱ ՁԵՎՈՎ ՈՒՍՈՒՑՄԱՆ 2000 ԹՎԱԿԱՆԻ ԸՆԴՈՒՆԵԼՈՒԹՅԱՆ

1. Սույն կանոնները հաստատված են Հայաստանի Հանրապետության կրթության և գիտության նախարարության (այսուհետ` նախարարություն) կողմից, «Կրթության մասին» Հայաստանի Հանրապետության օրենքի 37 հոդվածի 9-րդ կետի համաձայն, նախարարության կանոնադրության 5-րդ կետի «լ» ենթակետին համապատասխան:

2. Հայաստանի Հանրապետության միջին մասնագիտական պետական ուսումնական հաստատությունները` քոլեջները և ուսումնարանները (այսուհետ` ՄՄՈՒՀ) հեռակա ձևով ուսուցման ընդունելություն են կատարում վճարովի հիմունքով` սույն կանոններով սահմանված մրցույթի պայմանների համաձայն:

3. ՄՄՈՒՀ կարող են դիմել հիմնական ընդհանուր, միջնակարգ (լրիվ) ընդհանուր, մասնագիտական տեխնիկական (պրոֆտեխնիկական), միջին մասնագիտական և բարձրագույն կրթություն ունեցող անձինք:

4. Ընդունելությունը կատարվում է առանց քննությունների` նախարարության կողմից ըստ մասնագիտությունների միջնակարգ (լրիվ) ընդհանուր կրթության ատեստատի (հիմնական ընդհանուր կրթության վկայականի, մասնագիտական տեխնիկական կրթության դիպլոմի ներդիրի) որպես մրցութային սահմանված գնահատականների հիման վրա:

5. Օտարերկրյա պետությունների քաղաքացիների ընդունելությունը ՄՄՈՒՀ-ներ կարգավորվում է ՀՀ կրթության և գիտության նախարարի 1997 թվականի մարտի 17-ի թիվ 40-Մ հրամանով հաստատված «Հայաստանի Հանրապետությունում օտարերկրյա քաղաքացիների ուսուցման մասին կարգով»:

6. Դիմորդի փաստաթղթերն ընդունվում են տվյալ ուսումնական հաստատությունում` 2000 թվականի նոյեմբերի 20-ից մինչև դեկտեմբերի 8-ը:

7. Դիմորդը ՄՄՈՒՀ-ի ընդունող հանձնաժողովին անձամբ ներկայացնում է`

ա) դիմում,

բ) կրթության մասին փաստաթղթի բնագիրը կամ պատճենը,

գ) չորս լուսանկար (3 x 4 չափսի),

դ) անձը հաստատող փաստաթուղթ (անձնագիր, կամ ծննդյան վկայական` մինչև 16 տարեկան դիմորդի համար, կամ զինվորական գրքույկ, կամ ՀՀ ՆԳ բաժինների կողմից տրված 9-րդ ձև, փախստականի վկայական),

ե) փաստաթուղթ զինվորական ծառայությանն առնչության մասին (զորակոչային տարիք ունեցող դիմորդից ընդունվում են զինհաշվառման փաստաթղթերում տարկետման իրավունք տվող համապատասխան նշումի կամ չզորակոչվելու պատճառը հաստատող այլ նշումների առկայության դեպքում, իսկ նախկինում առողջության պատճառով տարկետում ունեցողներից` ռազմաբժշկական կենտրոնական հանձնաժողովի նշումների առկայության դեպքում):

Դիմորդը ներկայացնում է նաև`

ա) ընդունելության արտոնության իրավունքը հաստատող փաստաթուղթ,

բ) քաղվածք աշխատանքային գրքույկից:

8. Դիմորդը` ընդունելության կազմակերպման և անցկացման համար, տվյալ ուսումնական հաստատությունում նախապես վճարում է 1000 (հազար) դրամ:

Անկախ ընդունելության արդյունքից` վճարված գումարը դիմորդին հետ չի վերադարձվում:

Հաստատության ընդունող հանձնաժողովն առանձին անձանց կարող է ազատել վերոնշյալ վճարից:

9. Ընդունելության մրցույթն անց է կացվում ըստ մասնագիտությունների` տվյալ ուսումնական հաստատությունում:

10. Առաջին հերթին ընդունվում է միջնակարգ (լրիվ) ընդհանուր կրթության ատեստատի (հիմնական ընդհանուր կրթության վկայականի, մասնագիտական տեխնիկական կրթության դիպլոմի ներդիրի) որպես մրցութային սահմանված առարկաների գնահատականների առավելագույն գումար ունեցող դիմորդը:

Նշված գումարների հավասարության դեպքում նախապատվությունը տրվում է`

ա) ըստ սահմանված հաջորդականության` մրցութային առարկաներից առավել բարձր գնահատականներ ունեցող դիմորդներին, ապա` մյուս առարկաների գնահատականների առավել բարձր միջին թվաբանական ունեցող դիմորդին.

բ) համապատասխան կազմակերպություններում մասնագիտական աշխատանքի առավել տևական ստաժ ունեցող դիմորդին:

Դիմորդի ցանկությամբ, մրցութային առարկաների գնահատականներ կարող են համարվել տվյալ կամ այլ պետական ՄՄՈՒՀ-ում կամ ԲՈՒՀ-ում համապատասխան առարկաներից տվյալ տարում առկա (ստացիոնար) ուսուցման ձևով ընդունելության համար հանձնած ընդունելության քննությունների միավորները:

11. Դիմորդների ընդունելության արտոնությունները հաշվի են առնվում համաձայն ՀՀ կառավարության 27.08.1999թ. «Հայաստանի Հանրապետության միջին մասնագիտական պետական ուսումնական հաստատություններում դիմորդների ընդունելության արտոնությունները սահմանելու մասին» թիվ 545 որոշման պահանջների:

12. Մրցույթով անցածները հրամանագրվում են և մրցույթի արդյունքները հրապարակվում են 2000թ. դեկտեմբերի 11-ին:

13. Սույն կանոնների իրականացումը վերահսկում է նախարարությունը: