108.0085.03.04.98

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԷՆԵՐԳԵՏԻԿԱՅԻ ՆԱԽԱՐԱՐՈՒԹՅՈՒՆ

Հ Ր Ա Մ Ա Ն

N 85-ԳՄ

03.04.1998 թ.

ՄԱՏԱԿԱՐԱՐՎԱԾ ԷԼԵԿՏՐԱԷՆԵՐԳԻԱՅԻ ՈՐԱԿԻ ՑՈՒՑԱՆԻՇՆԵՐԻ ՈՐՈՇՄԱՆ ԿԱՐԳԻ ՄԱՍԻՆ

Հիմք ընդունելով Հայաստանի Հանրապետության կառավարության 1998 թ. հունվարի 16-ի N 14 որոշմամբ հաստատված «Էլեկտրական էներգիայից օգտվելու կանոններ»-ի 49 կետը,

ՀՐԱՄԱՅՈՒՄ ԵՄ`

1. Հաստատել «Մատակարարված էլեկտրական էներգիայի որակի ցուցանիշների որոշման կարգ»-ը (կցվում է):

2. Կարգը ներկայացնել ՀՀ արդարադատության նախարարություն` պետական գրանցման:

Նախարար

Գ. Մարտիրոսյան

ՀԱՍՏԱՏՎԱԾ Է ՀՀ ԷՆԵՐԳԵՏԻԿԱՅԻ ՆԱԽԱՐԱՐՈՒԹՅԱՆ 03.04.1998 թ. N 85-ԳՄ ՀՐԱՄԱՆՈՎ

ՄԱՏԱԿԱՐԱՐՎԱԾ ԷԼԵԿՏՐԱԿԱՆ ԷՆԵՐԳԻԱՅԻ ՈՐԱԿԻ ՑՈՒՑԱՆԻՇՆԵՐԻ ՈՐՈՇՄԱՆ

Կ Ա Ր Գ

1. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգը մշակված է համաձայն ՀՀ էներգետիկայի նախարարության կանոնադրության 2 կետի «ե» ենթակետի և ի կիրառումն ՀՀ կառավարության 16.01.98 թ. N 14 որոշմամբ հաստատված «Էլեկտրական էներգիայից օգտվելու կանոններ»-ի 49-րդ կետի:

2. Կարգով սահմանվում է, որ ընդհանուր նշանակության եռաֆազ և միաֆազ, 50 Հերց հաճախականությամբ փոփոխական հոսանքի էլեկտրական ցանցերում, էլեկտրաէներգիայի մատակարարի և բաժանորդի էլեկտրական ցանցերի սահմանազատման կետում, էլեկտրաէներգիայի որակի ցուցանիշները պետք է համապատասխանեն ԳՕՍՏ 13109-87 «ԷԼԵԿՏՐԱԿԱՆ ԷՆԵՐԳԻԱ. Էլեկտրական ցանցերում էլեկտրաէներգիայի որակին ներկայացվող պահանջներ» պահանջներին:

3. Էլեկտրաէներգիայի որակի ցուցանիշներին վերաբերող հասկացությունները և նրանց սահմանումները պարզաբանելիս անհրաժեշտ է ղեկավարվել ԳՕՍՏ-13109-87 հավելված 1-ով և ԳՕՍՏ 23875-88 «ԷԼԵԿՏՐԱԿԱՆ ԷՆԵՐԳԻԱՅԻ ՈՐԱԿԸ. Տերմիններ և սահմանումներ»:

4. Էլեկտրաէներգիայի որակի ցուցանիշները հաշվարկվում են ԳՕՍՏ 13109-87 հավելված 2-ի համաձայն:

5. Էլեկտրաէներգիայի որակի ցուցանիշները` իրենց թույլատրելի շեղումներով հանդերձ, ամրագրվում են էլեկտրաէներգիայի մատակարարի և բաժանորդի միջև կնքված էլեկտրաէներգիայի առք ու վաճառքի պայմանագրով:

Պայմանագրով, բացի լարման և հաճախության շեղումներին վերաբերվող դրույթներից, կարող են ամրագրվել նաև էլեկտրաէներգիայի որակի ցուցանիշներին առաջադրվող այլ պահանջներ և դրանց պահպանման համար կողմերի պատասխանատվությունը:

6. Էլեկտրաէներգիայի հզոր ընդունիչների էլեկտրական ցանցին միացնելու հնարավորությունը, որոնք կարող են ցանցում առաջացնել էլեկտրամագնիսական տատանումներ և բերել էլեկտրաէներգիայի որակի ցուցանիշների թույլատրելի սահմաններից շեղումների, գնահատվում է էլեկտրաէներգիայի մատակարարի կողմից, հաշվի առնելով էլեկտրական ցանցի և տվյալ ընդունիչի էլեկտրամագնիսական համատեղելիությունը: Նման միացումները կանոնակարգվում են Էներգապետհսկողության կողմից մշակված մեթոդական փաստաթղթերով:

II. ԷԼԵԿՏՐԱԷՆԵՐԳԻԱՅԻ ՈՐԱԿԻ ՑՈՒՑԱՆԻՇՆԵՐԻ ՈՐՈՇՄԱՆ ԸՆԹԱՑԱԿԱՐԳԸ

7. Պայմանագրով ամրագրված սահմաններից էլեկտրաէներգիայի որակի ցուցանիշների առավել շեղումների դեպքում, բաժանորդը պետք է դիմի էլեկտրաէներգիայի մատակարարին: Վերջինս, բաժանորդի դիմելուց ոչ ուշ քան 5 օրվա ընթացքում, պարտավոր է բաժանորդին տեղեկացնել շեղումների պատճառների և դրանք վերացնելու ուղղությամբ ձեռնարկված կամ ձեռնարկվող միջոցառումների մասին:

8. Ստանալով բաժանորդի դիմումը էլեկտրաէներգիայի որակի ցուցանիշների առավել շեղումների մասին, էլեկտրաէներգիայի մատակարարը պարտավոր է ԳՕՍՏ 13109-87-ի 3.1 կետի համաձայն իր կողմից սպասարկվող էլեկտրական ցանցում և բաժանորդի հետ սահմանազատման կետում իրականացնել դրանց հսկումը և չափագրումը` 24 ժամից ոչ պակաս տևողությամբ: Էլեկտրաէներգիայի որակի ցուցանիշների հսկողության և չափագրության հավաստիությունը ապահովելու նպատակով, նույնպիսի չափագրումներ պետք է իրականացվեն նաև բաժանորդի էլեկտրական ցանցում` պատասխանատու էլեկտրաընդունիչների մուտքային սեղմակների վրա:

9. Էլեկտրաէներգիայի որակի ցուցանիշների հսկողությունը և չափագրությունը իրականացվում են համաձայն «Ընդհանուր նշանակության էլեկտրական ցանցերում էլեկտրական էներգիայի որակի հսկողության և վերլուծության մեթոդական ցուցումներ». (Ղեկավարող փաստաթուղթ ՌԴ 34.15.501-88, ՍՊՕ «Սոյուզտեխէներգո», Մ., 1990) փաստաթղթի: Նշված մեթոդական ցուցումները տարածվում են էլեկտրաէներգիայի մատակարարի բաշխիչ ցանցի, որի էլեկտրասնուցումը, որպես կանոն, իրականացվում է 35-220/6-10 կՎ տրանսֆորմատորներից, և բաժանորդի էլեկտրական ցանցի վրա:

Էլեկտրաէներգիայի որակի ցուցանիշների հսկողությունը և չափագիտությունը իրականացվում է ՌԴ 34.15.501-88 փաստաթղթում նշված չափիչ սարքերով կամ այլ սարքերով, որոնք բավարարում են ԳՕՍՏ 13109-87-ի պահանջներին և սերտիֆիկացված են Հայպետստանդարտի կողմից:

Նշված մեթոդական ցուցումները չեն կիրառվում էներգահամակարգի անցումային ռեժիմներում:

10. Էլեկտրաէներգիայի որակի ցուցանիշների շուրջ էլեկտրաէներգիայի մատակարարի և բաժանորդի միջև ծագած վեճերը լուծվում են վերադասության կամ դատական կարգով: