«Գրանցված է»
ՀՀ արդարադատության
նախարարության կողմից
10 նոյեմբերի 2004 թ.
Պետական գրանցման թիվ 10004304

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԱՌՈՂՋԱՊԱՀՈՒԹՅԱՆ ՆԱԽԱՐԱՐ

29 օգոստոսի 2004 թ. ք. Երևան

N 768-Ն

Հ Ր Ա Մ Ա Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՌՈՂՋԱՊԱՀՈՒԹՅԱՆ ՆԱԽԱՐԱՐՈՒԹՅԱՆ ԳՈՐԾԱՎԱՐՈՒԹՅԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Հիմք ընդունելով Հայաստանի Հանրապետության կառավարության 2002 թվականի հունիսի 20-ի N 890 որոշման 2-րդ կետը.

Հրամայում եմ`

1. Հաստատել Հայաստանի Հանրապետության առողջապահության նախարարության գործավարության կարգը` համաձայն N 1 հավելվածի:

2. Ուժը կորցրած ճանաչել Հայաստանի Հանրապետության առողջապահության նախարարի 2003 թվականի մարտի 14-ի N 153 հրամանի 1-ին կետը:

3. Հայաստանի Հանրապետության առողջապահության նախարարի իրավական խորհրդական Ս. Քրմոյանին` սույն հրամանը սահմանված կարգով ներկայացնել արդարադատության նախարարություն` պետական իրավական փորձաքննության և պետական գրանցման:

Նախարար

Ն. Դավիդյան

Հավելված N 1 ՀՀ առողջապահության նախարարի 2004 թ. օգոստոսի 29-ի N 768-Ն հրամանի

Կ Ա Ր Գ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՌՈՂՋԱՊԱՀՈՒԹՅԱՆ ՆԱԽԱՐԱՐՈՒԹՅԱՆ ԳՈՐԾԱՎԱՐՈՒԹՅԱՆ

I. Ընդհանուր դրույթներ

1. Սույն կարգով սահմանվում է Հայաստանի Հանրապետության առողջապահության նախարարության գործավարության կարգը:

2. Հայաստանի Հանրապետության առողջապահության նախարարության գործավարության կազմակերպումն իրականացնում է Հայաստանի Հանրապետության առողջապահության նախարարության աշխատակազմը (այսուհետև` աշխատակազմ):

3. Աշխատակազմի կառուցվածքային ստորաբաժանումներում գործավարության կազմակերպման և վարման համար պատասխանատու է ստորաբաժանման ղեկավարը:

4. Նախարարի տեղակալների, խորհրդականների, օգնականի և մամլո քարտուղարի գործունեության ընթացքում գործավարությունը կազմակերպվում է նախարարության աշխատակազմի քարտուղարության կողմից:

5. Գաղտնի գործավարությունն իրականացվում է «Պետական և ծառայողական գաղտնիքի մասին» Հայաստանի Հանրապետության օրենքի պահանջներին համապատասխան:

II. Հայաստանի Հանրապետության առողջապահության նախարարությունում ստացված թղթակցության ընդունումը, գրանցումն ու շարժը

6. ՀՀ առողջապահության նախարարությունում ստացված ամբողջ պաշտոնական և ոչ պաշտոնական թղթակցությունն ընդունվում և գրանցվում է աշխատակազմի քարտուղարությունում (այսուհետև քարտուղարություն)` մատյանների օգնությամբ և միևնույն ժամանակ համակարգչային եղանակով, որտեղ արտացոլվում են փաստաթղթի համառոտ բովանդակությունը, շարժը և կատարման ընթացքը:

7. Գրանցված փաստաթղթի 1-ին էջի ներքևի աջ անկյունում դրվում է դրոշմակնիք, որի վրա նշվում են մտից գրանցման համարը և ամսաթիվը: Ստացված փաստաթղթի մտից գրանցման համարը բաղկացած է քարտուղարության դասակարգիչներով թղթակցին տրված պայմանանիշից և նրա հերթական համարից:

8. Քարտուղարությունում բացվում են ստացված բոլոր ծրարները (նաև էլեկտրոնային), բացի «Անձամբ», «Գաղտնի» մակագրությամբ ծրարներից և անձնական էլեկտրոնային ստորագրությամբ փակված փաստաթղթերի էլեկտրոնային օրինակներից (ֆայլերից):

9. Քարտուղարության աշխատողները պարտավոր են ծրարը բացելիս ստուգել փաստաթղթերի առկայությունը (ներառյալ հավելվածները), առդիր թերթերի քանակը, փաստաթղթերի համարները համեմատել ծրարի վրա նշվածների հետ:

10. Փաստաթղթի կամ ֆայլերի բացակայության կամ վնասված լինելու դեպքում կազմվում է ակտ` 3 օրինակից, որոնցից մեկը մնում է քարտուղարությունում, երկրորդը կցվում է փաստաթղթին, իսկ երրորդն ուղարկվում է այն կազմակերպություն, որտեղից ստացվել է ծրարը:

11. Եթե ծրարում կամ ֆայլում հայտնաբերվում են սխալմամբ դրված փաստաթղթեր, դրանք նոր ծրարներով կամ համակարգչային ցանցով ուղարկվում են ըստ պատկանելության` փաստաթղթերին կցելով այն ծրարները (նաև` էլեկտրոնային), որոնցով դրանք ստացվել են, անհրաժեշտության դեպքում տեղյակ պահելով այն կազմակերպությանը, որտեղից ստացվել է ծրարը:

12. Ծրարները (նաև էլեկտրոնային), որոնցով ստացվել է թղթակցությունը, պահպանվում և փաստաթղթին են կցվում այն դեպքում, երբ միայն ծրարի միջոցով կարելի է պարզել ուղարկողի հասցեն կամ, եթե ծրարի վրա փոստային դրոշմակնիքի ամսաթիվը նշանակություն ունի տվյալ նյութի ուղարկման ու ստացման ժամանակը որոշելու համար:

13. Նախարարությունում ստացվող էլեկտրոնային նամակները տպվում են թղթի վրա և պահվում էլեկտրոնային թղթագրության համար նախատեսված թղթապանակներում:

14. Հայաստանի Հանրապետության Նախագահից, Հայաստանի Հանրապետության Ազգային ժողովից, Հայաստանի Հանրապետության կառավարությունից ստացված նյութերը և «Շտապ» թղթակցությունն անհապաղ գրանցվում ու հանձնվում են զեկուցման: Մյուս թղթակցությունը հասցեատերերին է տրվում առձեռն կամ հաղորդվում է լոկալ ցանցով աշխատանքային մեկ օրվա ընթացքում` սույն կարգին համապատասխան: Հանգստյան օրերին ստացված հեռագրերը կամ հեռախոսագրերը ընդունվում են նախարարի ընդունարանում` հերթապահ աշխատողի կողմից և շտապ լինելու դեպքում անհապաղ զեկուցվում են նախարարին կամ նրա տեղակալներին:

12. ՀՀ առողջապահության նախարարությանը հասցեագրված և մուտքագրված գրությունները, նամակները և մյուս փաստաթղթերը գրանցումից հետո ուղարկվում են աշխատակազմի ղեկավարին` նախարարին զեկուցելու համար: Նորմատիվ և անհատական իրավական ակտերի նախագծերը, ինչպես նաև պետական կառավարման մարմինների կողմից կարծիքի առաքված իրավական ակտերի նախագծերի վերաբերյալ պատասխան գրությունները նախարարին են զեկուցվում աշխատակազմի ղեկավարի կողմից` նախարարի իրավական խորհրդականի հետ համատեղ:

13. Նախարարը ստացված թղթակցությունը մակագրում է նախարարի առաջին տեղակալին, նախարարի տեղակալներին, աշխատակազմի ղեկավարին, նախարարի իրավական խորհրդականին կամ նախարարի խորհրդականներին: Բացառիկ դեպքերում` նախարարի հայեցողությամբ մուտք եղած փաստաթուղթը կարող է մակագրվել անմիջականորեն ստորաբաժանման ղեկավարին:

14. Մակագրված փաստաթղթերի կատարման ժամկետները արտացոլվում են քարտուղարությունում և զեկուցվում աշխատակազմի ղեկավարին:

15. Աշխատակազմի ղեկավարը հսկողություն է իրականացնում մակագրված փաստաթղթերի կատարման նկատմամբ և կարող է դրանց հետ կապված հանձնարարականներ տալ ստորաբաժանումների ղեկավարներին:

16. Նախարարի տեղակալներին և խորհրդականներին մակագրված փաստաթղթերի կատարման կետանցի դեպքում աշխատակազմի ղեկավարը կամ վերջինիս հանձնարարությամբ քարտուղարության պետը գրավոր ծանուցում է համապատասխան նախարարի տեղակալին կամ խորհրդականին:

17. ՀՀ առողջապահության նախարարին հանձնված գրությունները, նամակները և մյուս փաստաթղթերը հաջորդ օրը վերադարձվում են քարտուղարություն և նույն օրը ըստ մակագրությունների բաժանվում կատարողներին:

18. Նախարարությունում մի կառուցվածքային ստորաբաժանումից մյուսին թղթակցության հանձնումը կատարվում է միայն քարտուղարության միջոցով:

19. Յուրաքանչյուր ստորաբաժանում համաձայն ստացված փաստաթղթում արված մակագրության, բարձրացված հարցերին ընթացք տալուց կամ հարցերը լուծելուց հետո վերադարձնում է փաստաթուղթը քարտուղարություն, կցելով պատասխանի պատճենը, կատարման մասին տեղեկատվությունը կամ համապատասխան նշումը:

20. Նախարարության աշխատողները պատասխանատու են իրենց մոտ գտնվող փաստաթղթերի պահպանման համար և պարտավոր են խնամքով վերաբերել դրանց: Արգելվում է նախարարությունում ստացված փաստաթղթերի բնագրային տեքստում որևէ շտկում կատարելը: Նախարարության աշխատողներին արգելվում է փաստաթղթերը նախարարությունից դուրս բերել:

21. Քարտուղարությունը` գործին կցելու համար փաստաթուղթն ընդունում է այն դեպքում, երբ փաստաթղթին կից` նախարարի, նախարարի տեղակալների կամ աշխատակազմի ղեկավարի կողմից ներկայացված համապատասխան հիմնավորման վրա առկա է «Գործին» մակագրությունը:

22. Արձակուրդ գնալիս, երկարատև գործուղման մեկնելիս կամ այլ պատճառներով բացակայելիս` աշխատողը պարտավոր է իր մոտ եղած փաստաթղթերը հանձնել իրեն փոխարինողին, կամ ստորաբաժանման գործավարին: Աշխատանքից ազատվելիս, աշխատողը պարտավոր է իր մոտ գտնվող փաստաթղթերը հանձնել իրեն փոխարինողին կամ ստորաբաժանման գործավարին, լրացնել շրջանցիկ թերթիկ և այն հանձնել հաշվապահական հաշվառման վարչություն:

23. Նախարարության ձևաթղթերը, կնիքները, դրոշմակնիքները պատրաստվում են և գործողության մեջ են դրվում նախարարի թույլտվությամբ:

24. Նախարարության կնիքների և ձևաթղթերի օգտագործման հսկողությունը իրականացվում է աշխատակազմի ղեկավարի կողմից:

III. Ստացված փաստաթղթերի ներքին շրջանառությունը

25. Նախարարի կողմից մակագրված փաստաթղթերը նախարարի տեղակալների և աշխատակազմի ղեկավարի կողմից կարող են մակագրվել համապատասխան ստորաբաժանումների ղեկավարներին:

26. Նախարարի առաջին տեղակալը ստացված գրությունները մակագրում է իր համակարգման ոլորտի ստորաբաժանումների ղեկավարներին: Նախարարի բացակայության դեպքում նախարարի առաջին տեղակալը կարող է գրություններ մակագրել ցանկացած ստորաբաժանման ղեկավարին:

27. Նախարարի տեղակալը գրություններ է մակագրում միայն իր համակարգման ոլորտի ստորաբաժանման ղեկավարին: Նախարարի այլ տեղակալի համակարգման ոլորտի վարչության կարծիքը ստանալու նպատակով նախարարի տեղակալը գրությունը առաքում է միայն նախարարի համապատասխան տեղակալի կամ աշխատակազմի ղեկավարի միջոցով:

28. Նախարարի խորհրդականներին մակագրված փաստաթղթերը կատարվում են անմիջականորեն վերջիններիս կողմից, եթե մակագրության մեջ նշված չեն այլ ստորաբաժանումներ, որի դեպքում գրությունները կատարվում են ստորաբաժանման կողմից` նախարարի համապատասխան խորհրդականի հետ համատեղ:

29. Նախարարի խորհրդականը կարող է ստացված հանձնարարականը կատարելու առնչությամբ հայցել համապատասխան ստորաբաժանման կարծիքը` նախարարի տեղակալի, աշխատակազմի ղեկավարի կամ անմիջապես ստորաբաժանման ղեկավարի միջոցով:

30. Ստորաբաժանման ղեկավարը ստացված գրություններին սահմանված կարգով ընթացք է տալիս` ստորաբաժանման աշխատակիցների միջոցով: Այլ ստորաբաժանման կարծիքը ստանալու նպատակով ստորաբաժանման ղեկավարը կարող է հայցել այլ ստորաբաժանումների կարծիքները` համակարգող տեղակալի, իսկ բացառիկ դեպքերում անմիջականորեն ստորաբաժանման ղեկավարի միջոցով:

31. Որպես կանոն այլ ստորաբաժանման կարծիքը հայցելու դեպքում նշված ստորաբաժանմանը ներկայացվում է պատասխանի (կամ համապատասխան փաստաթղթի) նախագիծը: Չի թույլատրվում ստացված գրության վերահասցեագրումը այլ ստորաբաժանմանը մեկ այլ ստորաբաժանման ղեկավարի կողմից:

IV. Նախարարությունում փաստաթղթերի կատարման ժամկետները

32. Նախարարություն վերադաս մարմիններից մուտք գործած փաստաթղթերի կատարման համար սահմանվում են հետևյալ ժամկետները (եթե փաստաթղթում ժամկետներ չեն նախատեսված)`

- լրացուցիչ ուսումնասիրություններ չպահանջող հարցերի համար` մինչև 5 օր.

- լրացուցիչ ուսումնասիրություններ, քննարկումներ պահանջող հարցեր` մինչև 10 օր:

Նախարարություն մուտք գործած դիմում-բողոքների համար (եթե այլ ժամկետներ չեն նախատեսված) սահմանվում են հետևյալ ժամկետները`

- լրացուցիչ ուսումնասիրություններ, հիմնավորումներ չպահանջող փաստաթղթերի, դիմում-բողոքների համար` մինչև 15 աշխատանքային օր,

- լրացուցիչ ուսումնասիրություններ, հիմնավորումներ պահանջող փաստաթղթերի համար` մինչև մեկ ամիս:

Առանձին դեպքերում կատարման ժամկետը կարող է երկարացվել, միայն հանձնարարությունը տվող ղեկավարի կողմից` ըստ հայեցողության:

IV. Փաստաթղթի նախապատրաստումը եվ առաքումը

33. Նախարարության աշխատողը նախարարին ներկայացվող փաստաթղթերը նախապատրաստելիս պարտավոր է ուսումնասիրել փաստաթղթի բովանդակությունը և անհրաժեշտության դեպքում հավաքել տեղեկատվական նյութեր, կազմել տեղեկանքներ:

34. Նախարարի ստորագրմանը ներկայացվող փաստաթղթերը պարտադիր կարգով պետք է նշագրվեն համապատասխան նախարարի տեղակալի, նախարարի իրավական խորհրդականի, ստորաբաժանման ղեկավարի կողմից: Ֆինանսական նյութեր պարունակող փաստաթղթերը պետք է նշագրվեն էկոնոմիկայի ու հաշվապահական հաշվառման վարչության պետի, իսկ բուժօգնության կազմակերպման հետ կապված հարցեր պարունակող փաստաթղթերի նախագծերը` բուժօգնության կազմակերպման վարչության պետի կողմից: Փաստաթղթի հակառակ էջի ձախ անկյունում գրվում է կատարողի անունը, ազգանունը և հեռախոսահամարը:

35. Բացի 34-րդ կետում նշված պաշտոնատար անձանցից նախարարի ստորագրությանը ներկայացվող գրությունները պետք է պարտադիր կարգով նշագրվեն այն պաշտոնատար անձանց կողմից, ում մակագրվել էր գրությունը:

36. Քարտուղարությունում նախարարությունից ելքագրման համար ստացված գրությունները քարտուղարության պետի կողմից ստուգվում են սույն կարգի 34 և 35 կետերում նշված նշագրումների առկայության մասով:

37. Նախարարության աշխատողների կողմից պատրաստված զեկուցագրերը, տեղեկանքները, պաշտոնական նամակները և այլ գրությունները նախարարին են ներկայացվում աշխատակազմի ղեկավարի, նախարարի տեղակալների, գլխավոր պետական սանիտարական բժշկի, նախարարի խորհրդականների, օգնականի կամ ստորաբաժանումների ղեկավարների միջոցով:

38. Նյութերը նախարարի հանձնարարականներով և ցուցումներով քարտուղարության միջոցով ուղարկվում են հասցեատերերին:

V. Նախարարության հրամանների, հանձնարարականների, արձանագրությունների ձեվակերպումն ու առաքումը

39. Նախարարության հրամանները տպագրվում են համապատասխան ձևաթղթի վրա, առանց ուղղումների ու ջնջումների ընդունված կարգի համաձայն նախարարին կամ աշխատակազմի ղեկավարին ստորագրման ներկայացնելու համար:

40. Բոլոր հրամանների, հանձնարարականների, արձանագրությունների առաջին օրինակները համարակալվում և պահվում են քարտուղարությունում:

41. Նախարարի, աշխատակազմի ղեկավարի (ինչպես նաև կադրային` աշխատանքի նշանակման և ազատման) հրամանների համար սահմանվում է առանձին համարակալում:

42. Հրաման նախապատրաստող ստորաբաժանման ղեկավարը պարտավոր է կատարել նշագրում հրամանի առաջին օրինակի վերջին էջում և ծանոթացնել հրամանի նախագծին աշխատակազմի ղեկավարին, նախարարի իրավական խորհրդականին ու բոլոր շահագրգիռ անձանց, որոնք ստորագրում են հրամանի առաջին օրինակի վերջին էջի ներքևի ձախ անկյունում, անհամաձայնության դեպքում ներկայացնելով գրավոր հատուկ կարծիք:

43. Հրամանը ստորագրվելուց հետո պատասխանատու ստորաբաժանման ղեկավարը պարտավոր է այն ներկայացնել քարտուղարություն համարակալման: Հրամանի հետ միասին պատասխանատու անձը ներկայացնում է այն հասցեատերերի ցանկը, որոնց պետք է առաքվի հրամանը:

44. Հրամանի բազմացումը ըստ առաքվող ստորաբաժանումների և կազմակերպությունների թվի կատարվում է քարտուղարությունում կամ բացառիկ դեպքերում կատարող ստորաբաժանման կողմից:

45. Քարտուղարությունում համապատասխան կնիքով կնքվում են հրամանների պատճենները և ապահովվում է դրանց ժամանակին առաքումը հասցեատերերին:

46. Քարտուղարության կողմից կազմակերպություններին և աշխատակազմի աշխատակիցներին հրամանների լրացուցիչ օրինակներ չեն տրվում` առանց աշխատակազմի ղեկավարի կամ նրա տեղակալի ցուցումի:

47. Հրամաններում ուղղումներ կատարվում են բացառապես ակնհայտ տեխնիկական վրիպակների դեպքում` աշխատակազմի ղեկավարի գրավոր ցուցումով, և առաքվում` ըստ սկզբնական հասցեատերերի:

48. Գործակարգավարական խորհրդակցության արձանագրումը կազմում է նախարարի օգնականը:

49. Գործակարգավարական խորհրդակցության արձանագրությունները ըստ հանձնարարականների բազմացվում և կատարողներին է հանձնվում քարտուղարության միջոցով:

50. Նախարարի, նրա տեղակալների, աշխատակազմի ղեկավարի մոտ կայացած խորհրդակցությունների արձանագրությունները ստորագրվում են նախագահողի կողմից, համարակալվում են քարտուղարությունում: Դրանց պատճենները քարտուղարության կողմից կնքվելուց հետո ուղարկվում են համապատասխան ստորաբաժանումներին կամ կազմակերպություններին:

VI. Ելից թղթակցության ձեվակերպումը

51. Նախարարությունում ելից փաստաթղթերը ստորագրվում են նախարարի, նախարարի առաջին տեղակալի, նախարարի տեղակալների, աշխատակազմի ղեկավարի կողմից:

52. Նախարարի մակագրության դեպքում, կամ նախարարի համապատասխան հանձնարարականը կատարելու նպատակով ելից փաստաթղթերի ստորագրման իրավունք ունեն նախարարի իրավական խորհրդականը, նախարարի խորհրդականներն ու օգնականը և ստորաբաժանման ղեկավարը:

53. Աշխատակազմի ղեկավարը իր հրամանով սահմանում է այն գրությունների տեսակները, որոնք նախարարությունից կարող են ելքագրվել ստորաբաժանումների ղեկավարների ստորագրությամբ:

54. Նախարարի տեղակալները իրավունք ունեն ստորագրել միայն իրենց համակարգման ոլորտին վերաբերող գրություններ: Նախարարի առաջին տեղակալը, նախարարի բացակայության դեպքում, սահմանված կարգով իրավունք ունի ստորագրել նախարարության անունից առաքվող ցանկացած գրություն:

55. Ստորագրության ներկայացվող գրությանը կցվում է երկրորդ օրինակը` նախագիծը պատրաստող ստորաբաժանման և այլ անհրաժեշտ նշագրումներով:

56. Գրությունների տեքստի տակ, որոնց կցվում են լրացուցիչ նյութեր, նշվում են կցվող նյութի անվանումը, ամսաթիվը, համարը և թերթերի թիվը: Այն դեպքում, երբ նամակներն ուղարկվում են որպես վերադաս կազմակերպություններից, նախարարություններից ստացված փաստաթղթերի պատասխաններ, ապա հասցեատիրոջ անվան տակ վերևի ձախ անկյունում նշվում է այդ գրությունների ամսաթիվը և համարը:

57. Նամակի ելից համարը կազմված է պայմանանիշից և համարից:

58. Ելից թղթակցությունը 2 օրինակից, բաց վիճակում հիմքերի հետ միասին հանձնվում է քարտուղարություն համարակալելու և առաքելու համար` նշելով հասցեատերերի հասցեները:

59. Ելից փաստաթղթի մեկ օրինակը` հիմքերով, առաքվող թղթակցության ցուցակները, հասցեատերերի ստորագրությունները պահվում են քարտուղարությունում:

60. Հեռագրերը հանձնվում են քարտուղարություն` անհրաժեշտ քանակությամբ պատճեններով (հասցեատերերի թվին գումարած մեկ օրինակ` գործի համար): Քարտուղարությունը հեռագրատանն է հանձնում հեռագրերի պատճենները: Հեռագրի բնագրերը (ստորագրված օրինակը նշագրումով) հեռագրատան դրոշմակնիքով պահվում է հեռագրերի գործում:

61. Շտապ կամ սովորական թղթակցությունը քարտուղարության կողմից հասցեատերերին է առաքվում ցրիչի կամ սուրհանդակի միջոցով:

62. Նախարարի անունից ելքագրվող փաստաթղթերը պատրաստվում են հասարակ թղթի վրա, սույն կարգին համապատասխան նշագրվում, որի հիման վրա քարտուղարությունից ստացվում է նախարարի համարակալված ձևաթուղթ:

63. Նախարարի համարակալված ձևաթուղթ ստանալու իրավունք ունեն միայն նախարարի տեղակալները, խորհրդականները, աշխատակազմի ղեկավարն ու ստորաբաժանումների ղեկավարները:

64. Նախարարի տեղակալներին, խորհրդականներին, աշխատակազմի ղեկավարին և ստորաբաժանումների ղեկավարներին տրամադրված նախարարի ձևաթղթերը հաշվառվում են հատուկ մատյաններում, որտեղ ձևաթուղթ ստացողը համապատասխան նշագրում է կատարում:

65. Ոչ պիտանի դարձած նախարարի համարակալված ձևաթղթերը հանձնվում են քարտուղարություն, խոտանվում են քարտուղարության պետի կողմից` ձևաթղթի վրա «Անվավեր» նշագրում կատարելու միջոցով: Նշված համարի դիմաց ձևաթղթերի մատյանում համապատասխան գրառում է կատարվում:

VII. Քաղաքացիների առաջարկություններին, դիմումներին եվ բողոքներին ընթացք տալու եվ քննարկելու կարգը

66. Քաղաքացիների կողմից ստացված առաջարկությունները, դիմումներն ու բողոքները ստացման օրը գրանցվում են քարտուղարությունում: «Անձամբ» մակագրությամբ ծրարները գրանցվում և փակ վիճակում հանձնվում են հասցեատերերին:

67. Քաղաքացիների անհատական ընդունելությունը կատարվում է հատուկ կանոնակարգով: Ընդունելության ժամանակ գրավոր առաջարկությունները, դիմումները և բողոքները ենթակա են գրանցման սույն կարգի պահանջներին համապատասխան:

68. Գրանցման համարանիշը (կոդը) բաղկացած է հերթական համարից և դիմողի ազգանվան առաջին տառից:

69. Կոլեկտիվ առաջարկության, դիմումի և բողոքի ստացման դեպքում գրանցվում է «կոլ» պայմանանիշով:

70. Անանուն նամակները գրանցման ենթակա չեն և ոչնչացվում են օրենքով սահմանված կարգով:

71. Միևնույն անձից միևնույն հարցով ստացված դիմումները գրանցվում են նույն համարի տակ, ավելացնելով հերթական համարը կոտորակի միջոցով:

72. Նախարարության համապատասխան ստորաբաժանումը պարտավոր է ապահովել առաջարկություններում, դիմումներում և բողոքներում բարձրացված հարցերի բազմակողմանի ու խոր ուսումնասիրությունը և մակագրության համաձայն ու սահմանված ժամկետներում տալ դրանց լուծումը:

73. Առաջարկությունների, դիմումների, բողոքների վերաբերյալ տրված հանձնարարականների (մակագրությունների) կատարման վերահսկողությունը իրականացնում է քարտուղարությունը:

74. Նամակների քննարկման արդյունքների մասին սույն կարգի պահանջներին համապատասխան գրավոր կամ, դիմողի համաձայնությամբ, բանավոր տեղեկացվում է դրանց հեղինակներին: Այս նպատակով պատասխանը նախապատրաստվում է 2 օրինակից` մեկ օրինակը պահպանվում է քարտուղարությունում, իսկ մեկ օրինակը և հիմքերը` համապատասխան ստորաբաժանումում: Պատասխանի պայմանանիշը կազմված է գրանցման պայմանանշանից և այն գործի համարից, որի մեջ կարվում է տվյալ հարցին վերաբերող գրագրությունը:

VIII. Կատարողական կարգապահության վերահսկումը

75. Նախարարությունում կատարողական կարգապահության վերահսկումը կազմակերպում է քարտուղարությունը համակարգչի միջոցով` համապատասխան ծրագրով:

76. Վերադաս կազմակերպություններից ստացված բոլոր փաստաթղթերի, նախարարի, աշխատակազմի ղեկավարի հրամանների, հանձնարարականների, մակագրությունների, քաղաքացիների դիմումների նկատմամբ սահմանվում է վերահսկողություն:

77. Քարտուղարությունում պարբերաբար պատրաստվում են տեղեկանքներ ժամկետանց և կատարվելիք գրությունների և հանձնարարականների մասին և բաժանվում ըստ ստորաբաժանումների: Յուրաքանչյուր շաբաթվա վերջում կատարվածի մասին տեղեկանքը ներկայացվում է աշխատակազմի ղեկավարին:

78. Հանձնարարականները հսկողությունից հանվում են ներկայացված պատասխանի, տեղեկանքի (զեկուցագրի) հիման վրա:

79. Հանձնարարականի ժամկետը կարող է երկարացվել միայն հանձնարարությունը տվող ղեկավարի կողմից:

IX. Նախարարության կնիքների եվ դրոշմների օգտագործումը եվ պահպանումը

80. Նախարարության կնիքները և դրոշմները պատվիրվում են աշխատակազմի ղեկավարի կողմից:

81. Նախարարության` Հայաստանի Հանրապետության զինանշանով կլոր կնիքով կնքվում են ֆինանսատնտեսական փաստաթղթերը, աշխատանքային գրքույկները, պայմանագրերը, ծառայողական վկայականները, ինչպես նաև այն փաստաթղթերը, որոնք պահանջում են նախարարության կողմից անհրաժեշտ վավերացում:

82. Նախարարության հրամանների համար կլոր կնիքով կնքվում են հրամանների պատճենները և դրանց քաղվածքները:

83. Նախարարության կնիքները դրվում են նախարարի, նախարարի տեղակալների, աշխատակազմի ղեկավարի ստորագրությունը պարունակող փաստաթղթերի վրա, ինչպես նաև ստորաբաժանման ղեկավարների և նախարարի խորհրդականների ստորագրությունները պարունակող գրությունների վրա` սույն կարգի 44 և 45 կետերով նախատեսված դեպքերում:

84. Իրավական փաստաթղթերը (մասնավորապես կանոնադրությունները, դատական, դատախազության, իրավապահ մարմիններ, դատական ակտերի հարկադիր ծառայությանը հասցեագրված և այլն) կարող են կնքվել նաև նախարարի իրավական խորհրդականի ստորագրության առկայության դեպքում:

85. Կնիքները և դրոշմները պահվում են քարտուղարությունում:

X. Փաստաթղթերի պահպանումը

86. Նախարարության ընթացիկ արխիվ են հանձնվում նախորդ տարվա մշտական և ժամանակավոր պահպանման ենթակա գործավարության բոլոր փաստաթղթերը, արձանագրությունները:

87. Նախարարության արխիվում փաստաթղթերի պահպանումն իրականացվում է «Հայաստանի ազգային արխիվային ֆոնդի մասին» ՀՀ օրենքի պահանջներին համապատասխան:

88. Անհրաժեշտության դեպքում նախարարության արխիվից կարելի է օգտվել` գործերը դուրս բերել կամ դրանցից փաստաթղթեր պատճենահանել` միայն աշխատակազմի ղեկավարի, նրա տեղակալի կամ քարտուղարության պետի թույլտվությամբ:

89. Նախարարության արխիվը պահպանության համար փաստաթղթերն ընդունում է ըստ ցանկերի:

90. Նախարարության արխիվային գործի մասնագետը (արխիվարիուսը) քարտուղարության գործերի ընդունման համար ստորագրում է ցանկերի բոլոր օրինակների վրա, նշում է գործերի ընդունման ամսաթիվը և քանակը: Ցանկի մեկ օրինակը տրվում է գործերը հանձնողին, մյուսները մնում են աշխատակազմի արխիվում:

XI. Նախարարության առանձնացված ստորաբաժանումների գործավարության կարգը

91. Առանձնացված ստորաբաժանումներում գործավարությունը կազմակերպվում է սույն կարգի պահանջներից ելնելով:

92. Առանձնացված ստորաբաժանումում գրանցվում է ամբողջ թղթակցությունը հատուկ գրանցամատյանների միջոցով:

93. Նախարարի, աշխատակազմի ղեկավարի հանձնարարականների, հրամանների, մակագրված փաստաթղթերի ժամկետային և պատշաճ կատարման համար պատասխանատու է անմիջականորեն առանձնացված ստորաբաժանման ղեկավարը:

94. Առանձնացված ստորաբաժանման ղեկավարը իրավունք ունի ստորագրել այն ելից փաստաթղթերը, որոնք պատասխան են անմիջապես իր անունով ստացված գրությունների և (կամ) հարցի լուծումը անմիջականորեն իր լիազորությունների շրջանակներում է:

95. Առանձնացված ստորաբաժանման ղեկավարի ստորագրությամբ փաստաթղթերի ելքի համարակալումը համապատասխան կոդի և հերթական համարի միջոցով, ինչպես նաև առաքումը կատարվում է այդ ստորաբաժանման միջոցով:

96. Մնացած բոլոր դեպքերում ելից փաստաթղթերի ստորագրումը, ելքագրումը, առաքումը կանոնակարգվում է սույն կարգի 7-րդ գլխին համապատասխան:

97. Առանձնացված ստորաբաժանման ղեկավարի ստորագրությամբ, յուրաքանչյուր ամսվա վերջին օրը, նրա կողմից լիազորված աշխատակցի միջոցով քարտուղարություն է ներկայացվում ելից գրանցամատյանի համապատասխան էջերի լուսապատճենները, որոնք ելքագրվել են տվյալ ամսվա ընթացքում:

98. Առանձնացված ստորաբաժանումների տարածքային կենտրոնների ղեկավարները իրավունք ունեն ստորագրել այն ելից փաստաթղթերը, որոնք պատասխան են անմիջապես իրենց անունով ստացված գրությունների և (կամ) հարցի լուծումը անմիջականորեն իր լիազորությունների շրջանակներում է:

99. Առանձնացված ստորաբաժանումների տարածքային կենտրոններում գործավարությունը կազմակերպվում է սույն կարգի պահանջներից ելնելով:

100. Առանձնացված ստորաբաժանման տարածքային կենտրոնի ղեկավարի ստորագրությամբ, յուրաքանչյուր եռամսյակը մեկ, նրա կողմից լիազորված աշխատակցի միջոցով առանձնացված ստորաբաժանում է ներկայացվում ամփոփ տեղեկանք` կատարված, ժամկետանց հանձնարարականների ընթացքի վերաբերյալ և ելից գրանցամատյանի համապատասխան էջերի լուսապատճենը, որոնք կատարվել են տվյալ եռամսյակի ընթացքում:

101. Նախարարության առանձնացված ստորաբաժանումներին և վերջիններիս տարածքային կենտրոններին նախարարության քարտուղարության կողմից հատկացվում է հատուկ ծածկագիր` ելից փաստաթղթերը ձևակերպելու համար: