ԵՎՐԱՍԻԱԿԱՆ ՏՆՏԵՍԱԿԱՆ ՀԱՆՁՆԱԺՈՂՈՎ

ԿՈԼԵԳԻԱ

ԵՎՐԱՍԻԱԿԱՆ ՏՆՏԵՍԱԿԱՆ ՀԱՆՁՆԱԺՈՂՈՎԻ ԵՎ ՉԻԼԻԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՄԻՋԵՎ ՓՈԽԸՄԲՌՆՄԱՆ ՀՈՒՇԱԳՐԻ ՆԱԽԱԳԾԻ ՄԱՍԻՆ

1. Հավանություն տալ Եվրասիական տնտեսական հանձնաժողովի և Չիլիի Հանրապետության կառավարության միջև Փոխըմբռնման հուշագրի նախագծին (կցվում է)։

Հանձնարարել Եվրասիական տնտեսական հանձնաժողովի՝ Ինտեգրման հիմնական ուղղությունների և մակրոտնտեսության հարցերով կոլեգիայի անդամ (նախարար) Տ. Դ. Վալովոյին ստորագրել նշված Հուշագիրը՝ թույլատրելով այն ստորագրելու մասին բանակցությունների ընթացքում կից ներկայացվող նախագծում կատարել սկզբունքային բնույթ չունեցող փոփոխություններ։

2. Սույն Կարգադրությունն ուժի մեջ է մտնում դրա ընդունման օրվանից։

Նախագիծ

ՀՈՒՇԱԳԻՐ

Եվրասիական տնտեսական հանձնաժողովի և Չիլիի Հանրապետության կառավարության միջև փոխըմբռնման մասին

Եվրասիական տնտեսական հանձնաժողովը և Չիլիի Հանրապետության կառավարությունը, այսուհետ՝ Կողմեր,

ձգտելով Եվրասիական տնտեսական հանձնաժողովի և Չիլիի Հանրապետության կառավարության միջև բացել տարբեր ոլորտներում համագործակցության նոր հեռանկարներ,

ընդունելով փոխշահավետ տնտեսական համագործակցություն զարգացնելու նպատակով երկխոսություն հաստատելու Կողմերի ձգտումը,

կարևորելով համաշխարհային տնտեսությունում և ընդհանուր առմամբ միջազգային առևտրային համակարգում ինտեգրման հարցերով փոխգործակցությունը,

հաստատելով իրենց հավատարմությունը միջազգային իրավունքի սկզբունքներին, Միավորված ազգերի կազմակերպության և Առևտրի համաշխարհային կազմակերպության կանոնադրությանը,

հիմնվելով «Եվրասիական տնտեսական միության մասին» 2014 թվականի մայիսի 29-ի պայմանագրի դրույթների վրա,

հետևելով փոխադարձ հարգանքի, թափանցիկության, փոխշահավետ համագործակցության և Կողմերի հավասարության սկզբունքներին,

համաձայնեցին հետևյալի մասին.

1. Կողմերը մտադիր են համագործակցություն իրականացնել իրենց իրավասության շրջանակներում հետևյալ ուղղություններով.

տարածաշրջանային տնտեսական ինտեգրում և դրա զարգացման ռազմավարություն,

տնտեսական զարգացման և մակրոտնտեսական իրավիճակի վերլուծություն Եվրասիական տնտեսական միության անդամ պետություններում և Չիլիի Հանրապետությունում,

տնտեսական համագործակցություն,

տեխնիկական կարգավորում, համապատասխանության ստանդարտացում և գնահատում,

սանիտարական, անասնաբուժասանիտարական և կարանտինային բուսասանիտարական միջոցների կիրառում,

ֆինանսներ,

տրանսպորտ,

էներգետիկա,

ագրոարդյունաբերական համալիր,

մրցակցային քաղաքականություն, հակամենաշնորհային կարգավորում,

արդյունաբերություն, այդ թվում՝ արդյունաբերական համագործակցության խորացում, արդյունաբերական համալիրների մրցունակության, ինչպես նաև նորարարական և ներդրումային ակտիվության բարձրացում, արդյունաբերական ոլորտում գոյություն ունեցող խոչընդոտների վերացում, արդյունաբերական համալիրների զարգացման հետ կապված համատեղ ծրագրերի իրականացման աջակցություն,

մաքսային կարգավորում,

մտավոր սեփականություն,

ծառայություններ, ներդրումներ և ձեռնարկատիրության զարգացում,

այլ ուղղություններ, որոնք փոխադարձ հետաքրքրություն են ներկայացնում։

2. Սույն Հուշագրի 1-ին կետում նշված ուղղություններով համագործակցությունն իրականացվում է հետևյալ եղանակով՝

համաժողովների, ֆորումների, սեմինարների, խորհրդակցությունների, կլոր սեղանների անցկացում, այդ թվում՝ Եվրասիական տնտեսական միության անդամ պետությունների և Չիլիի Հանրապետության բիզնես–համայնքի ներկայացուցիչների մասնակցությամբ՝ փոխադարձ հետաքրքրություն ներկայացնող հարցերի շուրջ,

տարածաշրջանային և բազմակողմ ֆորումների կազմակերպման և անցկացման ոլորտում փորձի փոխանակում,

փոխադարձ հետաքրքրություն ներկայացնող տեղեկությունների, այդ թվում՝ վիճակագրական տեղեկությունների փոխանակում՝ պահպանելով Եվրասիական տնտեսական միության իրավունքի մաս կազմող միջազգային պայմանագրերով և ակտերով և Չիլիի Հանրապետության օրենսդրությամբ նախատեսված գաղտնիության և տեղեկատվության պաշտպանության պահանջները,

վերլուծական համառոտ ակնարկների նախապատրաստում՝ փոխադարձ հետաքրքրություն ներկայացնող հարցերի շուրջ։

Անհրաժեշտության դեպքում կողմերը կարող են նախապատրաստել համագործակցության համատեղ պլաններ և ծրագրեր։

3. Սույն Հուշագրի իրականացման նպատակներով փոխգործակցությունը կիրագործվի այդ թվում Եվրասիական տնտեսական հանձնաժողովի և Չիլիի Հանրապետության կառավարության միջև փոխգործացության հարցերով համատեղ հանձնաժողովի շրջանակներում, որը ձևավորվում է Կողմերի ներկայացուցիչներից։

Համատեղ հանձնաժողովի նիստերը կանցկացվեն տարին առնվազն մեկ անգամ։

Համատեղ հանձնաժողովի կազմը, համատեղ հանձնաժողովի նիստերի անցկացման ամսաթիվը և վայրը, ինչպես նաև համատեղ հանձնաժողովի նիստի օրակարգը որոշվում են Կողմերի պայմանավորվածությամբ։

4. Կողմերը կփորձեն իրականացնել կանոնավոր շփումներ Եվրասիական տնտեսական հանձնաժողովի կոլեգիայի անդամների և Չիլիի Հանրապետության նախարարների միջև։

5. Կողմերի փոխադարձ համաձայնությամբ սույն Հուշագրում կարող են կատարվել փոփոխություններ՝ համապատասխան արձանագրություն ստորագրելու միջոցով։

6. Սույն հուշագրի իրականացման և կիրառման հետ կապված հարցերը կլուծվեն Կողմերի միջև խորհրդակցությունների և բանակցությունների միջոցով:

7. Սույն Հուշագիրը միջազգային պայմանագիր չէ, չի առաջացնում միջազգային իրավունքով կարգավորվող իրավունքներ ու պարտավորություններ և Կողմերի վրա ֆինանսական պարտավորություններ չի դնում։

8. Սույն Հուշագիրը կիրառվում է դրա ստորագրման ամսաթվից։

9. Կողմերից յուրաքանչյուրն իրավունք ունի դադարեցնելու սույն Հուշագրի կիրառումը մյուս Կողմին դիվանագիտական ուղիներով համապատասխան գրավոր ծանուցում ուղարկելու միջոցով։ Սույն Հուշագրի կիրառումը դադարեցվում է մյուս Կողմի կողմից այդպիսի ծանուցում ստանալու օրվանից։

Կատարված է քաղաքում 20 թվականի « »-ին, երկու օրինակից՝ յուրաքանչյուրը ռուսերենով, իսպաներենով և անգլերենով, ընդ որում, երկու տեքստերն էլ հավասարազոր են։ Տարաձայնությունների դեպքում կիրառվում է անգլերեն լեզվով տեքստը։

Եվրասիական տնտեսական հանձնաժողովի կողմից

Չիլիի Հանրապետության կառավարության կողմից