Basic information
Number
N 2353-Ն
Type
Որոշում
Act type
Հիմնական ակտ (23.02.2006-մինչ օրս)
Status
Գործում է
Source
ՀՀՊՏ 2006.02.22/10(465) Հոդ.230
Enactment organisation
ՀՀ կառավարություն
Enactment date
22.12.2005
Signing organisation
ՀՀ վարչապետ
Signing date
30.01.2006
Ratification organisation
ՀՀ Նախագահ
Ratification date
13.02.2006
Effective date
23.02.2006

«Վավերացնում եմ»
Հայաստանի Հանրապետության
Նախագահ Ռ. Քոչարյան
13 փետրվարի 2006 թ.


ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

22 դեկտեմբերի 2005 թվականի N 2353-Ն

ՈՒՍՈՒՄՆԱԿԱՆ ՀԱՍՏԱՏՈՒԹՅՈՒՆՆԵՐՈՒՄ «ՖԻԶԻԿԱԿԱՆ ԿՈՒԼՏՈՒՐԱ» ԱՌԱՐԿԱՅԻ ՊԱՐՏԱԴԻՐ ԴԱՍԱՎԱՆԴՄԱՆ ԻՐԱԿԱՆԱՑՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ

«Մանկապատանեկան սպորտի մասին» Հայաստանի Հանրապետության օրենքի 6-րդ հոդվածի 1-ին մասին համապատասխան` Հայաստանի Հանրապետության կառավարությունը որոշում է.

1. Սահմանել ուսումնական հաստատություններում «Ֆիզիկական կուլտուրա» առարկայի պարտադիր դասավանդման իրականացման կարգը` համաձայն հավելվածի:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Հայաստանի Հանրապետության
վարչապետ

Ա. Մարգարյան


2006 թ. հունվարի 30
Երևան

Հավելված
ՀՀ կառավարության 2005 թվականի
դեկտեմբերի 22-ի N 2353-Ն որոշման

Կ Ա Ր Գ

 ՈՒՍՈՒՄՆԱԿԱՆ ՀԱՍՏԱՏՈՒԹՅՈՒՆՆԵՐՈՒՄ «ՖԻԶԻԿԱԿԱՆ ԿՈՒԼՏՈՒՐԱ» ԱՌԱՐԿԱՅԻ ՊԱՐՏԱԴԻՐ ԴԱՍԱՎԱՆԴՄԱՆ ԻՐԱԿԱՆԱՑՄԱՆ

1. Սույն կարգով սահմանվում է ուսումնական բոլոր հաստատություններում ուսումնառության ամբողջ ընթացքում «Ֆիզիկական կուլտուրա» առարկայի պարտադիր դասավանդման իրականացման կարգը:

2. «Ֆիզիկական կուլտուրա» առարկայի դասավանդումն իրականացվում է «Ֆիզիկական կուլտուրայի և սպորտի մասին», «Մանկապատանեկան սպորտի մասին» Հայաստանի Հանրապետության օրենքներին, այլ իրավական ակտերին, ուսումնական պլաններին, ծրագրերին, սահմանված չափորոշիչներին, ինչպես նաև սույն կարգին համապատասխան:

3. 2007/2008 ուսումնական տարվանից հանրակրթական ուսումնական հաստատություններում «Ֆիզիկական կուլտուրա» առարկայի ժամաքանակի ավելացումը նախատեսվում է իրականացնել միջնակարգ հանրակրթական դպրոցի տիպային ուսումնական պլանով նախատեսված դպրոցական պարտադիր ժամաքանակների սահմաններում:

4. Հայաստանի Հանրապետության կրթության և գիտության նախարարության կողմից հաստատված ֆիզիկական դաստիարակության համալիր ծրագրի համաձայն հանրակրթական հաստատությունների բոլոր աշակերտներն ուսումնական տարվա սկզբին պետք է ենթարկվեն բժշկական զննման և դրա արդյունքով բաժանվեն հիմնական, նախապատրաստական և հատուկ խմբերի` համաձայն Հայաստանի Հանրապետության առողջապահության նախարարության կողմից սահմանված չափորոշիչների:

Աշակերտների բժշկական զննումն անցկացնում են տարածքային պոլիկլինիկաների բժիշկները:

5. Կրթության առանձնահատուկ պայմանների կարիք ունեցող աշակերտներին ցուցաբերվում է անհատական մոտեցում:

6. Հատուկ խմբերում ընդգրկված աշակերտների հետ պարապմունքներն անցկացնում են ֆիզկուլտուրայի ուսուցիչները` հատուկ ծրագրով:

7. Ֆիզիկական կուլտուրայի դասերին ուսումնական նյութի բովանդակության ուսուցման և դաստիարակության մեթոդների ընտրությունն անմիջականորեն պայմանավորվում է ֆիզիկական կուլտուրայի ժամերին առաջադրվող խնդիրներով, սովորողների ֆիզիկական պատրաստվածության մակարդակով և պարապմունքների անցկացման պայմաններով:

8. «Ֆիզիկական կուլտուրա» առարկայից առաջադիմության գնահատման հիմնական խնդիրը սովորողների համար համապատասխան կանոնակարգով նախատեսված գիտելիքների շարժողական ունակությունների և հմտությունների յուրացման աստիճանի պարզումն է:

9. «Ֆիզիկական կուլտուրա» առարկայի որակյալ դասավանդման համար նյութատեխնիկական բազան ապահովում են Հայաստանի Հանրապետության կրթության և գիտության նախարարությունը, այլ շահագրգիռ նախարարությունները և պետական կառավարման այլ մարմիններ, որոնց ենթակայությամբ գործում են ուսումնական հաստատությունները:

Հայաստանի Հանրապետության
կառավարության աշխատակազմի
ղեկավար-նախարար
Մ. Թոփուզյան

Change History
Changing Act Corresponding incorporation
Changed acts
Changing Act Corresponding incorporation