ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ

ՏԱՐԱԾՔԱՅԻՆ ԿԱՌԱՎԱՐՄԱՆ ԵՎ ԵՆԹԱԿԱՌՈՒՑՎԱԾՔՆԵՐԻ

ՆԱԽԱՐԱՐ

«17» նոյեմբերի 2025 թ. ք. Երևան

N 28-Ն

Հ Ր Ա Մ Ա Ն

Ղեկավարվելով Հայաստանի Հանրապետության «Համայնքային ծառայության մասին» օրենքի 14-րդ հոդվածի 7-րդ մասով ՝

ՀՐԱՄԱՅՈՒՄ ԵՄ

1. Հաստատել համայնքային ծառայության թափուր պաշտոն զբաղեցնելու համար անցկացվող մրցույթի թեստերը կազմելու, թեստային առաջադրանքները ձևավորելու, թեստային առաջադրանքների քանակը սահմանելու կարգը՝ համաձայն հավելվածի։

2. Սույն հրամանն ուժի մեջ է մտնում պաշտոնական հրապարակմանը հաջորդող օրվանից։

Նախարար`   11/17/2025

Դ․ ԽՈՒԴԱԹՅԱՆ

Հավելված Հայաստանի Հանրապետության  տարածքային կառավարման և ենթակառուցվածքների նախարարի 2025 թվականի նոյեմբերի 17-ի N 28-Ն հրամանի

1. Սույն կարգը սահմանում է համայնքային ծառայության թափուր պաշտոն զբաղեցնելու համար անցկացվող մրցույթի (այսուհետ՝ մրցույթ) ընթացքում կիրառվող թեստերի կազմման, թեստային առաջադրանքների ձևավորման և դրանց քանակի սահմանման ընթացակարգը։

2. Թեստերը կազմվում են «Համայնքային ծառայության մասին» Հայաստանի Հանրապետության օրենքի և սույն կարգի պահանջներին համապատասխան՝ ապահովելով թափանցիկություն, օբյեկտիվություն և մասնագիտական հմտությունների համաչափ գնահատում։

3. Թեստը թեստային առաջադրանքների ամբողջություն է, որի նպատակն է գնահատել մրցույթի մասնակցի մասնագիտական գիտելիքները, հմտությունները և կարողությունները, որոնք անհրաժեշտ են համապատասխան համայնքային ծառայության պաշտոնը զբաղեցնելու համար։

4. Հարցաշարերը կազմում և լրամշակում է Տարածքային կառավարման և ենթակառուցվածքների նախարարության լիազոր ստորաբաժանումը՝ ներգրավելով համայնքային ծառայության, իրավաբանության և տեղական ինքնակառավարման ոլորտների մասնագետներ։

5. Հարցաշարերը ներառում են երկու հիմնական բաղադրիչ՝

1) մասնագիտական հարցեր՝ ուղղված մասնակիցների աշխատանքային ոլորտին առնչվող տեսական և գործնական գիտելիքների խորը և համապարփակ գնահատմանը։

2) իրավիճակային (սիտուացիոն) խնդիրներ՝ նախատեսված են գնահատելու մրցույթի մասնակիցների վերլուծական մտածողության, արագ կողմնորոշվելու և գործնական իրավիճակներում ճիշտ որոշումներ կայացնելու ունակությունների գնահատմանը։

6. Հարցաշարերի բովանդակությունը թարմացվում է առնվազն յուրաքանչյուր երկու տարին մեկ անգամ, ինչպես նաև անհապաղ, Հայաստանի Հանրապետության օրենսդրական կամ պրակտիկայում անհրաժեշտ փոփոխությունների պարագայում՝ ապահովելով նրանց արդիականությունը և համապատասխանությունը համայնքային ծառայության պահանջներին ու իրականությանը։

7. Թեստերի քանակը սահմանվում է համայնքային ծառայության պաշտոնների խմբերի առանձնահատկություններից ելնելով։

8. Համայնքային ծառայության յուրաքանչյուր պաշտոնի համար հարցաշարերն ընդգրկում են՝

1) համայնքային ծառայության գլխավոր պաշտոնների խմբի թափուր պաշտոնների համար՝ առնվազն 150 հարց (խնդիր),

2) համայնքային ծառայության առաջատար պաշտոնների խմբի թափուր պաշտոնների համար՝ առնվազն 120 հարց (խնդիր),

3) համայնքային ծառայության կրտսեր պաշտոնների խմբի թափուր պաշտոնների համար՝ առնվազն 90 հարց (խնդիր)։

9. Թեստային առաջադրանքները կարող են ունենալ հետևյալ ձևերը՝

1) ճիշտ պատասխանի ընտրություն, երբ թեստավորման մասնակցին առաջարկվում է հարց՝ ենթադրյալ պատասխաններով, որոնցից մեկը միանշանակ ճիշտ պատասխանն է, և որոնցից թեստավորման մասնակիցն ընտրում է պատասխանի իր տարբերակը.

2) այլընտրանքային ընտրություն, երբ թեստավորման մասնակիցը հարցին պատասխանում է «այո» կամ «ոչ»։

10. Թեստային առաջադրանքների քանակը սահմանվում է համայնքային ծառայության պաշտոնների խմբերի հիման վրա՝

1) համայնքային ծառայության գլխավոր պաշտոնների խմբի համար՝ 50 հարց,

2) համայնքային ծառայության առաջատար պաշտոնների խմբի համար՝ 40 հարց,

3) համայնքային ծառայության կրտսեր պաշտոնների խմբի համար՝ 30 հարց։

11. Թեստային առաջադրանքների բովանդակությունն ընդգրկում է հետևյալ բնագավառները՝

1) Հայաստանի Հանրապետության Սահմանադրություն` 10 տոկոս.

2) «Համայնքային ծառայության մասին» («Հանրային ծառայության մասին») Հայաստանի Հանրապետության օրենք` 30 տոկոս.

3) տեղական ինքնակառավարման մարմինների իրավասությունը սահմանող Հայաստանի Հանրապետության օրենսդրություն՝ 60 տոկոս։

12. Թեստային առաջադրանքները կազմելիս անհրաժեշտ է պահպանել հետևյալ պահանջները՝

1) պարզ ձևակերպումներ՝ բացառելով ոչ հստակ կամ բարդ, երկիմաստ հարցերն ու խնդիրները։

2) առաջադրանքների տրամաբանական կառուցվածք՝ ապահովելով հարցի բովանդակության, պատասխանների տարբերակների և ճիշտ պատասխանի միջև հստակ կապը։ Առաջադրանքները կազմվում են այնպես, որ.

ա․ հարցը հստակ արտահայտի մեկ միտք,

բ․ բոլոր պատասխանների տարբերակները լինեն համաչափ և իրար տրամաբանական շարունակություն,

գ․ ճիշտ պատասխանը բխի հարցի բովանդակությունից,

դ․ առաջադրանքների ամբողջությունը ապահովի թեմատիկ և բարդության աստիճանով հաջորդականություն։

3) ժխտողական կառուցվածք ունեցող առաջադրանքները պետք է լինեն հնարավորինս քիչ, իսկ ժխտողական մասնիկները («Չի», «Չէ», «Ոչ») ընդգծված նշվեն։

4) պատասխանների տարբերակներում չպետք է օգտագործվեն «Բոլոր վերոգրյալները ճիշտ են (ճիշտ չեն)», «Բոլոր հիմնավորումները ճիշտ են (ճիշտ չեն)», «Թվարկված պատասխանները ճիշտ են (ճիշտ չեն)» և նմանատիպ ձևակերպումներ։

13. Պատասխանների տարբերակներում չպետք է նշվի մասնակի ճիշտ պատասխան։

14. Թեստային առաջադրանքներում բացառվում է ուժը կորցրած իրավական ակտերից կամ իրավական ակտերի ուժը կորցրած հոդվածներից հարցերի կիրառումը։

15. Թեստերի բովանդակությունը կազմվում է սույն կարգի 11-րդ կետով սահմանված ոլորտների տոկոսային հարաբերակցությամբ։

16. Մրցույթն անցկացնելուց ոչ ուշ քան մեկ ամիս առաջ և ոչ ավելի քան երկու ամիս առաջ թեստավորման համար նախատեսված հարցաշարերը՝ ներառյալ դրանց միանշանակ ճիշտ պատասխանները, հրապարակվում են համայնքի պաշտոնական տեղեկատվական հարթակում տվյալ մրցույթի վերաբերյալ հայտարարության հետ միաժամանակ։

17. Թեստավորման համար կազմված հարցաշարերից թեստային առաջադրանքների ընտրությունը իրականացվում է ավտոմատացված համակարգչային ծրագրի միջոցով՝ պատահականության սկզբունքով ընտրված հարցերից և խնդիրներից։

18. Հարցերը ընտրվում են նախապես կոդավորված և համակարգչային բազայում ներմուծված հարցերի փաթեթից։

19. Համակարգը ապահովում է գործընթացի թափանցիկությունն ու հավասար պայմանները թեստավորման բոլոր մասնակիցների համար։

20. Թափանցիկությունը ապահովվում է այնպիսի համակարգչային ծրագրի կիրառմամբ, որը գրանցում է հարցերի ընտրության գործընթացը և ապահովում է տվյալների անփոփոխելիությունը և պատահական ընտրության վերահսկելիությունը։

21. Հարցաշարերը համակարգչային բազայում կոդավորվում և համարակալվում են ըստ պաշտոնների խմբերի և ոլորտների։

22. Համակարգչային բազայում պահվում են նաև յուրաքանչյուր հարցին (խնդրին) համապատասխան պատասխանների տարբերակները, որոնցից միայն մեկը համարվում է միանշանակ ճիշտ։

23. Համակարգչային ծրագիրը պատահականության սկզբունքով ձևավորում է ամբողջական թեստ՝ սահմանված ձևաչափով, և միաժամանակ ստեղծում է ճիշտ պատասխանների երկու ձևանմուշ, որոնք տպվում և կնքվում են, պահվում փակ արկղում, դրանցից մեկը մրցույթի անցկացումից հետո փակցվում է տեսանելի տեղում։

24. Թեստի ամբողջական փաթեթը մրցութային հանձնաժողովը պարտավոր է պատրաստել և պահպանել թեստավորման օրը։

25. Թեստավորումը կազմակերպվում է գրավոր կամ համակարգչային եղանակով։

26. Յուրաքանչյուր մրցույթի համար կազմված մեկ ընդհանուր թեստը ներառում է հավասարաչափ բաշխված հարցեր և խնդիրներ՝ ըստ պաշտոնի և մասնագիտական բնագավառի պահանջների։

27. Թեստային առաջադրանքները կազմվում են թեստավորման օրը։

28. Մասնակիցները պարտավոր են պահպանել թեստավորման սահմանված կանոնները և ապահովել ընթացակարգերի լիարժեք կատարումը։

29. Թեստավորման սրահը պետք է լիարժեք համապատասխանի տեխնիկական և հիգիենայի կանոնների պահանջներին՝ ապահովելով․

1) բավարար քանակով և անխափան աշխատող համակարգիչներ, որոնք ունեն անհրաժեշտ ծրագրային ապահովում և համատեղելիություն թեստավորման հարթակի հետ,

2) անխափան էլեկտրամատակարարում և ինտերնետ կապ,

3) տվյալների գաղտնիության և անձնական տվյալների պաշտպանության միջոցներ,

4) հարմարավետ և անվտանգ միջավայր բոլոր մասնակիցների համար։

30. Թեստավորման ընթացքում մասնակիցներին խստիվ արգելվում է՝

1) օգտագործել բջջային հեռախոսներ, խելացի ժամացույցներ կամ այլ կապի ձայնագրող միջոցներ,

2) հաղորդակցվել այլ մասնակիցների հետ,

3) օգտվել ցանկացած գրավոր, էլեկտրոնային կամ այլ օժանդակ նյութերից կամ սարքավորումներից, որոնք չեն տրամադրվել մրցութային հանձնաժողովի կողմից։

4) խանգարել թեստավորման բնականոն ընթացքին կամ խոչընդոտել մյուս մասնակիցների աշխատանքը։

31. Թեստավորման ամբողջ ընթացքը պետք է գտնվի մրցութային հանձնաժողովի կողմից հսկողության ներքո։

32. Կարգապահական խախտման դեպքում մրցութային հանձնաժողովը կազմում է արձանագրություն, դադարեցնում մասնակցի թեստավորումը և հանձնաժողովի որոշմամբ նրա արդյունքները ճանաչվում են անվավեր։

33. Անվավեր ճանաչված արդյունքների վերաբերյալ մասնակիցը տեղեկացվում է գրավոր՝ նշելով դադարեցման հիմքերը։

34. Թեստավորման հարցաշարերը, դրանց ճիշտ պատասխանները և վերաբերելի նյութերը համարվում են գաղտնի տեղեկատվություն մինչև դրանց պաշտոնական հրապարակումը։

35. Գաղտնիության ապահովման համար մրցութային հանձնաժողովը սահմանում է դրանց մշակման, պահպանման և տրամադրման ներքին ընթացակարգեր, այդ թվում՝ պատասխանատու անձանց նշանակումը և վերահսկողության մեխանիզմները։

36. Թեստավորման մասնակիցների անձնական տվյալների հավաքագրումը, մշակումը, պահպանումը և ոչնչացումը իրականացվում է Հայաստանի Հանրապետության օրենսդրության և տվյալների պաշտպանության գործող նորմատիվ ակտերի պահանջներին համապատասխան։

37. Մասնակիցները պետք է նախապես տեղեկացվեն իրենց տվյալների մշակման նպատակների, պահպանման ժամկետների և դրանց վերաբերյալ ունեցած իրավունքների մասին։

38. Թեստավորման նյութերին և մասնակիցների արդյունքներին հասանելիություն ունեն միայն մրցութային հանձնաժողովի անդամները և գործընթացում ներգրավված տեխնիկական անձնակազմը։

39. Արգելվում է թեստավորման արդյունքների և անձնական տվյալների փոխանցումը երրորդ անձանց, բացառությամբ այն դեպքերի, երբ դա նախատեսված է օրենքով կամ դատարանի որոշմամբ։

Պաշտոնական հրապարակման օրը՝ 28 նոյեմբերի 2025 թվական: