«ԵՎՐԱՍԻԱԿԱՆ ՏՆՏԵՍԱԿԱՆ ՄԻՈՒԹՅԱՆՆ ԱՌԸՆԹԵՐ ԴԻՏՈՐԴ ՊԵՏՈՒԹՅԱՆ ԿԱՐԳԱՎԻՃԱԿԻ ՄԱՍԻՆ» ՀԻՄՆԱԴՐՈՒՅԹԻ ՎԵՐԱԲԵՐՅԱԼ

Եվրասիական տնտեսական բարձրագույն խորհուրդը որոշեց.

Հաստատել կից ներկայացվող՝ «Եվրասիական տնտեսական միությանն առընթեր դիտորդ պետության կարգավիճակի մասին» հիմնադրույթը:

Եվրասիական տնտեսական բարձրագույն խորհրդի անդամներ՝

1. Սույն հիմնադրույթը մշակվել է՝ հաշվի առնելով «Եվրասիական տնտեսական միության մասին» 2014 թվականի մայիսի 29-ի պայմանագրի (այսուհետ՝ Պայմանագիր) 109-րդ հոդվածը և դրանով սահմանվում է պետությանը՝ Եվրասիական տնտեսական միությանը (այսուհետ՝ Միություն) առընթեր դիտորդ պետության կարգավիճակ տալու կարգը:

11. Միությանն առընթեր դիտորդ պետության կարգավիճակը տրամադրվում է այն պետությանը, որը շահագրգռված է Միության և Միության անդամ պետությունների (այսուհետ՝ անդամ պետություններ) հետ՝ Պայմանագրով և Միության շրջանակներում միջազգային պայմանագրերով նախատեսված ոլորտներում փոխշահավետ առևտրի ու տնտեսական համագործակցության և այդ ոլորտներում իրավական կարգավորման մոտարկման մեջ։

(11-ին կետը լրաց. ԵՏԲԽ 10.12.21 թիվ 21)

12. Միությանն առընթեր դիտորդ պետության կարգավիճակ ստանալու մեջ շահագրգռված պետությունը (այսուհետ՝ շահագրգիռ պետություն), նախքան սույն հիմնադրույթի 2-րդ կետում նշված դիմումն ուղարկելը, Եվրասիական տնտեսական հանձնաժողովի կոլեգիայի (այսուհետ՝ Հանձնաժողով) նախագահի անունով դիվանագիտական ուղիներով ուղարկում է գրություն՝ Միությանն առընթեր դիտորդ պետության կարգավիճակ ստանալու մտադրության կապակցությամբ խորհրդակցություններ անցկացնելու (այսուհետ՝ խորհրդակցություններ) խնդրանքով և, արտահայտելով իր պատրաստակամությունը, պահպանել Պայմանագրի 109-րդ հոդվածի դրույթներն ու առաջնորդվել սույն հիմնադրույթով։

(12-րդ կետը լրաց. ԵՏԲԽ 10.12.21 թիվ 21)

13. Սույն հիմնադրույթի 12 կետում նշված գրությունն ստանալու օրվանից 90 օրացուցային օրվա ընթացքում Հանձնաժողովը՝

անցկացնում է անդամ պետությունների՝ շահագրգիռ պետության հետ փոխգործակցության վերլուծություն՝ վերջինիս Միությանն առընթեր դիտորդ պետության կարգավիճակ տրամադրելու տնտեսական նպատակահարմարության առնչությամբ.

կազմակերպում է խորհրդակցություններ՝ անդամ պետությունների լիազորված ներկայացուցիչների և շահագրգիռ պետության մասնակցությամբ։

Հանձնաժողովի կողմից անցկացված վերլուծության արդյունքներն անդամ պետություններ են ուղարկվում ոչ ուշ, քան խորհրդակցությունների անցկացման օրվանից 15 օրացուցային օր առաջ։

(13-րդ կետը լրաց. ԵՏԲԽ 10.12.21 թիվ 21)

14. Հանձնաժողովը, խորհրդակցությունների ավարտի օրվանից 3 աշխատանքային օրվա ընթացքում, անդամ պետություններին ու շահագրգիռ պետությանը տեղեկացնում է դրանց արդյունքների մասին։

(14-րդ կետը լրաց. ԵՏԲԽ 10.12.21 թիվ 21)

2. Խորհրդակցությունների ավարտից հետո շահագրգիռ պետությունը, հաշվի առնելով դրանց արդյունքները, դիվանագիտական ուղիներով գրավոր դիմում է ուղարկում Եվրասիական տնտեսական բարձրագույն խորհրդի (այսուհետ՝ Բարձրագույն խորհուրդ) նախագահի անունով՝ իրեն Միությանն առընթեր դիտորդ պետության կարգավիճակ տալու մասին խնդրանքով (այսուհետ՝ դիմող պետություն) և Պայմանագրի 109-րդ հոդվածի դրույթները պահպանելու պատրաստակամություն հայտնելով և առաջնորդվել սույն հիմնադրույթով:

(2-րդ կետը փոփ., լրաց. ԵՏԲԽ 10.12.21 թիվ 21)

3. Բարձրագույն խորհրդում նախագահող՝ Միության անդամ պետությունը ստացված դիմումն ուղարկում է Հանձնաժողով, որն էլ դիվանագիտական ուղիներով այդ մասին անհապաղ տեղեկացնում է անդամ պետություններ և նրանց է ուղարկում այդ դիմումի պատճենները:

(3-րդ կետը փոփ. ԵՏԲԽ 10.12.21 թիվ 21)

4. Անդամ պետությունները սույն հիմնադրույթի 3-րդ կետում նշված տեղեկատվությունն ստանալու օրվանից 30 օրացուցային օրվա ընթացքում Հանձնաժողով են ներկայացնում դիմող պետությանը՝ Միությանն առընթեր դիտորդ պետության կարգավիճակ տալու առնչությամբ իրենց դիրքորոշման վերաբերյալ տեղեկատվություն: Նշված ժամկետը լրանալուց հետո Հանձնաժողովը 5 օրացուցային օրվա ընթացքում տեղեկացնում է անդամ պետություններին ստացված դիրքորոշումների մասին և Բարձրագույն խորհրդի նիստի համար սահմանված կարգով նյութեր է պատրաստում դիմող պետությանը՝ Միությանն առընթեր դիտորդ պետության կարգավիճակ տալու առնչությամբ:

5. Դիմող պետությանը՝ Միությանն առընթեր դիտորդ պետության կարգավիճակ տալու մասին որոշումն ընդունվում է Բարձրագույն խորհրդի կողմից:

6. Բարձրագույն խորհրդի կողմից՝ Միությանն առընթեր դիտորդ պետության կարգավիճակ տալու մասին հարցի քննարկման արդյունքների հիման վրա Հանձնաժողովը համապատասխան որոշումն ուժի մեջ մտնելու օրվանից 5 օրացուցային օրվա ընթացքում դիվանագիտական ուղիներով գրավոր տեղեկացնում է դիմող պետությանն ընդունված որոշման մասին:

7. Միությանն առընթեր դիտորդ պետության կարգավիճակ ստացած պետության (այսուհետ՝ դիտորդ պետություն) կառավարությունը Հանձնաժողովի նստավայր է ուղարկում այն անձին, որը մշտական հիմունքով լիազորված է Հանձնաժողովի և դրա մարմինների հետ կանոնավոր փոխգործակցության համար (այսուհետ՝ Ներկայացուցիչ):

8. Ներկայացուցչի՝ դիտորդ պետության գործադիր իշխանության բարձրագույն մարմնի կողմից տրամադրված լիազորությունները Ներկայացուցչի կողմից տրվում են Հանձնաժողովի կոլեգիայի նախագահին կամ դիվանագիտական ուղիներով ուղարկվում են Հանձնաժողով:

9. Ներկայացուցիչը նպաստում է Հանձնաժողովի հետ դիտորդ պետության գործադիր իշխանության համապատասխան մարմինների կանոնավոր կապերի հաստատմանը և պահպանմանը՝ առևտրատնտեսական փոխգործակցության զարգացման, տեխնիկական, մաքսային, սանիտարական և բուսասանիտարական կանոնակարգման հարցերով, Հանձնաժողովի իրավասության շրջանակի մեջ մտնող այլ հարցերով, ինչպես նաև նպաստում է երկխոսությանն ու համագործակցությանն այն ոլորտներում, որոնք փոխադարձ հետաքրքրություն են ներկայացնում դիտորդ պետության և անդամ պետությունների համար:

91. Դիտորդ պետության փոխգործակցությունը անդամ պետությունների և Միության մարմինների հետ իրականացվում է ռուսերենով։

(91-ին կետը լրաց. ԵՏԲԽ 10.12.21 թիվ 21)

10. Ներկայացուցիչն աշխատակազմ ձևավորելու իրավունք ունի: Ներկայացուցիչը և նրա աշխատակազմի աշխատակիցները կարող են հավատարմագրվել Հանձնաժողովի նստավայրի պետությունում, այդ թվում՝ դիտորդ պետության արտասահմանյան ներկայացուցչության կազմում՝ Հանձնաժողովի նստավայրի պետությունում:

11. Ներկայացուցիչը, նրա աշխատակազմի աշխատակիցները և դիտորդ պետության մյուս ներկայացուցիչներն իրավունք ունեն հրավերով մասնակցելու Հանձնաժողովին առընթեր խորհրդատվական մարմինների նիստերին, ինչպես նաև Հանձնաժողովի կոլեգիայի և Հանձնաժողովի խորհրդի նիստերին՝ առանց ձայնի իրավունքի: Դիտորդ պետությանն ուղարկվում են հրավերներ բոլոր նիստերի համար՝ բացառությամբ այն հարցերի առնչությամբ նիստերի, որոնք փակ են ճանաչվել Հանձնաժողովի կոլեգիայի անդամի և (կամ) անդամ պետության խնդրանքով:

12. Դիտորդ պետության և դրա կառավարության ղեկավարները կարող են հրավերով ներկա գտնվել Բարձրագույն խորհրդի և Եվրասիական միջկառավարական խորհրդի նիստերին՝ նշված նիստերի անցկացումը կազմակերպելու կարգերին համապատասխան:

13. Բարձրագույն խորհրդի կամ Եվրասիական միջկառավարական խորհրդի նիստին մասնակցելու հրավերը, որպես կանոն, ուղարկվում է դիտորդ պետությանը ոչ ուշ, քան նիստի անցկացման օրվանից 15 օրացուցային օր առաջ:

14. Ներկայացուցչի, նրա աշխատակազմի գործունեությունն ապահովելու հետ կապված բոլոր ծախսերը, ինչպես նաև Միության մարմինների և Հանձնաժողովի թարգմանությամբ` դեպի ռուսերեն և ռուսերենից, որը Միության մարմինների աշխատանքային լեզուն է (այդ թվում՝ սինքրոն թարգմանությամբ), կոլեգիային առընթեր խորհրդատվական մարմինների նիստերին մասնակցելու համար դիտորդ պետության մյուս ներկայացուցիչների գործուղման հետ կապված մյուս ծախսերը կրում է դիտորդ պետությունը:

(14-րդ կետը լրաց. ԵՏԲԽ 10.12.21 թիվ 21)

15. Դիտորդ պետության հարցմամբ Հանձնաժողովը տրամադրում է Միության մարմինների ակտերի պատճենները՝ դիտորդ պետության համար հետաքրքրություն ներկայացնող հարցերի առնչությամբ՝ բացառությամբ սահմանափակ տարածման փաստաթղթերի (գաղտնի և ծառայողական օգտագործման համար):

16. Դիտորդ պետությունը պարտավոր է առաջնորդվել առևտրային և տնտեսական համագործակցության նպատակներով, ինչպես նաև ձեռնպահ մնալ ցանկացած այնպիսի գործողությունից, որը կարող է վնասել Միության և անդամ պետությունների շահերին, Պայմանագրի առարկային և նպատակներին։

(16-րդ կետը լրաց. ԵՏԲԽ 10.12.21 թիվ 21)

17. Բարձրագույն խորհրդի կողմից կարող է որոշում ընդունվել դիտորդ պետության կարգավիճակի չեղարկման մասին հետևյալ դեպքերում՝

ա) դիտորդ պետության կողմից Միության և (կամ) անդամ պետությունների շահերի դեմ ուղղված գործողություններ կամ հայտարարություններ անելու դեպքում.

բ) դիտորդ պետության կողմից դիտորդ պետության կարգավիճակից հրաժարվելու մասին դիմում ստանալու դեպքում:

(հիմնադրույթը լրաց., փոփ. ԵՏԲԽ 10.12.21 թիվ 21)

Պաշտոնական հրապարակման օրը՝ 22 հունիսի 2022 թվական: