031.0205.17.12.98

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻ

Կ Ա Ր Գ Ա Դ Ր ՈՒ Թ Յ ՈՒ Ն Ը

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻ ԱՇԽԱՏԱԿԱԶՄԻ ՏՆՏԵՍԱԳԻՏԱԿԱՆ ՎԱՐՉՈՒԹՅԱՆ ԿԱՆՈՆԱԴՐՈՒԹՅՈՒՆԸ ՀԱՍՏԱՏԵԼՈՒ ՄԱՍԻՆ

Հիմք ընդունելով Հայաստանի Հանրապետության Նախագահի 1998 թվականի օգոստոսի 5-ի «Հայաստանի Հանրապետության Նախագահի աշխատակազմի կանոնադրության և կազմակերպական կառուցվածքի մասին» ՆՀ-97 հրամանագիրը` որոշում եմ.

1. Հաստատել Հայաստանի Հանրապետության Նախագահի աշխատակազմի տնտեսագիտական վարչության կանոնադրությունը` համաձայն հավելվածի:

2. Սույն կարգադրությունն ուժի մեջ է մտնում պաշտոնական հրապարակման պահից:

Հայաստանի Հանրապետության Նախագահ	Ռ. Քոչարյան
Երևան 17 դեկտեմբերի 1998 թ. ՆԿ-205

Հավելված ՀՀ Նախագահի 1998 թվականի դեկտեմբերի 17-ի ՆԿ-205 կարգադրության

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻ ԱՇԽԱՏԱԿԱԶՄԻ ՏՆՏԵՍԱԳԻՏԱԿԱՆ ՎԱՐՉՈՒԹՅԱՆ

Կ Ա Ն Ո Ն Ա Դ Ր ՈՒ Թ Յ ՈՒ Ն

I. ԸՆԴՀԱՆՈՒՐ ԴՐՈՒՅԹՆԵՐ

1. Հայաստանի Հանրապետության Նախագահի աշխատակազմի (այսուհետ` Աշխատակազմ) տնտեսագիտական վարչությունը (այսուհետ` Վարչություն) Աշխատակազմի կառուցվածքային ստորաբաժանում է:

2. Վարչությունն իր գործունեության ընթացքում ղեկավարվում է Հայաստանի Հանրապետության Սահմանադրությամբ, Հայաստանի Հանրապետության օրենքներով, Հայաստանի Հանրապետության Նախագահի հրամանագրերով և կարգադրություններով, Աշխատակազմի կանոնադրությամբ, ինչպես նաև Աշխատակազմի ղեկավարի հրամաններով:

3. Վարչության կանոնադրությունը հաստատում և փոփոխում է Հայաստանի Հանրապետության Նախագահը` Աշխատակազմի ղեկավարի ներկայացմամբ:

4. Վարչության ներքին կառուցվածքը և հաստիքացուցակը հաստատում և փոփոխում է Աշխատակազմի ղեկավարը` Վարչության պետի ներկայացմամբ:

5. Վարչությունն ունի իր անվանմամբ ձևաթուղթ:

II. ՎԱՐՉՈՒԹՅԱՆ ԽՆԴԻՐԸ ԵՎ ԳՈՐԾԱՌՈՒՅԹՆԵՐԸ

1. Վարչության խնդիրն է` Հայաստանի Հանրապետության օրենսդրությամբ Հայաստանի Հանրապետության Նախագահին և Աշխատակազմին վերապահված լիազորությունների լիարժեք և արդյունավետ իրականացման ապահովումը` իր իրավասության շրջանակներում:

2. Վարչության գործառույթներն են`

- Հայաստանի Հանրապետության Նախագահին ներկայացվող սոցիալ-տնտեսական հարցերին վերաբերող փաստաթղթերի փորձագիտական քննություն իրականացնելը.

- համապատասխան մարմինների հետ համագործակցելով` սոցիալ-տնտեսական բնագավառին վերաբերող ծրագրերի և իրավական ակտերի հիմնադրույթները և նախագծերը քննության ենթարկելը.

- Հայաստանի Հանրապետության Նախագահի և Աշխատակազմի ղեկավարի հանձնարարությամբ տնտեսության համապատասխան բնագավառներում գործերի վիճակի վերլուծությունը, հրատապ հարցերի բացահայտումը և դրանց հիման վրա համապատասխան առաջարկություններ ներկայացնելը.

- Հայաստանի Հանրապետության Նախագահին և Աշխատակազմի ղեկավարին Հայաստանի Հանրապետությունում և օտարերկրյա պետություններում սոցիալ-տնտեսական գործընթացների և առանձին մակրոտնտեսական ցուցանիշների դինամիկայի վերաբերյալ զեկուցագրեր ներկայացնելը.

- Հայաստանի Հանրապետության Նախագահի հրամանագրերով, կարգադրություններով և Աշխատակազմի ղեկավարի հրամաններով իրեն վերապահված այլ գործառույթներ:

3. Վարչությունն իր գործառույթներն իրականացնելիս`

- Հայաստանի Հանրապետության Նախագահին և Աշխատակազմի ղեկավարին առաջարկություններ է ներկայացնում տնտեսական օրենսդրության և կառավարման համակարգի կատարելագործման վերաբերյալ.

- իր իրավասության շրջանակներում նախապատրաստում և սահմանված կարգով Աշխատակազմի ղեկավարին է ներկայացնում Հայաստանի Հանրապետության Նախագահի հրամանագրերի, կարգադրությունների, հանձնարարականների, ինչպես նաև այլ փաստաթղթերի նախագծեր` համապատասխան եզրակացություններով և տեղեկանքներով.

- իր իրավասության շրջանակներում, Հայաստանի Հանրապետության Նախագահի հրամանագրերի և կարգադրությունների նախագծերը նախապատրաստելու, Հայաստանի Հանրապետության Նախագահի և Աշխատակազմի ղեկավարի հանձնարարականների կատարումն ապահովելու նպատակով, հրավիրում է խորհրդակցություններ` դրանց մասնակից դարձնելով համապատասխան պետական մարմինների պաշտոնատար անձանց, մասնագետների, փորձագետների.

- Հայաստանի Հանրապետության Նախագահի և Աշխատակազմի ղեկավարի հանձնարարությամբ պարբերաբար ուսումնասիրում և քննարկում է Հայաստանի Հանրապետության համապատասխան նախարարությունների և պետական կառավարման մյուս հանրապետական և տարածքային մարմինների կողմից Հայաստանի Հանրապետության Նախագահի հրամանագրերի, կարգադրությունների, հանձնարարականների կատարման արդյունքները և ներկայացնում համապատասխան տեղեկանքներ.

- իր իրավասության շրջանակներում, անհրաժեշտության դեպքում, Հայաստանի Հանրապետության Նախագահին և Աշխատակազմի ղեկավարին զեկուցագրեր է ներկայացնում իր կողմից սպասարկվող բնագավառի հետ առնչվող համապատասխան մարմիններում, կազմակերպություններում, ինչպես նաև պաշտոնատար անձանց կողմից կատարվող աշխատանքների վիճակի մասին.

- իր իրավասության շրջանակներում, Հայաստանի Հանրապետության Նախագահին ներկայացված ակտերի նախագծերի համակողմանի ուսումնասիրման նպատակով, Աշխատակազմի ղեկավարի միջոցով փորձաքննության է ուղարկում համապատասխան նյութերը և անհրաժեշտության դեպքում պահանջում տեղեկատվական-վերլուծական բնույթի այլ նյութեր ու փաստաթղթեր.

- Աշխատակազմի ղեկավարի թույլտվությամբ, անհրաժեշտության դեպքում, հասարակական և պայմանագրային հիմունքներով, իր աշխատանքներին ներգրավում է այլ կազմակերպությունների և մասնագետների:

III. ՎԱՐՉՈՒԹՅԱՆ ԱՇԽԱՏԱՆՔՆԵՐԻ ԿԱԶՄԱԿԵՐՊՈՒՄԸ ԵՎ ՂԵԿԱՎԱՐՈՒՄԸ

1. Վարչության պետն անմիջականորեն ենթարկվում է Աշխատակազմի ղեկավարին:

2. Վարչության պետը պաշտոնի է նշանակվում և պաշտոնից ազատվում է Հայաստանի Հանրապետության Նախագահի կարգադրությամբ` Աշխատակազմի ղեկավարի ներկայացմամբ:

3. Վարչության պետը`

- իրականացնում է Վարչության անմիջական ղեկավարումը.

- իրականացնում է Վարչության ներքին կառուցվածքային ստորաբաժանումների աշխատանքների համակարգումը.

- Աշխատակազմի ղեկավարին առաջարկություններ է ներկայացնում Վարչության կանոնադրության, դրանում փոփոխություններ կատարելու վերաբերյալ.

- Աշխատակազմի ղեկավարին առաջարկություններ է ներկայացնում Վարչության ներքին կառուցվածքային ստորաբաժանումների ղեկավարներին և մյուս աշխատողներին պաշտոնի նշանակելու և պաշտոնից ազատելու, նրանց խրախուսելու վերաբերյալ.

- Վարչության աշխատողների միջև բաշխում է պարտականությունները.

- իր իրավասության շրջանակներում այլ մարմիններից, պաշտոնատար անձանցից պահանջում է անհրաժեշտ տեղեկատվություն և նյութեր.

- իր իրավասության շրջանակներում ապահովում է Վարչության և այլ մարմինների փոխհարաբերությունները.

- ստորագրում է Վարչության անունից պատրաստվող փաստաթղթերը.

- Վարչության իրավասության շրջանակներում նախապատրաստում է առաջարկություններ, տեղեկանքներ, հաշվետվություններ, զեկուցագրեր և այլ գրություններ.

- պատասխանատվություն է կրում Վարչության առջև դրված խնդիրների լուծման համար.

- կատարում է Հայաստանի Հանրապետության Նախագահի և Աշխատակազմի ղեկավարի հանձնարարականները.

- իրականացնում է Հայաստանի Հանրապետության Նախագահի և Աշխատակազմի ղեկավարի կողմից իրեն վերապահված այլ լիազորություններ:

4. Վարչության ներքին կառուցվածքային ստորաբաժանումների ղեկավարներն անմիջականորեն ենթարկվում են Վարչության պետին:

5. Վարչության ներքին կառուցվածքային ստորաբաժանումների ղեկավարները պաշտոնի են նշանակվում և պաշտոնից ազատվում Աշխատակազմի ղեկավարի հրամանով` Վարչության պետի ներկայացմամբ:

6. Վարչության ներքին կառուցվածքային ստորաբաժանումների ղեկավարները`

- իրականացնում են համապատասխան ստորաբաժանման անմիջական ղեկավարումը.

- ապահովում են իրենց ղեկավարած ստորաբաժանման աշխատանքի պատշաճ կազմակերպումը.

- Վարչության պետին են զեկուցում իրենց ղեկավարած ստորաբաժանման կողմից պատրաստված նյութերը.

- Վարչության պետի հանձնարարությամբ այլ մարմիններից, պաշտոնատար անձանցից պահանջում են իրենց ղեկավարած ստորաբաժանման գործունեության հետ առնչվող անհրաժեշտ տեղեկատվություն և նյութեր.

- պատասխանատվություն են կրում իրենց ղեկավարած ստորաբաժանման առջև դրված խնդիրների լուծման համար.

- կատարում են Վարչության պետի հանձնարարականները:

Հայաստանի Հանրապետության Նախագահի աշխատակազմի ղեկավար

Ա. Հարությունյան