«Գրանցված է»

ՀՀ արդարադատության

նախարարության կողմից

2 դեկտեմբերի 2010 թ.

Պետական գրանցման թիվ 12410454

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿԱՌԱՎԱՐՈՒԹՅԱՆՆ ԱՌԸՆԹԵՐ
ՊԵՏԱԿԱՆ ԵԿԱՄՈՒՏՆԵՐԻ ԿՈՄԻՏԵ

17 նոյեմբերի 2010 թ.

N 2436-Ն

Հ Ր Ա Մ Ա Ն

ԿԵՆՏՐՈՆԱԿԱՆ ԴԵՊՈԶԻՏԱՐԻԱՅԻ ԵՎ ԱՐԺԵԹՂԹԵՐԻ ՍԵՓԱԿԱՆԱՏԵՐԵՐԻ (ԱՆՎԱՆԱՏԵՐԵՐԻ) ՌԵԵՍՏՐԻ ՎԱՐՄԱՆ ԻՐԱՎՈՒՆՔ ՈՒՆԵՑՈՂ ԱՅԼ ԱՆՁԱՆՑ ԿՈՂՄԻՑ ՏԵՂԵԿՈՒԹՅՈՒՆՆԵՐԸ ՀԱՐԿԱՅԻՆ ՄԱՐՄՆԻՆ ՆԵՐԿԱՅԱՑՆԵԼՈՒ ԿԱՐԳԸ ԵՎ ԲՈՎԱՆԴԱԿՈՒԹՅՈՒՆԸ ՀԱՍՏԱՏԵԼՈՒ ՄԱՍԻՆ

Հիմք ընդունելով «Հարկերի մասին» Հայաստանի Հանրապետության օրենքի 20-րդ հոդվածի ութերորդ մասի 8-րդ կետը և ղեկավարվելով «Իրավական ակտերի մասին» Հայաստանի Հանրապետության օրենքի 16-րդ հոդվածով`

Հրամայում եմ`

1. Հաստատել «Կենտրոնական դեպոզիտարիայի և արժեթղթերի սեփականատերերի (անվանատերերի) ռեեստրի վարման իրավունք ունեցող այլ անձանց կողմից տեղեկությունները հարկային մարմնին տրամադրելու կարգը և բովանդակությունը»` համաձայն Հավելվածի:

2. Սույն հրամանը ուժի մեջ է մտնում պաշտոնական հրապարակման օրվան հաջորդող տասներորդ օրը:

ՀՀ կառավարությանն առընթեր պետական եկամուտների կոմիտեի նախագահ

Գ. Խաչատրյան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԿԵՆՏՐՈՆԱԿԱՆ ԴԵՊՈԶԻՏԱՐԻԱՅԻ ԵՎ ԱՐԺԵԹՂԹԵՐԻ ՍԵՓԱԿԱՆԱՏԵՐԵՐԻ (ԱՆՎԱՆԱՏԵՐԵՐԻ) ՌԵԵՍՏՐԻ ՎԱՐՄԱՆ ԻՐԱՎՈՒՆՔ ՈՒՆԵՑՈՂ ԱՅԼ ԱՆՁԱՆՑ ԿՈՂՄԻՑ ՏԵՂԵԿՈՒԹՅՈՒՆՆԵՐԸ ՀԱՐԿԱՅԻՆ ՄԱՐՄՆԻՆ ՆԵՐԿԱՅԱՑՆԵԼՈՒ ԿԱՐԳԸ ԵՎ ԲՈՎԱՆԴԱԿՈՒԹՅՈՒՆԸ ՀԱՍՏԱՏԵԼՈՒ ՄԱՍԻՆ

Հիմք ընդունելով «Հարկերի մասին» Հայաստանի Հանրապետության օրենքի 20-րդ հոդվածի ութերորդ մասի 8-րդ կետը և ղեկավարվելով «Իրավական ակտերի մասին» Հայաստանի Հանրապետության օրենքի 16-րդ հոդվածով, «Հայաստանի Հանրապետության կենտրոնական բանկի մասին» Հայաստանի Հանրապետության օրենքի 20-րդ հոդվածի «ե» կետով` Հայաստանի Հանրապետության կենտրոնական բանկի խորհուրդը որոշում է.

1. Հաստատել «Կենտրոնական դեպոզիտարիայի և արժեթղթերի սեփականատերերի (անվանատերերի) ռեեստրի վարման իրավունք ունեցող այլ անձանց կողմից տեղեկությունները հարկային մարմնին տրամադրելու կարգը և բովանդակությունը»` համաձայն Հավելվածի:

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

ՀՀ կենտրոնական բանկի նախագահ	Ա. Ջավադյան
2010 թ. նոյեմբերի 15 ք. Երևան

Հավելված

ՀԱՍՏԱՏՎԱԾ Է ՀՀ կենտրոնական բանկի խորհրդի 2010 թ. նոյեմբերի 9-ի թիվ 297-Ն որոշմամբ	ՀԱՍՏԱՏՎԱԾ Է ՀՀ կառավարությանն առընթեր պետական եկամուտների կոմիտեի նախագահի 2010 թվականի նոյեմբերի 17-ի թիվ 2436-Ն հրամանով
ՀՀ կենտրոնական բանկի նախագահ _________________ Ա. Ջավադյան	ՀՀ կառավարությանն առընթեր պետական եկամուտների կոմիտեի նախագահ _________________ Գ. Խաչատրյան

 ԿԵՆՏՐՈՆԱԿԱՆ ԴԵՊՈԶԻՏԱՐԻԱՅԻ ԵՎ ԱՐԺԵԹՂԹԵՐԻ ՍԵՓԱԿԱՆԱՏԵՐԵՐԻ (ԱՆՎԱՆԱՏԵՐԵՐԻ) ՌԵԵՍՏՐԻ ՎԱՐՄԱՆ ԻՐԱՎՈՒՆՔ ՈՒՆԵՑՈՂ ԱՅԼ ԱՆՁԱՆՑ ԿՈՂՄԻՑ ՏԵՂԵԿՈՒԹՅՈՒՆՆԵՐԸ ՀԱՐԿԱՅԻՆ ՄԱՐՄՆԻՆ ՆԵՐԿԱՅԱՑՆԵԼՈՒ ԿԱՐԳԸ ԵՎ ԲՈՎԱՆԴԱԿՈՒԹՅՈՒՆԸ

1. Սույն կարգը կարգավորում է կենտրոնական դեպոզիտարիայի և արժեթղթերի սեփականատերերի (անվանատերերի) ռեեստրի վարման իրավունք ունեցող այլ անձանց կողմից բաժնետիրական ընկերությունների վերաբերյալ տեղեկությունները Հայաստանի Հանրապետության կառավարությանն առընթեր պետական եկամուտների կոմիտեին (այսուհետ` Հարկային մարմին) տրամադրելու կարգը և բովանդակությունը:

2. Կենտրոնական դեպոզիտարիան և արժեթղթերի սեփականատերերի (անվանատերերի) ռեեստրի վարման իրավունք ունեցող այլ անձինք մինչև 2011 թվականի փետրվարի 1-ը Հայաստանի Հանրապետության կառավարությանն առընթեր պետական եկամուտների կոմիտե են ներկայացնում այն բաժնետիրական ընկերությունների ցանկերը, որոնց բաժնետոմսերի սեփականատերերի (անվանատերերի) ռեեստրի վարումն իրականացվել է իրենց կողմից 2011 թվականի հունվարի 1-ի դրությամբ` նշելով այդ ընկերությունների լրիվ անվանումները, պետական գրանցման վկայականի համարները, ինչպես նաև հարկ վճարողների հաշվառման համարները (Կենտրոնական դեպոզիտարիայում և արժեթղթերի սեփականատերերի (անվանատերերի) ռեեստրի վարման իրավունք ունեցող այլ անձանց մոտ առկայության դեպքում):

3. Կենտրոնական դեպոզիտարիան և արժեթղթերի սեփականատերերի (անվանատերերի) ռեեստրի վարման իրավունք ունեցող այլ անձինք 2011 թվականի հունվարի 1-ից հետո յուրաքանչյուր եռամսյակի համար Հարկային մարմին են ներկայացնում սույն կարգի 2-րդ կետում նշված ցանկում ներառված տեղեկությունների փոփոխությունների վերաբերյալ` մինչև տվյալ եռամսյակին հաջորդող ամսվա 15-ը: Եթե փոփոխություններ տեղի չեն ունենում սույն կարգի 2-րդ կետում նշված ցանկում, ապա Կենտրոնական դեպոզիտարիան և արժեթղթերի սեփականատերերի (անվանատերերի) ռեեստրի վարման իրավունք ունեցող այլ անձինք սույն կետում նշված ժամկետում այդ մասին նույնպես հայտնում են Հարկային մարմնին:

4. Հայաստանի Հանրապետության կենտրոնական բանկը մինչև 2011 թվականի փետրվարի 1-ը Հարկային մարմին ներկայացնում է 2011 թվականի հունվարի 1-ի դրությամբ արժեթղթերի սեփականատերերի (անվանատերերի) ռեեստրի վարման իրավունք ունեցող կազմակերպությունների ցանկը` նշելով դրանց լրիվ անվանումները, հարկ վճարողների հաշվառման համարները:

5. Հայաստանի Հանրապետության կենտրոնական բանկը 2011 թվականի հունվարի 1-ից հետո յուրաքանչյուր եռամսյակի համար Հայաստանի Հանրապետության կառավարությանն առընթեր պետական եկամուտների կոմիտե ներկայացնում է սույն կարգի 4-րդ կետում նշված ցանկում ներառված տեղեկությունների փոփոխությունների վերաբերյալ` մինչև տվյալ եռամսյակին հաջորդող ամսվա 15-ը: Եթե փոփոխություններ տեղի չեն ունենում սույն կարգի 4-րդ կետում նշված ցանկում, ապա Կենտրոնական բանկը սույն կետում նշված ժամկետում այդ մասին նույնպես հայտնում է Հարկային մարմնին:

6. Սույն կարգով նախատեսված տեղեկությունները կենտրոնական դեպոզիտարիայի և արժեթղթերի սեփականատերերի (անվանատերերի) ռեեստրի վարման իրավունք ունեցող այլ անձանց կողմից Հարկային մարմնին ներկայացվում են MS Excell ֆայլի տեսքով: Տեղեկությունների ներկայացման էլեկտրոնային հասցեն, ֆայլի էլեկտրոնային տեսքը և դրա լրացման ուղեցույցը Կենտրոնական դեպոզիտարիան և արժեթղթերի սեփականատերերի (անվանատերերի) ռեեստրի վարման իրավունք ունեցող այլ անձանց տրամադրում է Հարկային մարմինը: