ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

28 մարտի 1994 թ. N 135

քաղ. Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ 1994 ԹՎԱԿԱՆԻ ԿԱՊԻՏԱԼ ՇԻՆԱՐԱՐՈՒԹՅԱՆ ՃՇԳՐՏՎԱԾ ՊԵՏԱԿԱՆ ՊԱՏՎԵՐԸ ՀԱՍՏԱՏԵԼՈՒ ՄԱՍԻՆ

Հայաստանի Հանրապետության կառավարությունը որոշում է.

1. Հաստատել Հայաստանի Հանրապետության 1994 թվականի կապիտալ շինարարության ճշգրտված պետական պատվերը` 5300 մլն դրամ ծավալով, համաձայն NN 1, 2, 3, 4 հավելվածների:

2. Հանրապետության նախարարություններին, պետական վարչություններին, գերատեսչություններին և տեղական կառավարման մարմիններին` Հայաստանի Հանրապետության կառավարության կողմից սույն որոշմամբ հաստատված 1994 թվականի ցուցանիշներն ստանալուց հետո մեկշաբաթյա ժամկետում 1994 թվականի կապիտալ շինարարության համապատասխան պետական պատվերը տեղաբաշխել ըստ կապալառու կազմակերպությունների և հասցնել ձեռնարկություններին (միավորումներին), կազմակերպություններին:

3. Պատվիրատու նախարարություններին, պետական վարչություններին, գերատեսչություններին, տեղական կառավարման մարմիններին` 10-օրյա ժամկետում Հայաստանի Հանրապետության էկոնոմիկայի նախարարության հետ համաձայնեցնել ֆինանսավորվող օբյեկտների շինարարության տիտղոսացուցակները` հիմք ընդունելով սույն որոշմամբ հաստատված ցուցանիշները:

Առաջարկել ֆինանսավորվող բանկերին` կատարված կապիտալ ներդրումների ֆինանսավորումն իրականացնել Հայաստանի Հանրապետության էկոնոմիկայի նախարարության հետ համաձայնեցված օբյեկտների շինարարության տիտղոսացուցակներին համապատասխան:

Պատվիրատու նախարարություններին, պետական վարչություններին, գերատեսչություններին, տեղական կառավարման մարմիններին և կապալային կազմակերպություններին` 15-օրյա ժամկետում ավարտել կապալի պայմանագրերի կնքումն ըստ 1994 թվականի հաստատված ցուցանիշների:

4. Պատվիրատուներին` կապալային կազմակերպությունների հետ համատեղ մշակել սույն որոշման NN 3 և 4 հավելվածներին համապատասխան կառուցվող օբյեկտների, ինչպես նաև սոցիալական ոլորտի գործարկման ենթակա օբյեկտների շինարարության հերթականության գրաֆիկներ` նկատի ունենալով նյութատեխնիկական և ֆինանսական ռեսուրսների կենտրոնացումն այդ օբյեկտների համար:

5. Հայաստանի Հանրապետության էկոնոմիկայի նախարարությանը` կապիտալ ներդրումների արդյունավետությունը բարձրացնելու և օբյեկտների գործարկումն արագացնելու նպատակով անհրաժեշտության դեպքում 1994 թվականի 9 ամսվա արդյունքներով առաջարկություններ ներկայացնել Հայաստանի Հանրապետության կառավարություն` սույն որոշմամբ հաստատված ցուցանիշների ճշգրտման վերաբերյալ:

6. Հայաստանի Հանրապետության ֆինանսների նախարարությանը`

ա) մինչև 1994 թվականի ապրիլի 10-ը պատվիրատու կազմակերպություններին հատկացնել կանխավճար` կապիտալ ներդրումների սահմանաքանակների 25 տոկոսի չափով.

բ) երկրաշարժից հետո աղետի գոտու վերականգնման նպատակով հանգանակված գումարները (1 մլն ԱՄՆ-ի դոլար) կենտրոնացնել մեկ հաշվում և նպատակաուղղել աղետի գոտու վերականգնման աշխատանքների ֆինանսավորմանը` համաձայն սույն որոշմամբ հաստատված ցուցանիշների:

7. Հանձնարարել պատգամավորների քաղաքային և շրջանային խորհուրդների գործկոմներին` սոցիալական ոլորտի անավարտ շինարարության օբյեկտների պահպանությունն իրականացնել տեղական բյուջեի միջոցների հաշվին:

Այն նախարարություններին, պետական վարչություններին և գերատեսչություններին, որոնք ունեն տնտհաշվարկային ձեռնարկություններ` անավարտ շինարարության օբյեկտների պահպանությունը և կոնսերվացումն իրականացնել սեփական միջոցների հաշվին:

8. Հայաստանի Հանրապետության ճարտարապետության և քաղաքաշինության պետական վարչությանը` բնակելի տների շահագործումն արագացնելու նպատակով 20-օրյա ժամկետում Հայաստանի Հանրապետության կառավարություն ներկայացնել առաջարկություններ բնակելի տների հարդարման աշխատանքների ծավալների կրճատման վերաբերյալ, օգտագործելով Համաշխարհային բանկի փորձը` աղետի գոտու վերականգնման ծրագիրը մշակելիս:

9. Ուժը կորցրած ճանաչել Հայաստանի Հանրապետության կառավարության 1994 թվականի հունվարի 26-ի «Հայաստանի Հանրապետության 1994 թվականի բյուջեի հաշվին ֆինանսավորվող կապիտալ ներդրումների ծավալների հաստատման մասին» N 52 որոշման 1, 2, 3, 7, 10, 13 և 14-րդ կետերը ու 12-րդ կետի «ա» ենթակետը:

Հայաստանի Հանրապետության վարչապետ

Հ. ԲԱԳՐԱՏյան

Հայաստանի Հանրապետության ԿԱՌԱՎԱՐՈՒԹՅԱՆ ԳՈՐԾԵՐԻ ԿԱՌԱՎԱՐԻՉ

Ա. ԽԱՉԱՏՐՅԱՆ