ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

27 հոկտեմբերի 1993 թ. N 546

Քաղ. Երևան

Հայաստանի Հանրապետության արտադրական համակարգի գործունեությունը բարելավելու, արդյունավետ ինվեստիցիոն և սոցիալական քաղաքականություն իրականացնելու նպատակով Հայաստանի Հանրապետության կառավարությունը որոշում է.

1. Թույլատրել Հայաստանի Հանրապետության արդյունաբերության նախարարությունում, թեթև արդյունաբերության նախարարությունում, պարենի և մթերումների նախարարությունում, գյուղատնտեսության նախարարությունում, տրանսպորտի և հաղորդակցության նախարարությունում, կապի նախարարությունում, էներգետիկայի և վառելիքի նախարարությունում, շինարարության նախարարությունում, Հայաստանի Հանրապետության կառավարությանն առընթեր «Հայարդշինանյութեր» ՊԱՄ-ում ստեղծել ինվեստիցիոն և սոցիալական զարգացման կենտրոնացված ֆոնդեր՝ իրենց համակարգի ձեռնարկությունների տրամադրության տակ մնացող շահույթի հաշվին։

2. Հաստատել Հայաստանի Հանրապետության նախարարությունների և գերատեսչությունների ինվեստիցիոն և սոցիալական զարգացման կենտրոնացված ֆոնդերի ձևավորման և օգտագործման կարգը (կցվում է)։

3. Սահմանել, որ Հայաստանի Հանրապետության նախարարությունների ու գերատեսչությունների ինվեստիցիոն և սոցիալական զարգացման կենտրոնացված ֆոնդերի հաշիվներին ձեռնարկությունների մասհանումները չպետք է գերազանցեն ձեռնարկությունների տրամադրության տակ մնացող շահույթի մինչև 10 տոկոսը։

4. Սահմանել, որ նշված ֆոնդերին մասհանումների նորմատիվները հաստատվում ու փոփոխվում են համապատասխան նախարարության և գերատեսչության կողմից՝ համաձայնեցնելով Հայաստանի Հանրապետության էկոնոմիկայի նախարարության և ֆինանսների նախարարության հետ:

Հայաստանի Հանրապետության վարչապետ

Հ. ԲԱԳՐԱՏյան

Հայաստանի Հանրապետության ԿԱՌԱՎԱՐՈՒԹՅԱՆ ԳՈՐԾԵՐԻ ԿԱՌԱՎԱՐիչ

Ա.  ԽԱՉԱՏՐՅԱՆ

ՀԱՍՏԱՏՎԱԾ է ՀՀ կառավարության 1993 թ. հոկտեմբերի 27-ի N 546 որոշմամբ

1. Հայաստանի Հանրապետության նախարարությունների ու գերատեսչությունների ինվեստիցիոն և սոցիալական զարգացման կենտրոնացված ֆոնդերը (այսուհետև` կենտրոնացված ֆոնդ) ստեղծվում են նախարարություններում և գերատեսչություններում` իրենց համակարգում ինքնուրույն ինվեստիցիոն և սոցիալական քաղաքականություն վարելու նպատակով։

2. Կենտրոնացված ֆոնդը ձևավորվում է Հայաստանի Հանրապետության նախարարությունների և գերատեսչությունների համակարգի ձեռնարկությունների, կազմակերպությունների (այսուհետև՝ ձեռնարկություններ) տրամադրության տակ մնացող շահույթից։

3. Կենտրոնացված ֆոնդի միջոցների հաշվին իրականացվող ծախսերը պետք է ուղղված լինեն Հայաստանի Հանրապետության սոցիալ-տնտեսական զարգացման ծրագրով նախատեսված միջոցառումների իրականացմանը։

4. Կենտրոնացված ֆոնդի միջոցներն օգտագործվում են՝

ա) նախագծային, նախահաշվային, գիտահետազոտական և կոնստրուկտորական աշխատանքների ֆինանսավորման համար.

բ) արտադրական նշանակության օբյեկտների կապիտալ շինարարության, վերազինման, նորոգման և շինտեղակայման աշխատանքների ֆինանսավորման համար.

գ) նոր տեխնոլոգիաների, հոսքային գծերի, սարքավորումների և դրանց պահեստամասերի ձեռքբերման համար.

դ) ձեռնարկությունների, ինչպես նաև նախարարության կամ գերատեսչության կենտրոնական ապարատի ղեկավար աշխատողների և մասնագետների որակավորման բարձրացման ծախսերի ֆինանսավորման համար, բայց ոչ ավելի, քան կենտրոնացված ֆոնդի միջոցների 1,5 տոկոսի չափով.

ե) հատուկ կարևոր աշխատանքների ու հանձնարարությունների կատարման համար տվյալ ճյուղի աշխատողների (այդ թվում նաև նախարարության կամ գերատեսչության կենտրոնական ապարատի) միանվագ խրախուսման, ինչպես նաև նրանց միանվագ նյութական օգնության ցուցաբերման համար, բայց ոչ ավելի, քան կենտրոնացված ֆոնդի միջոցների 0,5 տոկոսի չափով։

5. Կենտրոնացված ֆոնդի միջոցներին ձեռնարկությունների մասհանումները կատարվում են նախարարության կամ գերատեսչության կողմից սահմանված կարգով ու ժամկետներում։

6. Կենտրոնացված ֆոնդի միջոցները պահվում են նախարարության հատուկ հաշվում։

7. Կենտրոնացված ֆոնդի մնացորդները ենթակա չեն վերադարձման կամ պետական բյուջե գանձման և օգտագործվում են սույն կարգին համապատասխան։

8. Կենտրոնացված ֆոնդի միջոցների օգտագործման ուղղությունները որոշում և դրանց օգտագործման նկատմամբ վերահսկողությունն իրականացնում են Հայաստանի Հանրապետության նախարարությունների և գերատեսչությունների կոլեգիաները։

9. Կենտրոնացված ֆոնդի միջոցների ծախսերը կատարվում են նախարարության կամ գերատեսչության կոլեգիայի որոշմամբ և կենսագործվում նախարարի կամ գերատեսչության ղեկավարի հրամանով։