ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

6 հոկտեմբերի 1993 թ. N 508

Քաղ. Երևան

ԱՂԵՏԻ ԳՈՏՈՒ ԵՎ ՓԱԽՍՏԱԿԱՆՆԵՐՈՎ ԲՆԱԿԵՑՎԱԾ ՇՐՋԱՆՆԵՐՈՒՄ ԵՎ ՔԱՂԱՔՆԵՐՈՒՄ ԱՆՀԱՏԱԿԱՆ ԲՆԱԿԱՐԱՆԱՅԻՆ ՇԻՆԱՐԱՐՈՒԹՅԱՆ ՆՊԱՏԱԿՈՎ ՎԱՐԿԱՅԻՆ ԷՄԻՍԻԱՅԻ ՄԻՋՈՑՆԵՐԻՑ ՎԱՐԿԵՐԻ ՏՐԱՄԱԴՐՄԱՆ, ՕԳՏԱԳՈՐԾՄԱՆ ԵՎ ՎԵՐԱՀՍԿՈՂՈՒԹՅԱՆ ԿԱՐԳԻ ՄԱՍԻՆ

Աղետի գոտում և փախստականներով բնակեցված շրջաններում և քաղաքներում անհատական բնակարանային շինարարության կազմակերպումը բարելավելու, այդ նպատակով վարկեր տրամադրելու և դրանց արդյունավետ ու նպատակային օգտագործումը կանոնակարգելու համար Հայաստանի Հանրապետության կառավարությունը որոշում է.

1. Համաձայն Հայաստանի Հանրապետության կառավարության 1993 թվականի ապրիլի 9-ի «Վարկային էմիսիայի հաշվին միջոցների տրամադրման, օգտագործման, նպատակային ծախսման նկատմամբ վերահսկողության կարգի մասին» N 162 որոշման 3-րդ կետի և 1993 թվականի մայիսի 8-ի «Գյումրի քաղաքում անհատական բնակարանային շինարարության զարգացման մասին» N 217 որոշման, ինչպես նաև հաշվի առնելով դրամի արժեզրկման տեմպերը, անհատական բնակարանային շինարարության նպատակով տրամադրվող վարկերի չափը յուրաքանչյուր կառուցողի հաշվով սահմանել 5 մլն ռուբլի, 20 տարի ժամկետով, մարումը նախատեսել վարկը տրամադրելու 5-րդ տարվանից սկսած, յուրաքանչյուր տարի հավասարաչափ մարելու պայմանով: Ընդ որում, նշված գումարի 50 տոկոսը վարկառուին տրամադրել անմիջապես, իսկ մյուս մասը` 1994 թվականից սկսած` պայմանով, որ վարկառուն գումարի երկրորդ մասը կարող է ստանալ սկզբում վերցրած գումարի լրիվ օգտագործումից հետո:

2. Սահմանել, որ անհատական բնակարանային շինարարության նպատակով աղետի գոտու բնակչությանը և փախստականներին երկարաժամկետ վարկը տրամադրվում է տարեկան 0,5 տոկոսադրույքով և վճարումը սկսվում է վարկի տրամադրումից վեց ամիս անց:

3. Անհատական բնակելի շինարարության նպատակով անհրաժեշտ վարկերի սահմանաքանակներն ըստ շրջանների և քաղաքների սահմանում են Հայաստանի Հանրապետության ֆինանսների նախարարությունը և էկոնոմիկայի նախարարությունը` համաձայն վարկառուների կատեգորիաների և նրանց թվաքանակի մասին պատգամավորների շրջանային, քաղաքային խորհուրդների գործկոմների և Հայաստանի Հանրապետության փախստականների պետական վարչության կողմից ներկայացվող հայտերի, հաշվի առնելով շինարարության համար անհրաժեշտ հնարավորությունները:

4. Հայաստանի Հանրապետության ֆինանսների նախարարությանը` ելնելով շրջանների և քաղաքների վարկերի սահմանաքանակներից, պատգամավորների շրջանային, քաղաքային խորհուրդների գործկոմներին վարկային էմիսիայի միջոցներից հատկացումները կատարել այդ գումարները գործկոմների համապատասխան բանկերի բաժանմունքներում բացվող հատուկ արտաբյուջետային հաշիվներին փոխանցման կարգով:

5. Պատգամավորների շրջանային և քաղաքային խորհուրդների գործկոմներին`

ա) սույն որոշման առաջին կետով նախատեսված վարկերը քաղաքացիներին տրամադրել վերջիններիս հետ կնքած վարկային պայմանագրերի հիման վրա:

Սույն վարկային պարտավորությունների կատարման ապահովումն իրականացվում է Հայաստանի Հանրապետության քաղաքացիական օրենսդրությամբ սահմանված կարգով կնքված գրավի կամ երաշխավորության պայմանագրերով.

բ) սեղմ ժամկետում ավարտել անհատական բնակարանային շինարարության համար սահմանված կարգով հողամասերի հատկացումը.

գ) կազմակերպել մրցույթ` կապալառու կազմակերպություն ընտրելու և նրանց հետ պայմանագրեր կնքելու համար:

6. Սահմանել, որ վարկառուներին հատկացվող վարկերի գումարի 10 տոկոսը կարող է տրամադրվել կանխիկ գործարքների կատարման համար:

7. Վարկի դիմաց տոկոսների հաշվարկը և գանձումն իրականացնում են համապատասխան բանկի բաժանմունքները և գանձված գումարները փոխանցվում են Հայաստանի Հանրապետության կենտրոնական բանկ` հանրապետական բյուջեի եկամուտների (բյուջետային դասակարգման 60 հատված, պարագրաֆ 6, բանկի սիմվոլ 71) «Վարկի էմիսիայի միջոցների օգտագործումից եկամուտներ» հաշվին:

Հետ վերադարձվող վարկերի գումարները բանկերը փոխանցում են համապատասխան պատգամավորների շրջանային, քաղաքային խորհուրդների գործկոմների հատուկ արտաբյուջետային հաշիվներին, վերջիններս այդ գումարները հաշվանցում են Հայաստանի Հանրապետության ֆինանսների նախարարության «Վարկային էմիսիայի միջոցներ» հատուկ արտաբյուջետային N 141948 հաշվին:

8. Վարկի ժամկետանց պարտքի դիմաց վարկառուից գանձվում է տույժ յուրաքանչյուր ուշացած ամսվա պարտքի գումարի 0,5 տոկոսի չափով:

9. Հատկացված վարկերի նպատակային և արդյունավետ օգտագործման նկատմամբ վերահսկողությունն իրականացնում են պատգամավորների շրջանային, քաղաքային խորհուրդների գործկոմները` տեղական ֆինանսական մարմինների, կապիտալ շինարարության բաժինների միջոցով, և վարկառուների հաշիվները սպասարկող բանկերը:

10. Հայխնայբանկին` սույն որոշման առաջին կետում նշված մարման ենթակա մնացորդն ամեն տարի` սկսած 5-րդ տարվանից, ինդեքսավորել Հայաստանի Հանրապետության կենտրոնական բանկի հաշվային դրույքի (վերաֆինանսավորման դրույքի) 50 տոկոսի չափով:

11. Հայաստանի Հանրապետության կառավարությանն առընթեր «Հայարդշինանյութեր» ՊԱՄ-ին` պատգամավորների համապատասխան շրջխորհուրդների գործկոմների հետ համատեղ 10-օրյա ժամկետում քննության առնել աղետի գոտու բնակիչների և փախստականների բնակարանային շինարարության կարիքների համար շինանյութերի հայտերը և առաջարկություն ներկայացնել Հայաստանի Հանրապետության կառավարություն դրանք անկանխիկ հաշվարկով բավարարելու կարգի վերաբերյալ:

12. Ուժը կորցրած ճանաչել Հայաստանի Հանրապետության կառավարության 1993 թվականի հուլիսի 26-ի «Կոտայքի շրջանի Արզնի ավանում, Մասիսի շրջանի Հայանիստ և Նաիրիի շրջանի Նոր Արտամետ գյուղերում փախստականների համար անհատական բնակարանային շինարարության իրականացման նպատակով վարկ տրամադրելու մասին» N 384 որոշման 2-րդ, 3-րդ, 5-րդ ու 6-րդ կետերը, 1993 թվականի մայիսի 8-ի «Գյումրի քաղաքում անհատական բնակարանային շինարարության զարգացման մասին» N 217 որոշման 2-րդ կետը:

ՀԱՅԱՍՏԱՆի հանրապետության վարչապետ

Հ. ԲԱԳՐԱՏՅԱՆ

ՀԱՅԱՍՏԱՆի հանրապետության կԱՌԱՎԱՐՈՒԹՅԱՆ ԳՈՐԾԵՐԻ ԿԱՌԱՎԱՐիչ

Ա. ԽԱՉԱՏՐՅԱՆ