ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

21 հունիսի 1993 թ. N 313

Քաղ. Երևան

ԲՆԱԿՉՈՒԹՅՈՒՆԻՑ ԿՈՄՈՒՆԱԼ ԾԱՌԱՅՈՒԹՅՈՒՆՆԵՐԻ ՈՐՈՇ ՏԵՍԱԿՆԵՐԻ ՎՃԱՐՆԵՐԻ ԳԱՆՁՄԱՆ ՄԱՍԻՆ

Հաշվի առնելով ՀԱՄԿ-ի առաջարկությունը սպառողների շահերի պաշտպանության վերաբերյալ և բնակչությանը մատուցվող կոմունալ ու կապի որոշ ծառայությունների դիմաց վճարումները կարգավորելու նպատակով Հայաստանի Հանրապետության կառավարությունը որոշում է.

1. Սահմանել, որ Հայաստանի Հանրապետության կառավարության 1993 թվականի հունվարի 23-ի «Գների և սակագների փոփոխման մասին» N 16 որոշմամբ նախատեսված` բնակչությունից կոմունալ ծառայությունների որոշ տեսակների վճարների գանձումը 1993 թվականի առաջին եռամսյակում իրականացվում է փաստացի մատուցված ծառայությունների համար հետևյալ կարգով`

բնական գազի համար վճար չգանձել.

ջրախողովակից օգտվելու ծառայության համար Երևան քաղաքում գանձել սահմանված սակագնի 60 տոկոսի չափով.

կենցաղային աղբի տեղափոխման համար գանձել սահմանված սակագնի` Երևան քաղաքում 50 տոկոսից, այլ բնակավայրերում 70 տոկոսից ոչ ավելի` տարբերակելով կենցաղային աղբի տեղափոխումն ըստ շրջանների և քաղաքների, հաշվի առնելով տեղափոխման հաճախականությունը և սանիտարական վիճակը:

1993 թվականի առաջին եռամսյակի համար բնակչության կատարած ավելի մուծումների դեպքում պատգամավորների տեղական խորհուրդների գործադիր կոմիտեները կատարում են համապատասխան վերահաշվարկ, հաշվեգրելով դրանք հետագա մուծումների դիմաց:

2. Պատգամավորների Երևանի քաղաքային խորհրդի գործադիր կոմիտեին և Հայաստանի Հանրապետության կառավարությանն առընթեր «Հայբնակկոմտնտ» հանրապետական միավորմանը` բնակելի ֆոնդ ունեցող մյուս նախարարությունների, գերատեսչությունների և կազմակերպությունների, Հայաստանի Հանրապետության էներգետիկայի և վառելիքի նախարարության ու պատգամավորների տեղական խորհուրդների գործադիր կոմիտեների հետ համատեղ, փոխադարձ ակտերի միջոցով կիսամյակը մեկ անգամ ճշգրտել ըստ առանձին շրջանների և բնակավայրերի բնակչությանը բնական գազի հատկացման, ջրամատակարարման, ջեռուցման փաստացի տևողության ու կենցաղային աղբի տեղափոխման հաճախականության հարցերը և մինչև կիսամյակին հաջորդող ամսվա 10-ը բնակչությանը տեղեկացնել կատարված փաստացի ծառայությունների վճարումների մասին:

3. Հայաստանի Հանրապետության կապի նախարարությանը` ըստ հաշվետու ամսում առանձին ավտոմատ հեռախոսային կայանների փաստացի աշխատած ժամանակի, համապատասխան փոստային բաժանմունքների միջոցով մինչև յուրաքանչյուր հաջորդ ամսվա 5-ը բաժանորդներին տեղեկացնել փաստացի կատարված հեռախոսային կապի համար աբոնենտային վճարի չափի մասին:

Հայաստանի Հանրապետության վարչապետ

Հ. ԲԱԳՐԱՏյան

Հայաստանի Հանրապետության ԿԱՌԱՎԱՐՈՒԹՅԱՆ ԳՈՐԾԵՐԻ ԿԱՌԱՎԱՐԻՉ

Ա. ԽԱՉԱՏՐՅԱՆ