ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

24 մարտի 2011 թվականի N 307-Ն

ՏՐԱԿՏՈՐԻՍՏ-ՄԵՔԵՆԱՎԱՐՆԵՐԻ ԳԻՏԵԼԻՔՆԵՐԻ ՍՏՈՒԳՄԱՆ ԵՎ ՎԱՐՄԱՆ ԻՐԱՎՈՒՆՔԻ ՎԿԱՅԱԿԱՆՆԵՐԻ ՏՐԱՄԱԴՐՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Համաձայն «Գյուղատնտեսական տեխնիկայի շահագործման մասին» Հայաստանի Հանրապետության օրենքի 6-րդ հոդվածի 4-րդ մասի՝ Հայաստանի Հանրապետության կառավարությունը որոշում է.

1. Հաստատել տրակտորիստ-մեքենավարների գիտելիքների ստուգման և վարման իրավունքի վկայականների տրամադրման կարգը՝ համաձայն հավելվածի։

2. Ուժը կորցրած ճանաչել Հայաստանի Հանրապետության կառավարության 2006 թվականի հունվարի 19-ի «Տրակտորիստ-մեքենավարի գիտելիքների ստուգման կարգը հաստատելու մասին» N 61-Ն որոշումը:

3. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Հայաստանի Հանրապետության վարչապետ	Տ. Սարգսյան
2011 թ. ապրիլի 1 Երևան

Հավելված ՀՀ կառավարության 2011 թվականի  մարտի 24-ի N 307-Ն որոշման

Կ Ա Ր Գ

ՏՐԱԿՏՈՐԻՍՏ-ՄԵՔԵՆԱՎԱՐՆԵՐԻ ԳԻՏԵԼԻՔՆԵՐԻ ՍՏՈՒԳՄԱՆ ԵՎ ՎԱՐՄԱՆ ԻՐԱՎՈՒՆՔԻ ՎԿԱՅԱԿԱՆՆԵՐԻ ՏՐԱՄԱԴՐՄԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով կարգավորվում են տրակտորիստ-մեքենավարի վարման իրավունքի վկայական (այսուհետ` տրակտորիստ-մեքենավարի վկայական) ստանալու (այսուհետ` որակավորման) նպատակով քննության կազմակերպման, անցկացման, տրակտորիստ-մեքենավարի վկայական տալու, ինչպես նաև տրակտորիստ-մեքենավարի վարման իրավունքի կարգի փոփոխման, վկայականների փոխանակման և կրկնօրինակների տրամադրման գործընթացները:

2. Որակավորման քննությունն անցկացնում ու արդյունքներն ամփոփում են Հայաստանի Հանրապետության ներքին գործերի նախարարի կողմից ստեղծված որակավորման տարածքային հանձնաժողովները (այսուհետ՝ հանձնաժողով)։ Հանձնաժողովի կազմում ընդգրկվում են մեկ անձ` Հայաստանի Հանրապետության ներքին գործերի նախարարությունից (այսուհետ` նախարարություն) և մեկ անձ` տրակտորիստ-մեքենավարի դասընթացներ կազմակերպող պետական ոչ առևտրային կազմակերպություն հանդիսացող ուսումնական հաստատությունից (այսուհետ` ուսումնական հաստատություն):

(2-րդ կետը փոփ. 11.05.18 N 569-Ն, 05.09.24 N 1416-Ն)

3. Հանձնաժողովի կազմը և կանոնադրությունը հաստատում է Հայաստանի Հանրապետության ներքին գործերի նախարարը:

(3-րդ կետը փոփ. 11.05.18 N 569-Ն, 05.09.24 N 1416-Ն)

II. ՈՐԱԿԱՎՈՐՄԱՆ ՔՆՆՈՒԹՅՈՒՆՆԵՐԻ ԿԱԶՄԱԿԵՐՊՄԱՆ ԵՎ ԱՆՑԿԱՑՄԱՆ ԳՈՐԾԸՆԹԱՑԸ

4. Սույն կարգի 1-ին կետով սահմանված գործընթացները կազմակերպում է Նախարարությունը:

(4-րդ կետը փոփ. 11.05.18 N 569-Ն, 05.09.24 N 1416-Ն)

5. Տրակտորիստ-մեքենավարի վկայական ստանալու համար դիմող անձը (այսուհետ` դիմումատու) Նախարարության աշխատողին ներկայացնում է «Գյուղատնտեսական տեխնիկայի շահագործման մասին» Հայաստանի Հանրապետության օրենքով (այսուհետ՝ օրենք) սահմանված հետևյալ փաստաթղթերը՝

1) սահմանված ձևի դիմում.

2) անձը հաստատող փաստաթղթի պատճենը (անձնագիր).

3) տրակտորիստ-մեքենավարների դասընթացն ավարտելու մասին տրված ավարտական փաստաթղթի պատճենը.

4) 2 լուսանկար՝ 3 x 4 սմ չափսի (գունավոր).

5) պետական տուրքի վճարման անդորրագիր.

6) տրակտորիստ-մեքենավարի վկայականի պատճենը՝ վարման իրավունքի կարգը փոփոխելու դեպքում:

(5-րդ կետը փոփ. 11.05.18 N 569-Ն, 05.09.24 N 1416-Ն)

6. Սույն կարգի 5-րդ կետի 2-րդ, 3-րդ և 6-րդ ենթակետերով նախատեսված փաստաթղթերի պատճենները ներկայացվում են բնօրինակ փաստաթղթերի հետ միասին և Նախարարության աշխատողի կողմից համադրվելուց հետո բնօրինակները տեղում վերադարձվում են դիմումատուին:

(6-րդ կետը փոփ. 11.05.18 N 569-Ն, 05.09.24 N 1416-Ն)

7. Սույն կարգի 5-րդ կետով նախատեսված փաստաթղթերը ներկայացվում են Նախարարություն: Նախարարության աշխատողն ընդունում է փաստաթղթերը, ուսումնասիրում, ստուգում դրանց համապատասխանությունը սույն կարգի պահանջներին և դրանց անհամապատասխանության կամ թերի, կամ ոչ ամբողջական լինելու դեպքում դիմումատուին առաջարկում է քննության օրը ներկայացնել անհրաժեշտ փաստաթղթերը: Նախարարության աշխատողը, փաստաթղթերն ընդունելիս, դիմումատուին տրամադրում է համապատասխան հարցաշարը և տեղեկացնում որակավորման քննության անցկացման վայրի, ամսաթվի և ժամի մասին:

(7-րդ կետը փոփ. 11.05.18 N 569-Ն, 05.09.24 N 1416-Ն)

8. Որակավորման քննությունն անցկացվում է դիմումը ներկայացնելու օրվանից ոչ ուշ, քան 15 օր և ոչ շուտ, քան 10 օր հետո: Քննության անցկացման վայրի, ամսաթվի և ժամի մասին հանձնաժողովի անդամներին տեղեկացվում է քննության օրվանից առնվազն երեք աշխատանքային օր առաջ:

9. Դիմումատուի կողմից սույն կարգի 7-րդ կետով սահմանված ժամկետում անհրաժեշտ փաստաթղթերը չներկայացվելու դեպքում դիմումը հանձնաժողովի կողմից գրավոր մերժվում է, և այն նույն օրը տրամադրվում է դիմումատուին:

10. Որակավորման քննությունն անցկացվում է երկու փուլով`

1) առաջին փուլ. տեսական քննություն՝ գյուղատնտեսական տեխնիկայի շահագործման կանոնների և ճանապարհային երթևեկության կանոնների իմացության ստուգում.

2) երկրորդ փուլ. գործնական քննություն՝ գործնական վարման հմտության ստուգում:

11. Որակավորման քննության երկու փուլերն անցկացվում են նույն օրվա ընթացքում` ուսումնական հաստատությանը պատկանող տարածքում:

12. Որակավորման քննության առաջին փուլի համար Հայաստանի Հանրապետության ներքին գործերի նախարարի հրամանով հաստատվում են առանձին հարցաշարեր (այսուհետ` հարցաշար)` տրակտորիստ-մեքենավարների վարման իրավունքի առաջին, երկրորդ և երրորդ կարգերի համար:

(12-րդ կետը փոփ. 11.05.18 N 569-Ն, 05.09.24 N 1416-Ն)

13. Հանձնաժողովը տեսական քննությունն անցկացնում է հարցաշարերի հիման վրա կազմված հարցաթերթիկների միջոցով: Հարցաթերթիկները կազմվում են թեստավորման սկզբունքով: Յուրաքանչյուր հարցաթերթիկում նշված հարցաշարից ընդգրկվում է տասը հարց, որից հինգը՝ գյուղատնտեսական տեխնիկայի շահագործման կանոնների, և հինգը՝ ճանապարհային երթևեկության կանոնների վերաբերյալ: Տեսական հարցերին պատասխանելու համար դիմումատուին տրվում է 60 րոպե ժամանակ: Հարցերի պատասխանները տրվում են գրավոր:

14. Հանձնաժողովը չի ստուգում դիմումատուի ճանապարհային երթևեկության կանոնների իմացությունը, եթե դիմումատուն ունի վարորդական վկայական և դիմել է երրորդ կարգի տրակտորիստ-մեքենավարի վկայական ստանալու համար:

15. Տեսական քննությունը համարվում է դրական հանձնած, եթե դիմումատուն ճիշտ է պատասխանել հարցաթերթիկում ընդգրկված յուրաքանչյուր ոլորտի հարցերից առնվազն երեքին: Դիմումատուին տեսական քննության պատասխանները հայտնում են քննությունն ավարտվելուց և արդյունքներն ամփոփվելուց անմիջապես հետո:

16. Գործնական քննությունն անցկացվում է տեսական քննության արդյունքների ամփոփումից հետո: Գործնական քննությանը մասնակցել թույլատրվում է միայն տեսական քննությունը դրական հանձնած դիմումատուին: Գործնական քննության անցկացման համար պահանջվող գյուղատնտեսական տեխնիկան ապահովում է ուսումնական հաստատությունը: Գործնական քննությունն անցկացվում է այն խմբին պատկանող գյուղատնտեսական տեխնիկայով, որի վարման համար տրվելու է տրակտորիստ-մեքենավարի վկայական:

17. Գործնական քննության դրական արդյունքի համար սահմանված նվազագույն պահանջներն են շարժիչի գործարկումը, տրակտորին գյուղատնտեսական մեքենայի կամ գործիքի կցումը, կարգավորումը և գյուղատնտեսական տեխնիկայի վարումը: Եթե դիմումատուն դիմել է առաջին կարգի տրակտորիստ-մեքենավարի վկայական ստանալու համար և չունի երկրորդ կամ երրորդ կարգի տրակտորիստ-մեքենավարի վկայական, գործնական քննության համար, բացի սույն կետի առաջին պարբերությունում սահմանված նվազագույն պահանջներից, սահմանվում է նաև օրենքով սահմանված «E» և «F» խմբերին պատկանող գյուղատնտեսական տեխնիկայի գործարկման և այդ տեխնիկայի աշխատանքային հնարավորությունների ցուցադրման պահանջը:

18. Գործնական քննության արդյունքների մասին հանձնաժողովի որոշումն ընդունվում է քվեարկությամբ` հանձնաժողովի անդամների ձայների պարզ մեծամասնությամբ:

19. Որակավորման քննության ավարտից անմիջապես հետո արդյունքներն ամփոփվում են, և հանձնաժողովը նույն օրը տալիս է տրակտորիստ-մեքենավարի` վարման իրավունքի վկայական տրամադրելու համար քննության արդյունքների մասին եզրակացություն` համաձայն N 1 ձևի, որն ստորագրվում է հանձնաժողովի նախագահի և հանձնաժողովի անդամների կողմից: Այն կազմվում է երեք օրինակից, որոնցից մեկը պահվում է Նախարարության աշխատողի մոտ, մյուսը նույն օրը տրվում է դիմումատուին, իսկ երրորդը հանձնաժողովի նահագահը երկու աշխատանքային օրվա ընթացքում ներկայացնում է Նախարարության համապատասխան ստորաբաժանման ղեկավարին:

(19-րդ կետը փոփ. 11.05.18 N 569-Ն, 05.09.24 N 1416-Ն)

20. Տեսական քննության կամ գործնական քննության արդյունքների մասին հանձնաժողովի բացասական որոշման դեպքում հանձնաժողովը կազմում է բացասական եզրակացություն:

21. Հանձնաժողովի` որակավորման քննության մասին բացասական եզրակացություն ստանալու դեպքում դիմումատուն կարող է կրկին մասնակցել քննությանը` սույն կարգով սահմանված ընդհանուր դրույթներին համապատասխան:

22. Որակավորման քննության ավարտից հետո երեք աշխատանքային օրվա ընթացքում, հանձնաժողովի` որակավորման քննության մասին դրական եզրակացության հիման վրա, Նախարարությունը տվյալ անձին տրամադրում է տրակտորիստ-մեքենավարի վարման իրավունքի վկայական (74 x 105 մմ չափսի)` համաձայն N 2 ձևի, որի համապատասխան կարգի տողում կատարվում է «Թույլատրվում է» նշումը:

(22-րդ կետը փոփ. 11.05.18 N 569-Ն, 05.09.24 N 1416-Ն)

23. Տրակտորիստ-մեքենավարների վկայականները, փոխանակված վկայականները, ինչպես նաև տրակտորիստ-մեքենավարների վկայականների կրկնօրինակները Նախարարության աշխատողի կողմից հաշվառվում են տրակտորիստ-մեքենավարների վարման իրավունքի վկայականների հաշվառման գրանցամատյանում` համաձայն N 3 ձևի:

(23-րդ կետը փոփ. 11.05.18 N 569-Ն, 05.09.24 N 1416-Ն)

III. ՏՐԱԿՏՈՐԻՍՏ-ՄԵՔԵՆԱՎԱՐՆԵՐԻ ՎԱՐՄԱՆ ԻՐԱՎՈՒՆՔԻ ԿԱՐԳԻ ՓՈՓՈԽՄԱՆ, ՎԿԱՅԱԿԱՆՆԵՐԻ ՓՈԽԱՆԱԿՄԱՆ ԵՎ ԿՐԿՆՕՐԻՆԱԿՆԵՐԻ ՏՐԱՄԱԴՐՄԱՆ ԳՈՐԾԸՆԹԱՑԸ

24. Տրակտորիստ-մեքենավարների վարման իրավունքի կարգի փոփոխման գործընթացն իրականացվում է սույն կարգի ընդհանուր դրույթներին համապատասխան:

25. Տրակտորիստ-մեքենավարների վարման իրավունքի կարգի փոփոխման նպատակով դիմումատուն Նախարարության աշխատողին է ներկայացնում սույն կարգի 5-րդ կետով սահմանված բոլոր փաստաթղթերը:

(25-րդ կետը փոփ. 11.05.18 N 569-Ն, 05.09.24 N 1416-Ն)

26. Տրակտորիստ-մեքենավարի վարման իրավունքի վկայականի փոխանակման դեպքում տրակտորիստ-մեքենավարի հին վկայականը դակելու (կտրելու) միջոցով անվավեր ճանաչվելուց հետո պահպանվում է Նախարարությունում:

(26-րդ կետը փոփ. 11.05.18 N 569-Ն, 05.09.24 N 1416-Ն)

27. Տրակտորիստ-մեքենավարի վկայականի կրկնօրինակն ստանալու նպատակով դիմումատուն Նախարարության աշխատողին է ներկայացնում սույն կարգի 5-րդ կետի 1-ին, 2-րդ, 4-րդ և 5-րդ ենթակետերով սահմանված փաստաթղթերը:

(27-րդ կետը փոփ. 11.05.18 N 569-Ն, 05.09.24 N 1416-Ն)

28. Տրակտորիստ-մեքենավարի վկայականի կրկնօրինակը դիմումատուին է տրամադրվում պահանջվող փաստաթղթերը Նախարարության աշխատողին ներկայացնելուց հետո երեք աշխատանքային օրվա ընթացքում:

(28-րդ կետը փոփ. 11.05.18 N 569-Ն, 05.09.24 N 1416-Ն)

29. Հայաստանի Հանրապետության իրավասու մարմինների կողմից տրված (այդ թվում` այլ պետություններում փոխանակված), ինչպես նաև նախկին ԽՍՀՄ պետությունների իրավասու մարմինների կողմից տրված տրակտորիստ-մեքենավարի վկայականը կորցնելու, ինչպես նաև փոխանակման դեպքում՝ այն տնօրինողին սույն կարգով սահմանված կարգով նույն խմբի տրանսպորտային միջոցներ վարելու իրավունքի նոր վկայական է տրվում` առանց որակավորման քննություն հանձնելու, երեք աշխատանքային օրվա ընթացքում:

Հայաստանի Հանրապետության կառավարության աշխատակազմի ղեկավար

Դ. Սարգսյան

Ձև N 1

Ե Զ Ր Ա Կ Ա Ց ՈՒ Թ Յ ՈՒ Ն

ՏՐԱԿՏՈՐԻՍՏ-ՄԵՔԵՆԱՎԱՐԻ ՎԱՐՄԱՆ ԻՐԱՎՈՒՆՔԻ ՎԿԱՅԱԿԱՆ ՏՐԱՄԱԴՐԵԼՈՒ ՀԱՄԱՐ ՔՆՆՈՒԹՅԱՆ ԱՐԴՅՈՒՆՔՆԵՐԻ ՄԱՍԻՆ

ՀՀ ________________ մարզ

___ ___________ 20 թ.

Հանձնաժողովի նախագահ	________________________ (ստորագրությունը)	____________________________ (անունը, ազգանունը)
Հանձնաժողովի անդամներ	________________________ (ստորագրությունը)	____________________________ (անունը, ազգանունը)
	________________________ (ստորագրությունը)	____________________________ (անունը, ազգանունը)

Ձև N 2

ՏՐԱԿՏՈՐԻՍՏ-ՄԵՔԵՆԱՎԱՐԻ ՎԿԱՅԱԿԱՆ TRACTOR DRIVER CERTIFICATE         «ՄՏԶ» մակնիշի տրակտորի պատկերը

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ ՏՐԱԿՏՈՐԻՍՏ-ՄԵՔԵՆԱՎԱՐԻ ՎԿԱՅԱԿԱՆ   Անունը _________________________ Ազգանունը _____________________ Հայրանունը_____________________ Ծննդյան տարեթիվը _____________   Սերիա ___ N ______   Տրված է Հայաստանի Հանրապետության ներքին գործերի նախարարության կողմից ___________________________________(հանձնաժողովի նախագահի ստորագրությունը)   Կ.Տ. ___ _____________ 20 թ.   Վկայականի տիրոջ ստորագրությունը` ________________________________

REPՍBLIC OF ARMENIA TRACTOR DRIVER CERTIFICATE Տրակտորների և ինքնագնաց մեքենաների խմբերը, որոնց վարման համար տրված է վկայականը Թույլ-տվության մասին նշումը «A» խումբ՝ անիվավոր տրակտորներ, որոնք ունեն մինչև 14 կիլոնյուտոն (մինչև 80 ձիաուժից) շարժիչի հզորություն   «B» խումբ՝ անիվավոր տրակտորներ, որոնք ունեն 14 կիլոնյուտոնից (80 ձիաուժից) բարձր շարժիչի հզորություն   «C» խումբ՝ ընդհանուր նշանակության թրթուրավոր տրակտորներ   «D» խումբ՝ գյուղատնտեսական ինքնագնաց մեքենաներ, որոնք գործում են մեխանիկական շարժահաղորդմամբ   «E» խումբ՝ գյուղատնտեսական ինքնագնաց մեքենաներ, որոնք գործում են հիդրավլիկ շարժահաղորդմամբ   «F» խումբ՝ մելիորատիվ մեքենաներ, այդ թվում՝ մինչև 0,65 խոր. մետր շերեփի տարողությամբ էքսկավատորներ   __________________________________ (հատուկ նշումներ)

(ձևը փոփ. 11.05.18 N 569-Ն, 05.09.24 N 1416-Ն)

Գ Ր Ա Ն Ց Ա Մ Ա Տ Յ Ա Ն

ՏՐԱԿՏՈՐԻՍՏ-ՄԵՔԵՆԱՎԱՐՆԵՐԻ ՎԱՐՄԱՆ ԻՐԱՎՈՒՆՔԻ ՎԿԱՅԱԿԱՆՆԵՐԻ ՀԱՇՎԱՌՄԱՆ

(հավելվածը փոփ. 11.05.18 N 569-Ն, 05.09.24 N 1416-Ն)