ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
12 սեպտեմբերի 2024 թվականի N 1445-Լ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2024 ԹՎԱԿԱՆԻ ՀՈՒՆԻՍԻ 14-Ի N 884-Լ ՈՐՈՇՄԱՆ ՄԵՋ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ
Հիմք ընդունելով «Նորմատիվ իրավական ակտերի մասին» Հայաստանի Հանրապետության օրենքի 33-րդ և 34-րդ հոդվածները` Հայաստանի Հանրապետության կառավարությունը որոշում է.
1. Հայաստանի Հանրապետության կառավարության 2024 թվականի հունիսի 14-ի «Ամպայինն առաջինը» քաղաքականության մշակման և ներդրման մասին» N 884-Լ որոշման մեջ կատարել հետևյալ լրացումները՝
1) որոշման 1-ին կետի 4-րդ ենթակետը «ձեռնպահ են մնում» բառերից հետո լրացնել «սույն որոշման 1-ին կետի 1-ին ենթակետով սահմանված պահանջներին համապատասխանող» բառերով.
2) որոշումը լրացնել հետևյալ բովանդակությամբ 3.1-ին և 3.2-րդ կետերով՝
«3.1. Հայաստանի Հանրապետության ֆինանսների նախարարին՝ սույն որոշումն ուժի մեջ մտնելու օրվանից չորսամսյա ժամկետում Հայաստանի Հանրապետության բարձր տեխնոլոգիական արդյունաբերության նախարարության հետ համատեղ մշակել ամպային ծառայությունների մատուցման պետական գնման գործընթացի մեթոդաբանություն և ուղեցույց:
3.2. Սահմանել ամպային տիրույթում պաշտոնական կայքերի տեղակայման անվտանգության նվազագույն պահանջները՝ համաձայն հավելվածի:».
3) որոշումը լրացնել հավելվածով՝ համաձայն հավելվածի:
2. Սույն որոշումն ուժի մեջ է մտնում հրապարակմանը հաջորդող օրվանից:
|
Հայաստանի Հանրապետության |
Ն. Փաշինյան |
|
Երևան |
|
12.09.2024 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ |
|
Հավելված ՀՀ կառավարության 2024 թվականի սեպտեմբերի 12-ի N 1445-Լ որոշման |
|
«Հավելված ՀՀ կառավարության 2024 թվականի հունիսի 14-ի N 884-Լ որոշման |
ԱՄՊԱՅԻՆ ՏԻՐՈՒՅԹՈՒՄ ՏԵՂԱԿԱՅՎՈՂ ՊԱՇՏՈՆԱԿԱՆ ԿԱՅՔԵՐԻ ՆԿԱՏՄԱՄԲ ԱՆՎՏԱՆԳՈՒԹՅԱՆ ՆՎԱԶԱԳՈՒՅՆ ՊԱՀԱՆՋՆԵՐԸ
1. ԸՆԴՀԱՆՈՒՐ ԴՐՈՒՅԹՆԵՐ
1. Սույն հավելվածով սահմանվում են ամպային տիրույթում պաշտոնական կայքերի տեղակայման անվտանգության նվազագույն պահանջները:
2. Սույն հավելվածը վերաբերում է ամպային տիրույթում տեղակայվող պաշտոնական կայքի բովանդակության ձևավորմանը և տվյալներին, տեխնիկական բաղադրիչներին, տեղեկատվական անվտանգության վերահսկմանը և մշտադիտարկմանը:
3. Պաշտոնական կայքի տեղեկատվական ռեեստրը ներառում է կայքերի վերաբերյալ հիմնական տեղեկությունները և տեխնիկական մանրամասները, որոնք առնչվում են բիզնես գործընթացների շարունակականությանը։
2. ՊԱՇՏՈՆԱԿԱՆ ԿԱՅՔԻ ԲՈՎԱՆԴԱԿՈՒԹՅԱՆ ՈՒ ՀԱՐԱԿԻՑ ՏՎՅԱԼՆԵՐԻ ԴԱՍԱԿԱՐԳՈՒՄՆ ԱՄՊԱՅԻՆ ՀՈՍԹԻՆԳՈՒՄ
4. Պաշտոնական կայքում կարող են զետեղվել միայն «հանրային» դասակարգված տեղեկությունները:
5. Oգտատերերի անձնական և նույնականացման տվյալները (մուտքանուն, գաղտնաբառ և այլն) չպետք է ցուցադրվեն կայքի որևէ հատվածում:
6. Պաշտոնական կայքի ինտերֆեյսը (interface) չպետք է պարունակի կայքերի ստեղծման կամ կառավարման մեջ կիրառվող ամպային ծառայությունների և ծրագրային ապահովման մատակարարների վերաբերյալ գովազդային բնույթի տեղեկատվություն, բացառությամբ ներբեռնվող նյութերի։
7. Առցանց մատուցվող ծառայությունները (ոչ ստատիկ բովանդակություն, որը ստանում/պահում/մշակում է օգտատերերի տրամադրած տվյալները) պետք է տարանջատված լինեն պաշտոնական կայքի կոդից/տեխնիկական մասից:
3. ՊԱՇՏՈՆԱԿԱՆ ԿԱՅՔԻ ՏԵՂԱԿԱՅՄԱՆ, ՊԱՀՈՒՍՏԱՎՈՐՄԱՆ ԵՎ ԲԻԶՆԵՍ ՇԱՐՈՒՆԱԿԱԿԱՆՈՒԹՅԱՆ ԱՊԱՀՈՎՄԱՆ ԳՈՐԾԸՆԹԱՑՆԵՐԻ ՆԵՐԴՐՈՒՄԸ
8. Պաշտոնական կայքը պետք է տեղակայված լինի .gov.am տիրույթում (domain):
9. Պաշտոնական կայքի տեղակայման ամպային տիրույթ ընտրելիս՝ այլ հավասար պայմանների դեպքում նախապատվությունը տալ Հայաստանի Հանրապետությունում տեղակայված սերվերային ենթակառուցվածքին:
10. Ամպային տիրույթում տեղակայումը պետք է իրականացվի այնպես, որ կայքի ցանկացած թարմացում նախ կատարվի թեստավորման միջավայրում (pre-live), այնուհետև հաջող փորձարկումից հետո ապահովվի ինքնաշխատ եղանակով տեղակայումը (deployment) իրական միջավայրում (live):
11. Տեղակայման գրանցամատյանները (deployment logs) պետք է լինեն հասանելի ամպային ծառայությունների (PaaS) կամ ենթակառուցվածքի (IaaS) մակարդակով:
12. Ներդրված ցանկացած ամպային ծառայություն պետք է ներառի պաշտոնական կայքի տվյալների առնվազն օրական պահուստավորում (backup), ինչպես նաև հստակ ուղեցույցներ, թե ինչպես կարելի է վերականգնել կայքը:
13. Օրական պահուստավորումից բացի պետք է կատարվի առնվազն շաբաթական պահուստավորում (backup), ամպային ծառայությունների հիմնական մատակարարի հոսթինգից (hosting) տարբերվող վայրում (լոկալ պահուստավորում (local backup), այլընտրանքային ամպային ծառայություններ մատուցող ենթակառուցվածք):
14. Պաշտոնական կայքի ամբողջական պահուստավորման (full backup) և վերականգնման (կայքի զրոյական վիճակից) սցենարները պետք է փորձարկվեն մինչև ամպային հոսթինգում (hosting) կայքի գործարկումը:
15. Պաշտոնական կայքի ստեղծման ծրագրերը (բովանդակության կառավարման համակարգ (content management system) պետք է թարմացվեն և շտկվեն ամպային ծառայությունների մատակարարի կամ սպասարկման թիմի (DevOps) կողմից՝ ծրագրային թարմացումների առկայության դեպքում։
4. ՊԱՇՏՈՆԱԿԱՆ ԿԱՅՔԻ ՏԵԽՆԻԿԱԿԱՆ ԵՎ ԿԱԶՄԱԿԵՐՊՉԱԿԱՆ ԱՆՎՏԱՆԳՈՒԹՅԱՆ ՊԱՀՊԱՆՄԱՆ ՄԻՋՈՑԱՌՈՒՄՆԵՐԸ
16. Պաշտոնական կայքում պետք է ներդրվեն անվտանգության ապահովման տեխնոլոգիաները (Secure Sockets Layer/Transport Layer Security-SSL/TLS):
17. Պաշտոնական կայքի ադմինիստրատորի վահանակի (admin panel) մուտքը պետք է իրականացվի երկգործոն կամ բազմագործոն նույնականացմամբ (Two-factor authentication-2FA կամ Multi-factor authentication-MFA)՝ հնարավոր դեպքերում «Ես եմ» ազգային նույնականացման հարթակի միջոցով։
18. Պաշտոնական կայքի ամպային հոսթինգի (hosting) մատակարարի ադմինիստրատորի վահանակի (admin panel) մուտքը պետք է իրականացվի երկգործոն կամ բազմագործոն նույնականացմամբ (Two-factor authentication-2FA կամ Multi-factor authentication-MFA):
19. Ցանկացած կոդ/SaaS/IaaS/PaaS արտադրանք պետք է ստեղծվի առցանց միջավայրում տեղեկատվության անվտանգության թոփ 10 (The Open Web Application Security Project-OWASP Top 10) ստանդարտներին համապատասխան:
20. Պաշտոնական կայքում խոցելիության և ներթափանցման թեստավորումը (vulnerability and penetration testing) պետք է իրականացվի նախքան դրա ուղիղ տեղակայումը (live deployment) և շարունակվի տեղակայումից հետո՝ առնվազն տարին մեկ անգամ, իսկ խնդիրների հայտնաբերման դեպքում՝ դրանք շտկել հնարավոր սեղմ ժամկետում։
21. Հնարավոր դեպքերում խոցելիության սկանավորումները, ինչպես նաև կայքի առանձին բաղադրիչների թեստավորումները պետք է ներառվեն կայքի շարունակական ինտեգրման/շարունակական տեղակայման (Continuous Integration/Continuous Deployment-CI/CD) գործընթացում:
22. Պետք է կիրառել Վեբ միջցանցային էկրան (Web Application Firewall-WAF)՝ կայքը պաշտպանելու այնպիսի վեբ հավելվածների հարձակումներից, ինչպիսիք են օրինակ՝ ԷսՔյուԷլ-ը (Structured Query Language-SQL), ԷքսԷսԷս-ը (Cross Site Scripting-XSS)։ Օգտագործողը պետք է հնարավորություն ունենա ստանալ հարձակումների վերաբերյալ հաշվետվությունները:
23. Ամպային ծառայությունների մատակարարը պետք է տրամադրի ԴիՕԷս (DoS) և ԴիԴիՕԷս (DDoS) հարձակումներից ավտոմատ պաշտպանություն՝ օգտատերերին տրամադրելով լրացուցիչ կանոններ սահմանելու հնարավորություն։ Օգտագործողը պետք է հնարավորություն ունենա ստանալ հարձակումների վերաբերյալ հաշվետվությունները:
24. Դիտարկչի (browser) անվտանգությունն ապահովելու համար պետք է կիրառվեն այնպիսի գործիքներ, ինչպիսիք են օրինակ՝ ՍիԷսՓի-ն (Content Security Policy-CSP), ԷյջԷսԹիԷս-ը (Strict-Transport-Security-HSTS) և ԷքսՍիԹիՕ-ն (X-Content-Type-Options)։
25. Ամպային հոսթինգի (hosting) մատակարարների գրանցամատյանները (application events, host-based logs և այլն) պետք է լինեն հասանելի՝ կանխելու, հայտնաբերելու և հետաքննելու հնարավոր վնասակար գործողությունները:
26. Գրանցամատյանները (logs) պետք է պահպանվեն առնվազն մեկ տարի և հասանելի լինեն ադմինիստրատորներին և Հայաստանի Հանրապետության օրենսդրությամբ նախատեսված հանրային իշխանության մարմիններին:
27. Համակարգի և ծառայությունների ադմինիստրատորների հաշիվների արտոնությունների շրջանակը պետք է լինի խիստ սահմանափակ՝ ըստ դերերի (տեխնիկական ադմինիստրատոր, բովանդակություն մշակող և այլն)՝ ապահովելով հասանելիությունը միայն անհրաժեշտ ռեսուրսներին (Role-based Access Control): Օգտատերերը պետք է հեռացվեն, երբ չունեն մուտքի կարիք։
5. ՊԱՇՏՈՆԱԿԱՆ ԿԱՅՔԻ ՊԱՐԲԵՐԱԿԱՆ ՄՇՏԱԴԻՏԱՐԿՈՒՄԸ
28. Պետք է ներդնել պաշտոնական կայքի աշխատանքի մշտադիտարկման (monitoring) գործիքներ, որոնք ծանուցում են կայքի խափանումների, հարձակումների և այլ անվտանգային խնդիրների մասին։ Այս գործիքները կարող են տրամադրվել ամպային հոսթինգի (hosting) մատակարարի կողմից կամ ներդրվել պաշտոնական կայքում՝ օգտագործելով հեղինակավոր այլ մատակարարների կողմից առաջարկվող լուծումներ։
29. Ահազանգման համակարգը պետք է ծանուցումներն ուղարկի բազմաթիվ ուղիներով (ԷսԷմԷս (SMS), էլեկտրոնային փոստ, հեռախոս, ԷյՓիԱյ (API)։
30. Պետք է լինի միջադեպերի արձագանքման պլան և սպասարկման համաձայնագիր (Service level agreement-SLA) պետական մարմնի, թիմի կամ այն անձանց հետ, ովքեր պատասխանատու են պաշտոնական կայքի տեխնիկական աշխատանքի համար։
31. Պաշտոնական կայքի տեխնիկական թարմացումները կամ շտկումները և դրանց հետ կապված տեխնիկական աշխատանքները պետք է պատշաճ կերպով գրանցվեն առաջադրանքների կառավարման գործիքների (task management tools) կիրառմամբ՝ համաձայնեցված պետական մարմնի, թիմի կամ այն անձանց հետ, ովքեր պատասխանատու են կայքի տեխնիկական աշխատանքի համար:
32. Պաշտոնական կայքի օգտատերերի փորձառության (User Experience) վերլուծության որևէ գործիք չպետք է հավաքի օգտատերերի անձնական տվյալները։
6. ՊԱՇՏՈՆԱԿԱՆ ԿԱՅՔԵՐԻ ՏԵՂԵԿԱՏՎԱԿԱՆ ՌԵԵՍՏՐԸ
33. Պաշտոնական կայքի տեղեկատվական ռեեստրում պետք է ներառվեն՝
1) պաշտոնական կայքի ստեղծման ծրագրերը (բովանդակության կառավարման համակարգ (content management system).
2) պաշտոնական կայքի տնօրինողի կողմից առանձին բաղադրիչների, գրադարանների և պատրաստի գործիքների օրինական օգտագործման համար անհրաժեշտ բոլոր լիցենզիաները.
3) բաց կոդով բաղադրիչները, գրադարանները կամ գործիքները.
4) մշտադիտարկման (monitoring) գործիքների, վերլուծության, պատասխանատու թիմերի և սպասարկման համաձայնագրի (Service level agreement-SLA) հետ կապված բոլոր տեղեկությունները.
5) պաշտոնական կայքի ադմինիստրատորի վահանակի (admin panel) բոլոր օգտատերերի մասին տեղեկությունն ըստ դերերի, ներառյալ կոնտակտային տվյալները.
6) բոլոր լիցենզիաները, ամպային ծառայությունները, «ծրագրային ապահովումը որպես ծառայություն» (SaaS-Software as a Service), «ենթակառուցվածքը որպես ծառայություն» (IaaS-Infrastructure as a Service), «հարթակը որպես ծառայություն» (PaaS-Platform as a Service) լուծումները, պահուստավորման (backup) ծառայությունները և դրանց համապատասխան համաձայնագրերն ու գործողության ժամկետները.
7) պաշտոնական կայքում ներդրված անվտանգության ապահովման տեխնոլոգիաները (Secure Sockets Layer/Transport Layer Security-SSL/TLS), «SSL» հավաստագրերի պարամետրերը (թողարկող, գործողության ժամկետի ավարտ, թարմացումների ռազմավարություն և այլն).
8) պաշտոնական կայքի ամբողջական պահուստավորման (full backup) և վերականգնման (կայքի զրոյական վիճակից) սցենարների փորձարկման արդյունքները.
9) սույն հավելվածի 30-րդ կետում նշված միջադեպերի վերաբերյալ տեղեկությունը.
10) ծրագրային փոփոխությունների գրանցամատյանները (change logs) կամ սույն հավելվածի 31-րդ կետում նշված գործիքին հղումը։
7. ՊԱՇՏՈՆԱԿԱՆ ԿԱՅՔԵՐԻ ՏԵՂԱԿԱՅՄԱՆ ԱՄՊԱՅԻՆ ՏԻՐՈՒՅԹՈՒՄ ԿԱԶՄԱԿԵՐՊՈՒՄԸ
34. Պաշտոնական կայքի տվյալների ամբողջականության, հասանելիության և անվտանգության համար պատասխանատու է կայքը և տվյալները տնօրինող հանրային իշխանության մարմինը:
35. Ամպային ծառայության մատակարարի հետ պետք է ունենալ օպերատիվ կոնտակտի հնարավորություն 24/7 ռեժիմով (այդ թվում՝ ձայնային):
36. Ամպային տիրույթում պաշտոնական կայքերի տեղակայման վերահսկողությունն իրականացնում է «Կառավարության կառուցվածքի և գործունեության մասին» օրենքով սահմանված իրավասու մարմինը:
37. Ամպային տիրույթում պաշտոնական կայքերի տեղակայումից հետո դրանց նկատմամբ սույն հավելվածով սահմանվող պահանջների պահպանման և տեղեկատվական անվտանգության ապահովման աշխատանքների վերահսկողությունն իրականացնում են օրենսդրությամբ սահմանված կարգով համապատասխան վերահսկող մարմինները։
38. Պաշտոնական կայքերի տեղեկատվական ռեեստրի մշակումը, սպասարկումը և վարումն իրականացնում է «Հայաստանի տեղեկատվական համակարգերի գործակալություն» հիմնադրամը, որը հանդիսանում է նաև ռեեստրի անվտանգության պատասխանատուն։»:
|
Հայաստանի Հանրապետության |
Ա. Հարությունյան |
|
12.09.2024 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ |
| Փոփոխող ակտ | Համապատասխան ինկորպորացիան |
|---|
| Փոփոխող ակտ | Համապատասխան ինկորպորացիան |
|---|