ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

16 սեպտեմբերի 2022 թվականի N 1448-Ն

ՍՆՆԴԱՄԹԵՐՔԻ ԱՆՎՏԱՆԳՈՒԹՅԱՆ, ԱՆԱՍՆԱԲՈՒԺՈՒԹՅԱՆ ԵՎ ԲՈՒՍԱՍԱՆԻՏԱՐԻԱՅԻ ՈԼՈՐՏՆԵՐՈՒՄ ԱԶԳԱՅԻՆ ՌԵՖԵՐԵՆՍ ՊԵՏԱԿԱՆ ՓՈՐՁԱՐԿՄԱՆ ԼԱԲՈՐԱՏՈՐԻԱՆԵՐԻ ՆՇԱՆԱԿՄԱՆ ԿԱՐԳԸ ՍԱՀՄԱՆԵԼՈՒ ՄԱՍԻՆ
(վերնագիրը լրաց. 08.05.24 N 657-Ն)

Հիմք ընդունելով «Սննդամթերքի անվտանգության պետական վերահսկողության մասին» օրենքի 28-րդ հոդվածի 1-ին մասը` Հայաստանի Հանրապետության կառավարությունը որոշում է.

1. Սահմանել սննդամթերքի անվտանգության, անասնաբուժության և բուսասանիտարիայի ոլորտներում ազգային ռեֆերենս պետական փորձարկման լաբորատորիաների նշանակման կարգը՝ համաձայն հավելվածի:

(1-ին կետը լրաց. 08.05.24 N 657-Ն)

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Հայաստանի Հանրապետության վարչապետ	Ն. Փաշինյան
Երևան

16.09.2022 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ

Հավելված ՀՀ կառավարության 2022 թվականի սեպտեմբերի 16-ի N 1448-Ն որոշման

ՍՆՆԴԱՄԹԵՐՔԻ ԱՆՎՏԱՆԳՈՒԹՅԱՆ, ԱՆԱՍՆԱԲՈՒԺՈՒԹՅԱՆ ԵՎ ԲՈՒՍԱՍԱՆԻՏԱՐԻԱՅԻ ՈԼՈՐՏՆԵՐՈՒՄ ԱԶԳԱՅԻՆ ՌԵՖԵՐԵՆՍ ՊԵՏԱԿԱՆ ՓՈՐՁԱՐԿՄԱՆ ԼԱԲՈՐԱՏՈՐԻԱՆԵՐԻ ՆՇԱՆԱԿՄԱՆ
(վերնագիրը լրաց. 08.05.24 N 657-Ն)

1. Սույն կարգով կարգավորվում են սննդամթերքի անվտանգության, անասնաբուժության և բուսասանիտարիայի ոլորտներում ազգային ռեֆերենս պետական փորձարկման լաբորատորիաների (այսուհետ՝ ռեֆերենս պետական լաբորատորիա) նշանակման հետ կապված հարաբերությունները։

(1-ին կետը լրաց. 08.05.24 N 657-Ն)

2. Ռեֆերենս լաբորատորիաների նշանակումը հետապնդում է հետևյալ նպատակները՝

1) համապատասխանության պարտադիր գնահատման ենթակա և տեխնիկական կանոնակարգման օբյեկտ հանդիսացող արտադրանքի որոշակի ցուցանիշների՝ այլ լաբորատորիաների կողմից կատարված փորձարկումների (չափումների) արդյունքների ճշգրտության և արժանահավատության հաստատում կամ հերքում.

2) ռեֆերենս գործունեության ոլորտում չափումների միասնականության ապահովում, այդ թվում՝ Միավորների միջազգային համակարգի (SI), ազգային էտալոնների և (կամ) միջազգային էտալոնային միավորների մեծության հետ չափումների արդյունքների հետագծելիության կիրառմամբ.

3) ռեֆերենս գործունեության ոլորտում իրականացված փորձարկումների (չափումների) իրարամերժ արդյունքների առաջացման դեպքում Հայաստանի Հանրապետությունում ռեֆերենս լաբորատորիայի կողմից տրամադրված փորձարկումների (չափումների)՝ որպես վերջնական և հավաստի արդյունքի ապահովում և ընդունում.

4) ռեֆերենս ծառայությունների հասանելիության ապահովում արտադրողների, վերահսկողություն իրականացնող մարմինների և նշված ծառայություններից օգտվելու ցանկություն ունեցող անձանց համար:

(2-րդ կետը խմբ. 08.05.24 N 657-Ն)

3. Ռեֆերենս լաբորատորիաների նշանակումն իրականացվում է՝ հիմնվելով հետևյալ սկզբունքների վրա՝

1) փորձարկման մեթոդների, չափումների և կանոնների միասնականություն․

2) ռեֆերենս լաբորատորիաների նշանակման անկողմնակալություն.

3) ռեֆերենս համակարգի լաբորատորիաների գործունեության տեղեկատվության թափանցիկություն.

4) փորձարկման լաբորատորիաների և ռեֆերենս լաբորատորիաների միջև մրցակցության բացառում:

4. Ռեֆերենս լաբորատորիաները նշանակվում են Հայաստանի Հանրապետության էկոնոմիկայի նախարարության (այսուհետ՝ լիազոր մարմին) կողմից 3 տարի ժամկետով, բայց ոչ ավելի, քան ռեֆերենս գործունեության ոլորտում հավատարմագրման վկայագրի գործողության ժամկետը։

(4-րդ կետը փոփ. 08.05.24 N 657-Ն)

5. Ռեֆերենս լաբորատորիան ռեֆերենս է նշանակվում ռեֆերենս գործունեության ոլորտներում մեկ կամ մի քանի փորձարկման (չափման) ցուցանիշներով։

(5-րդ կետը փոփ. 08.05.24 N 657-Ն)

6. Ռեֆերենս լաբորատորիան չի կարող իրականացնել նույն նմուշի ընթացիկ և ռեֆերենս փորձարկումներ (չափումներ): Ռեֆերենս լաբորատորիայի կողմից ռեֆերենս գործունեության ոլորտում իրականացրած փորձարկումը (չափումը) հանդիսանում է վերջնական։

(6-րդ կետը խմբ. 08.05.24 N 657-Ն)

7. Ռեֆերենս լաբորատորիաները ոչ ռեֆերենս հետազոտության գործառույթների շրջանակներում կարող են իրականացնել ձեռնարկատիրական գործունեություն:

(7-րդ կետը խմբ. 08.05.24 N 657-Ն)

2. ՀԱՍԿԱՑՈՒԹՅՈՒՆՆԵՐ
(վերնագիրը խմբ. 08.05.24 N 657-Ն)

8. Սույն կարգում կիրառվող հասկացություններն են՝

1) ռեֆերենս մեթոդ՝ չափումներ իրականացնելու մանրազնին ուսումնասիրված մեթոդ, որի չափման անորոշության արժեքները համապատասխանում են կիրառվող մեթոդով չափումների արժեքներին, հատկապես նույն արժեքների չափման ընթացակարգերի ճշգրտության և ստանդարտ նմուշների գնահատման համար.

2) ռեֆերենս գործունեության ոլորտ՝ փորձարկումների (չափումների) և չափումների ոլորտ, որը սահմանվում է ռեֆերենս լաբորատորիաների կողմից ռեֆերենս գործառույթների իրականացման նպատակով.

3) ընթացակարգ՝ լաբորատորիայի կողմից հաստատված գործունեություն կամ գործընթացի իրականացման եղանակ.

4) ռեֆերենս լաբորատորիայի նշանակում՝ սույն կարգի իմաստով ռեֆերենս ոլորտում փորձարկման լաբորատորիային ռեֆերենս գործառույթների իրականացման լիազորության վերապահում․

5) ռեֆերենս նմուշ՝ վիճահարույց հարցերի առաջացման դեպքում լաբորատոր նմուշի հետ նույն ժամանակ և նույն պայմաններում պատրաստված արտադրանքի նմուշ, որն ընդունվում է նմուշառման մասնակիցների կողմից՝ կիրառելու որպես լաբորատոր նմուշ.

6) լաբորատոր նմուշ՝ նմուշառման մասնակիցների կողմից լաբորատոր հետազոտության համար նմուշառված արտադրանք:

(8-րդ կետը փոփ., լրաց. 08.05.24 N 657-Ն)

8.1. Սույն կարգում օգտագործված այլ հասկացություններն ունեն «Տեխնիկական կանոնակարգման մասին», «Չափումների միասնականության ապահովման մասին», «Հավատարմագրման մասին» օրենքներով սահմանված իմաստը և նշանակությունը:

(8.1-ին կետը լրաց. 08.05.24 N 657-Ն)

9․ Ռեֆերենս լաբորատորիա նշանակվելու համար լաբորատորիան պետք է բավարարի հետևյալ չափանիշները՝

1) պետք է լինի հավատարմագրված և նշանակված՝ հավատարմագրման և տեխնիկական կանոնակարգման ոլորտներում գործող օրենսդրությամբ սահմանված պահանջներին համապատասխան.

2) ներառված լինի «Եվրասիական տնտեսական միության սերտիֆիկացման մարմինների և փորձարկման լաբորատորիաների (կենտրոնների) միասնական ռեեստր»-ում.

3) ունենա ռեֆերենս գործունեության ոլորտում լաբորատոր փորձարկումների իրականացման և արդյունքների վերլուծության առնվազն 5 տարվա փորձ, համապատասխան որակավորում ունեցող իրազեկ աշխատակիցներ.

4) ունենա անհրաժեշտ տարածքներ՝ ռեֆերենս գործունեության ոլորտում փորձարկումների (չափումների) իրականացման և սարքավորումների տեղակայման համար.

5) ունենա չափումների միասնականության ապահովման ոլորտում գործող օրենսդրության համապատասխան հավաստված ստանդարտ նմուշներ (չափանմուշներ), աշխատանքային չափանմուշներ, իսկ դրանց բացակայության դեպքում՝ միջազգային ստանդարտին համաձայն հավատարմագրված մարմնի կողմից պատրաստված չափանմուշներ․

6) ունենա ռեֆերենս նյութերի ձեռքբերման, ռեֆերենս նյութերի և ռեֆերենս նմուշների պահպանման և օգտագործման ընթացակարգեր.

7) ունենա չափումների անորոշության գնահատման ընթացակարգեր.

8) երաշխավորի ռեֆերենս գործունեության ոլորտում ռեֆերենս նմուշների և ռեֆերենս նյութերի հետազոտությունների (փորձարկումների) և չափումների իրականացման ինքնուրույնություն՝ չընդգրկելով այլ փորձարկման լաբորատորիաների.

9) երաշխավորի ռեֆերենս գործունեության ոլորտում իրենց անկախությունը և անկողմնակալությունը, այն է՝ ռեֆերենս լաբորատորիան պետք է անկախ լինի փորձարկվող արտադրանքի արտադրողից, մատակարարից, իրացնողից, չի կարող հանդես գա որպես արտադրանքի նախագծող, արտադրող, մատակարար, տեղադրող, սեփականատեր կամ որպես նշված կողմերից մեկի նշանակված լիազոր ներկայացուցիչ կամ անմիջականորեն ներգրավված լինի համապատասխան արտադրանքի արտադրման կամ ստեղծման, շուկայահանման, տեղադրման, վաճառքի աշխատանքների մեջ.

10) երաշխավորի ռեֆերենս գործունեության ոլորտի մասին անհրաժեշտ տեղեկատվության թափանցիկությունն իր պաշտոնական կայքէջում.

11) երաշխավորի մասնակցություն ռեֆերենս գործունեության ոլորտում ոչ ուշ, քան 2 տարին 1 անգամ որակավորման ստուգման ընկերությունների կողմից կազմակերպվող որակավորման ստուգմանը՝ ապահովելով դրական եզրակացության առկայություն:

(9-րդ կետը խմբ. 08.05.24 N 657-Ն)

10. Սննդամթերքի անվտանգության, անասնաբուժության և բուսասանիտարիայի ոլորտներում ռեֆերենս լաբորատորիա նշանակվելու համար լիազոր մարմինն իր պաշտոնական կայքէջում հրապարակում է հայտարարություն։ Հայտերը ներկայացնելու համար սահմանվում է հայտարարության հրապարակման օրվանից երկշաբաթյա ժամկետ։

11. Լաբորատոր փորձարկումներ (չափումներ) իրականացնող կազմակերպությունները (այսուհետ՝ հայտատու) կարող են դիմել սննդամթերքի անվտանգության, անասնաբուժության և բուսասանիտարիայի ոլորտներում մեկ կամ մի քանի հետազոտական ցուցանիշներով ռեֆերենս լաբորատորիա նշանակվելու համար, եթե բավարարում են սույն կարգի 9-րդ կետով սահմանված չափանիշները և ներկայացնում են սույն կարգի 12-րդ կետով պահանջվող փաստաթղթերը:

(11-րդ կետը փոփ. 08.05.24 N 657-Ն)

12. Ռեֆերենս լաբորատորիա նշանակվելու համար հայտատուն էլեկտրոնային եղանակով (իսկ դրա անհնարինության դեպքում թղթային տարբերակով) լիազոր մարմնի հայտարարության մեջ նշված էլեկտրոնային հասցեին է ուղարկում էլեկտրոնային կամ թղթային ստորագրությամբ հայտ՝ համաձայն սույն հավելվածի N 1 ձևի, որին կցվում են`

1) ԳՕՍՏ ԻՍՕ/ԻԷԿ 17025 «Փորձարկման և տրամաչափարկման լաբորատորիաների իրազեկությանը ներկայացվող ընդհանուր պահանջներ» (ISO/IEC 17025 «General requirements for the competence of testing and calibration laboratories») հավատարմագրման վկայագրի պատճենը.

2) հավատարմագրված միջազգային կազմակերպությունների կողմից կազմակերպվող որակի արտաքին գնահատման ամենամյա ծրագրերին վերջին 2 տարվա ընթացքում առնվազն մեկ անգամ մասնակցությունը հավաստող փաստաթղթերի կամ վկայագրերի պատճենները.

3) մեծությունների ելակետային արժեքների չափումների ռեֆերենս լաբորատորիայի փորձարկումների (չափումների) ցանկը.

4) լաբորատոր հետազոտության իրականացման ծրագիրը՝ առաջարկվող ռեֆերենս մեկ կամ մի քանի ցուցանիշով փորձարկումների (չափումների) ծավալների, մասնագիտական և տեխնիկական հագեցվածության տվյալների ընդգրկմամբ.

5) լաբորատոր հետազոտության ընթացքում կիրառվող ռեֆերենս մեթոդի (մեթոդների) ցանկը.

6) աշխատողների, սարքավորումների և լաբորատոր տարածքների վերաբերյալ տեղեկատվություն (ներառյալ աշխատողների որակավորումը հավաստող փաստաթղթերը, սարքավորումների տեխնիկական բնութագրերը, լաբորատոր տարածքների հատակագծերը, այդ թվում՝ սեփականության կամ վարձակալության վկայականները և այլն).

7) սույն կարգի 9-րդ կետում նշված պահանջները հավաստող փաստաթղթերը։

(12-րդ կետը փոփ. 08.05.24 N 657-Ն)

13. Յուրաքանչյուր դիմումի և կից ներկայացված փաստաթղթերի ամբողջականության, սույն կարգով սահմանված չափանիշների հավաստիության ուսումնասիրության և համապատասխանության վերաբերյալ եզրակացության տրամադրման համար լիազոր մարմնի կողմից հայտարարությունը տալու օրը, ինչպես նաև սույն կարգի 25-րդ կետի համաձայն ներկայացված հաշվետվությունների ներկայացման օրը լիազոր մարմնի ղեկավարի հրամանով ստեղծվում է 5 անդամից կազմված հանձնաժողով (այսուհետ՝ հանձնաժողով):

14. Հայտերն ստանալու մասին լիազոր մարմինը տեղեկացնում է հայտատուին ինքնաշխատ էլեկտրոնային հաղորդագրությամբ՝ հայտը ներկայացնելու պահին հայտում նշված էլեկտրոնային հասցեին ծանուցում ուղարկելու միջոցով:

15. Հայտը ներկայացնելուց հետո մեկօրյա ժամկետում հայտում և կից փաստաթղթերում տեխնիկական բնույթի սխալներ, ջնջումներ, վրիպակներ հայտնաբերելու կամ ներկայացված փաստաթղթերը թերի լինելու դեպքում հանձնաժողովը պաշտոնապես տեղեկացնում է դրա մասին հայտատուին՝ հնարավորություն տալով եռօրյա ժամկետում վերացնել թերությունները:

16. Հայտը ներկայացնելուց հետո եռօրյա ժամկետում տեխնիկական բնույթի թերությունները վերացնելու նախաձեռնությամբ կարող է հանդես գալ նաև հայտատուն:

17. Սույն կարգի 15-րդ և 16-րդ կետերով սահմանված տեխնիկական բնույթի թերությունները վերացնելու համար սահմանվող ժամանակահատվածը սույն կարգի 19-րդ կետով սահմանված ժամանակահատվածի հետ համընկնելու կամ գերազանցելու դեպքում հանձնաժողովն ընդունում է որոշում՝ օրենքին և սույն կարգին համապատասխանության կամ անհամապատասխանության վերաբերյալ եզրակացությունը կազմելու վերջնաժամկետն առավելագույնը 3 օրով երկարաձգելու մասին:

18. Ակնհայտ կեղծ փաստաթղթեր ներկայացնելու, սույն կարգի 15-րդ և 16-րդ կետերով սահմանված ժամկետում թերությունները չվերացնելու, ինչպես նաև սույն կարգի 22-րդ կետով սահմանված դեպքում հայտը մերժվում է:

19. Սույն կարգի 9-րդ կետում նշված չափանիշներին համապատասխանությունը և փաստաթղթերի հավաստիությունը գնահատելու նպատակով հանձնաժողովն իրականացնում է յուրաքանչյուր հայտի և կից փաստաթղթերի ուսումնասիրություն և լիազոր մարմնի ղեկավարին է ներկայացնում համապատասխանության կամ անհամապատասխանության հիմնավորված եզրակացություն՝ սույն կարգի 15-րդ կետով սահմանված հայտարարության ներկայացման համար սահմանված ժամկետն ավարտվելուն հաջորդող 7 աշխատանքային օրվա ընթացքում:

20. Հանձնաժողովը սույն կարգի 19-րդ կետով սահմանված ժամկետը լրանալուն հաջորդող օրը լիազոր մարմնի ղեկավարին ներկայացնում է ներկայացված հայտերի վերաբերյալ համապատասխանության հիմնավորված եզրակացությունները, որոնց հիման վրա լիազոր մարմնի ղեկավարն ընդունում է հրաման՝ սույն կարգի պահանջները բավարարող հայտատուին (հայտատուներին) հայտարարված ցուցանիշով ռեֆերենս լաբորատորիա նշանակելու մասին:

21. Ռեֆերենս լաբորատորիա նշանակելու մասին հրամանը և համապատասխանության հիմնավորված եզրակացությունը նույն օրն էլեկտրոնային եղանակով տրամադրվում է հայտատուին:

22. Լիազոր մարմնի ղեկավարն անհամապատասխանության հիմնավորված եզրակացությունների հիման վրա ընդունում է հրաման՝ հայտը մերժելու մասին՝ սույն կարգի 19-րդ կետով սահմանված ժամկետը լրանալուն հաջորդող օրը և նույն օրն անհամապատասխանության հիմնավորված եզրակացությունների հետ մեկտեղ էլեկտրոնային եղանակով պաշտոնապես ներկայացվում է սույն կարգի պահանջները չբավարարող հայտատուին (հայտատուներին):

23. Ռեֆերենս լաբորատորիաների նշանակման և դադարեցման վերաբերյալ տեղեկատվությունը լիազոր մարմինը հրապարակում է իր պաշտոնական կայքէջում՝ հրամանն ընդունվելուց հետո 3 աշխատանքային օրվա ընթացքում: Ռեֆերենս լաբորատորիաների նշանակման և դադարեցման մասին տեղեկատվությունը 3 աշխատանքային օրվա ընթացքում տրամադրում է նաև Եվրասիական տնտեսական հանձնաժողովին՝ Եվրասիական տնտեսական միության պաշտոնական կայքէջում տեղադրելու համար։

24. Հանձնաժողովը դադարեցնում է իր գործունեությունը ռեֆերենս լաբորատորիա նշանակվելու, ինչպես նաև սույն կարգի 26-րդ կետով սահմանված ժամկետի ավարտման պահից:

25. Ռեֆերենս լաբորատորիա նշանակվելուց հետո՝ յուրաքանչյուր տարի, ռեֆերենս լաբորատորիաները լիազոր մարմնին ներկայացնում են ռեֆերենս գործունեության վերաբերյալ հաշվետվություններ: Հաշվետվությունների ձևը սահմանում է լիազոր մարմինը:

26. Սույն կարգի 25-րդ կետով սահմանված կարգով ներկայացված հաշվետվությունները 5 աշխատանքային օրվա ընթացքում ուսումնասիրվում են հանձնաժողովի կողմից և սույն կարգի 3-րդ գլխում սահմանված չափանիշներին անհամապատասխանություններ արձանագրելու դեպքում լիազոր մարմինն ընդունում է լաբորատորիայի՝ ռեֆերենս նշանակումը դադարեցնելու մասին հրաման և 1 աշխատանքային օրվա ընթացքում էլեկտրոնային եղանակով ծանուցում կազմակերպությանը:

27. Լիազոր մարմինը պարտավոր է երաշխավորել սույն կարգի համաձայն լիազոր մարմին ներկայացված հայտատուների փաստաթղթերի գաղտնիությունը, առևտրային գաղտնիքի և անձնական տվյալների պաշտպանությունը:

28. Ռեֆերենս լաբորատորիայի նշանակումը դադարեցվում է՝

1) ռեֆերենս լաբորատորիայի կողմից համապատասխան դիմում ներկայացնելու դեպքում.

2) սույն կարգի 3-րդ գլխում սահմանված չափանիշներին անհամապատասխանություններ արձանագրելու դեպքում:

Ձև N 1

_______________________________________

__________________

(լիազոր մարմնի անվանումը)

Հայտատու __________________________________________________________________________ (իրավաբանական անձի անվանումը, անհատ ձեռնարկատիրոջ անունը, ազգանունը, __________________________________________________________ հեռախոսահամարը և էլեկտրոնային հասցեն) __________________________________________________________ գործունեության ոլորտը/տեսակը)   Գործունեության վայրը ________________________________________________________________ (իրավաբանական անձի, անհատ ձեռնարկատիրոջ գործունեության վայրը)   Իրավաբանական անձի պետական գրանցման համարը, անհատ ձեռնարկատիրոջ պետական հաշվառման համարը _________________________   Հարկ վճարողի հաշվառման համարը _________________________   Խնդրում եմ նշանակել ռեֆերենս լաբորատորիա _______________________ հետազոտական ցուցանիշով (ցուցանիշներով)   Հայտին կից ներկայացնում եմ ________________________________________________________։ Հայտնում եմ, որ ներկայացված փաստաթղթերում առկա տվյալներն ամբողջական են և հավաստի:   Հայտատու ____________________                       (ստորագրությունը) _____________________ (անունը, ազգանունը)   _____ _______________ 20  թ.

(հավելվածը լրաց., խմբ., փոփ. 08.05.24 N 657-Ն)

Հայաստանի Հանրապետության վարչապետի աշխատակազմի ղեկավար

Ա. Հարությունյան

16.09.2022 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ

Պաշտոնական հրապարակման օրը՝ 19 սեպտեմբերի 2022 թվական: