ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

18 հուլիսի 2024 թվականի N 1127-Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2023 ԹՎԱԿԱՆԻ ՍԵՊՏԵՄԲԵՐԻ 28-Ի N 1666-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ

Հիմք ընդունելով «Նորմատիվ իրավական ակտերի մասին» Հայաստանի Հանրապետության օրենքի 33-րդ և 34-րդ հոդվածների պահանջները` Հայաստանի Հանրապետության կառավարությունը որոշում է.

1. Հայաստանի Հանրապետության կառավարության 2023 թվականի սեպտեմբերի 28-ի «Հանրային իշխանության մարմինների (բացառությամբ տեղական ինքնակառավարման մարմինների) և պետական ոչ առևտրային կազմակերպությունների պաշտոնատար անձանց ծառայողական և այդ մարմիններին սպասարկող ավտոմեքենաների հատկացման ու շահագործման, պետական պաշտոն կամ պետական ծառայության պաշտոն զբաղեցնող անձանց տրանսպորտային ծախսերի փոխհատուցման կարգը, առանձին մարմիններին հատկացվող ծառայողական և սպասարկող ավտոմեքենաների սահմանաքանակները, ավտոմեքենաների վառելիքի, յուղերի ու քսուքների ծախսի, ավտոդողերի վազքի, կուտակչային մարտկոցների ծառայության ժամկետների նորմաները, պաշտոնատար անձանց ծառայողական և այդ մարմիններին սպասարկելու նպատակով ձեռք բերվող ավտոմեքենաների առանձին չափորոշիչները հաստատելու մասին» N 1666-Ն որոշման (այսուհետ՝ որոշում) մեջ կատարել հետևյալ փոփոխությունները և լրացումները՝

1) որոշման 3-րդ կետը «ավտոմեքենա։» բառից հետո լրացնել «Հայաստանի Հանրապետության նախագահի աշխատակազմին՝ նախագահի կողմից իրականացվող գործառույթների պատշաճ կատարումն ապահովելու նպատակով, բացի սույն որոշմամբ հաստատված հավելված N 3-ով սահմանված դեպքերից, ամրացվում է ևս 7 տարբերանշանով սպասարկման ավտոմեքենա։» բառերով.

2) որոշման 8-րդ կետը շարադրել հետևյալ խմբագրությամբ՝

«8. Հաստատել Հայաստանի Հանրապետության հանրային իշխանության մարմինների (բացառությամբ սույն որոշման N 1 հավելվածով հաստատված կարգի 1-ին կետում նշված մարմինների) աշխատակազմերին ամրացված ծառայողական ավտոմեքենաների հատկացման և շահագործման, ինչպես նաև պետական պաշտոն զբաղեցնող անձանց տրանսպորտային ծախսերի փոխհատուցման կարգը և առանձին չափորոշիչները՝ համաձայն հավելված N 3-ի։».

3) որոշման 9-րդ կետի 1-ին ենթակետում «կազմակերպություններում» բառը փոխարինել «պետական ոչ առևտրային և առևտրային կազմակերպություններում» բառերով.

4) որոշումը լրացնել հետևյալ բովանդակությամբ 9.1-ին կետով՝

«9.1. Առաջարկել Հայաստանի Հանրապետության հանրային իշխանության մարմինների (բացառությամբ սույն որոշման N 1 հավելվածով հաստատված կարգի 1-ին կետում նշված մարմինների) ղեկավարներին՝ չորսամսյա ժամկետում տրանսպորտային միջոցների գնման գործընթացը համապատասխանեցնել սույն որոշմամբ հաստատված N 3 հավելվածի դրույթներին և վեցամսյա ժամկետում կոմիտե ներկայացնել տեղեկատվություն սույն որոշմամբ հաստատված N 3 հավելվածի կատարման ընթացքի մասին, ինչպես նաև իրականացնել ավտոմեքենաների հասանելի սահմանաչափը գերազանցող տրանսպորտային միջոցների հանձնումը կոմիտեին՝ Հայաստանի Հանրապետության օրենսդրությամբ սահմանված կարգով:».

5) որոշման 10-րդ կետի 2-րդ ենթակետում «9-րդ կետով» բառերը փոխարինել «9-րդ և 9.1-ին կետերով» բառերով.

6) որոշումը լրացնել N 3 հավելվածով՝ համաձայն հավելվածի.

7) որոշման N 2 հավելվածի 19-րդ կետի 3-րդ ենթակետն ուժը կորցրած ճանաչել։

2. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրվանից:

Հայաստանի Հանրապետության փոխվարչապետ	Մ. Գրիգորյան
Երևան

18.07.2024 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ

Հավելված ՀՀ կառավարության 2024 թվականի հուլիսի 18-ի N 1127-Ն որոշման

«Հավելված N 3 ՀՀ կառավարության 2023 թվականի սեպտեմբերի 28-ի N 1666-Ն որոշման

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՀԱՆՐԱՅԻՆ ԻՇԽԱՆՈՒԹՅԱՆ ՄԱՐՄԻՆՆԵՐԻ (ԲԱՑԱՌՈՒԹՅԱՄԲ ՍՈՒՅՆ ՈՐՈՇՄԱՆ N 1 ՀԱՎԵԼՎԱԾՈՎ ՀԱՍՏԱՏՎԱԾ ԿԱՐԳԻ 1-ԻՆ ԿԵՏՈՒՄ ՆՇՎԱԾ ՄԱՐՄԻՆՆԵՐԻ) ԱՇԽԱՏԱԿԱԶՄԵՐԻՆ ԱՄՐԱՑՎԱԾ ԾԱՌԱՅՈՂԱԿԱՆ ԱՎՏՈՄԵՔԵՆԱՆԵՐԻ ՀԱՏԿԱՑՄԱՆ ԵՎ ՇԱՀԱԳՈՐԾՄԱՆ, ԻՆՉՊԵՍ ՆԱԵՎ ՊԵՏԱԿԱՆ ՊԱՇՏՈՆ ԶԲԱՂԵՑՆՈՂ ԱՆՁԱՆՑ ՏՐԱՆՍՊՈՐՏԱՅԻՆ ԾԱԽՍԵՐԻ ՓՈԽՀԱՏՈՒՑՄԱՆ ԿԱՐԳԸ ԵՎ ԱՌԱՆՁԻՆ ՉԱՓՈՐՈՇԻՉՆԵՐԸ

1. Սույն կարգով կարգավորվում են Հայաստանի Հանրապետության դատախազության, Հայաստանի Հանրապետության կենտրոնական բանկի, Հայաստանի Հանրապետության քննչական կոմիտեի, Հայաստանի Հանրապետության մրցակցության պաշտպանության հանձնաժողովի, Հեռուստատեսության և ռադիոյի հանձնաժողովի, Հայաստանի Հանրապետության կենտրոնական ընտրական հանձնաժողովի, Հայաստանի Հանրապետության կոռուպցիայի կանխարգելման հանձնաժողովի, Հանրային ծառայությունները կարգավորող հանձնաժողովի, Հայաստանի Հանրապետության հաշվեքննիչ պալատի, Հայաստանի Հանրապետության մարդու իրավունքների պաշտպանի գրասենյակի, Հայաստանի Հանրապետության հակակոռուպցիոն կոմիտեի, Հայաստանի Հանրապետության բարձրագույն դատական խորհրդի, Հանրային հեռարձակողի խորհրդի, Հայաստանի Հանրապետության Ազգային ժողովի, Հայաստանի Հանրապետության նախագահի, Հայաստանի Հանրապետության սահմանադրական դատարանի աշխատակազմերին (այսուհետ՝ հանրային իշխանության մարմիններ) ծառայողական ավտոմեքենաների հատկացման և շահագործման, ինչպես նաև պետական պաշտոն զբաղեցնող անձանց կանոնադրական գործառույթների իրականացման նպատակով տրամադրված տրանսպորտային ծախսերի փոխհատուցման հետ կապված փոխհարաբերությունները և առանձին չափորոշիչները։

2. Ծառայողական ավտոմեքենաների հատկացման, շահագործման կամ հանրային իշխանության մարմինների կանոնադրական գործառույթների իրականացման նպատակով տրամադրված տրանսպորտային ծախսերի փոխհատուցման, ինչպես նաև ծառայողական և սպասարկման ավտոմեքենաների սահմանաքանակների սահմանման կարգավորումները պետք է ապահովեն հետևյալ պահանջները՝

1) հանրային իշխանության մարմինների բնականոն գործունեությունը կազմակերպելու նպատակով տրանսպորտային կարիքների նկատմամբ պահանջների բավարարումը.

2) հանրային իշխանության մարմինների ծառայողական ավտոմեքենաների թվաքանակի օպտիմալացումը, ծառայողական ավտոմեքենաների օգտագործման արդյունավետության շարունակականության բարձրացումը և Հայաստանի Հանրապետության պետական բյուջեի միջոցների տնտեսումը.

3) հանրային իշխանության մարմինների գործառույթների ու զարգացման հեռանկարային ծրագրերի և դրանց առաջադրանքների կատարման և ծառայողական ավտոմեքենաների նկատմամբ պահանջի ու տրանսպորտային ծախսերի փոխհատուցման չափի սահմանման միջև ուղղակի կապի ապահովումը.

4) հանրային իշխանության մարմինների գործունեության օպերատիվ կազմակերպման ապահովումը.

5) հանրային իշխանության մարմինների աշխատանքային պայմանների շարունակական բարելավումը.

6) հանրային իշխանության մարմիններում պաշտոնատար անձանց զբաղեցրած պաշտոնին համապատասխան պատշաճ սպասարկման ապահովումը։

3. Տրանսպորտային միջոցների նկատմամբ պահանջը բավարարվում է՝

1) ծառայողական ավտոմեքենաների հատկացման և շահագործման միջոցով.

2) հանրային իշխանության մարմնի ղեկավարի նախընտրությամբ՝ ծառայողական ավտոմեքենա հատկացնելու փոխարեն տրանսպորտային ծախսերի փոխհատուցման ճանապարհով։

4. Սույն կարգի համաձայն հանրային իշխանության մարմինների ծառայողական ավտոմեքենա են համարվում՝

1) հանրային իշխանության մարմնի ղեկավարի պաշտոն զբաղեցնող անձին սպասարկելու նպատակով նախատեսված ավտոմեքենան (այսուհետ՝ պաշտոնատար անձի սպասարկման ավտոմեքենա), որը հատկացվում է պաշտոնական պարտականությունների կատարման հետ կապված տրանսպորտային փոխադրումներ իրականացնելու համար.

2) հանրային իշխանության մարմինների անձնակազմերի սպասարկման համար նախատեսված ծառայողական ավտոմեքենաները (այսուհետ՝ անձնակազմերի սպասարկման ավտոմեքենա), որոնք հատկացվում են նրանց կողմից պաշտոնական պարտականությունների կատարման հետ կապված տրանսպորտային փոխադրումներ և որոշակի կանոնադրական գործառույթներ իրականացնելու նպատակով։

5. Պաշտոնատար անձի և անձնակազմի սպասարկող ավտոմեքենաներ կարող են լինել՝

1) տարբերանշանով սպասարկման ավտոմեքենաները.

2) գործառնական և հատուկ նշանակության սպասարկման ավտոմեքենաները։

6. Տարբերանշանով ավտոմեքենաներ են համարվում այն ավտոմեքենաները, որոնց դիմապակուն փակցված է հանրային իշխանության մարմնի տարբերանշանը և անվանումը։

7. Գործառնական և հատուկ նշանակության ավտոմեքենաներ են համարվում այն ավտոմեքենաները, որոնք հագեցված են համապատասխան տեխնիկական միջոցներով, ունեն հատուկ կահավորում և գունանշում՝ բացառությամբ օպերատիվ աշխատանքների համար նախատեսված ավտոմեքենաների, կամ նշանակված են կոնկրետ խնդիրների լուծման համար։

8. Պաշտոնատար անձի և անձնակազմի սպասարկող ավտոմեքենաներ հատկացվում են՝

1) հանրային իշխանության մարմնում հաշվառված, օգտագործման մեջ գտնվող, սահմանված կարգի համաձայն օգտակար ծառայության ժամկետը լրացած ավտոմեքենաների փոխարինման համար.

2) հանրային իշխանության մարմնին վերապահված նոր գործառույթի իրականացման համար կամ հաստիքների ավելացման արդյունքում.

3) վթարված կամ շահագործման ոչ ենթակա ավտոմեքենաների փոխարինման համար, եթե առկա է գնահատման համար սահմանված կարգի համաձայն տրված եզրակացությունը։

9. Ավտոմեքենաների օգտակար ծառայության ժամկետը որոշվում է Հայաստանի Հանրապետության ֆինանսների նախարարի 2016 թվականի հունվարի 8-ի թիվ 3-Ն հրամանի (այսուհետ` հրաման) համաձայն։

10. Պաշտոնատար անձի և անձնակազմի սպասարկող ավտոմեքենաները փոխարինվում են առաջին հերթին՝ Հայաստանի Հանրապետության տարածքային կառավարման և ենթակառուցվածքների նախարարության պետական գույքի կառավարման կոմիտեում (այսուհետ` կոմիտե) հաշվառված, օգտակար ծառայության ժամկետում գտնվող, շահագործման համար պիտանի ավտոմեքենաներով կամ դրանց բացակայության դեպքում՝ կոմիտեի կողմից ձեռք բերված նոր ավտոմեքենաներով գույք հատկացնելու մասին Հայաստանի Հանրապետության կառավարության համապատասխան որոշմամբ։

11. Պաշտոնատար անձի և անձնակազմի սպասարկող ավտոմեքենաներն իրենց հատկանիշներով պետք է համապատասխանեն սույն որոշմամբ հաստատված N 2 հավելվածով սահմանված դրույթներին։

12. Սույն որոշմամբ հաստատված N 2 հավելվածով սահմանված չափորոշիչներից տարբերվող չափորոշիչներով կամ հրամանով սահմանված ծառայության ժամկետից պակաս ծառայության ժամկետ ունեցող պաշտոնատար անձանց ծառայողական ավտոմեքենաների ձեռքբերման թույլտվությունը կոմիտեի առաջարկության հիման վրա տալիս է Հայաստանի Հանրապետության կառավարությունը։

13. Պաշտոնատար անձի և անձնակազմի սպասարկող ավտոմեքենաների համար նախատեսված տարբերանշանով ավտոմեքենաների ու գործառնական և հատուկ նշանակության ավտոմեքենաների առավելագույն գները սահմանվում են Հայաստանի Հանրապետության ֆինանսների նախարարի կողմից։

14. Հանրային իշխանության մարմինների համար նոր ավտոմեքենաների ձեռքբերման դեպքում՝

1) ավտոմեքենաների վազքը չի կարող գերազանցել 1000 կիլոմետրը, իսկ արտադրության տարեթիվը պետք է համընկնի ձեռքբերման տարեթվի հետ.

2) ավտոմեքենաների պարտադիր ապահովագրությունն իրականացնում են հանրային իշխանության մարմինները.

3) ավտոմեքենաների գնման պայման է հանդիսանում երաշխիքային սպասարկումը՝ պայմանագրով նախատեսված սակագներով (մեխանիզմներով).

4) ավտոմեքենաների շահագործման ժամկետը չի կարող պակաս լինել հրամանով սահմանված տրանսպորտային միջոցների ամորտիզացիոն մասհանումների տարեկան նորմային համապատասխան հաշվարկված ծառայության ժամկետից։

15. Պաշտոնատար անձի սպասարկող մեկական ավտոմեքենա հատկացվում է՝

1) Հայաստանի Հանրապետության նախագահին, Հայաստանի Հանրապետության նախագահի աշխատակազմի ղեկավարին.

2) Հայաստանի Հանրապետության Ազգային ժողովի նախագահին, տեղակալներին, աշխատակազմի ղեկավարին, խմբակցությունների և հանձնաժողովների նախագահներին.

3) Հայաստանի Հանրապետության սահմանադրական դատարանի նախագահին, դատավորներին.

4) Հայաստանի Հանրապետության կենտրոնական բանկի խորհրդի, Հայաստանի Հանրապետության մրցակցության պաշտպանության հանձնաժողովի, Հեռուստատեսության և ռադիոյի հանձնաժողովի, Հայաստանի Հանրապետության կենտրոնական ընտրական հանձնաժողովի, Հայաստանի Հանրապետության կոռուպցիայի կանխարգելման հանձնաժողովի, Հանրային ծառայությունները կարգավորող հանձնաժողովի, Հայաստանի Հանրապետության բարձրագույն դատական խորհրդի, Հանրային հեռարձակողի խորհրդի անդամներին.

5) Հայաստանի Հանրապետության հաշվեքննիչ պալատի նախագահին և անդամներին.

6) Հայաստանի Հանրապետության գլխավոր դատախազին.

7) Հայաստանի Հանրապետության մարդու իրավունքների պաշտպանին.

8) Հայաստանի Հանրապետության հակակոռուպցիոն կոմիտեի նախագահին.

9) Հայաստանի Հանրապետության քննչական կոմիտեի նախագահին:

16. Անձնակազմի սպասարկման ավտոմեքենաներն ամրացվում են համապատասխան հանրային իշխանության մարմնի աշխատակազմի ղեկավարի կամ գլխավոր քարտուղարի համապատասխան իրավական ակտով, որում նշվում են ամրացվող ավտոմեքենայի բնութագրիչ (այդ թվում՝ տեխնիկական) տվյալները:

17. Անձնակազմի սպասարկման համար նախատեսված տարբերանշանով ավտոմեքենաները հատկացվում են հանրային իշխանության մարմիններին՝ մինչև 100 փաստացի աշխատողին մեկ ավտոմեքենա, իսկ 100-ից ավել աշխատողների դեպքում՝ յուրաքանչյուր 100 փաստացի աշխատողին մեկ ավտոմեքենա սկզբունքով։ Ընդ որում, Հայաստանի Հանրապետության նախագահի, Հայաստանի Հանրապետության Ազգային ժողովի, Հայաստանի Հանրապետության քննչական կոմիտեի, Հայաստանի Հանրապետության հակակոռուպցիոն կոմիտեի և Հայաստանի Հանրապետության դատախազության դեպքում՝ հաշվարկվում է 100 փաստացի աշխատողին մեկ ավտոմեքենա ավելացված մարմնի ղեկավարի տեղակալների թվով սկզբունքով։

18. Հանրային իշխանության մարմինները կարող են սույն որոշման 7-րդ կետի համաձայն ներկայացված համապատասխան հիմնավորման դեպքում օգտվել տրանսպորտային ծախսերի փոխհատուցումից Հայաստանի Հանրապետության ֆինանսների նախարարության համաձայնությամբ և կոմիտեի առաջարկությամբ։

19. Հանրային իշխանության մարմինների տարբերանշանով սպասարկման ու գործառնական և հատուկ նշանակության ավտոմեքենաները հատկացվում են Հայաստանի Հանրապետության կառավարության որոշմամբ (բացառությամբ Հայաստանի Հանրապետության կառավարության 2022 թվականի սեպտեմբերի 8-ի N 1403-Ն որոշմամբ սահմանված դեպքերի), նրանց կողմից համապատասխան հիմնավորմամբ ներկայացված առաջարկի հիման վրա։

20. Հանրային իշխանության մարմինները սպասարկման ու գործառնական և հատուկ նշանակության ավտոմեքենաների նկատմամբ առաջարկը ներկայացնելիս պետք է հաշվի առնեն հետևյալ երկու պայմանի կատարումը՝

1) գործառնական և հատուկ նշանակության փաստացի առկա ավտոմեքենաների քանակը, որպես առաջարկի սահմանային շեմի ապահովում.

2) կանոնադրական գործառույթներով պայմանավորված սույն կետով սահմանված շեմի գերազանցման հիմնավորման անհրաժեշտություն։

21. Անձնակազմի սպասարկման համար նախատեսված տարբերանշանով ավտոմեքենաները՝

1) կարող են օգտագործվել, այդ թվում՝ որպես հերթապահ ավտոմեքենա, ինչպես հանրային իշխանության մարմնի աշխատակիցներին սպասարկելու, այնպես էլ հանրային իշխանության մարմնի մեկ կամ մի քանի ստորաբաժանումների գործառույթներն ապահովելու համար.

2) չեն կարող հատկացվել պաշտոնատար անձանց սպասարկման համար։

22. Հանրային իշխանության մարմիններն ավտոմեքենաների հատկացման համար սույն որոշմամբ սահմանված կարգով պահանջվող դիմումները կոմիտե պետք է ներկայացնեն պետական միջնաժամկետ ծախսերի ծրագրերի և առաջիկա տարվա բյուջետային ֆինանսավորման հայտերը բյուջետային հատկացումների գլխավոր կարգադրիչների կողմից Հայաստանի Հանրապետության ֆինանսների նախարարություն ներկայացնելու ժամկետների ավարտից առնվազն 15 օր առաջ։

23. Կոմիտեն սույն կարգի 22-րդ կետով նշված դիմումը ստանալուց հետո 7 աշխատանքային օրվա ընթացքում քննարկում է դիմումով ներկայացված ավտոմեքենաների նկատմամբ պահանջը, իր հաշվեկշռում հաշվառված շահագործման ենթակա ավտոմեքենաներով բավարարելու կամ նոր ավտոմեքենաների ձեռքբերման նպատակով կոմիտեի կողմից բյուջետային գործընթացի շրջանակներում, իր բյուջետային ֆինանսավորման հայտի մեջ ներառելու հարցը։ Եթե ներկայացված դիմումը հնարավոր չէ բավարարել կոմիտեի հաշվեկշռում հաշվառված ավտոմեքենաների հաշվին, ապա կոմիտեն սահմանված ժամկետում բյուջետային հայտը ներկայացնում է Հայաստանի Հանրապետության ֆինանսների նախարարություն։

24. Կոմիտեն, բյուջետային հայտը սահմանված կարգով ընդունվելու դեպքում, ապահովում է հանրային իշխանության մարմիններին ավտոմեքենաների գնման և հատկացման գործընթացի իրականացումը։

25. Հանրային իշխանության մարմինների ղեկավարների նախընտրությամբ սույն կարգի 8-րդ կետի 1-ին և 3-րդ ենթակետերով նախատեսված ավտոմեքենաներով փոխարինելու կամ 2-րդ ենթակետով նոր ավտոմեքենա հատկացնելու փոխարեն կարող է հատկացվել տրանսպորտային ծախսերի փոխհատուցում (այսուհետ՝ այլընտրանքային տարբերակ) առավելագույնը մեկ ավտոմեքենայի պահպանման համար Հայաստանի Հանրապետության պետական բյուջեով նախատեսված ծախսի չափով։

26. Հանրային իշխանության մարմիններն ավտոմեքենաների նկատմամբ պահանջի այլընտրանքային տարբերակին անցնելու դեպքում պարտավոր են բյուջետային ֆինանսավորման հայտերի ներկայացման սահմանված ժամկետներում հաշվարկել տրանսպորտային ծախսերի փոխհատուցման չափը և այն բյուջետային գործընթացի շրջանակներում ներառել իրենց բյուջետային ֆինանսավորման հայտում։

27. Հանրային իշխանության մարմիններն այլընտրանքային տարբերակի դեպքում տրանսպորտային ծախսերի փոխհատուցման չափը որոշում են՝ ելնելով Հայաստանի Հանրապետության ֆինանսների նախարարության կողմից մշակված մեթոդաբանությունից։

28. Տրանսպորտային ծախսերի փոխհատուցման մեթոդաբանությունն իր մեջ ներառում է երկու տարբերակ՝

1) հանրային իշխանության մարմնի ղեկավարի որոշմամբ ընտրված որոշակի անձանց շրջանակի համար յուրաքանչյուր օրացուցային օրվա կտրվածքով սահմանված որոշակի լիտր վառելիքի (բենզինի սեղմված բնական գազի կամ հեղուկացված նավթային գազի), ինչպես նաև հիբրիդ և էլեկտրական տարբերակով աշխատող տրանսպորտային միջոցների շահագործման դեպքում էլեկտրաէներգիայի արժեքին հավասար գումարի չափով ծախսերի փոխհատուցում.

2) համապատասխան գործառույթների իրականացման համար տաքսի ծառայության ձեռքբերում։

29. Սույն կարգի 28-րդ կետում նշված տարբերակներից որևէ մեկի կամ անձանց շրջանակի ընտրության նպատակահարմարությունը որոշում է հանրային իշխանության մարմնի ղեկավարը։

30. Այլընտրանքային տարբերակի ընտրության դեպքում, եթե այն կոչված է փոխարինելու հանրային իշխանության մարմնի հաշվեկշռում հաշվառված և օգտագործվող ավտոմեքենաներին, ապա հանրային իշխանության մարմինը պարտավոր է բյուջետային հայտն ընդունվելու և բյուջետային ֆինանսավորումը կատարելու դեպքում փոխարինվող ավտոմեքենան մեկ ամսվա ընթացքում հանձնել կոմիտեի տնօրինությանը։

31. Կոմիտեն պարտավոր է իրականացնել հանրային իշխանության մարմինների ծառայողական ավտոմեքենաների, այդ թվում՝ տարբերանշանով ու գործառնական և հատուկ նշանակության ավտոմեքենաների հաշվառում և յուրաքանչյուր հաշվետու տարվա մինչև դեկտեմբերի 20-ը Հայաստանի Հանրապետության վարչապետի աշխատակազմ ներկայացնել ամփոփ տեղեկանք՝ հաշվառման արդյունքների վերաբերյալ։»:

Հայաստանի Հանրապետության վարչապետի աշխատակազմի ղեկավար

Ա. Հարությունյան

19.07.2024 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ

Պաշտոնական հրապարակման օրը՝ 19 հուլիսի 2024 թվական: