ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ԷՆԵՐԳԵՏԻԿԱՅԻ ԲՆԱԳԱՎԱՌՈՒՄ ԼԻՑԵՆԶԻԱ ՈՒՆԵՑՈՂ ԱՆՁԻ ԲԱԺՆԵՄԱՍԻ (ԲԱԺՆԵՏՈՄՍԻ, ՓԱՅԻ) ԿԱՄ ԴՐԱ ՆԿԱՏՄԱՄԲ ԻՐԱՎՈՒՆՔԻ ՕՏԱՐՄԱՆ, ԱՅԼ ԿԵՐՊ ՓՈԽԱՆՑՄԱՆ ԿԱՄ ԳՐԱՎԱԴՐՄԱՆ, ԻՆՉՊԵՍ ՆԱԵՎ ԼԻՑԵՆԶԱՎՈՐՎԱԾ ԳՈՐԾՈՒՆԵՈՒԹՅԱՆ ԻՐԱԿԱՆԱՑՄԱՆ ՀԱՄԱՐ ԱՆՀՐԱԺԵՇՏ ԳՈՒՅՔԻ ԿԱՄ ԴՐԱ ՆԿԱՏՄԱՄԲ ԻՐԱՎՈՒՆՔԻ ՕՏԱՐՄԱՆ, ԱՅԼ ԿԵՐՊ ՓՈԽԱՆՑՄԱՆ ԿԱՄ ԳՐԱՎԱԴՐՄԱՆ ՀԱՄԱՁԱՅՆԵՑՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Հիմք ընդունելով «Էներգետիկայի մասին» օրենքի 17-րդ հոդվածի 1-ին մասի «դ» կետը և 27-րդ հոդվածը՝ Հայաստանի Հանրապետության հանրային ծառայությունները կարգավորող հանձնաժողովը որոշում է.

1. Հաստատել էներգետիկայի բնագավառում լիցենզիա ունեցող անձի բաժնեմասի (բաժնետոմսի, փայի) կամ դրա նկատմամբ իրավունքի օտարման, այլ կերպ փոխանցման կամ գրավադրման, ինչպես նաև լիցենզավորված գործունեության իրականացման համար անհրաժեշտ գույքի կամ դրա նկատմամբ իրավունքի օտարման, այլ կերպ փոխանցման կամ գրավադրման համաձայնեցման կարգը՝ համաձայն հավելվածի:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Հայաստանի Հանրապետության հանրային ծառայությունները կարգավորող հանձնաժողովի նախագահի տեղակալ՝

Մ. Սողոմոնյան

Հավելված Հաստատված է Հայաստանի Հանրապետության հանրային ծառայությունները կարգավորող հանձնաժողովի 2019 թվականի փետրվարի 27-ի N 39-Ն որոշմամբ

ԿԱՐԳ

ԷՆԵՐԳԵՏԻԿԱՅԻ ԲՆԱԳԱՎԱՌՈՒՄ ԼԻՑԵՆԶԻԱ ՈՒՆԵՑՈՂ ԱՆՁԻ ԲԱԺՆԵՄԱՍԻ (ԲԱԺՆԵՏՈՄՍԻ, ՓԱՅԻ) ԿԱՄ ԴՐԱ ՆԿԱՏՄԱՄԲ ԻՐԱՎՈՒՆՔԻ ՕՏԱՐՄԱՆ, ԱՅԼ ԿԵՐՊ ՓՈԽԱՆՑՄԱՆ ԿԱՄ ԳՐԱՎԱԴՐՄԱՆ, ԻՆՉՊԵՍ ՆԱԵՎ ԼԻՑԵՆԶԱՎՈՐՎԱԾ ԳՈՐԾՈՒՆԵՈՒԹՅԱՆ ԻՐԱԿԱՆԱՑՄԱՆ ՀԱՄԱՐ ԱՆՀՐԱԺԵՇՏ ԳՈՒՅՔԻ ԿԱՄ ԴՐԱ ՆԿԱՏՄԱՄԲ ԻՐԱՎՈՒՆՔԻ ՕՏԱՐՄԱՆ, ԱՅԼ ԿԵՐՊ ՓՈԽԱՆՑՄԱՆ ԿԱՄ ԳՐԱՎԱԴՐՄԱՆ ՀԱՄԱՁԱՅՆԵՑՄԱՆ

1. Սույն կարգով սահմանվում է «Էներգետիկայի մասին» օրենքի համաձայն լիցենզիա ունեցող անձի (այսուհետ` լիցենզավորված անձ) բաժնեմասի (բաժնետոմսի, փայի) (այսուհետ՝ բաժնեմաս) կամ դրա նկատմամբ իրավունքի, ինչպես նաև լիցենզավորված գործունեության իրականացման համար անհրաժեշտ հիմնական գույքի կամ դրա նկատմամբ իրավունքի օտարման, այլ կերպ փոխանցման կամ գրավադրման համաձայնեցման կարգը:

2. Լիցենզավորված անձի 25 և ավելի տոկոս բաժնեմասի կամ դրա նկատմամբ իրավունքի, ինչպես նաև լիցենզավորված անձի որոշումները կանխորոշելու հնարավորություն տվող բաժնեմասի կամ դրա նկատմամբ իրավունքի՝ անկախ քանակից, օտարման, այլ կերպ փոխանցման կամ գրավադրման դեպքում լիցենզավորված անձը պարտավոր է նախապես ստանալ Հայաստանի Հանրապետության հանրային ծառայությունները կարգավորող հանձնաժողովի (այսուհետ՝ հանձնաժողով) համաձայնությունը:

3. Լիցենզավորված գործունեության իրականացման համար անհրաժեշտ հիմնական գույքի կամ դրա նկատմամբ իրավունքի օտարման, այլ կերպ փոխանցման կամ գրավադրման համար լիցենզավորված անձը պարտավոր է նախապես ստանալ հանձնաժողովի համաձայնությունը:

4. Սույն կարգի դրույթները չեն տարածվում մինչև 30 ՄՎտ հզորությամբ կայանում էլեկտրական էներգիայի (հզորության) արտադրության, ինչպես նաև մինչև 30 ՄՎտ գումարային հզորությամբ մեկից ավելի կայաններում էլեկտրական էներգիայի (հզորության) արտադրության լիցենզիա ունեցող անձանց վրա, եթե վերջիններս չունեն այլ լիցենզիաներ, որոնց դեպքում պահանջվում է սույն կարգով նախատեսված համաձայնեցում:

5. Լիցենզավորված անձի բաժնեմասը (լիցենզավորված գործունեության իրականացման համար անհրաժեշտ հիմնական գույքը) կամ դրա նկատմամբ իրավունքը ժառանգման կարգով փոխանցելու, վերակազմավորման արդյունքում իրավահաջորդության կարգով անցնելու, գրավադրելու, երաշխավորության արդյունքում փոխանցելու, հարկադիր կարգով իրացման (վաճառքի), սերվիտուտ սահմանելու, լիցենզավորված անձի բանկային հաշիվների, դրամական միջոցների վերաբերյալ գործարքները չեն համարվում սույն կարգի 2-րդ և 3-րդ կետերով նախատեսված իմաստով գործարք և համաձայնեցման ենթակա չեն։

(5-րդ կետը լրաց. 12.05.21 N 171-Ն, փոփ., լրաց. 11.01.23 N 2-Ն)

6. Սույն կարգի 2-րդ կետի իմաստով լիցենզավորված անձի որոշումները կանխորոշելու հնարավորություն տվող բաժնեմասը լիցենզավորված անձի քվեարկելու իրավունք տվող՝ լիցենզավորված անձի որոշումների կայացման վրա ազդելու կամ վերջինիս գործունեության ուղղությունները, ոլորտները կանխորոշելու հնարավորություն տվող բաժնեմասն է՝ անկախ այդ անձի կողմից տվյալ գործարքով ձեռք բերվող բաժնեմասի քանակից:

7. Սույն կարգի 3-րդ կետի իմաստով լիցենզավորված գործունեության իրականացման համար անհրաժեշտ հիմնական գույք (այսուհետ՝ գույք) է համարվում էներգետիկայի բնագավառում լիցենզավորված (կարգավորվող) գործունեությանը մասնակցող կամ երբևէ մասնակցած՝

1) 5 կմ-ից ավելի երկարություն ունեցող 35 Կվ լարման էլեկտրահաղորդման գծերը.

2) 110 Կվ և բարձր լարման էլեկտրահաղորդման գծերը.

3) 35 Կվ և ավելի լարման տրանսֆորմատորները.

4) բարձր ճնշման գազատարները (բացառությամբ դրանց փոխարինման կամ ապամոնտաժման արդյունքում առաջացած խողովակների), գազաբաշխիչ կայանները կամ գազի ստորգետնյա պահեստ-կայանների ճնշակները.

5) շենքերը, շինությունները կամ հողատարածքները, որոնց մակերեսը գերազանցում է 20 քառակուսի մետրը.

6) լիցենզիայով ամրագրված սարքավորումները.

7) սույն կետի 1-6-րդ ենթակետերով չնախատեսված՝ 50 միլիոն և ավելի սկզբնական, իսկ դրա որոշման անհնարինության դեպքում, համապատասխան հիմնավորմամբ՝ շուկայական արժեքով այլ գույքը։

(7-րդ կետը լրաց. 12.05.21 N 171-Ն, 11.01.23 N 2-Ն) 

8. Լիցենզավորված անձը հանձնաժողով է ներկայացնում սույն կարգի պահանջներին համապատասխանող հայտ՝ նախքան`

1) լիցենզավորված անձի 25 և ավելի տոկոս բաժնեմասի կամ դրա նկատմամբ իրավունքի, ինչպես նաև լիցենզավորված անձի որոշումները կանխորոշելու հնարավորություն տվող բաժնեմասի՝ անկախ քանակից, օտարումը՝ վաճառքի, մասնավորեցման (սեփականաշնորհման), փոխանակության, նվիրատվության կամ օրենսդրությամբ նախատեսված (չարգելված) այլ գործարքի կնքումը.

2) լիցենզավորված անձի 25 և ավելի տոկոս բաժնեմասի կամ դրա նկատմամբ իրավունքի, ինչպես նաև լիցենզավորված անձի որոշումները կանխորոշելու հնարավորություն տվող բաժնեմասի՝ անկախ քանակից, այլ կերպ փոխանցումը՝ հավատարմագրային կառավարման հանձնելը կամ օրենսդրությամբ նախատեսված (չարգելված) այլ գործարքի կնքումը.

3) լիցենզավորված անձի 25 և ավելի տոկոս բաժնեմասը կամ դրա նկատմամբ իրավունքի, ինչպես նաև լիցենզավորված անձի որոշումները կանխորոշելու հնարավորություն տվող բաժնեմասի՝ անկախ քանակից, գրավադրումը՝ գրավադրման գործարքի կնքումը.

4) գույքի կամ դրա նկատմամբ իրավունքի օտարումը՝ վաճառքի, մասնավորեցման (սեփականաշնորհման), փոխանակության, նվիրատվության կամ օրենսդրությամբ նախատեսված (չարգելված) այլ գործարքի կնքումը.

5) գույքի կամ դրա նկատմամբ իրավունքի այլ կերպ փոխանցումը՝ վարձակալության, անհատույց օգտագործման, հավատարմագրային կառավարման հանձնելը կամ օրենսդրությամբ նախատեսված (չարգելված) այլ գործարքի կնքումը.

6) գույքի կամ դրա նկատմամբ իրավունքի գրավադրումը` գրավադրման գործարքի կնքումը։

(8-րդ կետը փոփ. 09.02.22 N 50-Ն, 11.01.23 N 2-Ն) 

9. Հայտը ներառում է`

1) բաժնեմաս (գույք) կամ դրա նկատմամբ իրավունք (այսուհետ՝ բաժնեմաս (գույք)) օտարող, այլ կերպ փոխանցող կամ գրավադրող անձի անվանումը (անունը, ազգանունը և հայրանունը), պետական գրանցման (հաշվառման) համարը, անձնագրի կամ անձը հաստատող այլ փաստաթղթի պատճենը,

2) բաժնեմաս (գույք) ձեռք բերող անձի անվանումը (անունը, ազգանունը և հայրանունը), պետական գրանցման (հաշվառման) համարը, անձնագրի կամ անձը հաստատող այլ փաստաթղթի պատճենը, բացառությամբ այն դեպքերի, երբ գործարքի տեսակով պայմանավորված՝ գործարքի կողմը սկզբնական փուլում հայտնի չէ (այդ թվում՝ աճուրդի կամ մրցույթի միջոցով գույքի օտարման դեպքում),

3) բաժնեմասի (գույքի) օտարման, այլ կերպ փոխանցման կամ գրավադրման գործարքի էական պայմանները, աճուրդի դեպքում՝ օտարվող գույքի անվանումը, մեկնարկային գինը, մեկնարկային գինը նվազեցնելու հնարավոր (թույլատրելի) սահմանը,

4) բաժնեմասի (գույքի) բնորոշ հատկանիշները,

5) լիցենզավորված անձի կանոնադրական (բաժնեհավաք կամ փայահավաք) կապիտալում բաժնեմաս ձեռք բերողի մասնակցության նախատեսվող չափը և տոկոսը, վերջինիս պատկանող՝ լիցենզավորված անձի բաժնեմասի (հավաստագրի) քանակը (եթե ունի նման մասնակցություն), նշում ձեռք բերող անձին պատկանող և ձեռք բերվող բաժնեմասերով հավաստվող քվեարկության իրավունքի մասին (բաժնեմասի օտարման դեպքում),

6) գործարքի կնքման հիմնավորումը,

7) բաժնեմասի (գույքի) նկատմամբ իրավունքը հաստատող փաստաթղթի պատճենը, իսկ դրա բացակայության դեպքում՝ համապատասխան հիմնավորմամբ, լիցենզավորված անձի հաշվապահական հաշվառման մեջ տվյալ գույքի հաշվառման գույքային համարը,

8) բաժնեմասը (գույքը) ձեռք բերող անձի անհրաժեշտ փորձի վերաբերյալ հիմնավորող տեղեկություններ,

9) հայտը լրացնող պատասխանատու անձի կոնտակտային տվյալները,

10) հայտը ներկայացնելու տարին, ամիսը և ամսաթիվը,

11) այլ տեղեկություններ և (կամ) կից ներկայացվող փաստաթղթեր՝ լիցենզավորված անձի հայեցողությամբ։

(9-րդ կետը խմբ., լրաց., փոփ. 12.05.21 N 171-Ն, փոփ. 09.02.22 N 50-Ն, խմբ. 11.01.23 N 2-Ն)

10. (կետն ուժը կորցրել է 12.05.21 N 171-Ն)

11. Հայտը ստորագրում է լիցենզավորված անձի գործադիր մարմնի ղեկավարը կամ սահմանված կարգով նրան փոխարինող, կամ լիազորված անձը, իսկ անհատ ձեռնարկատիրոջ դեպքում՝ վերջինս կամ նրա ներկայացուցիչը:

12. Հայտը ներկայացվում է հայերեն, մեկ օրինակից։ Հայտում օտար լեզվով փաստաթուղթ ներկայացնելիս լիցենզավորված անձը պարտավոր է միաժամանակ ներկայացնել դրա` օրենքով սահմանված կարգով կատարված հայերեն թարգմանությունը, բացառությամբ օրենքով նախատեսված դեպքերի։

13. Լիցենզավորված անձն օրենքով սահմանված գաղտնի համարվող տեղեկությունը ներկայացնում է նման փաստաթղթերի շրջանառության կարգին համապատասխան՝ հայտում նշելով տվյալ տեղեկությունը գաղտնի համարելու հիմքը։ Տվյալ դեպքում հանձնաժողովը հայտը քննարկում է օրենքով և այլ իրավական ակտերով սահմանված պահանջների պահպանմամբ:

(13-րդ կետը խմբ. 11.01.23 N 2-Ն)

14. Լիցենզավորված անձն օրենքով սահմանված կարգով պատասխանատվություն է կրում հանձնաժողով ներկայացրած տեղեկատվության հավաստիության և ամբողջականության համար:

(14-րդ կետը լրաց. 12.05.21 N 171-Ն)

15. Հայտը ստանալու օրվանից՝ 15 աշխատանքային օրվա ընթացքում, հանձնաժողովի համապատասխան կառուցվածքային ստորաբաժանումները ստուգում են hայտի (դրան կից ներկայացվող փաստաթղթերի) ճշտությունն ու ամբողջականությունը։ Սույն կարգին համապատասխանության դեպքում հայտը համարվում է ուսումնասիրության ընդունված։

(15-րդ կետը խմբ. 12.05.21 N 171-Ն, փոփ. 09.02.22 N 50-Ն) 

16. (կետն ուժը կորցրել է 12.05.21 N 171-Ն)

17. Եթե ներկայացված հայտը (դրան կից ներկայացվող փաստաթղթերը) չի (չեն) համապատասխանում սույն կարգի պահանջներին, ապա այն չի ընդունվում ուսումնասիրության, ինչի մասին հանձնաժողովը, համապատասխան հիմնավորումներով, սույն կարգի 15-րդ կետում նշված ժամկետում իրազեկում է լիցենզավորված անձին։

(17-րդ կետը խմբ. 12.05.21 N 171-Ն) 

18. Լիցենզավորված անձը, սույն կարգի 17-րդ կետում նշված անհամապատասխանությունները վերացնելուց հետո, կարող է նոր հայտ ներկայացնել հանձնաժողով, որի պարագայում լիցենզավորված անձը և հանձնաժողովն առաջնորդվում են սույն կարգի 15-րդ, 17-րդ և 18-րդ կետերով սահմանված պահանջներով ու ժամկետներով: Լիցենզավորված անձն իրավունք ունի հղում կատարել նախկին հայտով ներկայացված փաստաթղթերին, եթե դրանցում ներկայացված տվյալները նոր հայտի ներկայացման պահին չեն փոփոխվել։

(18-րդ կետը խմբ. 12.05.21 N 171-Ն) 

19. Հանձնաժողովը լիցենզավորված անձի 25 և ավելի տոկոս բաժնեմասի կամ դրա նկատմամբ իրավունքի, ինչպես նաև լիցենզավորված անձի որոշումները կանխորոշելու հնարավորություն տվող բաժնեմասի կամ դրա նկատմամբ իրավունքի օտարման, այլ կերպ փոխանցման կամ գրավադրման գործարքների համաձայնեցման հայտը, սույն կարգի համաձայն ուսումնասիրության ընդունելու օրվան հաջորդող երկու աշխատանքային օրվա ընթացքում, ներկայացնում է Հայաստանի Հանրապետության վարչապետի աշխատակազմ՝ «Էներգետիկայի մասին» օրենքի համաձայն ազգային անվտանգությանը կամ պետական շահերին վնասելու տեսանկյունից Կառավարության դիրքորոշումը ստանալու նպատակով։

(19-րդ կետը խմբ. 09.02.22 N 50-Ն, փոփ. 11.01.23 N 2-Ն) 

20. Եթե սույն կարգի 19-րդ կետի համաձայն ներկայացված հայտով նախատեսված գործարքը Կառավարության գնահատմամբ վնասում է կամ կարող է վնասել ազգային անվտանգությունը կամ պետական շահերը, ապա Հայաստանի Հանրապետության վարչապետի աշխատակազմը, հայտն ստանալուց հետո քսան աշխատանքային օրվա ընթացքում, Կառավարության համապատասխան դիրքորոշումը ուղարկում է Հանձնաժողով։

(20-րդ կետը փոփ. 11.01.23 N 2-Ն) 

21. Կառավարության դիրքորոշումը սույն կարգի 20-րդ և 21.2-րդ կետերով սահմանված ժամկետում չներկայացվելու դեպքում այն համարվում է դրական։

(21-րդ կետը փոփ. 11.01.23 N 2-Ն, 07.07.23  N 226-Ն)

21.1. Ազգային անվտանգության կամ պետական շահերից ելնելով՝ լիցենզավորված անձից կարող են պահանջվել լրացուցիչ տեղեկություններ (փաստաթղթեր): Հանձնաժողովը, սույն կետում նշված լրացուցիչ տեղեկությունների (փաստաթղթեր) ներկայացման անհրաժեշտության վերաբերյալ գրությամբ տեղեկացվելուց հետո, հինգ աշխատանքային օրվա ընթացքում այդ մասին գրավոր տեղեկացնում է լիցենզավորված անձին և վերջինիս կողմից նշված տեղեկություններն ստանալուց հետո երկու աշխատանքային օրվա ընթացքում ներկայացնում է Կառավարություն։

(21.1-ին կետը լրաց. 07.07.23  N 226-Ն)

21.2. Կառավարությունը, սույն կարգի 21.1-ին կետին համապատասխան տեղեկությունները (փաստաթղթերը) ստանալուց հետո 20 աշխատանքային օրվա ընթացքում հայտի վերաբերյալ դիրքորոշումն ուղարկում է հանձնաժողով։

(21.2-րդ կետը լրաց. 07.07.23  N 226-Ն)

21.3. Սույն կարգի 21.1-ին կետով նախատեսված դեպքում սույն կարգի 22-րդ կետով սահմանված ժամկետը կասեցվում է մինչև սույն կարգի 21.2-րդ կետի համաձայն հանձնաժողովին Կառավարության դիրքորոշում ներկայացնելը, իսկ չներկայացնելու դեպքում՝ մինչև 21.2-րդ կետում նշված ժամկետի ավարտը։

(21.3-րդ կետը լրաց. 07.07.23  N 226-Ն)   

22. Հանձնաժողովը, սույն կարգի 15-րդ կետով սահմանված՝ հայտի ուսումնասիրության ընդունելու ժամկետի ավարտից, իսկ սույն կարգի 19-րդ կետում նշված գործարքների դեպքում՝ սույն կարգի 20-րդ կետի համաձայն Կառավարության դիրքորոշումն ստանալու պահից, իսկ վերջինիս դիրքորոշումը չստանալու դեպքում՝ սույն կարգի նույն կետում նշված ժամկետի ավարտից ոչ ուշ, քան տասնհինգ աշխատանքային օրվա ընթացքում ընդունում է գործարքի կնքմանը համաձայնություն տալու կամ գործարքի կնքմանը համաձայնության տրամադրումը մերժելու մասին որոշում։ Հանձնաժողովն իրավասու է գործարքի կնքմանը համաձայնություն տալու մասին որոշմամբ սահմանել դրա պարտադիր պայմաններ։

(22-րդ կետը խմբ. 09.02.22 N 50-Ն, փոփ. 11.01.23 N 2-Ն) 

23. Գործարքի կնքմանը համաձայնություն տալու դեպքում գործարքը կարող է կնքվել համապատասխան որոշումն ուժի մեջ մտնելու պահից վեցամսյա ժամկետում, բացառությամբ լիցենզավորված անձի հիմնավորմամբ հանձնաժողովի որոշմամբ ավելի երկար ժամկետ սահմանվելու դեպքերի։ Գործարքի կնքման` hանձնաժողովի որոշմամբ ամրագրված ժամկետը կարող է երկարաձգվել լիցենզավորված անձի դիմումի հիման վրա՝ այն հանձնաժողովի կողմից հիմնավոր համարվելու դեպքում։

(23-րդ կետը խմբ. 12.05.21 N 171-Ն, փոփ. 09.02.22 N 50-Ն) 

24. Հանձնաժողովը սույն կարգի 8-րդ կետում նշված գործարքի կնքմանը համաձայնություն չի տալիս, եթե այն՝

1) խախտում է կամ կարող է խախտել էներգետիկ համակարգի հուսալիությունը կամ անվտանգությունը,

2) խախտում է կամ կարող է խախտել ներքին շուկայի սպառողների շահերը,

3) սույն կարգի 19-րդ կետում նշված գործարքների դեպքում՝ Կառավարության գնահատմամբ վնասում է կամ կարող է վնասել ազգային անվտանգությանը կամ պետական շահերին,

4) ձեռք բերողը չունի անհրաժեշտ փորձ,

5) հայտը չի համապատասխանում սույն կարգի պահանջներին։

(24-րդ կետը լրաց. 09.02.22 N 50-Ն, փոփ. 11.01.23 N 2-Ն) 

25. Արգելվում է սույն կարգի 8-րդ կետում նշված գործարքի կնքումը՝

1) մինչև հանձնաժողովի կողմից տվյալ գործարքի կնքմանը համաձայնություն տալու մասին որոշում կայացնելը (չհամաձայնեցված գործարք).

2) եթե հանձնաժողովը մերժել է գործարքի կնքմանը համաձայնության տրամադրումը կամ գործարքը չի համապատասխանում դրա կնքմանը համաձայնություն տալու մասին հանձնաժողովի որոշմամբ սահմանված պայմաններին (դրույթներին) (արգելված գործարք):

(25-րդ կետը փոփ., խմբ. 12.05.21 N 171-Ն)

26. Լիցենզավորված անձը գործարքի կնքումից հետո երկշաբաթյա ժամկետում հանձնաժողով է ներկայացնում գործարքի կնքումը հավաստող՝ օրենսդրությամբ սահմանված փաստաթղթի (այդ թվում՝ պայմանագիր, արձանագրություն և այլն) պատճենը, ընդ որում, նշված փաստաթղթի օտարալեզու լինելու պարագայում դրա հետ միաժամանակ ներկայացվում է դրա՝ պատշաճ վավերացված հայերեն թարգմանությունը։ Հանձնաժողովի որոշմամբ երկու և ավելի գործարքի կնքմանը համաձայնություն տալու դեպքում սույն կետում նշված երկշաբաթյա ժամկետի սկիզբ է համարվում համաձայնեցված գործարքներից վերջինի կնքման պահը։ Լիցենզավորված անձը պարտավոր է գրավադրման, երաշխավորության և համանման այլ գործարքների արդյունքում (շրջանակում) բաժնեմասի (գույքի) փոխանցման դեպքում համապատասխան հիմքի ի հայտ գալու օրվանից երկշաբաթյա ժամկետում, իսկ բաժնեմասի (գույքի)՝ հարկադիր կարգով իրացման (վաճառքի) գործընթաց սկսվելու դեպքում, այդ մասին տեղեկանալուց հետո հինգ աշխատանքային օրվա ընթացքում գրավոր տեղեկացնել հանձնաժողովին։

(26-րդ կետը խմբ. 12.05.21 N 171-Ն, լրաց. 11.01.23 N 2-Ն, խմբ. 03.04.24 N 96-Ն)

26.1. Հանձնաժողովը լիցենզավորված անձի կողմից գործարքին համաձայնություն տալու մասին որոշման պայմանների (դրույթների) կատարումը գնահատում է այդ որոշմամբ սահմանված՝ գործարքի էական և այլ պայմանների շրջանակում։

(26.1-ին կետը լրաց. 12.05.21 N 171-Ն) 

 26.2. Լիցենզավորված անձը, հանձնաժողովի որոշմամբ համաձայնեցված գործարքի կնքումից հետո, դրանում հանձնաժողովի որոշմամբ ամրագրված՝ գործարքի էական և այլ պայմաններին առնչվող փոփոխություն կատարելու մտադրության դեպքում պարտավոր է համաձայնություն ստանալու համար, սույն կարգին համապատասխան, նախապես հայտ ներկայացնել հանձնաժողով։

(26.2-րդ կետը լրաց. 12.05.21 N 171-Ն) 

27. Առանց սույն կարգում նշված համաձայնության կնքված կամ դրա կնքմանը համաձայնություն տալու մասին հանձնաժողովի որոշմամբ սահմանված պայմաններին չհամապատասխանող գործարքն առ ոչինչ է։

(27-րդ կետը խմբ. 12.05.21 N 171-Ն, 09.02.22 N 50-Ն)

(հավելվածը լրաց., խմբ., փոփ. 12.05.21 N 171-Ն, 09.02.22 N 50-Ն, 11.01.23 N 2-Ն,  լրաց., փոփ. 07.07.23  N 226-Ն, խմբ. 03.04.24 N 96-Ն)