ԱՏՈՄԱՅԻՆ ԷՆԵՐԳԻԱՅԻ ՕԳՏԱԳՈՐԾՄԱՆ ԲՆԱԳԱՎԱՌՈՒՄ ԱՆՎՏԱՆԳՈՒԹՅԱՆ ՓՈՐՁԱՔՆՆՈՒԹՅԱՆ ԿԱԶՄԱԿԵՐՊՄԱՆ ԵՎ ԱՆՑԿԱՑՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Համաձայն «Խաղաղ նպատակներով ատոմային էներգիայի անվտանգ օգտագործման մասին» Հայաստանի Հանրապետության օրենքի 7-րդ հոդվածի 1-ին մասի «ժե» կետի, ինչպես նաև ատոմային էներգիայի օգտագործման բնագավառում անվտանգության բարձրացման գործընթացը միջազգային չափանիշներին համապատասխանեցնելու, ատոմային էներգիայի օգտագործման օբյեկտների և աշխատանքների անկախ գնահատումն ապահովելու նպատակով Հայաստանի Հանրապետության կառավարությունը որոշում է.

(նախաբանը լրաց. 11.05.23 N 698-Ն)

1. Հաստատել ատոմային էներգիայի օգտագործման բնագավառում անվտանգության փորձաքննության կազմակերպման և անցկացման կարգը (կցվում է):

2. Սույն որոշումն ուժի մեջ է մտնում 2001 թվականի հուլիսի 12-ից:

ՀայաՍՏԱՆԻ հԱՆՐԱՊԵՏՈՒԹՅԱՆ ՎԱՐՉԱՊԵՏ

Ա. Մարգարյան

Հաստատված է ՀՀ կառավարության 2001 թվականի հուլիսի 12-ի N 640 որոշմամբ

Կ Ա Ր Գ

ԱՏՈՄԱՅԻՆ ԷՆԵՐԳԻԱՅԻ ՕԳՏԱԳՈՐԾՄԱՆ ԲՆԱԳԱՎԱՌՈՒՄ ԱՆՎՏԱՆԳՈՒԹՅԱՆ ՓՈՐՁԱՔՆՆՈՒԹՅԱՆ ԿԱԶՄԱԿԵՐՊՄԱՆ ԵՎ ԱՆՑԿԱՑՄԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Ատոմային էներգիայի օգտագործման բնագավառում անվտանգության փորձաքննության (այսուհետև` փորձաքննություն) իրականացման նպատակն է ատոմային էներգիայի օգտագործման օբյեկտների ու աշխատանքների անվտանգության վերաբերյալ փաստաթղթերի և այլ նյութերի գնահատումը, Հայաստանի Հանրապետության օրենսդրությանը, միջուկային և ճառագայթային անվտանգության չափանիշներին, նորմերին և կանոններին դրանց համապատասխանությունը պարզելը:

2. Փորձաքննության ենթակա են միջուկային և ճառագայթային վտանգ ներկայացնող օբյեկտների և աշխատանքների անվտանգությունը հիմնավորող փաստաթղթերը, նախագծային փաստաթղթերը և այլ տեղեկություններ:

Պարտադիր փորձաքննության ենթակա անվտանգությունը հիմնավորող փաստաթղթերի ցանկը կցվում է:

Ցանկում չընդգրկված` անվտանգությունը հիմնավորող փաստաթղթերի փորձաքննության անհրաժեշտությունը որոշում է ատոմային էներգիայի օգտագործման բնագավառի կարգավորող մարմինը (այսուհետև` կարգավորող մարմին):

3. Փորձաքննության արդյունքներն օգտագործվում են միջուկային և ճառագայթային անվտանգության նորմերն ու կանոնները սահմանված կարգով գործողության մեջ դնելու, լիցենզիա տալու կամ մերժելու, լիցենզիայի պայմաններում փոփոխություններ կատարելու, անվտանգության մասին որոշումներ ընդունելու համար:

4. Սույն կարգի դրույթները տարածվում են կարգավորող մարմնի և նրանից լիցենզիա (թույլտվություն) ստացած իրավաբանական ու ֆիզիկական անձանց վրա:

5. Փորձաքննությունն իրականացնում է Հայաստանի Հանրապետության կառավարության կողմից լիազորված և կարգավորող մարմնից լիցենզիա ստացած կազմակերպությունը` «Միջուկային և ռադիացիոն անվտանգության գիտատեխնիկական կենտրոն» փակ բաժնետիրական ընկերությունը (այսուհետև` փորձագիտական կազմակերպություն):

Անհրաժեշտության դեպքում փորձաքննության աշխատանքներում կարող են ներգրավվել այլ կազմակերպություններ կամ մասնագետներ:

II. ՓՈՐՁԱՔՆՆՈՒԹՅԱՆ ԿԱԶՄԱԿԵՐՊՈՒՄԸ ԵՎ ԱՆՑԿԱՑՈՒՄԸ

6. Լիցենզավորված անձը փորձաքննություն անցկացնելու համար կազմում է փորձաքննության տեխնիկական առաջադրանք, որի կազմմանը կարող է մասնակցել փորձագիտական կազմակերպությունը: Փորձաքննության տեխնիկական առաջադրանքում նշվում են փորձաքննության ծավալը և նպատակը:

Փորձաքննության տեխնիկական առաջադրանքը համաձայնեցվում է կարգավորող մարմնի հետ:

Փորձաքննության ենթակա` անվտանգությունը հիմնավորող փաստաթղթերի օրինակների թիվը սահմանում է կարգավորող մարմինը:

7. Համաձայնեցված առաջադրանքի հիման վրա լիցենզավորված անձը 10-օրյա ժամկետում փորձագիտական կազմակերպության հետ կնքում է փորձաքննություն անցկացնելու պայմանագիր:

Վճարման կարգն ու ժամանակացույցը սահմանվում են լիցենզավորված անձի և փորձագիտական կազմակերպության միջև կնքված պայմանագրով:

Պետական մարմինների կողմից պատվիրված փորձաքննության ֆինանսավորումը կատարվում է պետական մարմինների պահպանման ծախսերի հաշվին:

8. Լիցենզավորված անձի կողմից ներկայացված անվտանգությունը հիմնավորող փաստաթղթերում թերություններ, անճշտություններ հայտնաբերելու կամ լրացուցիչ փաստաթղթերի անհրաժեշտության դեպքում փորձագիտական կազմակերպությունը լիցենզավորված անձից պահանջում է դրանք վերանայել և լրացումներ կատարել:

9. Փորձագիտական կազմակերպությունն իրականացնում է անվտանգությունը հիմնավորող փաստաթղթերի փորձաքննություն, մշակում է փորձաքննության տեխնիկական առաջադրանքով նախատեսված անվտանգությունը հիմնավորող առանձին փաստաթղթերի վերաբերյալ եզրահանգումներ և ամփոփ հաշվետվություն (եզրակացություն):

10. Փորձաքննությանը չեն կարող մասնակցել անվտանգությունը հիմնավորող փաստաթղթերի հեղինակները և համահեղինակները:

11. Փորձաքննության անվտանգությունը հիմնավորող փաստաթղթերում պետական կամ ծառայողական գաղտնիքի առկայության դեպքում փորձաքննության աշխատանքներին մասնակցում են այդ փաստաթղթերի հետ աշխատելու իրավունք ունեցող անձինք:

12. Փորձագիտական եզրակացությունը մշակելիս գնահատվում են`

ա) ներկայացված տեղեկատվության ծավալը, անվտանգության չափանիշները,

բ) կիրառված գնահատման մեթոդները,

գ) հաշվարկների և վերլուծությունների արդյունքների համապատասխանությունն անվտանգության նորմերին, կանոններին և չափանիշներին:

13. Փորձագիտական եզրակացության ձևին և բովանդակությանը ներկայացվող պահանջները սահմանում է կարգավորող մարմինը:

14. Փորձաքննությունն ավարտելուց հետո փորձագիտական կազմակերպությունը փորձագիտական եզրակացության մեկ օրինակն անվտանգությունը հիմնավորող փաստաթղթերի հետ միասին ներկայացնում է կարգավորող մարմին, իսկ մյուսը` լիցենզավորված անձին:

III. ՊԱՏԱՍԽԱՆԱՏՎՈՒԹՅՈՒՆԸ

15. Լիցենզավորված անձը պատասխանատու է փորձաքննության ֆինանսավորման, ներկայացված փաստաթղթերի հավաստիության և ամբողջական տեղեկատվության համար:

16. Փորձագիտական կազմակերպությունը պատասխանատու է փորձաքննության որակի և եզրակացության համար:

Ց Ա Ն Կ

ՊԱՐՏԱԴԻՐ ՓՈՐՁԱՔՆՆՈՒԹՅԱՆ ԵՆԹԱԿԱ` ԱՆՎՏԱՆԳՈՒԹՅՈՒՆԸ ՀԻՄՆԱՎՈՐՈՂ ՓԱՍՏԱԹՂԹԵՐԻ

1. Միջուկային և ճառագայթային անվտանգության վերաբերյալ նորմատիվ ու կարգավորող փաստաթղթերի նախագծերը և դրանցում կատարվող փոփոխությունները:

2. Միջուկային և ճառագայթային անվտանգության տեսակետից կարևոր արտադրանքին, ծառայություններին և գործունեությանը վերաբերող նորմատիվ ու կարգավորող փաստաթղթերի նախագծերը:

3. Միջուկային և ճառագայթային անվտանգության տեսակետից կարևոր արտադրանքների տեխնիկական պայմանների նախագծերը:

4. Միջուկային տեղակայանքների և ռադիոակտիվ թափոնների տեղակայանքների (այսուհետև` տեղակայանք) անվտանգությունը հիմնավորող փաստաթղթերը, որոնք ընդգրկում են`

ա) հրապարակների ընտրությունը,

բ) անվտանգության տեսակետից կարևոր համակարգերի և տարրերի նախագծային ու կոնստրուկտորական փաստաթղթերը,

գ) վթարային իրավիճակների վերլուծությունը,

դ) օբյեկտների շահագործման հանձնման ծրագրերը,

ե) շահագործման փաստաթղթերը, այդ թվում`

ռեակտորային տեղակայանքի անձնագիրը,

տեխնոլոգիական աշխատակարգերը,

անվտանգ շահագործման սահմաններն ու պայմանները,

շահագործող անձնակազմի պատրաստման ծրագրերը,

անվտանգության տեսակետից կարևոր համակարգերի և տարրերի փորձարկման ծրագրերը,

տեղակայանքի վթարի դեպքում աշխատակազմի և բնակչության պաշտպանության միջոցառումների պլանը,

սույն կետում նախատեսված շահագործման փաստաթղթերում կատարված փոփոխությունները:

5. Լիցենզիայի պայմաններում նախատեսված փաստաթղթերը:

6. Լիցենզավորվող աշխատանքների որակի ապահովման ծրագրերը:

7. Տեղակայանքները շահագործումից հանելու նախագծերը և ծրագրերը:

8. Ատոմային էներգիայի օգտագործման օբյեկտների անվտանգության վերլուծությունների մասին հաշվետվությունները: