ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

21 ապրիլի 2023 թվականի N 560-Ն

ՍՊԱՌԱԶԻՆՈՒԹՅԱՆ, ՌԱԶՄԱԿԱՆ ՏԵԽՆԻԿԱՅԻ ՈՒ ՌԱԶՄԱԿԱՆ ՆՇԱՆԱԿՈՒԹՅԱՆ ԱՅԼ ՆՅՈՒԹԱՏԵԽՆԻԿԱԿԱՆ ՄԻՋՈՑՆԵՐԻ ԿՈՒՏԱԿՄԱՆ ԵՎ ՇԱՀԱԳՈՐԾՄԱՆ (ԾԱԽՍԻ) ՆՈՐՄԱՆԵՐԻ ՈՒ ՇԱՀԱԳՈՐԾՄԱՆ ԺԱՄԿԵՏՆԵՐԻ ՍԱՀՄԱՆՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Հիմք ընդունելով «Պաշտպանության մասին» Հայաստանի Հանրապետության օրենքի 7-րդ հոդվածի 1-ին մասի 5-րդ կետի «զ» ենթակետը` Հայաստանի Հանրապետության կառավարությունը որոշում է.

1. Հաստատել սպառազինության, ռազմական տեխնիկայի ու ռազմական նշանակության այլ նյութատեխնիկական միջոցների կուտակման և շահագործման (ծախսի) նորմաների ու շահագործման ժամկետների սահմանման կարգը՝ համաձայն հավելվածի:

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Հայաստանի Հանրապետության վարչապետ	Ն. ՓաշինՅԱՆ
Երևան

21.04.2023 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ

Հավելված ՀՀ կառավարության 2023 թվականի ապրիլի 21-ի N 560-Ն որոշման

Կ Ա Ր Գ

ՍՊԱՌԱԶԻՆՈՒԹՅԱՆ, ՌԱԶՄԱԿԱՆ ՏԵԽՆԻԿԱՅԻ ԵՎ ՌԱԶՄԱԿԱՆ ՆՇԱՆԱԿՈՒԹՅԱՆ ԱՅԼ ՆՅՈՒԹԱՏԵԽՆԻԿԱԿԱՆ ՄԻՋՈՑՆԵՐԻ ԿՈՒՏԱԿՄԱՆ ԵՎ ՇԱՀԱԳՈՐԾՄԱՆ (ԾԱԽՍԻ) ՆՈՐՄԱՆԵՐԻ ՈՒ ՇԱՀԱԳՈՐԾՄԱՆ ԺԱՄԿԵՏՆԵՐԻ ՍԱՀՄԱՆՄԱՆ

1. Սույն կարգով (այսուհետ` կարգ) կարգավորվում են սպառազինության, ռազմական տեխնիկայի, ռազմական նշանակության այլ նյութատեխնիկական միջոցների (այսուհետ նաև` ռազմական նշանակության միջոցներ) կուտակման և շահագործման (ծախսի) նորմաների և շահագործման ժամկետների ձևավորման պայմանները, որոնց հիման վրա ենթակա են սահմանվելու ռազմական նշանակության միջոցների կուտակման և շահագործման (ծախսի) նորմաներն ու դրանց շահագործման ժամկետները:

2. Սույն կարգի իմաստով`

1) սպառազինության, ռազմական տեխնիկայի, ռազմական նշանակության այլ նյութատեխնիկական միջոցներ են հանդիսանում Հայաստանի Հանրապետության զինված ուժերի (այսուհետ` ԶՈՒ) կարիքների համար ձեռք բերված և օգտագործվող`

ա. տարբեր տեսակի զենքեր և դրանց մարտական կիրառումն ապահովող միջոցների համալիրներ, այդ թվում՝ տեղափոխման միջոցներ, ուղղորդման, արձակման, կառավարման համակարգեր, ինժեներական սպառազինության միջոցներ, ինչպես նաև այլ հատուկ տեխնիկական միջոցներ, որոնք նախատեսված են ԶՈՒ համալրելու համար, ռազմամթերք և դրանց բաղադրիչները, պահեստային սարքավորումներ և սարքեր, ուսումնական զենքերի մասեր, սարքեր և բաղադրիչներ (տարբեր տեսակի զենքերի և ռազմական տեխնիկայի կեղծ մոդելներ և սիմուլյատորներ), պահեստային գործիքներ և պահեստամասեր,

բ. ԶՈՒ-ում կիրառվող օպտիկական, ջերմատեսիլ, գիշերային տեսանելիության, տեղագրագեոդեզիական և նավարկային, ռադիոէլեկտրոնային, ազդանշանային, կապի միջոցներ, համակարգեր, սարքեր և սարքավորումներ, դրանք կրող տեխնիկա, էլեկտրոնային հետախուզական համակարգեր, ինչպես նաև զորքերի, սպառազինության ու ռազմական տեխնիկայի կառավարման համակարգեր,

գ. պայթուցիկ նյութեր, պայթեցման առարկաներ և սարքեր, վառոդ (բացառությամբ որսորդականի), մարտական հրթիռների հրթիռային վառելիք, հատուկ նշանակության նյութեր և դրանց արտադրության համար նախատեսված հատուկ սարքավորումներ,

դ. սպառազինության և ռազմական տեխնիկայի մարտական կիրառման համար նախատեսված սարքավորումներ,

ե. սպառազինության և ռազմական տեխնիկայի արտադրության, նորոգման, արդիականացման կամ ոչնչացման (օգտահանման) համար նախատեսված հատուկ սարքավորումներ և տեխնոլոգիաներ,

զ. ԶՈՒ-ի անձնակազմի անհատական պաշտպանական միջոցներ, անձնակազմի կենսագործունեության ապահովման համակարգեր, ռադացիոն սարքերի ստուգման չափագիտական սարքավորումներ, դրանց արտադրության համար նախատեսված հատուկ սարքավորումներ և սարքեր,

է. զանգվածային խոցման զենքից պաշտպանության համար նախատեսված միջոցներ (ռադիոքիմիական, կենսաբանական հետախուզության միջոցներ, հատուկ մշակման միջոցներ, ոչ սպեցիֆիկ կենսաբանական հետախուզության տեխնիկական միջոցներ, անհատական և կոլեկտիվ պաշտպանական միջոցներ, ծխային միջոցներ, հրանետային հրկիզող միջոցներ (համակարգեր),

ը. թիկունքային ապահովման հատուկ սարքավորումներ, տեխնիկական միջոցներ, հատուկ մասի բաղադրիչներ, հրթիռային վառելիք և վառելիքաքսուկային նյութեր ու հատուկ հեղուկներ, բոլոր տեսակի վրաններ, դաշտային շարժական բաղնիքներ, միջատազերծող ախտահանիչ սարքեր և սարքավորումներ, հրշեջ ավտոտեխնիկա, հրշեջ տեխնիկական միջոցներ, հակահրդեհային գույք և միջոցներ,

թ. ուսումնանյութական բազայի սարքավորումներ (զրահատեխնիկայի և հրաձգային զենքերի վարժասարքեր, հրաձգարանային սարքավորումներ, ուսումնանյութական բազայի օժանդակ այլ միջոցներ),

ժ. ավիացիոն տեխնիկան (օդանավավարվող և անօդաչու թռչող սարքեր, թռչող սարքերի շարժիչներ, թռչող սարքերի սարքավորումներ (հանովի և ստացիոնար, տեղադրված թռչող սարքերի վրա), ավիացիոն խոցման միջոցներ (ավիացիոն հրթիռներ և ռումբեր, բոցավառվող բաքեր, ականներ, ավիացիոն հրետանային զենքի փամփուշտներ և նրանց լրակազմող մասեր, խոչընդոտող հրթիռներ և փամփուշտներ, ծածկագիր-լիցքեր, ձայնի պայթյունային աղբյուրներ, հրատեխնիկական միջոցներ, ավիացիոն վարժասարքեր, անօդաչու թռչող համակարգերի բաղկացուցիչ մասեր, անօդաչու թռչող սարքերի ղեկավարման կայաններ, ղեկավարման կայանի սարքավորումներ և բաղկացուցիչ մասեր (հանովի և ստացիոնար, տեղադրված ղեկավարման կայանի վրա).

2) կուտակման նորմա է համարվում ԶՈՒ-ի խնդիրների ապահովման և գործունեության համար անհրաժեշտ՝ Հայաստանի Հանրապետության պաշտպանության նախարարության տարեկան գնման պլանով նախատեսված ռազմական նշանակության միջոցների ձեռքբերումը.

3) շահագործման (ծախսի) նորմա է համարվում սպառազինությունը, ռազմական տեխնիկան և ռազմական նշանակության այլ նյութատեխնիկական միջոցները ժամանակային (տարեկան) կամ ծավալային (քանակական) առումներով օգտագործելու (կիրառելու) թույլատրելի սահմանաչափը.

4) շահագործման ժամկետ է համարվում սպառազինությունը, ռազմական տեխնիկան և ռազմական նշանակության այլ նյութատեխնիկական միջոցներն իրենց նշանակությանը համապատասխան օգտագործելու (կիրառելու)՝ սույն կարգի 4-րդ կետում նախատեսված հիմքերով սահմանված՝ ներառյալ շահագործման երկարաձգված ժամանակահատվածը, որի ավարտմամբ այդ միջոցը համարվում է իր նշանակությամբ օգտագործելու (կիրառելու) համար ոչ պիտանի։

3. Ռազմական նշանակության միջոցների կուտակման հիմք են հանդիսանում ԶՈՒ-ի խնդիրների ամենօրյա և հեռանկարային ապահովման ու գործունեության համար անհրաժեշտ ռազմական նշանակության միջոցների կարիքը սահմանող ԶՈՒ-ի զարգացման պլանն ու սպառազինության և ռազմական տեխնիկայի զարգացման պետական ծրագիրը:

4. «Պաշտպանության մասին» Հայաստանի Հանրապետության օրենքի 10-րդ հոդվածի 2-րդ մասի պահանջների համաձայն՝ Հայաստանի Հանրապետության պաշտպանության նախարարի կողմից սպառազինության, ռազմական տեխնիկայի և ռազմական նշանակության այլ նյութատեխնիկական միջոցների շահագործման (ծախսի) նորմաների ու դրանց շահագործման ժամկետների սահմանման՝ ներառյալ շահագործման ժամկետների երկարաձգման, համար հիմք են ընդունվում համապատասխան ռազմական նշանակության միջոցների գործարանային և տեխնիկական կանոնակարգերը (տեղեկագրերը), առկայության դեպքում` պետական ստանդարտները (ԳՈՍՏ), ծրագիր-մեթոդիկաները, ռազմական նշանակության միջոցի շահագործման ձեռնարկները (կանոնները), ինչպես նաև ռազմական նշանակության միջոցները նպատակային նշանակությամբ արդյունավետ, ծախսախնայող և երկարաժամկետ օգտագործման անհրաժեշտությունը: Ընդ որում՝ սպառազինության, ռազմական տեխնիկայի և ռազմական նշանակության այլ նյութատեխնիկական միջոցների շահագործման ժամկետները երկարաձգվում են՝ հաշվի առնելով ԶՈՒ-ի կողմից այդ միջոցների օգտակար օգտագործման (կիրառման) կարիքը և հնարավորությունը:

Հայաստանի Հանրապետության վարչապետի աշխատակազմի ղեկավար

Ա. Հարությունյան

21.04.2023 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ

Պաշտոնական հրապարակման օրը՝ 21 ապրիլի 2023 թվական: