ՀԵՌՈՒՍՏԱՏԵՍՈՒԹՅԱՆ ԵՎ ՌԱԴԻՈՅԻ ՀԱՆՁՆԱԺՈՂՈՎ
Ո Ր Ո Շ ՈՒ Մ
|
3 ապրիլի 2023 թվականի ք. Երևան |
թիվ 11-Ա |
ԼՍՈՂԱԿԱՆ ԾՐԱԳՐԻ ՀԱՃԱԽԱԿԱՆՈՒԹՅԱՆ ՕԳՏԱԳՈՐԾՄԱՆ ԼԻՑԵՆԶԱՎՈՐՄԱՆ ՄԱՐԶԱՅԻՆ` ՀՀ ՏԱՎՈՒՇԻ ՄԱՐԶԻ ՏԱՐԱԾՔՈՒՄ ՍՓՌՄԱՆ ՄՐՑՈՒՅԹԻ ՀԱՂԹՈՂ ՃԱՆԱՉԵԼՈՒ ԵՎ ԼԻՑԵՆԶԻԱ ՏՐԱՄԱԴՐԵԼՈՒ ՄԱՍԻՆ
Հեռուստատեսության և ռադիոյի հանձնաժողովը (այսուհետ՝ Հանձնաժողով) 2022 թվականի դեկտեմբերի 23-ին հայտարարել է լսողական ծրագրի հաճախականության օգտագործման լիցենզավորման մարզային՝ ՀՀ Տավուշի մարզի տարածքում սփռման մրցույթ (այսուհետ՝ Մրցույթ)։
Մրցույթին մասնակցելու նպատակով հայտերի և կից փաստաթղթերի ներկայացման համար սահմանված ժամանակահատվածում հայտեր են ներկայացրել՝ 2023 թվականի փետրվարի 3-ին՝ «ԷՖ-ԷՄ» ՍՊ, փետրվարի 13-ին՝ «ՏԱՎՈՒՇ ՄԵԴԻԱ» ՍՊ և «ՄԵԴԻԱ ՄԱՐՍԵՏ» ՍՊ ընկերությունները (այսուհետ նաև՝ Ընկերություններ)։
«Տեսալսողական մեդիայի մասին» օրենքի (այսուհետ՝ Օրենք) 46-րդ հոդվածի 3-րդ մասի և Հանձնաժողովի 2020 թվականի սեպտեմբերի 8-ի «Հանրային մուլտիպլեքսում սլոթի օգտագործման լիցենզավորման մրցույթի անցկացման կարգը և լիցենզիայի ձևը հաստատելու մասին» թիվ 94-Ն որոշմամբ հաստատված կարգի (այսուհետ՝ Կարգ) 16-րդ կետի համաձայն յուրաքանչյուր հայտին կից ներկայացվել է.
1. փաստաթուղթ՝ լսողական մեդիածառայություն մատուցողի նախանշած նպատակների իրագործման հիմնական ուղղությունների և միջոցառումների ընդհանրական նկարագրի վերաբերյալ,
2. ֆինանսական աղբյուրները հիմնավորող փաստաթղթեր,
3. տվյալներ օգտագործվելիք տեխնիկական միջոցների վերաբերյալ,
4. տեղեկություններ աշխատակազմի քանակի, նրանց կրթության և մասնագիտության վերաբերյալ,
5. էթիկայի կանոնագիր,
6. էթիկայի կանոնագրի դրույթների ապահովման ինքնակարգավորման միջոցները,
7. լիցենզավորման մրցույթին մասնակցելու համար «Պետական տուրքի մասին» օրենքով սահմանված պետական տուրքի վճարումը հավաստող անդորրագիրը:
2023 թվականի փետրվարի 17-ին Հանձնաժողովի դռնբաց նիստում հրապարակվել են ներկայացված հայտերը և կից փաստաթղթերը՝ Ընկերությունները մինչև 30 րոպե տևողությամբ ներկայացրել են դրանց բովանդակությունը։
Հայտերը և կից փաստաթղթերը ներկայացվել են Հայաստանի Հանրապետության օրենսդրությամբ սահմանված պահանջներին համապատասխան:
Ընկերությունների կողմից նախանշված նպատակների իրագործման հիմնական ուղղությունների և միջոցառումների ընդհանրական նկարագրի վերաբերյալ փաստաթղթերում ներկայացվել են իրենց ծրագրերի հիմնական տեսլականներն՝ անդրադառնալով գնահատման չափանիշներին, մասնավորապես․
«ԷՖ-ԷՄ» ՍՊ ընկերության («ՄԵԿ ԷՖ ԷՄ Տավուշի մարզ» ծրագիր) հայտի համաձայն ընկերության նպատակն է՝ պատրաստել լսողական ծրագիր, որտեղ կներառվեն բազմազան հաղորդումներ՝ հաշվի առնելով ունկնդիրների երաժշտական նախասիրությունները և ժանրային հետաքրքրությունները։ Ընկերությունը նախատեսում է ստեղծել մշակութային, կրթական, ուսումնական, ճանաչողական, երաժշտական և այլ բնույթի հաղորդումներ։ Եթերում կլինեն հայկական և համաշխարհային մշակույթի, դասական արվեստի և գրականության, երգի և երաժշտարվեստի նմուշները ներկայացնող հաղորդումներ, ազգային, համամարդկային, հոգևոր, մշակութային մնայուն արժեքների ճանաչողությանն ու ամրապնդմանն ուղղված հաղորդումներ, լրատվական, ինչպես նաև կոմերցիոն բնույթի հաղորդումներ, գովազդ, ժամանցային, մանկական, մարզական հաղորդումներ։
Ընկերությունը պատրաստվում է արտադրել այնպիսի հաղորդումներ, որոնք կներկայացնեն ազգային և համամարդկային մշակութային ժառանգությունը, երկրի արդի մշակութային կյանքը՝ նպատակ ունենալով ազգային ու համամարդկային հոգևոր բարոյական արժեքների տարածումը։ Կարևոր տեղ կհատկացվի նաև տվյալ մարզին առնչվող պատմամշակութային հաղորդումներին։ Հետագայում նախատեսվում է միջազգային գործընկերների հետ համագործակցելով՝ ծրագրում ներառել նաև որոշակի ծավալով օտարերկրյա հաղորդումներ, որոնք ուղղված կլինեն համամարդկային, հոգևոր, մշակութային մնայուն արժեքների ճանաչողությանն ու ամրապնդմանը։
Լրատվական հաղորդումները ներկայացվելու են բազմակողմանիորեն՝ հիմնվելով անկողմնակալ և հավաստի տեղեկատվության տրամադրման, ինչպես նաև տվյալ մարզի համար կարևոր խնդիրների և թեմաների օպերատիվ լուսաբանման սկզբունքի վրա։
Ընկերությունը պատրաստակամություն է հայտնել իր սեփական հաղորդումները տրամադրել նաև այլ մարզային հեռարձակողներին, ինչպես նաև վերջիններիս կողմից պատրաստված հաղորդումները ներառել իր եթերում։
Հայտի համաձայն ընկերությունը նախապատվություն է տալու սեփական և հայրենական արտադրության հաղորդումներին, որոնք գերակշռելու են եթերում։
Ներկայացված տեղեկատվության համաձայն բազմակարծության ապահովումն ընկերության հիմնական ուղենիշն է լինելու իր ողջ գործունեության ընթացքում և այդ նպատակով հաղորդումները ստեղծելիս հաշվի են առնվելու հնարավորինս լայն շրջանակի ունկնդիրների հետաքրքրությունները։
Տեխնիկական հնարավորությունների վերաբերյալ ներկայացվել են օգտագործվելիք տեխնիկական միջոցների տվյալները՝ տեխնիկական բնութագրերով, տրվել են ավտոմատացված եթերային համակարգի, ձայնագրման ստուդիայի, ձայնագրման խցի, արտագնա ձայնագրման և ուղիղ հեռարձակման համակարգերի, տեսաձայնագրման, թվային հեռարձակման և այլ տեխնիկական միջոցների նկարագրությունները։ Հեռարձակումն իրականացվելու է արդիական ավտոմատացված համակարգերով (եթերի որոշ մասը)։ Հեռարձակման ավտոմատացման համար նախատեսվում է օգտագործել «Radio Boss» հավելվածը, որը բազմաթիվ տարիների ընթացքում օգտագործվել և մինչ օրս էլ օգտագործվում է շատ երկրներում, այդ թվում նաև Հայաստանում։
Ընկերությունը ֆինանսական հնարավորությունների վերաբերյալ ներկայացրել է բանկային հաշվի մնացորդների մասին տեղեկանք և գովազդային պայմանագրեր։ Նշվել է, որ ֆինանսական միջոցները գոյանալու են օրենքով թույլատրելի աղբյուրներից՝ հիմնադրի ներդրումներից, գովազդից, հովանավորությունից, վճարովի եթերաժամանակից, հաղորդումների վաճառքից, ինչպես նաև ընկերության գործունեության հետ կապված այլ ծառայություններից։ Ընկերությունը մարզային սփռման լսողական ծրագրի հեռարձակման լիցենզիա ստանալու դեպքում նախատեսում է ավելի շատ գովազդ ներառել եթերում՝ որպես ֆինանսական ապահովվածության երաշխիք։
Հիմք ընդունելով այն փաստը, որ ընկերությունն արդեն գործող հեռարձակող է՝ մեկ մարզում լրացուցիչ հեռարձակում կազմակերպելու համար ընկերությունը բավարար է համարում աշխատակազմում ներառել մեկական լրագրող, եթերի ապահովման մասնագետ և տեխնիկական մասնագետ, որոնք զբաղվելու են միայն տվյալ մարզի տարածքում հաղորդումների, այդ թվում՝ տեղական լուրերի արտադրությամբ և տեխնիկայի պատշաճ աշխատանքի ապահովմամբ։ Ընկերության ամբողջական մեդիա արտադրանքի ստեղծման մեջ ներգրավված է լինելու ողջ աշխատակազմը, որտեղ, ըստ հայտի, ընդգրկված են ինչպես ոլորտում բազմամյա աշխատանքային փորձ ունեցող, այնպես էլ բարձր որակավորում ունեցող երիտասարդ մասնագետներ։ Նախատեսվում է ընդհանուր աշխատակազմում ընդգրկել ևս երկու տեխնիկական մասնագետ։
«ՏԱՎՈՒՇ ՄԵԴԻԱ» ՍՊ ընկերության («Տավուշ ԷՖԷՄ» ծրագիր) կողմից ներկայացված հայտի համաձայն ընկերության նպատակներն են՝ ձևավորել անկախ, բազմազան ու բազմակարծիք, լրատվական ու ժամանցային, բացառապես հայերեն տիրույթ Տավուշի մարզում՝ տեղեկատվական ճանաչողական, ուսուցողական, խորհրդատվական, հետաքննական, մարզական, երաժշտական, մշակութային հաղորդումներով և ռադիոթատրոնով, դարձնել Տավուշի մարզն առավել իրազեկված ու պաշտպանված, ավելի անվտանգ, մրցունակ, դիմակայուն, ինչպես նաև բարելավել մարդկանց բարոյահոգեբանական դիմակայունությունը։
Ներկայացված հայտի համաձայն ընկերության խնդիրներն են՝ Տավուշի մարզի տեղեկատվական կարողությունների հզորացում, բնակչության իրազեկվածության և մեդիագրագիտության բարձրացում, հեռավոր սահմանամերձ համայնքներում լրատվության հասանելիություն, պատանիների ու երիտասարդության ներգրավվածություն մարզի սոցիալական, տնտեսական և քաղաքական կյանքին, երկխոսության և հետադարձ կապի հարթակի ստեղծում պետական կառավարման և տեղական ինքնակառավարման մարմինների և ՀԿ-ների, երիտասարդական ու կանանց կազմակերպությունների, սահմանամերձ համայնքների բնակիչների միջև, մշակութային, մարզական, երաժշտական, հասարակական-քաղաքական, մանկական, կրթական, երիտասարդական, խորհրդատվական, գրական-գեղարվեստական, հոգեբանական հաղորդումների պատրաստում, բնակչության դիմակայունության բարձրացում, կլիմայի փոփոխության, բնապահպանական, համաճարակային, բնական ու տեխնածին աղետների, ինչպես նաև քաղպաշտպանական ռիսկերի իրազեկում և ուսուցում։
Ներկայացված հայտի համաձայն ընկերությունը ստեղծման առաջին իսկ օրվանից որդեգրել է խմբագրական քաղաքականության ընդունված սկզբունքները։ Նշվել է, որ ընկերությունը հրապարակում է բացառապես ստուգված, հավաստի տեղեկատվություն, փաստարկված կարծիք և տեսակետ, խորքային վերլուծություն, պրոֆեսիոնալ միտք, բացառիկ նշանակություն է տրվում լեզվի անաղարտությանը, արգելված է եթերում օգտագործել անվայել, անպարկեշտ բառեր և արտահայտություններ, ցուցադրել պոռնոգրաֆիա, բռնություն, դաժանություն պարունակող և քարոզող հաղորդումներ, հեռարձակել անչափահասների իրավունքները, մարդու անձնական կյանքի անձեռնմխելիությունը խախտող բնույթի տեղեկատվություն։
Նշվել է նաև, որ ընկերության սկզբունքներին դեմ է ազգային, կրոնական կամ այլ կարգի անհանդուրժողականություն հրահրելը, ծայրահեղական մոտեցումներ և ռազմատենչ հայտարարություններ տարածելը, հանցավոր գործունեությունը խրախուսելը։
Հայտում նկարագրվել են ընկերության տեսալսողական ծրագրի հաղորդումները և նշվել, որ դրանք իրենց արտացոլումը կգտնեն նաև «Տավուշ ԷՖԷՄ» ծրագրում։ Հաղորդումների թեմատիկ ուղղություններն են՝ մշակութային, մարզական, երաժշտական, հասարակական-քաղաքական, մանկական, կրթական, երիտասարդական, գրական-գեղարվեստական, երգիծական։ Ծրագիրը հայրենաճանաչ, հետաքրքրաշարժ, մտահոգեսնուցող ու բազմաժանր է, բազմազան և անդրադառնում է ամենատարբեր թեմաների։ Ցուցադրվում են նաև հաղորդումներ Տավուշի և տավուշցիների մասին՝ ներկայացվում են նրանց կյանքը, առօրյան, կենցաղը, մշակույթը, նրանց հուզող և հետաքրքրող խնդիրները, սահմանամերձ գյուղերի առօրյան։ Ուշադրության կենտրոնում են խոցելի խմբերը, կանանց իրավունքների պաշտպանությունը։ Ցուցադրվում են նաև հաղորդումներ գիտության, քաղաքականության, ներառականության, մշակութային գանձերի, կլիմայի փոփոխության և աղետների ռիսկերի կառավարման վերաբերյալ, նախատեսվում է նաև ռադիոբեմադրությունների պատրաստում։ Ընկերությունը կարևոր ուղղություններից է համարում դիմակայուն Տավուշ բազմավեկտոր ծրագիրը, որտեղ «Տավուշ ԷՖԷՄ» ծրագիրն անփոխարինելի դեր կունենա բնակչության ազդարարման, իրազեկման, ուսուցման և պատրաստվածության բարձրացման առումով։
Հայտի համաձայն սեփական արտադրության հաղորդումների ծավալը կկազմի 90-95% և բոլոր հաղորդումները բացառապես հայերեն են լինելու։
Ներկայացված տեղեկատվության համաձայն ընկերությունը համագործակցության լայն ցանց ունի Տավուշի մարզում, որտեղ ներգրավված են մարզի մշակույթի կենտրոնները, արվեստի, գրականության, մշակույթի հայտնի գործիչները։ Ընկերությունը համագործակցում է նաև Մեդիա նախաձեռնությունների կենտրոնի, գրեթե բոլոր հեռուստառադիոընկերությունների, հանրային հեռուստառադիոընկերության և այլ կազմակերպությունների հետ։ Նշվել է, որ ընկերությունը համագործակցության պայմանավորվածություն ունի կոմպոզիտորների միության հետ՝ ծրագրի շրջանակներում օգտագործել նրանց տեսաձայնային արխիվը։
Օգտագործվելիք տեխնիկական միջոցների վերաբերյալ ներկայացվել է ընկերության տեխնիկական միջոցների ցանկը՝ տեխնիկական բնութագրերով և քանակական տվյալներով։ Նախատեսվում է տեսալսողական մեդիածառայություն մատուցողի որոշ սարքավորումներ օգտագործել լսողական ծրագրի հեռարձակման համար, կազմվել է նաև հրատապ ձեռք բերվելիք տեխնիկայի ցանկ։ Նախատեսվում է «Տավուշ ԷՖԷՄ»-ի աշխատասենյակն ու ստուդիաները տեղակայել ընկերությանն անհատույց վարձակալման տրված ընդարձակ սրահներով տարածքում։
Որպես ֆինանսական հնարավորությունները հիմնավորող փաստաթուղթ ներկայացվել է Եվրամիության EED կազմակերպության հետ դրամաշնորհ տրամադրելու մասին պայմանագիր։ Ընկերությանը ֆինանսական աջակցություն են ցուցաբերել մի շարք միջազգային և տեղական կազմակերպություններ։ Լիցենզիա ստանալու դեպքում ընկերությունը նախատեսում է հաստատել նոր ծրագրեր և ներգրավել նոր դոնորներ, գործընկերներ, հովանավորներ և գովազդատուներ։ Նշվել է, որ Տավուշի մարզի ամենահեռավոր և սահմանամերձ գյուղում էլ «Տավուշ ԷՖԷՄ» ծրագիրը հասանելի ու անխոչընդոտ լսելի լինելու համար, տեղանքի առանձնահատկությունները հաշվի առնելով, անհրաժեշտ կլինեն լրացուցիչ ներդրումներ, որոնք հաշվարկվում և քննարկվում են։
Աշխատակազմի վերաբերյալ նշվել է, որ ընկերությունն ունի 21 հոգուց բաղկացած հիմնական թիմ, ինչպես նաև 10 պատանի թղթակից սահմանամերձ համայնքներում, որոնց թիվը նախատեսվում է քառապատկել։ Ներկայացվել է 16 աշխատակցի ինքնակենսագրականը։ Աշխատակազմի ուսուցման, վերապատրաստման, մասնագիտական կարողությունների բարձրացման նպատակով ընկերությունը համագործակցել և շարունակելու է համագործակցել տեղական և միջազգային կազմակերպությունների, ինչպես նաև համաշխարհային ճանաչում ունեցող լրատվամիջոցների հետ (Դոյչե Վելե, ԲԲՍԻ, Ռոյտերս), որոնց ցանկը կընդլայնվի, քանի որ ընկերությունն ընդգրկվել է Եվրամիության լրատվամիջոցների ցանկում։
«ՄԵԴԻԱ ՄԱՐՍԵՏ» ՍՊ ընկերության հայտի համաձայն «Էմ Էֆ Էմ Ռադիո» ծրագիրը գործարկվել է 2017 թվականին և շուրջ 6 տարի գործում է առցանց ռադիոկայանների շարքում, 24/7 ռեժիմով՝ առանց գովազդի։ Ծրագրի եթերային ձևաչափն է՝ ժամանակակից հիթային ռադիո, որի հիմնական թիրախային խումբը 18-45 տարեկան ունկնդիրներն են։ Ծրագրի եթերի 100%-ը երաժշտություն է, սակայն նախատեսվում է հեռարձակել նաև սեփական արտադրության հայերեն հաղորդումներ, որոնք կապահովեն բազմակարծությունը և միտված կլինեն ազգային, համամարդկային, հոգևոր, մշակութային մնայուն արժեքների ճանաչողությանն ու ամրապնդմանը։ Ծրագրի եթերացանցը կազմված է լինելու երաժշտության, նորությունների և թոք-շոուների համակցությունից, որոնք միտված կլինեն բավարարելու ունկնդիրների լայն շրջանակի պահանջները։ Կներկայացվեն հանրաճանաչ հին ու նոր երգեր, երաժիշտների կատարումներ, իսկ լրատվական թողարկումները կտրամադրեն տեղական, տարածաշրջանային և միջազգային նորություններ։ Հաղորդումներում կհյուրընկալվեն հայտնի փորձագետներ և անհատներ, որոնք կքննարկեն հանրությանը հուզող ոլորտային հարցեր և թեմաներ։
Ըստ հայտի ընկերության մարքեթինգային քաղաքականության հիմնական նպատակներն են՝ բարձրացնել ծրագրի ներկայացվածության մակարդակը ՀՀ տարածքում և նրանից դուրս, ավելացնել կայքի այցելությունները, բջջային հավելվածի ճանաչելիությունը, սոցիալական կայքերում ծրագրի էջերի հետևորդների թվաքանակը, ներգրավել նոր ունկնդիրներ և գովազդատուներ, ապահովել գովազդների հեռարձակումից մուտքերի անընդհատությունը։
Նշվել է, որ ներդրված ժամանակակից տեխնիկական միջոցների շնորհիվ ծրագիրը տարբերվում է ընտրված ձևաչափով, եթերի ժամանակակից ձևավորմամբ և որակյալ հնչողությամբ։ Ընկերության առաջխաղացումն իրականացվելու է սոցիալական ցանցերի, արտաքին գովազդի և միջոցառումների հովանավորման միջոցով։
Ներկայացվել են ընկերության գործունեության ապահովման համար անհրաժեշտ տեխնիկական միջոցները՝ քանակական տվյալներով և տեխնիկական բնութագրերով, ներկայացվել է նաև դրանց վրա կատարվելիք ծախսը։
Համաձայն հայտի՝ ընկերության ֆինանսական միջոցները գոյանալու են եթերում գովազդի վաճառքից, հաղորդումների հովանավորչությունից և առցանց գովազդից, ինչպես նաև ընկերության կողմից մատուցվող այլ ծառայություններից։ Ընկերությունը նախատեսում է եթերում ներառել սեփական արտադրության կոմերցիոն բնույթի հաղորդումներ, ինչը ևս կավելացնի ընկերության հասույթը։
Ընկերության բյուջեն ներառելու է անձնակազմի, տեխնիկայի, մարքեթինգի, եթերացանցի, ինչպես նաև ընթացիկ ծախսերը։ Նշվել է, որ կանխատեսումների համաձայն ծրագիրը կսկսի շահույթով աշխատել մեկնարկից 2-3 տարի հետո։
Որպես ֆինանսական հնարավորությունները հիմնավորող փաստաթուղթ ներկայացվել է գրություն՝ ընկերության միակ մասնակցի և տնօրենի կողմից առ այն, որ ծրագրի ֆինանսավորումը կկատարվի իր կողմից և որպես հավաստում ներկայացվել է նաև բանկային հաշիվների վերաբերյալ տեղեկանք։
Աշխատակազմի վերաբերյալ ներկայացված տեղեկատվության համաձայն ընկերությունում աշխատում են բանիմաց աշխատակիցներ, որոնք ունեն տևական մասնագիտական փորձառություն և արդյունավետ իրականացնում են աշխատանքային պարտականությունները։ Ներկայացված ցանկի համաձայն աշխատակազմը բաղկացած է 5 աշխատողից, որոնք ունեն 15-50 տարվա մասնագիտական աշխատանքային փորձ։
Ներկայացվել են նաև ընկերության ռիսկերը և դրանց կառավարման մեխանիզմները։
Հանձնաժողովի հիմնավորումները, պատճառաբանությունը և եզրահանգումը.
Հանձնաժողովը, ղեկավարվելով օրինականության, ժողովրդավարության, հավասարության, անաչառության, ինքնուրույնության, կոլեգիալության և հրապարակայնության սկզբունքներով, Ընկերությունների հայտերի և կից փաստաթղթերի ուսումնասիրության, համադրման և գնահատման արդյունքում ամրագրում է հետևյալը.
Մրցույթին մասնակցող «ԷՖ-ԷՄ» ՍՊ ընկերությունը տեսալսողական մեդիայի ոլորտում լսողական ծրագրերի հեռարձակում է իրականացնում 2021 թվականից՝ Երևան քաղաքի տարածքում, իսկ 2022 թվականից՝ ՀՀ Լոռու, Սյունիքի, Արագածոտնի և Վայոց ձորի մարզերի տարածքում։ «ՏԱՎՈՒՇ ՄԵԴԻԱ» ՍՊ ընկերությունը 2021 թվականին տրամադրված հանրային մուլտիպլեքսում սլոթի օգտագործման լիցենզավորման մարզային սփռման լիցենզիայի համաձայն ՀՀ Տավուշի մարզի տարածքում հեռարձակում է «ՏԱՎՈՒՇ ՏՎ» տեսալսողական ծրագիրը։ «ՄԵԴԻԱ ՄԱՐՍԵՏ» ՍՊ ընկերության «Էմ Էֆ Էմ Ռադիո» ծրագիրը 2017 թվականից հեռարձակվում է առցանց տիրույթում, իսկ 2023 թվականի հունվարից ընկերությունը հեղինակազորված տեսալսողական մեդիածառայություն մատուցող է։
Օրենքի 46-րդ հոդվածի 8-րդ մասի համաձայն Հանձնաժողովը մրցույթում հաղթող մասնակցի ընտրության ժամանակ հաշվի է առնում՝ 1. սեփական արտադրության հաղորդումների գերակայությունը, 2. հայերեն հաղորդումների գերակայությունը, 3. բազմակարծությունը խթանելու կարողությունը, 4. հայտատուի տեխնիկական և ֆինանսական հնարավորությունները, 5. աշխատակազմի մասնագիտական պատրաստվածությունը, 6. ազգային, համամարդկային, հոգևոր, մշակութային մնայուն արժեքների ճանաչողությանն ու ամրապնդմանն ուղղված հաղորդումների գերակայությունը, 7. գործող լիցենզավորված հեռարձակողի դեպքում՝ գործունեության իրականացման ընթացքում լիցենզավորման հայտով ստանձնած պարտավորություններին համապատասխանությունը:
Օրենքի 32-րդ հոդվածի 1-ին մասի 14-րդ կետի համաձայն՝ Հանձնաժողովն իրականացնում է հեռարձակողների և օպերատորների գործունեության մշտադիտարկում։
Վերոնշյալ իրավական կարգավորումների համատեքստում նշենք, որ Օրենքի 46-րդ հոդվածի 8-րդ մասի 7-րդ կետով սահմանված դրույթը տարածվում է միայն «ԷՖ-ԷՄ» ՍՊ ընկերության վրա, քանի որ Մրցույթի մասնակիցներից միայն «ԷՖ-ԷՄ» ՍՊ ընկերությունն է գործող լիցենզավորված լսողական ծրագրեր հեռարձակող: Հետևաբար, Հանձնաժողովի կողմից Ընկերությունների մրցութային հայտերի ուսումնասիրության, համադրման և վերլուծության համար հիմք են հանդիսացել տեսլականներում ներկայացված, իսկ «ԷՖ-ԷՄ» ՍՊ ընկերության դեպքում հաշվի են առնվել նաև գործունեության իրականացման ընթացքում լսողական ծրագրի հաճախականության օգտագործման լիցենզավորման հայտերով ստանձնած պարտավորություններին համապատասխանությունը (Հանձնաժողովի կառուցվածքային ստորաբաժանման կողմից 2023 թվականի հունվար ամսվա ընթացքում իրականացված փաստացի դիտարկման արդյունքների հիման վրա)։
Սեփական արտադրության և հայերեն հաղորդումներ
«ԷՖ-ԷՄ» ՍՊ ընկերության հայտի համաձայն ընկերությունը նախապատվություն է տալու սեփական և հայրենական արտադրության հաղորդումներին, որոնք գերակշռելու են ծրագրում։
«ՏԱՎՈՒՇ ՄԵԴԻԱ» ՍՊ ընկերությունը հայտում ներկայացրել է «Տավուշ ՏՎ» տեսալսողական ծրագրում հեռարձակվող հաղորդումները, նշելով, որ դրանք իրենց արտացոլումը կգտնեն նաև «Տավուշ ԷՖԷՄ» ծրագրում։ Ներկայացված տեղեկատվության համաձայն ընկերության բոլոր հաղորդումները բացառապես հայերեն են լինելու, իսկ սեփական հաղորդումների ծավալը կկազմի 90-95%։
«ՄԵԴԻԱ ՄԱՐՍԵՏ» ՍՊ ընկերությունը նշել է, որ ծրագրի եթերի 100%-ը երաժշտություն է, սակայն նախատեսվում է հեռարձակել նաև սեփական արտադրության հայերեն հաղորդումներ։ Նշված հաղորդումների ծավալի վերաբերյալ քանակական տվյալներ չեն ներկայացվել։
Այս չափանիշների վերաբերյալ ներկայացված տեղեկատվության համաձայն Ընկերություններն իրենց ծրագրերում ապահովելու են սեփական արտադրության և հայերեն հաղորդումների գերակայությունը:
Բազմակարծությունը խթանելու կարողություն
Կարևորելով հանրային իրազեկման գործում հեռարձակողների դերակատարումը և ժողովրդավարական պետության մեջ քաղաքացու տեղեկացվածության իրավունքի ապահովումը, Օրենքով երաշխավորված է տեղեկատվության ազատությունը, հավաստի տեղեկատվություն ստանալու իրավունքը, կարծիքների արտահայտման իրավունքը, որը կնպաստի տեսալսողական հաղորդումների բովանդակության բազմազանությանը և բազմակարծության խթանմանը: Այս համատեքստում հարկ է նշել, որ հեռարձակողներն իրենց ծրագրերում պետք է ապահովեն նաև հաղորդումների բազմազանություն։
«ԷՖ-ԷՄ» ՍՊ ընկերության հայտի համաձայն բազմակարծության ապահովումն ընկերության հիմնական ուղենիշն է լինելու իր գործունեության ընթացքում և ներառվելու է լրատվական հաղորդումներում, այն ներկայացնելով բազմակողմանիորեն՝ հիմնվելով անկողմնակալ և հավաստի տեղեկատվության տրամադրման սկզբունքի վրա։ Միաժամանակ, ընկերությունը նախատեսում է լիցենզիա ստանալու դեպքում ներկայացնել բազմազան հաղորդումներ։
«ԷՖ-ԷՄ» ՍՊ ընկերության հաղորդումներում բազմակարծությունը գործնականում ապահովելու վերաբերյալ նշենք, որ «Մեկ Էֆ Էմ» ծրագրի դիտարկման արդյունքների համաձայն ծրագրում հիմնականում տեղ են գտել լրատվական թողարկումներ, երաժշտություն, գովազդ և այլ հաղորդումներ։ Հետևաբար, ծրագրի խմբագրական քաղաքականությունը միայն որոշ չափով է համապատասխանում մրցութային հայտով ներկայացված տեսլականին։
«ՏԱՎՈՒՇ ՄԵԴԻԱ» ՍՊ ընկերության նպատակներից է անկախ, բազմազան ու բազմակարծիք, լրատվական ու ժամանցային, բացառապես հայերեն տիրույթի ձևավորումը Տավուշի մարզում։ Հայտի համաձայն ծրագիրը հայրենաճանաչ, հետաքրքրաշարժ, մտահոգեսնուցող ու բազմաժանր է, բազմազան և անդրադառնում է ամենատարբեր թեմաների, իսկ հաղորդումները հիմնականում կրթական, մշակութային, հասարակական-քաղաքական, տեղեկատվական, մանկապատանեկան, երաժշտական, մարզական թեմատիկ ուղղվածության են։
«ՄԵԴԻԱ ՄԱՐՍԵՏ» ՍՊ ընկերության հայտում բազմակարծության ապահովման վերաբերյալ միայն նշվել է, որ նախատեսվում է հեռարձակել սեփական արտադրության հայերեն հաղորդումներ, որոնք կապահովեն բազմակարծությունը։
Ազգային, համամարդկային, հոգևոր, մշակութային մնայուն արժեքների ճանաչողությանն ու ամրապնդմանն ուղղված հաղորդումներ
Մրցութային հայտերի ուսումնասիրության արդյունքում պարզվել է, որ Ընկերությունների ծրագրերում նախատեսվում են մի շարք մշակութային և գիտակրթական հաղորդումներ, որոնք միտված են ազգային, համամարդկային, հոգևոր, մշակութային մնայուն արժեքների ճանաչողությանն ու ամրապնդմանը։ Ընկերությունների ծրագրերում ներառված են նաև հանրօգուտ բովանդակության՝ մանկական, կրթական, մշակութային և մարզական թեմատիկ ուղղվածության հաղորդումներ։
«ԷՖ-ԷՄ» ՍՊ ընկերության ծրագրում ներկայացվելու են հայկական և համաշխարհային մշակույթի, դասական արվեստի և գրականության, երգի և երաժշտարվեստի նմուշները։ Երաժշտական արտադրանքի հետ ունկնդիրներին է ներկայացվելու նաև ազգային, համամարդկային, հոգևոր, մշակութային մնայուն արժեքների ճանաչողությանն ու ամրապնդմանն ուղղված հաղորդումներ։ Ընկերությունը պատրաստվում է արտադրել այնպիսի հաղորդումներ, որոնք կներկայացնեն ազգային և համամարդկային մշակութային ժառանգությունը, երկրի արդի մշակութային կյանքը՝ թիրախ ունենալով ազգային ու համամարդկային հոգևոր բարոյական արժեքների քարոզչությունը։ Նախատեսվում է ծրագրում կարևոր տեղ հատկացնել նաև տվյալ մարզին առնչվող պատմամշակութային հաղորդումներին։
Սակայն, այս համատեքստում ևս պետք է արձանագրենք, որ «Մեկ Էֆ Էմ» ծրագրի դիտարկման արդյունքների համաձայն ծրագրում հիմնականում տեղ են գտել լրատվական թողարկումներ, երաժշտություն, գովազդ և այլ հաղորդումներ։
«ՏԱՎՈՒՇ ՄԵԴԻԱ» ՍՊ ընկերությունը նախատեսում է մշակութային, գրական-գեղարվեստական հաղորդումների, ռադիոբեմադրությունների պատրաստում, ինչպես նաև Տավուշի և տավուշցիների կյանքը, առօրյան, կենցաղը, մշակույթը, նրանց հուզող և հետաքրքրող խնդիրները, սահմանամերձ գյուղերի առօրյան ներկայացնող հաղորդումներ։ Ընկերությունը համագործակցության լայն ցանց ունի Տավուշում, որտեղ ներգրավված են մարզի մշակույթի կենտրոնները, արվեստի, գրականության, մշակույթի հայտնի գործիչները։ Ի թիվս այլ սկզբունքների, որպես հավատամք, ընկերությունը որդեգրել է նաև ազգային, ժողովրդավարական և համամարդկային արժեքներին հավատարիմ լինելու սկզբունքը։
«ՄԵԴԻԱ ՄԱՐՍԵՏ» ՍՊ ընկերության կողմից ներկայացված տեղեկատվության համաձայն ծրագրում նախատեսվում են սեփական արտադրության հայերեն հաղորդումներ, որոնք միտված կլինեն ազգային, համամարդկային, հոգևոր, մշակութային մնայուն արժեքների ճանաչողությանն ու ամրապնդմանը։
Տեխնիկական և ֆինանսական հնարավորություններ
Ընկերությունների կողմից ներկայացված տեխնիկական միջոցների հնարավորությունների վերաբերյալ իրականացված վերլուծության արդյունքում կարող ենք արձանագրել հետևյալը․
«ԷՖ-ԷՄ» ՍՊ ընկերությունը ներկայացրել է Երևան քաղաքում տեղակայված կենտրոնական գրասենյակում շահագործման մեջ գտնվող տեխնիկական և համակարգչային միջոցների ցանկը: Ընկերությունը նախատեսում է մարզում եթերային հեռարձակումը հիմնականում իրականացնել Երևանի կենտրոնական գրասենյակից՝ հեռավար կարգով՝ «Radio Boss» եթերային ծրագրով, որը լավագույններից է համարվում։
Ներկայացվել է մարզում նախատեսվող և պլանավորված հաղորդակների տեղաբաշխումն ըստ քանակների և հզորությունների՝ օգտագործվելու են 100-300 ՎՏ հզորության տրանզիստորային 3 հաղորդակներ, որոնք համարվում են իրենց սերնդի մեջ լավագույնները:
Հաղորդակների ներկայացված տեղաբաշխումն ըստ իրենց հզորությունների և տոպոլոգիայի հնարավորություն է տալիս իրականացնել ձայնային ազդանշանի օպտիմալ հեռարձակում տվյալ մարզում: Ներկայացված է, թե ինչպես է իրականացվելու ձայնային ազդանշանի սփռումը, օգտագործելով DEVA DB6400 թվային համակարգերը, DEVA 9009-TX ձայնային համակարգերը, IP համակարգերի կոդավորիչները և DEVA 9009-RX դեկոդավորիչները, որոնք ժամանակակից ձայնային համակարգերում համարվում են երկրորդ սերնդի տեխնիկական սարքավորումներ:
Ֆինանսական հնարավորությունների հիմնավորվածության վերաբերյալ ընկերությունը ներկայացրել է բանկային հաշվի մնացորդների վերաբերյալ տեղեկանք և գովազդային պայմանագրեր։
«ՏԱՎՈՒՇ ՄԵԴԻԱ» ՍՊ ընկերությունը նախատեսում է «Տավուշ ԷՖԷՄ»-ի աշխատասենյակն ու ստուդիաները տեղակայել ընկերությանը անհատույց վարձակալման տրված ընդարձակ սրահներով տարածքում։
Ներկայացվել է ընկերության տեխնիկական միջոցների ցանկը՝ տեխնիկական բնութագրերով և քանակական տվյալներով, որից կարելի է եզրակացնել, որ «Տավուշ ԷՖԷՄ» ծրագրի շահագործման ժամանակ պետք է օգտագործվեն հեռուստաընկերության ձայնային հիմնական միջոցները՝ ձայնագրման տաղավարն իր տեխնիկական միջոցներով, հեռարձակման եթերային սենյակն իր տեխնիկական և համակարգչային հիմնական միջոցներով:
Ըստ ներկայացված տեխնիկական միջոցների ցանկի, ընկերությունը նախատեսում է շահագործել 500 ՎՏ հզորությամբ մեկ հաղորդակ, որի տեղաբաշխումը մեկ ամրագրված տարածքում, կախված մարզի աշխարհագրական տոպոլոգիայից, կդժվարացնի ձայնային ազդանշանի սփռումն ամբողջ մարզով: Հետագայում ընկերությունը պլանավորում է անհրաժեշտության դեպքում ձեռք բերել լրացուցիչ հաղորդակներ՝ 50-100 ՎՏ հզորություններով: Ընկերությունը պլանավորում է ձեռք բերել հրատապ տեխնիկական միջոցներ, բայց ներկայացված չեն դրանց անվանումները, տեխնիկական բնութագրերն ու հզորությունները:
Որպես ֆինանսական հնարավորությունները հիմնավորող փաստաթուղթ ներկայացվել է Եվրամիության EED կազմակերպության հետ դրամաշնորհի պայմանագիր և նշվել, որ ընկերությանը ֆինանսական աջակցություն են ցուցաբերել նաև մի շարք միջազգային և տեղական կազմակերպություններ, իսկ լիցենզիա ստանալու դեպքում ընկերությունը նախատեսում է հաստատել նոր ծրագրեր և ներգրավել նոր դոնորներ, գործընկերներ, հովանավորներ, գովազդատուներ։ Միևնույն ժամանակ նշվել է, որ Տավուշի մարզի ամենահեռավոր և սահմանամերձ գյուղում էլ «Տավուշ ԷՖԷՄ» ծրագիրը հասանելի ու անխոչընդոտ լսելի լինելու համար, տեղանքի առանձնահատկություններով պայմանավորված, անհրաժեշտ կլինեն լրացուցիչ ներդրումներ, որոնք հաշվարկվում և քննարկվում են։
«ՄԵԴԻԱ ՄԱՐՍԵՏ» ՍՊ ընկերության կողմից տեխնիկական միջոցների վերաբերյալ ներկայացվել է ընկերության գործունեության ապահովման համար անհրաժեշտ տեխնիկական միջոցների ցանկը՝ քանակական տվյալներով, տեխնիկական բնութագրերով։ Ցանկի համաձայն նախատեսվում է շահագործել FMUSER FSN-150 T RDS մակնիշի 3 հաղորդակ՝ մարզի ամբողջ տարածքում ազդանշանը սփռելու համար:
Որպես ֆինանսական հիմնավորում ներկայացվել է գրություն՝ ընկերության միակ մասնակցի և տնօրենի կողմից առ այն, որ ծրագրի ֆինանսավորումը կկատարվի իր կողմից և որպես հավաստում ներկայացվել է նաև բանկային հաշիվների վերաբերյալ տեղեկանք։
Համաձայն հայտի՝ ընկերության ֆինանսական միջոցները գոյանալու են եթերում գովազդի վաճառքից, հաղորդումների հովանավորչությունից, առցանց գովազդից, ինչպես նաև ընկերության կողմից մատուցվող այլ ծառայություններից։ Ընկերությունը նախատեսում է եթերում ներառել սեփական արտադրության կոմերցիոն բնույթի հաղորդումներ, ինչը ևս կավելացնի ընկերության հասույթը։
Աշխատակազմի մասնագիտական պատրաստվածություն
Մրցույթին մասնակցող Ընկերություններն իրենց աշխատակազմերի, ինչպես նաև աշխատակազմերում ընդգրկված անձանց մասնագիտական կարողությունների վերաբերյալ ներկայացրել են բավարար չափով տեղեկություններ և նշել նրանց փորձառության և մասնագիտական պատրաստվածության մասին։
Հարկ է նշել, որ բացի հիմնական աշխատողներից «ԷՖ-ԷՄ» ՍՊ ընկերությունը մեկ մարզում լրացուցիչ հեռարձակում կազմակերպելու համար բավարար է համարում ներառել մեկական լրագրող, եթերի ապահովման մասնագետ և տեխնիկական մասնագետ, «ՏԱՎՈՒՇ ՄԵԴԻԱ» ՍՊ ընկերությունը սահմանամերձ համայնքներում աշխատող 10 պատանի թղթակիցների թիվը նախատեսում է քառապատկել, իսկ «ՄԵԴԻԱ ՄԱՐՍԵՏ» ՍՊ ընկերությունը, որպես առցանց հեռարձակող, միայն ներկայացրել է գործող աշխատակազմում ներառված 5 աշխատողների վերաբերյալ տեղեկատվություն։
Անհրաժեշտ է ընդգծել, որ Հանձնաժողովի դիտարկմամբ սահմանափակ ռեսուրսի՝ հաճախականության օգտագործման միջոցով հեռարձակվող լսողական ծրագրերի բովանդակությունը պետք է արտացոլի հանրային պահանջմունքների և հետաքրքրությունների բազմազանությունը։
Տեսալսողական մեդիայի ոլորտը կարգավորող Հայաստանի Հանրապետության օրենսդրությունը, միջազգայնորեն ընդունված հայեցակարգերն ու չափորոշիչները նախատեսում են, որ լիցենզիա ստացած տեսալսողական մեդիածառայություններ մատուցողները պետք է ունենան կառավարման և ֆինանսավորման թափանցիկ համակարգ, լինեն անկախ ու վստահելի, ապահովեն հաղորդումների բարձր որակ, ինչպես նաև առանցքային դերակատարում ունենան ազգային մշակույթի պահպանման և պաշտպանության, ազգային ինքնության ձևավորման գործում։
Օրենքի 46-րդ հոդվածի 6-րդ մասի և Կարգի 29-րդ կետի համաձայն Հանձնաժողովի անդամները վարկանիշային փակ քվեարկության միջոցով կատարում են մրցույթում հաղթող մասնակցի ընտրությունը:
Վարկանիշային փակ քվեարկություն ապահովելու նպատակով անցկացվել է վիճակահանություն, որի ժամանակ Հանձնաժողովի յուրաքանչյուր անդամ պատահականության սկզբունքով վերցրել է Հանձնաժողովի անդամների թվին համապատասխան վիճակահանության՝ թվագրում պարունակող թերթիկներից մեկը և փոխանցել Հանձնաժողովի քարտուղարին, որը վիճակահանության թերթիկում նշված թվագրումով գնահատման թերթիկը տրամադրել է Հանձնաժողովի անդամին:
Վարկանիշային քվեարկությունից առաջ Հանձնաժողովի անդամները հանդես չեն եկել հայտարարությամբ և միջնորդությամբ:
Օրենքի 46-րդ հոդվածի 8-րդ մասի և Կարգի 37-րդ կետի համաձայն Հանձնաժողովը մրցույթում հաղթող մասնակցի ընտրության ժամանակ հաշվի է առնում՝
1. սեփական արտադրության հաղորդումների գերակայությունը,
2. հայերեն հաղորդումների գերակայությունը,
3. բազմակարծությունը խթանելու կարողությունը,
4. հայտատուի տեխնիկական և ֆինանսական հնարավորությունները,
5. աշխատակազմի մասնագիտական պատրաստվածությունը,
6. ազգային, համամարդկային, հոգևոր, մշակութային մնայուն արժեքների ճանաչողությանն ու ամրապնդմանն ուղղված հաղորդումների գերակայությունը,
7. գործող լիցենզավորված տեսալսողական մեդիածառայություն մատուցողի դեպքում՝ գործունեության իրականացման ընթացքում լիցենզավորման հայտով ստանձնած պարտավորություններին համապատասխանությունը:
Օրենքի 46-րդ հոդվածի 7-րդ մասի համաձայն՝ վարկանիշային քվեարկության իրականացման ընթացակարգը սահմանվում է սլոթի օգտագործման լիցենզավորման մրցույթի անցկացման կարգով, որը 32-րդ հոդվածի 1-ին մասի 6-րդ կետի համաձայն սահմանում է Հանձնաժողովը:
Օրենքի 60-րդ հոդվածի 14-րդ մասի համաձայն՝ լսողական ծրագիր հեռարձակողների համար անալոգային հաճախականությունների վրա տարածվում են Օրենքով սլոթի վերաբերյալ նախատեսված կարգավորումները։
Կարգի 32-րդ կետի համաձայն սահմանվել է, որ Հանձնաժողովի յուրաքանչյուր անդամ, Կարգի 37-րդ կետի չափանիշները հաշվի առնելով, մրցույթի յուրաքանչյուր մասնակցի գնահատում է գնահատման թերթիկում՝ ամբողջ թվով՝ 20 միավորային սանդղակով: Հանձնաժողովի յուրաքանչյուր անդամ գնահատման թերթիկին կից ներկայացնում է իր գնահատման հիմնավորումը։
Գնահատման թերթիկի ձևը հաստատվել է Կարգի Ձև N 2-ով:
Հաշվի առնելով վերոգրյալը, ուսումնասիրելով ներկայացված հայտերը և կից փաստաթղթերը, Հանձնաժողովի անդամներն իրենց հիմնավորումներով, փակ վարկանիշային քվեարկությամբ Ընկերությունների հայտերը գնահատել են հետևյալ միավորներով.
|
հ/հ |
Մասնակցի անվանումը |
Գնահատման միավորը |
Վարկանիշային | ||||
|
Գնահատման թերթիկի համարը | |||||||
|
1 |
2 |
3 |
4 |
5 | |||
|
1 |
«ԷՖ-ԷՄ» ՍՊԸ |
15 |
15 |
18 |
16 |
17 |
81 |
|
2 |
«ՏԱՎՈՒՇ ՄԵԴԻԱ» ՍՊԸ |
16 |
17 |
17 |
17 |
18 |
85 |
|
3 |
«ՄԵԴԻԱ ՄԱՐՍԵՏ» ՍՊԸ |
11 |
12 |
16 |
11 |
16 |
66 |
|
Անցողիկ շեմը |
33,(3) | ||||||
Հանձնաժողովի անդամները գնահատման թերթիկին կից ներկայացրել են իրենց գնահատման հիմնավորումները, որոնք կցվում են սույն որոշմանը։
Կարգի 32-րդ կետի համաձայն՝ մրցույթում անցողիկ շեմ է համարվում հնարավոր առավելագույն վարկանիշային միավորի մեկ երրորդը, իսկ վարկանիշային միավորը Կարգի 33-րդ կետի համաձայն որոշվում է գնահատման միավորների հանրագումարով։
Տվյալ մրցույթում անցողիկ շեմը 33,(3) միավորն է։
Հանձնաժողովի անդամների վարկանիշային քվեարկության արդյունքում «ԷՖ-ԷՄ» ՍՊ, «ՏԱՎՈՒՇ ՄԵԴԻԱ» ՍՊ և «ՄԵԴԻԱ ՄԱՐՍԵՏ» ՍՊ ընկերությունները հաղթահարել են անցողիկ շեմը։
Կարգի 34-րդ կետի համաձայն՝ վարկանիշային քվեարկության արդյունքում հաղթող է ճանաչվում անցողիկ շեմը հաղթահարած և առավելագույն վարկանիշային միավոր ստացած մասնակիցը, իսկ մեկ մասնակցի դեպքում՝ անցողիկ շեմը հաղթահարած մասնակիցը:
Ղեկավարվելով «Տեսալսողական մեդիայի մասին» օրենքի 32-րդ հոդվածի 1-ին մասի 1-ին և 3-րդ կետերի, 46-րդ հոդվածի 6-րդ, 8-րդ, 10-րդ մասերի, 60-րդ հոդվածի 14-րդ մասի, Հեռուստատեսության և ռադիոյի հանձնաժողովի 2020 թվականի սեպտեմբերի 8-ի «Հանրային մուլտիպլեքսում սլոթի օգտագործման լիցենզավորման մրցույթի անցկացման կարգը և լիցենզիայի ձևը հաստատելու մասին» թիվ 94-Ն որոշմամբ հաստատված կարգի դրույթներով և հիմք ընդունելով վարկանիշային քվեարկության արդյունքները, Հեռուստատեսության և ռադիոյի հանձնաժողովը որոշում է.
1. «ՏԱՎՈՒՇ ՄԵԴԻԱ» ՍՊ ընկերությանը ճանաչել լսողական ծրագրի հաճախականության օգտագործման լիցենզավորման մարզային սփռման մրցույթի հաղթող և տրամադրել ՀՀ Տավուշի մարզի տարածքում լսողական ծրագրի հաճախականության օգտագործման լիցենզիա:
2․ «ՏԱՎՈՒՇ ՄԵԴԻԱ» ՍՊ ընկերությանը ՀՀ Տավուշի մարզում տրամադրել հետևյալ հաճախականությունները՝ ք. Նոյեմբերյան՝ 98.7 ՄՀց, ք. Իջևան՝ 94.3 ՄՀց և ք. Բերդ՝ 99.7 ՄՀց։
3. Սույն որոշման անբաժանելի մաս համարել Հանձնաժողովի անդամների գնահատման հիմնավորումները՝ համաձայն Հավելվածի։
4. Սույն որոշումն ուժի մեջ է մտնում Ընկերություններին պատշաճ իրազեկելու օրվան հաջորդող օրվանից:
5. Սույն որոշումը կարող է բողոքարկվել ՀՀ վարչական դատարան` ուժի մեջ մտնելու օրվանից երկամսյա ժամկետում:
|
Հեռուստատեսության և ռադիոյի հանձնաժողովի նախագահ |
Տ. ՀակոբՅԱՆ |
|
2023 թ. ապրիլի 3 ք. Երևան |
|
Հավելված Հեռուստատեսության և ռադիոյի հանձնաժողովի 2023 թվականի ապրիլի 3-ի թիվ 11-Ա որոշման |
ՀԻՄՆԱՎՈՐՈՒՄ
2022 թվականի դեկտեմբերի 23-ին հայտարարված լսողական ծրագրի հաճախականության օգտագործման լիցենզավորման մարզային՝ ՀՀ Տավուշի մարզի տարածքում սփռման մրցույթի մասնակիցների հայտերի թվանշման
1. «ԷՖ-ԷՄ» ՍՊ ընկերություն
Մրցույթին ներկայացված «ԷՖ-ԷՄ» ՍՊ ընկերության ծրագիրը պատշաճ կազմված է, իրագործման դեպքում կարող է որակյալ բովանդակության և տարբեր ժանրերի երաժշտության հարթակ լինել Տավուշի մարզում: Ծրագիրը համապատասխանում է «Տեսալսողական մեդիայի մասին» օրենքով սահմանված այն պահանջներին ու չափորոշիչներին, որոնցով Հեռուստատեսության և ռադիոյի հանձնաժողովը գնահատում է մրցույթին ներկայացված ծրագրերը:
Բովանդակության և չափորոշիչների վերաբերյալ: Ընկերությունը պարտավորվում է ներկայացնել հայկական և համաշխարհային մշակույթի, դասական արվեստի և գրականության, երգի և երաժշտարվեստի նմուշները: Ըստ ծրագրի կարևոր տեղ կհատկացվի տվյալ մարզին առնչվող պատմամշակութային հաղորդումներին։ Ազգային, համամարդկային, հոգևոր, մշակութային մնայուն արժեքների ճանաչողությանն ու ամրապնդմանն ուղղված հաղորդումների գերակայությունն ընկերությունը կփորձի ապահովել ստեղծվող յուրաքանչյուր հաղորդման միջոցով:
Բազմակարծության ապահովումը, ըստ ծրագրի, ընկերության հիմնական ուղենիշն է լինելու, և այդ նպատակով հաղորդումները ստեղծելիս հաշվի են առնվելու ունկնդիրների հետաքրքրությունները։ Ընկերությունը նախապատվություն է տալու սեփական և հայրենական արտադրության հաղորդումներին և ծրագրերում գերակշռելու են սեփական և հայրենական արտադրության հաղորդումները։
Այստեղ պետք է նշեմ, որ ընկերությունը նույնաբովանդակ հայտ էր ներկայացրել Սյունիքի և Լոռու մարզերում լսողական ծրագրի հաճախականության օգտագործման լիցենզավորման մրցույթներին: Սակայն, լիցենզիաներ ստանալուց հետո ընկերությունը թերի է կատարում իր վրա վերցրած պարտավորությունները: Մասնավորապես, ծրագրերում բացակայում են տվյալ մարզերին առնչվող պատմամշակութային, ինչպես նաև «ազգային, համամարդկային, հոգևոր, մշակութային մնայուն արժեքների ճանաչողությանն ու ամրապնդմանն ուղղված» հաղորդումները: Ուստի, վերապահումով եմ վերաբերվում այս հայտում ներկայացված մի շարք խոստումներին:
Օգտագործվելիք տեխնիկական միջոցների և հնարավորությունների վերաբերյալ: Հայտում ներկայացված հաղորդակների տեղաբաշխումն ըստ իրենց հզորությունների և տոպոլոգիայի հնարավորություն է տալիս իրականացնել ձայնային ազդանշանի օպտիմալ հեռարձակում Տավուշի մարզում:
Նախատեսվում է օգտագործել 100-300 ՎՏ հզորության 3 հաղորդակներ, որոնք համարվում են իրենց սերնդի մեջ լավագույնները: Ներկայացված է, թե ինչպես է իրականացվելու Տավուշի մարզում ձայնային ազդանշանի սփռումը, օգտագործելով DEVA DB6400 թվային համակարգերը, DEVA 9009-TX ձայնային համակարգերը, IP համակարգերի կոդավորիչները և DEVA 9009-RX դեկոդավորիչները, որոնք համարվում են ժամանակակից ձայնային համակարգերում երկրորդ սերնդի տեխնիկական սարքավորումներ:
Ուստի, տեխնիկական միջոցները բավարար են հաղորդումներ պատրաստելու և հեռարձակելու համար:
Ծրագրի ֆինանսական բաղադրիչի վերաբերյալ: Ընկերության ֆինանսական միջոցները, ըստ ծրագրի, գոյանալու են օրենքով թույլատրելի տարբեր աղբյուրներից՝ հիմնադրի ներդրումներ, գովազդ, վճարովի եթերաժամանակ, հաղորդումների վաճառք և այլն: Հայտին կցված են մի քանի պայմանագրեր գովազդատու ընկերությունների հետ: Համաձայն ներկայացված ծրագրի, նախատեսվող ֆինանսական մուտքերի աղբյուրները դիվերսիֆիկացված են:
Ամփոփեմ: ՀՌՀ աշխատակազմի կողմից պատրաստած ամփոփ տեղեկանքը և «ԷՖ-ԷՄ» ՍՊ ընկերության հայտի վերլուծությունը, ինչպես նաև այլ մարզերում իրականացվող խմբագրական քաղաքականությունը հիմք է տալիս ինձ գնահատել ընկերության ծրագիրը 15 միավոր գնահատականով:
2. «ՏԱՎՈՒՇ ՄԵԴԻԱ» ՍՊ ընկերություն
Մրցույթին ներկայացված ընկերության և ծրագիրը, և ծրագրի շնորհանդեսը պատշաճ կազմված են, բազմաբովանդակ, հետաքրքիր: Այն լիովին համապատասխանում է մարզային ռադիոյի գործունեության իմ տեսլականին, և իրագործման դեպքում կարող է իրազեկման, մարզի բնակչության տեղեկատվության աղբյուրի որակյալ հարթակ լինել: Ծրագիրը համապատասխանում է «Տեսալսողական մեդիայի մասին» օրենքով սահմանված այն պահանջներին ու չափորոշիչներին, որոնցով Հեռուստատեսության և ռադիոյի հանձնաժողովը գնահատում է մրցույթին ներկայացված ծրագրերը:
Բովանդակության և չափորոշիչների վերաբերյալ: Ներկայացված հայտում ընկերությունը պարտավորվում է ձևավորել անկախ, բազմազան ու բազմակարծիք, լրատվական ու ժամանցային, բացառապես հայերեն տիրույթ Տավուշի մարզում՝ տեղեկատվական ճանաչողական, ուսուցողական, խորհրդատվական, հետաքննական, մարզական, երաժշտական, մշակութային հաղորդումներով և ռադիոթատրոնով։ Ինչպես նաև դարձնել Տավուշի մարզն առավել իրազեկված, պատրաստված ու պաշտպանված, այն դարձնել ավելի անվտանգ, մրցունակ, դիմակայուն, բարեկեցիկ, երջանիկ ու կայուն զարգացող, բարելավել մարդկանց բարոյահոգեբանական դիմակայունությունը ու կյանքի որակը բարձրացնել։
Հայտում նաև նշվում է, որ ընկերության սկզբունքներին դեմ է ազգային, կրոնական կամ այլ կարգի անհանդուրժողականություն հրահրելը, ծայրահեղական մոտեցումներ և ռազմատենչ հայտարարություններ տարածելը, հանցավոր գործունեությունը խրախուսելը և այլն։
Կարևոր եմ համարում նշել, որ ընկերությանը պատկանող «Տավուշ ՏՎ» մարզային հեռուստածրագիրը հրապարակում է բացառապես ստուգված, հավաստի տեղեկատվություն, փաստարկված կարծիք և տեսակետ, մեծ տեղ է հատկացնում մարզային իրադարձություններին, ավանդույթներին, մշակույթին:
Հայտում նշվել է, որ «Տավուշ ՏՎ»-ի ծրագրերն իրենց արտացոլումը կգտնեն նաև «Տավուշ ԷՖԷՄ» ծրագրում: Հաշվի առնելով, որ ընկերությունն ունի նաև ակտիվ գործող կայք և ներկայություն սոցցանցերում, ապա մարզում կարող է ստեղծվել բազմազան մեդիահարթակ, որը կբավարարի Տավուշի մարզի բնակիչների տեղեկատվական պահանջմունքները:
Օգտագործվելիք տեխնիկական միջոցների և հնարավորությունների վերաբերյալ: Ընկերության կողմից ներկայացված ցանկում ներառված է ընկերության կողմից հեռուստաընկերությունում շահագործվող տեխնիկական և համակարգչային հիմնական միջոցների ցանկը, որտեղից կարելի է եզրակացնել, որ «Տավուշ ԷՖԷՄ» ծրագրի շահագործման ժամանակ պետք է օգտագործվեն հեռուստաընկերության ձայնային հիմնական միջոցները, այն է՝ ձայնագրման տաղավարն իր տեխնիկական միջոցներով:
Ըստ ներկայացված տեխնիկական միջոցների ցանկի, ընկերությունը նախատեսում է շահագործել 500 ՎՏ հզորությամբ թվով մեկ հաղորդակ, որի տեղաբաշխումը մեկ ամրագրված տարածքում, կախված մարզի աշխարհագրական տոպոլոգիայից, կդժվարացնի ձայնային ազդանշանի սփռումն ամբողջ մարզով:
Ներկայացված է, որ ընկերությունը պլանավորում է ձեռք բերել հրատապ տեխնիկական միջոցներ, բայց ներկայացված չէ այդ ցանկն իր բովանդակությամբ, իր տեխնիկական միջոցներով, պարամետրերով և հզորություններով: Այնուամենայնիվ տեխնիկական միջոցները բավարար են ռադիոյի անխափան գործունեության համար:
Ծրագրի ֆինանսական բաղադրիչի վերաբերյալ: Ընկերության ֆինանսական միջոցները, ըստ ծրագրի, գոյանալու են օրենքով թույլատրելի տարբեր աղբյուրներից՝ ներդրումներ, գովազդ, վճարովի եթերաժամանակ, հաղորդումների վաճառք և այլն: Հայտին կից ներկայացվել է Եվրամիության EED կազմակերպության հետ դրամաշնորհ տրամադրելու մասին պայմանագիր։ Համաձայն ներկայացված ծրագրի, նախատեսվող ֆինանսական մուտքերի աղբյուրները դիվերսիֆիկացված են:
Ամփոփեմ: ՀՌՀ աշխատակազմի կողմից պատրաստած ամփոփ տեղեկանքը և «ՏԱՎՈՒՇ ՄԵԴԻԱ» ՍՊ ընկերության հայտի վերլուծությունը, ինչպես նաև այլ մեդիահարթակներում ընկերության գործունեությունը հիմք է տալիս ինձ գնահատել ընկերության ծրագիրը 17 միավոր գնահատականով:
3. «ՄԵԴԻԱ ՄԱՐՍԵՏ» ՍՊ ընկերություն
Մրցույթին ներկայացված ընկերության ծրագիրը պատշաճ կազմված է: Ծրագիրը համապատասխանում է «Տեսալսողական մեդիայի մասին» օրենքով սահմանված այն պահանջներին ու չափորոշիչներին, որոնցով Հեռուստատեսության և ռադիոյի հանձնաժողովը գնահատում է մրցույթին ներկայացված ծրագրերը:
Բովանդակության և չափորոշիչների վերաբերյալ: Ըստ հայտի ծրագրի եթերացանցը կազմված է լինելու երաժշտության, նորությունների և թոք-շոուների համակցությունից, որոնք միտված կլինեն բավարարելու ունկնդիրների լայն շրջանակի պահանջները։ Երգացանկը կներկայացնի հանրաճանաչ հին ու նոր երգերի և տեղի երաժիշտների կատարումները, իսկ լրատվական թողարկումները կտրամադրեն տեղական, տարածաշրջանային և միջազգային նորություններ։ Հաղորդումներում կհյուրընկալվեն հայտնի փորձագետներ և անհատներ, որոնք կքննարկեն հանրությանը հուզող ոլորտային հարցեր և թեմաներ։
Ընկերության մարքեթինգային քաղաքականության հիմնական նպատակներից են լինելու՝ բարձրացնել ծրագրի ներկայացվածության մակարդակը ՀՀ տարածքում և նրանից դուրս, ավելացնել կայքի այցելությունները, բջջային հավելվածի ճանաչելիությունը, սոցիալական կայքերում ծրագրի էջերի հետևորդների թվաքանակը: Իմ կարծիքով, այդ նպատակները շատ թույլ են առնչվում մարզային ռադիոյի գործունեության սկզբունքներին:
Օգտագործվելիք տեխնիկական միջոցների և հնարավորությունների վերաբերյալ: Ներկայացված է տեխնիկական և համակարգչային միջոցների այն ցանկը, որն ընկերությունը պլանավորում է ձեռք բերել, որտեղ ամրագրված է, որ շահագործվելու է FMUSER FSN-150 T RDS մակնիշի թվով 3 հատ հաղորդակներ մարզի ամբողջ տարածքում ազդանշանը սփռելու համար: Ցանկում ամրագրված է հետևյալը․
1. եթերային համակարգիչ intel core i7 32 GB RAM 4 TB HDD-1 հատ
2. հավաքակցման համակարգ intel core i5 CPU 32 GB RAM 4 TB HDD-1հատ։
Հայտում թվարկված չեն այն տեխնիկական միջոցները, որոնցով ընկերությունը պատրաստվում է սեփական հաղորդումներ և թոք-շոուներ պատրաստել:
Ծրագրի ֆինանսական բաղադրիչի վերաբերյալ: Համաձայն հայտի՝ ընկերության ֆինանսական միջոցները գոյանալու են եթերում գովազդի վաճառքից, հաղորդումների հովանավորչությունից և առցանց գովազդից, ինչպես նաև ընկերության կողմից մատուցվող այլ ծառայություններից: Այստեղ հարկ եմ համարում նշել, որ ընկերության կողմից գործարկվող «MFM Radio» առցանց ռադիոծրագիրը հեռարձակվում է առանց գովազդի:
Ներկայացվել է գրություն ընկերության միակ մասնակցի և տնօրենի կողմից առ այն, որ ծրագրի ֆինանսավորումը կկատարվի իր կողմից, որի ընդհանուր գումարը կկազմի մոտ 10 մլն ՀՀ դրամ և որպես հավաստում ներկայացվել է նաև բանկային հաշիվների վերաբերյալ տեղեկանք։
Ամփոփեմ: ՀՌՀ աշխատակազմի կողմից պատրաստած ամփոփ տեղեկանքը և «ՄԵԴԻԱ ՄԱՐՍԵՏ» ՍՊ ընկերության հայտի վերլուծությունը, ինչպես նաև այլ մեդիահարթակներում ընկերության գործունեությունը հիմք է տալիս ինձ գնահատել ընկերության ծրագիրը 12 միավոր գնահատականով:
|
Հեռուստատեսության և ռադիոյի հանձնաժողովի նախագահ |
Տ. ՀակոբՅԱՆ |
|
30.03.2023 թ. |
ՀԻՄՆԱՎՈՐՈՒՄ
2022 թվականի դեկտեմբերի 23-ին հայտարարված լսողական ծրագրի հաճախականության օգտագործման լիցենզավորման մարզային՝ ՀՀ Տավուշի մարզի տարածքում սփռման մրցույթի մասնակիցների՝ «ԷՖ-ԷՄ» ՍՊ, «ՏԱՎՈՒՇ ՄԵԴԻԱ» ՍՊ և «ՄԵԴԻԱ ՄԱՐՍԵՏ» ՍՊ ընկերությունների հայտերի գնահատման
Հաշվի առնելով Հեռուստատեսության և ռադիոյի հանձնաժողովի 2020 թվականի սեպտեմբերի 8-ի «Հանրային մուլտիպլեքսում սլոթի օգտագործման լիցենզավորման մրցույթի անցկացման կարգը և լիցենզիայի ձևը հաստատելու մասին» թիվ 94-Ն որոշմամբ հաստատված կարգի 37-րդ կետով սահմանված գնահատման չափանիշները, մրցույթի երեք մասնակիցների՝ «ԷՖ-ԷՄ» ՍՊ, «ՏԱՎՈՒՇ ՄԵԴԻԱ» ՍՊ և «ՄԵԴԻԱ ՄԱՐՍԵՏ» ՍՊ ընկերությունների կողմից ներկայացված փաստաթղթերի ուսումնասիրության արդյունքում արձանագրել եմ հետևյալը.
«ԷՖ-ԷՄ» ՍՊ ընկերությունը նախապատվություն է տալու սեփական և հայրենական արտադրության հաղորդումներին և ծրագրերում գերակշռելու են սեփական և հայրենական արտադրության հաղորդումները։
«ՏԱՎՈՒՇ ՄԵԴԻԱ» ՍՊ ընկերությունը հայտում ներկայացրել է «Տավուշ Տվ» տեսալսողական ծրագրում հեռարձակվող հաղորդումները, նշելով, որ դրանք իրենց արտացոլումը կգտնեն նաև «Տավուշ ԷֆԷմ» ծրագրում։ Ըստ ներկայացված հայտի ընկերության բոլոր հաղորդումները բացառապես հայերեն են լինելու, իսկ սեփական հաղորդումների ծավալը կկազմի 90-95%։
«ՄԵԴԻԱ ՄԱՐՍԵՏ» ՍՊ ընկերությունը նշել է, որ ծրագրի եթերի 100%-ը երաժշտություն է, սակայն նախատեսվում է հեռարձակել նաև սեփական արտադրության հայերեն հաղորդումներ, որոնց վերաբերյալ քանակական տվյալներ չեն ներկայացվել։
Բազմակարծության ապահովման վերաբերյալ «ԷՖ-ԷՄ» ՍՊ ընկերությունը, ի թիվս այլնի նշել է, որ բազմակարծության ապահովումն ընկերության հիմնական ուղենիշն է լինելու իր գործունեության ընթացքում և ներառվելու է լրատվական հաղորդումներում, այն ներկայացնելով բազմակողմանիորեն՝ հիմնվելով անկողմնակալ և հավաստի տեղեկատվության տրամադրման սկզբունքի վրա։
Բազմակարծության ապահովման վերաբերյալ «ՏԱՎՈՒՇ ՄԵԴԻԱ» ՍՊ ընկերությունը նշել է, որ իր նպատակներից է անկախ, բազմազան ու բազմակարծիք, լրատվական ու ժամանցային, բացառապես հայերեն տիրույթի ձևավորումը ՀՀ Տավուշի մարզում։
Միաժամանակ, «ՄԵԴԻԱ ՄԱՐՍԵՏ» ՍՊ ընկերությունը իր հայտում բազմակարծության ապահովման վերաբերյալ նշել է միայն, որ նախատեսվում է հեռարձակել սեփական արտադրության հայերեն հաղորդումներ, որոնք կապահովեն բազմակարծությունը։
Ինչ վերաբերում է տեխնիկական միջոցներին և հնարավորություններին, ապա «ԷՖ-ԷՄ» ՍՊ ընկերությունը ներկայացրել է Երևան քաղաքում տեղակայված կենտրոնական գրասենյակում շահագործման մեջ գտնվող տեխնիկական և համակարգչային միջոցների ցանկը: Ընկերությունը նախատեսում է մարզում եթերային հեռարձակումը հիմնականում իրականացնել Երևանի կենտրոնական գրասենյակից՝ հեռավար կարգով՝ «Radio Boss» եթերային ծրագրով, որը լավագույններից է համարվում։ Ներկայացվել է մարզում նախատեսվող և պլանավորված հաղորդակների տեղաբաշխումն ըստ քանակների և հզորությունների՝ օգտագործվելու են 100-300 ՎՏ հզորության տրանզիստորային 3 հաղորդակներ, որոնք համարվում են իրենց սերնդի մեջ լավագույնները:
«ՏԱՎՈՒՇ ՄԵԴԻԱ» ՍՊ ընկերության կողմից ներկայացվել է ընկերության տեխնիկական միջոցների ցանկը՝ տեխնիկական բնութագրերով և քանակական տվյալներով: Ըստ ներկայացված տեխնիկական միջոցների ցանկի, ընկերությունը նախատեսում է շահագործել 500 ՎՏ հզորությամբ մեկ հաղորդակ, որի տեղաբաշխումը մեկ ամրագրված տարածքում, կախված մարզի աշխարհագրական տոպոլոգիայից, կդժվարացնի ձայնային ազդանշանի սփռումն ամբողջ մարզով: Հետագայում ընկերությունը պլանավորում է անհրաժեշտության դեպքում ձեռք բերել լրացուցիչ հաղորդակներ՝ 50-100 ՎՏ հզորություններով: Ընկերությունը պլանավորում է ձեռք բերել հրատապ տեխնիկական միջոցներ, սակայն չեն ներկայացվել դրանց անվանումները, տեխնիկական բնութագրերն ու հզորությունները:
«ՄԵԴԻԱ ՄԱՐՍԵՏ» ՍՊ ընկերության կողմից տեխնիկական միջոցների վերաբերյալ ներկայացվել է ընկերության գործունեության ապահովման համար անհրաժեշտ տեխնիկական միջոցների ցանկը՝ քանակական տվյալներով, տեխնիկական բնութագրերով։ Ցանկի համաձայն նախատեսվում է շահագործել FMUSER FSN-150 T RDS մակնիշի 3 հաղորդակ՝ մարզի ամբողջ տարածքում ազդանշանը սփռելու համար:
Երեք ընկերությունների կողմից ներկայացված ֆինանսական աղբյուրները հիմնավորող փաստաթղթերի ուսումնասիրությունների արդյունքում, եկել եմ այն եզրակացության, որ «ԷՖ-ԷՄ» ՍՊ ընկերության կողմից ներկայացվել են ավելի հիմնավոր փաստաթղթեր և տվյալներ:
Բոլոր ընկերություններն էլ ներկայացրել են տեղեկություններ աշխատակազմի վերաբերյալ, նշել նրանց փորձառության և մասնագիտական պատրաստվածության մասին։
Ինչ վերաբերում է ազգային, համամարդկային, հոգևոր, մշակութային մնայուն արժեքների ճանաչողությանն ու ամրապնդմանն ուղղված հաղորդումների գերակայությանը, ապա ընկերությունները նշել են հետևյալը.
«ԷՖ-ԷՄ» ՍՊ ընկերության ծրագրում ներկայացվելու են հայկական և համաշխարհային մշակույթի, դասական արվեստի և գրականության, երգի և երաժշտարվեստի նմուշները։ Երաժշտական արտադրանքի հետ ունկնդիրներին է ներկայացվելու նաև ազգային, համամարդկային, հոգևոր, մշակութային մնայուն արժեքների ճանաչողությանն ու ամրապնդմանն ուղղված հաղորդումներ։ Ընկերությունը պատրաստվում է արտադրել այնպիսի հաղորդումներ, որոնք կներկայացնեն ազգային և համամարդկային մշակութային ժառանգությունը, երկրի արդի մշակութային կյանքը՝ թիրախ ունենալով ազգային ու համամարդկային հոգևոր բարոյական արժեքների քարոզչությունը։ Նախատեսվում է ծրագրում կարևոր տեղ հատկացնել նաև տվյալ մարզին առնչվող պատմամշակութային հաղորդումներին։
«ՏԱՎՈՒՇ ՄԵԴԻԱ» ՍՊ ընկերությունը նախատեսում է մշակութային, գրական-գեղարվեստական հաղորդումների, ռադիոբեմադրությունների պատրաստում, ինչպես նաև Տավուշի և տավուշցիների կյանքը, առօրյան, կենցաղը, մշակույթը, նրանց հուզող և հետաքրքրող խնդիրները, սահմանամերձ գյուղերի առօրյան ներկայացնող հաղորդումներ։ Ընկերությունը համագործակցության լայն ցանց ունի Տավուշում, որտեղ ներգրավված են մարզի մշակույթի կենտրոնները, արվեստի, գրականության, մշակույթի հայտնի գործիչները։
«ՄԵԴԻԱ ՄԱՐՍԵՏ» ՍՊ ընկերության կողմից ներկայացված տեղեկատվության համաձայն ծրագրում նախատեսվում են սեփական արտադրության հայերեն հաղորդումներ, որոնք միտված կլինեն ազգային, համամարդկային, հոգևոր, մշակութային մնայուն արժեքների ճանաչողությանն ու ամրապնդմանը։
Հաշվի առնելով վերոշարադրյալը, ՀՀ Տավուշի մարզի և սահմանային, և անվտանգային գործոնը՝ համադրելով ներկայացված հայտերը, գտնում եմ, որ «ՏԱՎՈՒՇ ՄԵԴԻԱ» ՍՊ ընկերության ներկայացրած ծրագիրը, որտեղ գերակայում է տեղական կոնտենտը առավել կարևոր է և հիմնավոր՝ նախանշված նպատակների և դրանց հասնելու մեթոդների ընտրության տեսանկյունից:
|
Հեռուստատեսության և ռադիոյի հանձնաժողովի անդամ |
Վ. ՕհանՅԱՆ |
|
30.03.2023 թ. |
ՀԻՄՆԱՎՈՐՈՒՄ
2022 թվականի դեկտեմբերի 23-ին հայտարարված լսողական ծրագրի հաճախականության օգտագործման լիցենզավորման մարզային՝ ՀՀ Տավուշի մարզի տարածքում սփռման մրցույթի մասնակիցների հայտերի գնահատման
Լսողական ծրագրի հաճախականության օգտագործման լիցենզավորման մարզային՝ ՀՀ Տավուշի մարզի տարածքում սփռման մրցույթին մասնակցելու նպատակով ներկայացվել են երեք հայտ՝ «ԷՖ-ԷՄ» ՍՊ ընկերությունից, «ՏԱՎՈՒՇ ՄԵԴԻԱ» ՍՊ ընկերությունից, «ՄԵԴԻԱ ՄԱՐՍԵՏ» ՍՊ ընկերությունից։
Հայտերը համապատասխանում են «Տեսալսողական մեդիայի մասին» օրենքում և Հեռուստատեսության և ռադիոյի հանձնաժողովի կողմից ընդունված կարգում ամրագրված չափորոշիչներին:
Ներկայացված հայտերի և կից փաստաթղթերի ուսումնասիրության արդյունքում ստորև ներկայացնում եմ իմ կարծիք-հիմնավորումը։
1․ «ԷՖ-ԷՄ» ՍՊ ընկերություն
«ԷՖ-ԷՄ» ՍՊ ընկերության նպատակն է պատրաստել լսողական ծրագիր, որտեղ կներառվեն բազմազան հաղորդումներ՝ հաշվի առնելով ունկնդիրների երաժշտական նախասիրությունները և ժանրային հետաքրքրությունները։
Հարկ է նշել, որ ընկերությունը նույնաբովանդակ հայտեր էր ներկայացրել Սյունիքի, Վայոց ձորի, Արագածոտնի և Լոռու մարզերում լսողական ծրագրի հաճախականության օգտագործման լիցենզավորման մրցույթներին:
Ընկերությունը նախատեսում է ստեղծել մշակութային, կրթական, ուսումնական, ճանաչողական, երաժշտական, հայկական և համաշխարհային մշակույթի, դասական արվեստի և գրականության, երգի և երաժշտարվեստի նմուշները ներկայացնող հաղորդումներ՝ ուղղված ազգային, համամարդկային, հոգևոր, մշակութային մնայուն արժեքների ճանաչողությանն ու ամրապնդմանը, լրատվական և կոմերցիոն բնույթի հաղորդումներ, գովազդ։
Ըստ հայտի նախապատվությունը տրվելու է սեփական և հայրենական արտադրության հաղորդումներին, կարևոր տեղ է հատկացվելու նաև մարզին առնչվող պատմամշակութային հաղորդումներին։
Նախատեսվում է օգտագործել 100-300 ՎՏ հզորության 3 հաղորդակներ, որոնք համարվում են իրենց սերնդի մեջ լավագույնները: Ներկայացված է, թե ինչպես է իրականացվելու Տավուշի մարզում ձայնային ազդանշանի սփռումը, օգտագործելով DEVA DB6400 թվային համակարգերը, DEVA 9009-TX ձայնային համակարգերը, IP համակարգերի կոդավորիչները և DEVA 9009-RX դեկոդավորիչները, որոնք համարվում են ժամանակակից ձայնային համակարգերում երկրորդ սերնդի տեխնիկական սարքավորումներ: Ուստի, տեխնիկական միջոցները բավարար են հաղորդումներ պատրաստելու և հեռարձակելու համար:
Ընկերության ֆինանսական միջոցները գոյանալու են օրենքով թույլատրելի աղբյուրներից՝ հիմնադրի ներդրումներից, գովազդից, հովանավորությունից, վճարովի եթերաժամանակից, հաղորդումների վաճառքից, ինչպես նաև ընկերության գործունեության հետ կապված այլ ծառայություններից։
Ընկերությունն արդեն գործող հեռարձակող է, հետևապես մեկ մարզում լրացուցիչ հեռարձակում կազմակերպելու համար նախատեսում են աշխատակազմում ներառել մեկ լրագրող, եթերի ապահովման մասնագետ և տեխնիկական մասնագետ, որոնք զբաղվելու են միայն տվյալ մարզի տարածքում հաղորդումների, այդ թվում՝ տեղական լուրերի արտադրությամբ և տեխնիկայի պատշաճ աշխատանքի ապահովմամբ։ Իսկ ընկերության ամբողջական մեդիա արտադրանքի ստեղծման մեջ ներգրավված է լինելու ընկերության ողջ աշխատակազմը։
Ամփոփելով՝ ընկերության կողմից ներկայացված հայտը գնահատում եմ 16 միավոր։
2․ «ՏԱՎՈՒՇ ՄԵԴԻԱ» ՍՊ ընկերություն
«ՏԱՎՈՒՇ ՄԵԴԻԱ» ՍՊ ընկերության նպատակն է ձևավորել անկախ, բազմազան ու բազմակարծիք, լրատվական ու ժամանցային, բացառապես հայերեն ու հայկական տիրույթ Տավուշի մարզում՝ տեղեկատվական ճանաչողական, ուսուցողական, խորհրդատվական, հետաքննական, մարզական, երաժշտական, մշակութային հաղորդումներով և ռադիոթատրոնով, նպաստել մարդկանց իրազեկվածության բարձրացմանը Տավուշի մարզում՝ դարձնելով ավելի անվտանգ, մրցունակ, դիմակայուն, բարեկեցիկ, երջանիկ ու կայուն զարգացող, բարելավել մարդկանց բարոյահոգեբանական դիմակայունությունը։ Ընկերության սկզբունքներին դեմ է ազգային, կրոնական կամ այլ կարգի անհանդուրժողականության հրահրումը, ծայրահեղական մոտեցումների և ռազմատենչ հայտարարությունների տարածումը, հանցավոր գործունեության խրախուսումը։
Ընկերության կողմից ներկայացված տեխնիկական միջոցների ցանկում ներառված է «Տավուշ ՏՎ» հեռուստաընկերությունում շահագործվող տեխնիկական և համակարգչային հիմնական միջոցների ցանկը, որտեղից կարելի է եզրակացնել, որ «Տավուշ ԷՖԷՄ» ծրագրի շահագործման ժամանակ պետք է օգտագործվեն հեռուստաընկերության ձայնային հիմնական միջոցները, այն է՝ ձայնագրման տաղավարն իր տեխնիկական միջոցներով:
Ըստ ներկայացված տեխնիկական միջոցների ցանկի, ընկերությունը նախատեսում է շահագործել 500 ՎՏ հզորությամբ թվով մեկ հաղորդակ, որի տեղաբաշխումը մեկ ամրագրված տարածքում, կախված մարզի աշխարհագրական տոպոլոգիայից, կդժվարացնի ձայնային ազդանշանի սփռումն ամբողջ մարզով: Նախատեսվում է «Տավուշ ԷՖԷՄ»-ի աշխատասենյակն ու ստուդիաները տեղակայել ընկերությանն անհատույց վարձակալման տրված ընդարձակ սրահներով տարածքում։
Ընկերության ֆինանսական միջոցները գոյանալու են օրենքով թույլատրելի տարբեր աղբյուրներից՝ ներդրումներ, գովազդ, վճարովի եթերաժամանակ, հաղորդումների վաճառք և այլն: Հայտին կցված է Եվրամիության EED կազմակերպության հետ դրամաշնորհ տրամադրելու մասին պայմանագիր: Համաձայն ներկայացված ծրագրի, նախատեսվող ֆինանսական մուտքերի աղբյուրները դիվերսիֆիկացված են:
Ընկերությունն ունի 21 հոգուց բաղկացած հիմնական թիմ, ինչպես նաև 10 պատանի թղթակից սահմանամերձ համայնքներում, որոնց թիվը նախատեսվում է քառապատկել։ Ներկայացվել է 16 աշխատակցի ինքնակենսագրականը։ Աշխատակազմի ուսուցման, վերապատրաստման, մասնագիտական կարողությունների բարձրացման նպատակով ընկերությունը համագործակցել և շարունակելու է համագործակցել տեղական և միջազգային կազմակերպությունների, ինչպես նաև համաշխարհային ճանաչում ունեցող լրատվամիջոցների հետ (Դոյչե Վելե, ԲԲՍԻ, Ռոյտերս), որոնց ցանկը կընդլայնվի, քանի որ ընկերությունն ընդգրկվել է Եվրամիության լրատվամիջոցների ցանկում։ Մարզում երիտասարդ մասնագետների պատրաստումն ու մասնագիտական կարողությունների զարգացումը շատ բարձր է գնահատվում իմ կողմից։
Ամփոփելով՝ ընկերության կողմից ներկայացված հայտը գնահատում եմ 17 միավոր։
3․ «ՄԵԴԻԱ ՄԱՐՍԵՏ» ՍՊ ընկերություն
«ՄԵԴԻԱ ՄԱՐՍԵՏ» ՍՊ ընկերության կողմից ներկայացված ծրագրի եթերացանցը կազմված է լինելու երաժշտության, նորությունների և թոք-շոուների համակցությունից, որոնք միտված կլինեն բավարարելու ունկնդիրների լայն շրջանակի պահանջները։ Երգացանկը կներկայացնի հանրաճանաչ հին ու նոր երգերի և տեղի երաժիշտների կատարումները, իսկ լրատվական թողարկումները կտրամադրեն տեղական, տարածաշրջանային և միջազգային նորություններ։ Հաղորդումներում կհյուրընկալվեն հայտնի փորձագետներ և անհատներ, որոնք կքննարկեն հանրությանը հուզող ոլորտային հարցեր և թեմաներ։ Ընկերությունը նշել է, որ ծրագրի եթերի 100%-ը երաժշտություն է, սակայն նախատեսվում է հեռարձակել նաև սեփական արտադրության հայերեն հաղորդումներ։ Նշված հաղորդումների ծավալի վերաբերյալ քանակական տվյալներ չեն ներկայացվել։
Ընկերության մարքեթինգային քաղաքականության հիմնական նպատակներից են լինելու՝ բարձրացնել ծրագրի ներկայացվածության մակարդակը ՀՀ տարածքում և նրանից դուրս, ավելացնել կայքի այցելությունները, բջջային հավելվածի ճանաչելիությունը, սոցիալական կայքերում ծրագրի էջերի հետևորդների թվաքանակը: Իմ կարծիքով, այդ նպատակները շատ թույլ են առնչվում մարզային ռադիոյի գործունեության սկզբունքներին:
Ներկայացված է տեխնիկական և համակարգչային միջոցների ցանկը, որն ընկերությունը պլանավորում է ձեռք բերել, որտեղ ամրագրված է, որ շահագործվելու է FMUSER FSN-150 T RDS մակնիշի թվով 3 հատ հաղորդակներ մարզի ամբողջ տարածքում ազդանշանը սփռելու համար, սակայն հայտում թվարկված չեն այն տեխնիկական միջոցները, որոնցով ընկերությունը պատրաստվում է սեփական հաղորդումներ և թոք-շոուներ պատրաստել:
Ընկերության ֆինանսական միջոցները գոյանալու են եթերում գովազդի վաճառքից, հաղորդումների հովանավորչությունից և առցանց գովազդից, ինչպես նաև ընկերության կողմից մատուցվող այլ ծառայություններից: Իսկ ահա ընկերության կողմից գործարկվող «MFM Radio» առցանց ռադիոծրագիրը հեռարձակվում է առանց գովազդի:
Ընկերությունը ներկայացրել է գործող աշխատակազմում ներառված 5 աշխատողների վերաբերյալ տեղեկատվություն, որը թույլ չի տալիս պատկերացում կազմել, թե մարզում լսողական ծրագիրը զարգացնելու համար ինչպիսի մասնագետներ և որքան մարդկային ռեսուրս է պատրաստվում ներգրավվել։
Ամփոփելով՝ ընկերության կողմից ներկայացված հայտը գնահատում եմ 11 միավոր։
|
Հեռուստատեսության և ռադիոյի հանձնաժողովի անդամ |
Գ. ՄամիկոնՅԱՆ |
|
31.03.2023 թ. |
Հ Ի Մ Ն Ա Վ Ո Ր ՈՒ Մ
2022 թվականի դեկտեմբերի 23-ին հայտարարված լսողական ծրագրի հաճախականության օգտագործման լիցենզավորման մարզային՝ ՀՀ Տավուշի մարզի տարածքում սփռման մրցույթի մասնակիցների հայտերի թվանշման
1․ «ԷՖ-ԷՄ» ՍՊ ընկերություն
«ԷՖ-ԷՄ» ՍՊ ընկերությունը ներկայացրել է մի ծրագիր, որտեղ առկա են գործունեություն ծավալելու համար պահանջվող բոլոր տվյալները։ Դրանք խոստանում են բավականին ընդլայն գործունեություն։
Ծրագիրն աչքի է ընկնում իր մշակութային ընդգրկմամբ։ Այստեղ առկա է մեր մշակույթի՝ երաժշտության, գրականության և արվեստի հաղորդումների բավականին խոստումնալից մի համալիր։ Շահեկան է, որ շեշտը դրվելով հայ և միջազգային արվեստի պրոպագանդման ու տարածման վրա՝ ընկերությունը միաժամանակ նպատակ ունի այդ ամենը կոնկրետացնել մարզի պատմությանը, նրա պատմամշակութային համայնապատկերին և տեղական առանձնահատկություններին անդրադառնալով։
Ընկերությունը խոստանում է իր հաղորդումների մի զգալի մասը պատրաստել իբրև իր սեփական արտադրանքը։
«ԷՖ-ԷՄ» ՍՊ ընկերությունն իր ծրագրով նպատակ ունի հարկ եղած ծավալ ապահովել լրատվության դաշտի համար, իր ունկնդիրներին իրազեկել ինչպես տեղական, այնպես էլ միջազգային անցուդարձերի տեղեկատվությամբ։
Ընկերությունն իր տեխնիկական հնարավորությունների տվյալներում նշել է լսողական ծրագրերի իրականացման առկա միջոցները։ Դրանք վերաբերում են և տարածքային հնարավորություններին, համակարգչային և այլ միջոցներին։ Տրանզիստորային երեք հաղորդակներով սփռվող հաղորդումներն ի վիճակի են ապահովել գործունեության պահանջվող շառավիղ։ Ձայնային ազդանշանի հեռարձակումը կարող է ապահովել բարձր արդյունավետություն։
Նշված են նաև ֆինանսավորման աղբյուրները և սկզբունքները։ Առկա են նաև գովազդային պայմանագրեր, որոնք կապահովեն ընկերության գործունեությունը։ Ընկերությունը նախատեսում է նաև կոմերցիոն բնույթի հաղորդումներ, որոնք կօժանդակեն իր միջոցների համալրմանը։ Առկա է նաև վճարովի եթերաժամերի, հաղորդումների վաճառքի մասնաբաժին։ Այս ամենը կամրագրի որոշակի ֆինանսական ապահովվածություն։
Ըստ աշխատակազմի մասնագիտական պատրաստվածության տեղեկությունների՝ ընդգրկված են բավականին փորձառու ռադիոլրագրողներ, որոնք օժտված են համապատասխան մասնագիտական պատրաստվածությամբ։
Ներկայացվող ծրագրերը ենթադրում են, որ ընկերությունը հնարավորություն ունի ապահովել որակյալ լսողական եթեր։
Այս ամենն ինձ առիթ է տալիս բավականին բարձր գնահատել «ԷՖ-ԷՄ» ՍՊ ընկերության ծրագիրը, որը ներկայացված է մրցույթին։
2․ «ՏԱՎՈՒՇ ՄԵԴԻԱ» ՍՊ ընկերություն
Վերոնշյալ ընկերությունը ներկայացրել է լսողական մեդիածառայություն մատուցողից պահանջվող բոլոր փաստաթղթերը, ըստ որոնց՝
ընկերությունը նպատակ ունի կազմակերպել անկախ, բազմակարծիք ու բազմազան մի լրատվական տիրույթ, որը կունենա լրատվության, մշակույթի, երաժշտության, տեղեկատվության, ճանաչողական, ուսուցողական և այլ բնույթի հաղորդումներ։ Ընկերությունը նշել է, որ կունենա ռադիոթատրոն, ինչը շատ գովելի է։ Հաշվի առնելով մարզի աշխարհաքաղաքական դիրքն ու նշանակությունը Հայաստանի Հանրապետության կյանքում՝ այդ հաղորդումները կբարձրացնեն ոչ միայն ռադիոունկնդրի մշակութային պատրաստվածությունը, ոչ միայն կիրազեկեն մարզի բնակչությանը և նրան կմղեն մշակութային մեդիագրագիտության, այլև կհոգան սահմանամերձ բնակչության նրա առանձնահատուկ պահանջները, ինչպես նաև կամրապնդեն նրա բարոյահոգեբանական նկարագիրը, նրան հայրենասիրության նոր լիցք կհաղորդեն և դրանով իսկ նրան մասնակից կդարձնեն իրենց մարզի առանձնահատուկ խնդիրներին ու դրանց լուծման հնարավորություններին։
Ընկերության ծրագրում մեծ տեղ է հատկացվում ռադիոունկնդրի թե ճաշակի, և թե գեղագիտական ու բարոյահոգեբանական որակների բարձրացմանը։ Այն խոստանում է լինել պատշաճությունների սահմաններում, առանց տարաձայնությունների, ներքին թշնամանքի, բռնության և հակամարտության կոչերի, հարգել բազմակարծությունը և չտրվել օրախնդիր և կենցաղային խոսակցությունների՝ այսօր մեզանում ցավոք տարածված պաթոսին։
«ՏԱՎՈՒՇ ՄԵԴԻԱ» ՍՊ ընկերությունը խոստանում է իր հաղորդումների մեծ մասը հիմնել սեփական արտադրության վրա։ Ըստ ծրագրի՝ դա կկազմի 90 տոկոս։ Նշված է նաև համագործակցության լայն շառավիղ մեր այսօրվա գրականության և մշակույթի գործիչների հետ։ ՀՀ կոմպոզիտորների միության հետ խոստացվող համագործակցությունը նրան հնարավորություն կտա օգտվել հիշյալ կազմակերպության տեսաձայնային արխիվից, ինչը կարող է լուրջ խթան հանդիսանալ ընկերության երաժշտական ծրագրերի լրջության համար։
Տեխնիկական միջոցներն իրենց բնութագրերով համապատասխանում են լսողական ծրագրի հեռարձակման գործունեություն ծավալելու ժամանակակից պահանջներին։ Ներկայացվել է նաև ձեռք բերվելիք միջոցների ցանկ, որոնք առավել կընդլայնեն նրա հնարավորությունները։
Գործունեություն ծավալելու համար տարածքային պայմանները նույնպես բավարար են։
Ընկերության ֆինանսական հնարավորությունները ներառում են նաև դրամաշնորհային ծրագրեր ու միջոցներ (Եվրոմիության EED կազմակերպության համագործակցությամբ)։ Գործընկերների, ֆինանսական ներդրողների և հովանավորների ու գովազդատուների հարցում ընկերությունը մտադիր է ծավալել ակտիվ գործունեություն։
Այս ամենն ինձ առիթ է տալիս բավականին բարձր գնահատել «ՏԱՎՈՒՇ ՄԵԴԻԱ» ՍՊ ընկերության ծրագիրը, որը ներկայացված է մրցույթին։
3․ «ՄԵԴԻԱ ՄԱՐՍԵՏ» ՍՊ ընկերություն
Ընկերությունը 2017 թ․-ից գոյություն ունի մեր մեդիա դաշտում, իբրև առցանց լսողական մեդիա։ Այն այսպես ասած թիրախային մեդիա է, այսինքն՝ ուղղված է հիմնականում ունկնդիրների որոշակի մի լսարանի, որը գերադասում է երաժշտական հիթային հաղորդումները։ Դա առանձնահատուկ՝ պատանի և երիտասարդ երաժշտասերների լսարան է։ Բայց ընկերությունը չի սահմանափակվում իր այդ նախասիրության շրջանակներում և նպատակ ունի ընդլայնվել նաև սեփական արտադրության հաղորդումներով, որոնց մեջ առկա կլինեն թե մշակութային, թե տեղեկատվական ու ուսուցողական բնույթի հաղորդումները։
Տեխնիկական միջոցները, ինչպես նշված է, համապատասխանում են ընկերության առջև դրված ծրագրերի իրականացմանը և դրանց բնույթին։ Նախատեսվում է, որ ընթացքում դրանք կհամալրվեն ու կթարմացվեն։
Ֆինանսական միջոցների ապահովումը կատարվելու է հովանավորների միջոցներով, ինչպես նաև գովազդներից ստացվող միջոցներով։ Նշվում են նաև ընկերության կողմից մատուցվելիք այլ ծառայություններ, որոնք որոշակի չափաբաժնով կոմերցիոն բնույթ կունենան։
Ընկերության միակ բաժնետերը, որը նաև տնօրենն է, ներկայացրել է բանկային հաշիվների մասին տեղեկանք։
Աշխատակազմը կներառի բանիմաց աշխատակիցներ։ Ըստ տեղեկանքի՝ 5 աշխատակիցներն ունեն մասնագիտական աշխատանքային փորձ։
Այս ամենն ինձ առիթ է տալիս բավականին բարձր գնահատել «ՄԵԴԻԱ ՄԱՐՍԵՏ» ՍՊ ընկերության ծրագիրը, որը ներկայացված է մրցույթին։
|
Հեռուստատեսության և ռադիոյի հանձնաժողովի անդամ |
Հ. Հակոբյան (Հակոբ Մովսես) |
|
31.03.2023 թ. |
ՀԻՄՆԱՎՈՐՈՒՄ
2022 թվականի դեկտեմբերի 23-ին հայտարարված լսողական ծրագրի հաճախականության օգտագործման լիցենզավորման մարզային՝ ՀՀ Տավուշի մարզի տարածքում սփռման մրցույթի մասնակիցների հայտերի գնահատման
Նշված մրցույթին մասնակցելու համար դիմել են «ԷՖ-ԷՄ» ՍՊ, «ՏԱՎՈՒՇ ՄԵԴԻԱ» ՍՊ և «ՄԵԴԻԱ ՄԱՐՍԵՏ» ՍՊ ընկերությունները, որոնց կողմից ներկայացված փաստաթղթերի ուսումնասիրությունից պարզվել է հետևյալը։
1․ «ԷՖ-ԷՄ» ՍՊ ընկերություն
«ԷՖ-ԷՄ» ՍՊ ընկերությունը լսողական ծրագրի հեռարձակման ոլորտում գործունեություն է իրականացնում 2021 թվականից։
Մրցույթին ներկայացված ընկերության ծրագիրն իրագործման դեպքում կարող է երաժշտության, տեղեկատվության հարթակ լինել Տավուշի մարզում: Ընկերությունը պարտավորվում է ներկայացնել հայկական և համաշխարհային մշակույթի, դասական արվեստի և գրականության, երգի և երաժշտարվեստի նմուշները: Ըստ ծրագրի կարևոր տեղ կհատկացվի տվյալ մարզին առնչվող պատմամշակութային հաղորդումներին։ Ընկերությունը հանձն է առնում ապահովել նաև ազգային, համամարդկային, հոգևոր, մշակութային մնայուն արժեքների ճանաչողությանն ու ամրապնդմանն ուղղված հաղորդումներ:
Գնահատելի է տեսնել, որ բազմակարծության ապահովումը, ըստ ծրագրի, ընկերության հիմնական ուղենիշն է լինելու։ Ընկերությունը նախապատվություն է տալու սեփական և հայրենական արտադրության հաղորդումներին, որոնք գերակշռելու են եթերում։
Տեխնիկական սարքավորումների վերաբերյալ փաստաթղթերում ներկայացված տեղեկատվության համաձայն պլանավորվում է մարզային հեռարձակումն իրականացնել աշխարհում լավագույններից համարվող եթերային ծրագրով, իսկ ձայնային ազդանշանի սփռումն ապահովվել վերջին սերնդի սարքավորումներով: Խրախուսելի է ընկերության պատրաստակամությունը՝ օգտագործման համար նախատեսել տեխնիկական այնպիսի միջոցներ, որոնք թույլ կտան ապահովել առանց խափանումների հեռարձակում:
Ընկերության ֆինանսական միջոցները, ըստ ծրագրի, գոյանալու են օրենքով թույլատրելի տարբեր աղբյուրներից՝ հիմնադրի ներդրումներ, գովազդ, վճարովի եթերաժամանակ, հաղորդումների վաճառք և այլն: Հայտին կցված են մի քանի պայմանագրեր գովազդատու ընկերությունների հետ: Նշվածից երևում է, որ ֆինանսական մուտքերի աղբյուրները բազմազան են:
Ներկայացված ծրագիրն իրագործելու համար ընկերությունը բավարար է համարում հիմնական աշխատակազմում ներառել 3 աշխատող՝ եթերի ապահովման մասնագետ, լրագրող և տեխնիկական մասնագետ։
2․ «ՏԱՎՈՒՇ ՄԵԴԻԱ» ՍՊ ընկերություն
«ՏԱՎՈՒՇ ՄԵԴԻԱ» ՍՊ ընկերությունը ներկայումս հանրային մուլտիպլեքսում իրականացնում է տեսալսողական ծրագրի հեռարձակում։
Ընկերությունը հայտում ներկայացրել է «Տավուշ ՏՎ» տեսալսողական ծրագրում հեռարձակվող հաղորդումները, որոնք ներառվելու են նաև «Տավուշ ԷՖԷՄ» ծրագրում։ Ընկերությունը ստանձնում է բոլոր հաղորդումները բացառապես հայերեն հեռարձակելու և 90-95% ծավալով սեփական հաղորդումներ հեռարձակելու պարտավորություն։ Նախատեսվում է ձևավորել անկախ, բազմազան ու բազմակարծիք, լրատվական ու ժամանցային, բացառապես հայերեն տիրույթ Տավուշի մարզում՝ հասարակական-քաղաքական, մանկական, կրթական, մշակութային, տեղեկատվական, ճանաչողական, ուսուցողական, մարզական, երաժշտական և այլ թեմատիկ ուղղվածության հաղորդումներով։
Ազգային, համամարդկային, հոգևոր, մշակութային մնայուն արժեքների ճանաչողությանն ու ամրապնդմանն ուղղված հաղորդումների ապահովման վերաբերյալ ընկերությունը նախատեսում է մշակութային, գրական-գեղարվեստական հաղորդումների, ռադիոբեմադրությունների պատրաստում, գնահատելի է հատկապես ընկերության հանձնառությունը՝ պատրաստել Տավուշի և տավուշցիների կյանքը, առօրյան, կենցաղը, մշակույթը, նրանց հուզող և հետաքրքրող խնդիրները, սահմանամերձ գյուղերի առօրյան ներկայացնող հաղորդումներ, միաժամանակ համագործակցելով մարզի մշակույթի կենտրոնների, արվեստի, գրականության, մշակույթի հայտնի գործիչների հետ։
Ընկերությունը նախատեսում է շահագործել հեռուստաընկերությունում շահագործվող որոշ տեխնիկական սարքավորումներ, ինչպես նաև պլանավորում է անհրաժեշտության դեպքում ձեռք բերել լրացուցիչ տեխնիկական միջոցներ:
Որպես ֆինանսական հիմնավորում ներկայացվել է դրամաշնորհի պայմանագիր, ընկերությունը նախատեսում է հաստատել նոր ծրագրեր և ներգրավել նոր դոնորներ, գործընկերներ, հովանավորներ, գովազդատուներ։ Միաժամանակ, հաշվարկվում և քննարկվում են բոլոր այն ֆինանսական միջոցները, որոնք անհրաժեշտ կլինեն ներդնել մարզի սահմանամերձ գյուղերում էլ «Տավուշ ԷՖԷՄ» ծրագիրը հասանելի լինելու համար, ինչը կարևորվում է մարզի սահմանամերձ բնակավայրերի բնակիչների կողմից տեղեկատվություն ստանալու իրավունքի տեսանկյունից։ Ընկերությունը նախատեսում է սահմանամերձ համայնքներում աշխատող 10 պատանի թղթակիցների թիվը քառապատկել։
3․ «ՄԵԴԻԱ ՄԱՐՍԵՏ» ՍՊ ընկերություն
«ՄԵԴԻԱ ՄԱՐՍԵՏ» ՍՊ ընկերությունը 2017 թվականից գործում է առցանց հարթակում։ Ծրագրի եթերի 100%-ը երաժշտություն է, սակայն նախատեսվում է հեռարձակել նաև սեփական արտադրության հայերեն հաղորդումներ, որոնք կապահովեն բազմակարծությունը և միտված կլինեն ազգային, համամարդկային, հոգևոր, մշակութային մնայուն արժեքների ճանաչողությանն ու ամրապնդմանը։ Ծրագրի եթերացանցը կազմված է լինելու երաժշտության, նորությունների և թոք-շոուների համակցությունից՝ կներկայացվեն հանրաճանաչ հին ու նոր երաժշտական կատարումներ տեղական, տարածաշրջանային և միջազգային նորություններ։ Հանրությանը հուզող ոլորտային հարցերի և թեմաների քննարկման համար հաղորդումներում կհյուրընկալվեն հայտնի փորձագետներ և անհատներ։
Ընկերությունը նախատեսում է հեռարձակել բազմակարծությունը ապահովող սեփական արտադրության հայերեն հաղորդումներ, սակայն քանակական տվյալներ չեն նշվել։
Ըստ տեղեկատվության՝ ժամանակակից տեխնիկական միջոցների շնորհիվ ծրագիրը տարբերվում է ընտրված ձևաչափով, եթերի ձևավորմամբ և որակյալ հնչողությամբ։ Ընկերության առաջխաղացումն իրականացվելու է սոցիալական ցանցերի, արտաքին գովազդի և միջոցառումների հովանավորման միջոցով։
Ընկերությունը ֆինանսական միջոցներն ապահովելու է հովանավորչությունից և առցանց գովազդից, ինչպես նաև ընկերության կողմից մատուցվող այլ ծառայություններից, նախատեսվում է նաև եթերում ներառել սեփական արտադրության կոմերցիոն բնույթի հաղորդումներ, ինչը ևս կավելացնի ընկերության հասույթը։ Ծրագրի ֆինանսավորումը կատարվելու է ընկերության միակ մասնակցի և տնօրենի կողմից՝ ներկայացված փաստաթղթի համաձայն։ Աշխատակազմի մասին նշվել է, որ այն բաղկացած է 5 աշխատողից, որոնք ունեն 15-50 տարվա մասնագիտական աշխատանքային փորձ։
ՀՌՀ աշխատակազմի կողմից ներկայացված եզրակացությունը և «ԷՖ-ԷՄ» ՍՊ, «ՏԱՎՈՒՇ ՄԵԴԻԱ» ՍՊ և «ՄԵԴԻԱ ՄԱՐՍԵՏ» ՍՊ ընկերությունների ծրագրերի վերլուծությունը հիմք է տալիս եզրակացնել, որ «ԷՖ-ԷՄ» ՍՊ և «ՄԵԴԻԱ ՄԱՐՍԵՏ» ՍՊ ընկերությունների ծրագրերը հիմնականում երաժշտական ուղղվածություն են նախատեսում, ի տարբերություն «ՏԱՎՈՒՇ ՄԵԴԻԱ» ՍՊԸ-ի, որի կողմից ներկայացված ծրագիրն առավել համոզիչ է՝ մարզի առջև ծառացած տեղեկատվական բացերը լրացնելու տեսանկյունից։
|
Հեռուստատեսության և ռադիոյի հանձնաժողովի անդամ |
Դ. Ամալյան |
|
31.03.2023 թ. |
| Փոփոխող ակտ | Համապատասխան ինկորպորացիան |
|---|
| Փոփոխող ակտ | Համապատասխան ինկորպորացիան |
|---|