ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

15 դեկտեմբերի 2022 թվականի N 1933-Ն

Հիմք ընդունելով «Բնակչության բժշկական օգնության և սպասարկման մասին» Հայաստանի Հանրապետության օրենքի 33-րդ հոդվածի 7-րդ մասը` Հայաստանի Հանրապետության կառավարությունը որոշում է.

1. Սահմանել առողջապահական պետական նպատակային ծրագրերի շրջանակներում շարունակական մասնագիտական զարգացման (այսուհետ՝ ՇՄԶ) առանձին տեսակների իրականացման կարգը` համաձայն հավելվածի:

2. Հայաստանի Հանրապետության առողջապահության նախարարին և Հայաստանի Հանրապետության կրթության, գիտության, մշակույթի և սպորտի նախարարին՝ արտակարգ իրավիճակներում, անհրաժեշտությունից ելնելով, պետական նպատակային ծրագրերի շրջանակում կազմակերպել և իրականացնել ՇՄԶ դասընթացներ` տվյալ իրավիճակով պայմանավորված բուժաշխատողների մասնագիտական գիտելիքներն ու հմտությունները բարձրացնելու նպատակով։

3. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Հայաստանի Հանրապետության վարչապետ	Ն. Փաշինյան
Երևան

15.12.2022 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ

Հավելված ՀՀ կառավարության 2022 թվականի դեկտեմբերի 15-ի N 1933-Ն որոշման

1. Սույն կարգով կարգավորվում են առողջապահական պետական նպատակային ծրագրերի շրջանակներում շարունակական մասնագիտական զարգացման (այսուհետ` ՇՄԶ) առանձին տեսակների (այսուհետ` միջոցառում) իրականացման գործընթացի կազմակերպման և իրականացման հետ կապված հարաբերությունները։

2. Արտակարգ իրավիճակներում բնակչության բժշկական օգնության և սպասարկման հավելյալ կարիքի դեպքում, առողջապահական պետական նպատակային ծրագրերի շրջանակներում իրականացվում են առողջապահության բնագավառում մասնագիտական գործունեություն իրականացնող ֆիզիկական անձանց տեսական գիտելիքների և գործնական հմտությունների զարգացման միջոցառումներ։

3. Սույն կարգի 2-րդ կետով նախատեսված դեպքում միջոցառումներն իրականացվում են մասնագիտական լրացուցիչ կրթություն իրականացնող կազմակերպությունների միջոցով:

4. Մասնագիտական լրացուցիչ կրթություն իրականացնող կազմակերպությունները սույն կարգի 2-րդ կետով նախատեսված դեպքում միջոցառման անցկացումից առնվազն երեք օր առաջ կարող են ներկայացնել միջոցառման կրեդիտավորման հայտ:

5. Հայտը՝ կից փաստաթղթերով, ուսումնասիրվում, բավարարվում կամ մերժվում է Հայաստանի Հանրապետության առողջապահության նախարարություն (այսուհետ` լիազոր մարմին) ներկայացվելու օրվանից մեկ աշխատանքային օրվա ընթացքում:

6. Ներկայացված փաստաթղթերի ամբողջական չլինելու դեպքում լիազոր մարմինը հայտն ստանալուց հետո մեկ աշխատանքային օրվա ընթացքում դրա մասին պատշաճ ծանուցում է հայտատուին և առաջարկում դրանք երկու աշխատանքային օրվա ընթացքում համալրել:

7. Լիազոր մարմին ներկայացված հայտի և կից փաստաթղթերի ուսումնասիրության հիման վրա ընդունվում է միջոցառման ծրագրի հաստատման և կրեդիտների շնորհման կամ հայտի մերժման վերաբերյալ լիազոր մարմնի ղեկավարի հրաման:

Հայաստանի Հանրապետության վարչապետի աշխատակազմի ղեկավար

Ա. Հարությունյան

15.12.2022 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ

Պաշտոնական հրապարակման օրը՝ 15 դեկտեմբերի 2022 թվական: