Եվրասիական տնտեսական միության մաքսային օրենսգրքի 23-րդ հոդվածի 5-րդ կետին համապատասխան՝ Եվրասիական տնտեսական հանձնաժողովի կոլեգիան որոշեց.

1. Հաստատել կից ներկայացվող՝

ապրանքի դասակարգման մասին նախնական որոշման ձևը՝ Եվրասիական տնտեսական միության արտաքին տնտեսական գործունեության միասնական ապրանքային անվանացանկին համապատասխան.

Եվրասիական տնտեսական միության արտաքին տնտեսական գործունեության միասնական ապրանքային անվանացանկին համապատասխան ապրանքի դասակարգման մասին նախնական որոշման ձևի լրացման և այդպիսի նախնական որոշման մեջ փոփոխությունների (լրացումների) կատարման կարգը։

2. Ուժը կորցրած ճանաչել՝

Մաքսային միության հանձնաժողովի 2010 թվականի մայիսի 20-ի «Մաքսային փաստաթղթերի ձևերի մասին» թիվ 260 որոշման 2-րդ կետը.

Մաքսային միության հանձնաժողովի 2010 թվականի մայիսի 20-ի թիվ 260 որոշման մեջ կատարվող փոփոխությունների 3-րդ, 14-րդ և 15-րդ կետերը (Եվրասիական տնտեսական հանձնաժողովի կոլեգիայի 2017 թվականի հուլիսի 11-ի «Մաքսային միության հանձնաժողովի 2010 թվականի մայիսի 20-ի թիվ 260 որոշման մեջ փոփոխություններ կատարելու մասին» թիվ 84 որոշման հավելված)։

3. Սույն որոշումն ուժի մեջ է մտնում դրա պաշտոնական հրապարակման օրվանից 120 օրացուցային օրը լրանալուց հետո։

(3-րդ կետը խմբ. ԵՏՀԿ 22.05.18 թիվ 78)

Եվրասիական տնտեսական հանձնաժողովի կոլեգիայի նախագահ`

Տ. Սարգսյան

ՀԱՍՏԱՏՎԱԾ Է  Եվրասիական տնտեսական հանձնաժողովի կոլեգիայի 2018 թվականի ապրիլի 17-ի թիվ 58 որոշմամբ

ՆԱԽՆԱԿԱՆ ՈՐՈՇՈՒՄ Եվրասիական տնտեսական միության արտաքին տնտեսական գործունեության միասնական ապրանքային անվանացանկին համապատասխան ապրանքի դասակարգման մասին
1. Նախնական որոշման գրանցման համարը
2. Նախնական որոշում ընդունած մաքսային մարմնի անվանումը		3. Նախնական որոշման գործողության ժամկետի ավարտի ամսաթիվը
4. Հայտատու		5. Ապրանքի անվանումը
6. Ապրանքի ծածկագիրը ԵԱՏՄ ԱՏԳ ԱԱ-ին համապատասխան
7. Ապրանքի նկարագրությունը
8. Նախնական որոշման ընդունման հիմնավորումը
9. Ծառայողական նշումների համար 9.1. 9.2. 9.3.
10. Մաքսային մարմնի պաշտոնատար անձի ստորագրությունը, մաքսային մարմնի կնիքը
———————————— (պաշտոնը)	—————————(ստորագրությունը)		—————————————— (սկզբնատառերը, ազգանունը)

ՀԱՍՏԱՏՎԱԾ Է  Եվրասիական տնտեսական հանձնաժողովի կոլեգիայի 2018 թվականի ապրիլի 17-ի թիվ 58 որոշմամբ

I. Ընդհանուր դրույթներ

1. Սույն կարգով սահմանվում են Եվրասիական տնտեսական հանձնաժողովի կոլեգիայի 2018 թվականի ապրիլի 17-ի թիվ 58 որոշմամբ հաստատված՝ Եվրասիական տնտեսական միության արտաքին տնտեսական գործունեության միասնական ապրանքային անվանացանկին համապատասխան ապրանքի դասակարգման մասին նախնական որոշման (այսուհետ՝ նախնական որոշում) ձևի՝ թղթային կրիչի վրա փաստաթղթի տեսքով լրացման կանոնները և այդպիսի նախնական որոշման մեջ փոփոխությունների (լրացումների) կատարման կանոնները։

2. Եվրասիական տնտեսական միության մաքսային օրենսգրքի 8-րդ հոդվածի 3-րդ կետին համապատասխան էլեկտրոնային փաստաթղթի տեսքով նախնական որոշման կառուցվածքը և ձևաչափը սահմանվում են Եվրասիական տնտեսական միության անդամ պետությունների օրենսդրությանը համապատասխան (այսուհետ՝ անդամ պետություններ), եթե էլեկտրոնային փաստաթղթի տեսքով նախնական որոշման ընդունումը նախատեսված է անդամ պետությունների օրենսդրությամբ։

3. Նախնական որոշման ձևը լրացնելիս կիրառվում են Եվրասիական տնտեսական միության նորմատիվ-տեղեկատու տեղեկատվության միասնական համակարգի ռեսուրսների կազմում մտնող տեղեկագրքերը և դասակարգիչները, ինչպես նաև անդամ պետությունների օրենսդրությանը համապատասխան ձևավորվող և կիրառման ենթակա՝ մաքսային նպատակներով օգտագործվող տեղեկագրքերը և դասակարգիչները։

4. Նախնական որոշումը, ներառյալ՝ դրան կից լրացուցիչ թերթը ձևակերպվում է տպագիր տեսքով Ա4 ձևաչափի (210x297 մմ) թղթի թերթերի վրա՝ 2 օրինակով, որոնցից մեկը նախատեսված է նախնական որոշում ընդունած անդամ պետության մաքսային մարմնի (այսուհետ՝ մաքսային մարմին) համար, իսկ մյուսը՝ նախնական որոշման ընդունման մասին հայտ ներկայացրած անձի համար (այսուհետ՝ հայտատու)։

5. Նախնական որոշման ձևը լրացվում է տպասարքերի օգտագործմամբ (բացառությամբ 10-րդ սյունակի) և չպետք է պարունակի ջնջումներ, ջնջվածքներ և ուղղումներ։

6. Նախնական որոշման ձևը լրացվում է ռուսերենով կամ այն անդամ պետության պետական լեզվով, որի մաքսային մարմինն ընդունում է այդ նախնական որոշումը։

Եթե նախնական որոշման ընդունման մասին հայտին կից փաստաթղթերում հանդիպում է օտարերկրյա անձանց, ապրանքների և այլնի անվանումների գրառում լատինական այբուբենի տառերի օգտագործմամբ, ապա այդ տեղեկությունները նախնական որոշման ձևում նշվում են լատինական այբուբենի տառերով։

7. Այն դեպքում, երբ նախնական որոշման ձևը լրացնելիս սյունակներում չկա բավականաչափ տեղ տեղեկությունները նշելու համար, այդ տեղեկությունները նշվում են այդպիսի նախնական որոշմանը լրացուցիչ կցվող Ա4 ձևաչափի թերթերի վրա, որոնք այդպիսի նախնական որոշման անքակտելի մասն են կազմում (այսուհետ՝ լրացում): Ընդ որում, նախնական որոշման ձևի համապատասխան սյունակում կատարվում է «Տե՛ս լրացումը» գրառումը։ Լրացման բոլոր թերթերը պետք է լինեն համարակալված։

Լրացման յուրաքանչյուր թերթի վրա նշվում են՝

վերևի աջ անկյունում՝ «Նախնական որոշման լրացում թիվ ___________ ____ թերթի վրա».

նախնական որոշման ձևի սյունակի համարը և այն տեղեկությունները, որոնց համար նախնական որոշման ձևի սյունակում չկա բավականաչափ տեղ։

Մաքսային մարմինը նախնական որոշման մեջ նշված ապրանքի նույնականացման նպատակով անհրաժեշտության դեպքում կարող է լրացուցիչ թերթի վրա տեղավորել ապրանքի մասին լրացուցիչ տեղեկատվություն (օրինակ՝ ապրանքի գծագիրը, սխեման, լուսանկարչական պատկերը)։

Լրացման յուրաքանչյուր թերթ ստորին աջ անկյունում վավերացվում է նախնական որոշում ընդունած մաքսային մարմնի ղեկավարի (ղեկավարի տեղակալի) կամ այլ պաշտոնատար անձի ստորագրությամբ, որն ունի դրա լիազորությունը Եվրասիական տնտեսական միության մաքսային օրենսգրքի 82-րդ հոդվածի 2-րդ կետին համապատասխան (այսուհետ՝ մաքսային մարմնի լիազորված անձ), ինչպես նաև եթե դա նախատեսված է անդամ պետությունների օրենսդրությամբ՝ այդ մաքսային մարմնի կնիքի դրոշմվածքով։

II. Նախնական որոշման ձևը լրացնելը

8. «Նախնական որոշման գրանցման համարը» 1-ին սյունակը լրացվում է հետևյալ կարգով։

Սյունակում նշվում է հետևյալ սխեմայով ձևավորված՝ նախնական որոշման գրանցման համարը.

որտեղ՝

տարր 1՝ այն անդամ պետության ծածկագիրը, որի մաքսային մարմնի կողմից ընդունվում է նախնական որոշում՝ աշխարհի երկրների դասակարգչին համապատասխան.

տարր 2՝ նախնական որոշում ընդունած մաքսային մարմնի ծածկագիրը՝ անդամ պետությունում կիրառվող՝ մաքսային մարմինների դասակարգչին համապատասխան.

տարր 3՝ ՕՕԱԱՏՏ ձևաչափով (օր, ամիս, օրացուցային տարվա վերջին 2 թվանշանները) նախնական որոշման ընդունման ամսաթիվը.

տարր 4՝ նախնական որոշման հերթական համարը, որը շնորհվել է այդպիսի նախնական որոշում ընդունած մաքսային մարմնի կողմից (հաշվի առնելով այն, որ միջանցիկ համարակալումը մեկ օրացուցային տարվա ընթացքում սկսվում է 0001-ից).

տարր 5՝ համար «01»։

9. «Նախնական որոշում ընդունած մաքսային մարմնի անվանումը» 2-րդ սյունակը լրացվում է հետևյալ կարգով։

Սյունակում նշվում է նախնական որոշում ընդունած մաքսային մարմնի լրիվ անվանումը։

10. «Նախնական որոշման գործողության ժամկետի ավարտի ամսաթիվը» 3-րդ սյունակը լրացվում է հետևյալ կարգով։

Սյունակում նշվում է նախնական որոշման գործողության ժամկետի ավարտի ամսաթիվը՝ օօ.աա.տտ (օր, ամիս, օրացուցային տարի) ձևաչափով։

11. «Հայտատու» 4-րդ սյունակը լրացվում է հետևյալ կարգով։

Սյունակում նշվում են տեղեկություններ հայտատուի մասին.

անդամ պետության օրենսդրությանը համապատասխան ստեղծված՝ իրավաբանական անձի կամ իրավաբանական անձ չհանդիսացող կազմակերպության համար՝ լրիվ անվանումը, հարկային համարը և հասցեն (գտնվելու վայրը).

անդամ պետության օրենսդրությանը համապատասխան որպես անհատ ձեռնարկատեր գրանցված ֆիզիկական անձի համար (այսուհետ՝ անհատ ձեռնարկատեր)՝ ազգանունը, անունը, հայրանունը (առկայության դեպքում), հարկային համարը և հասցեն (բնակության վայրը).

անդամ պետությունում բնակության մշտական վայր ունեցող՝ անհատ ձեռնարկատեր չհանդիսացող ֆիզիկական անձի համար՝ ազգանունը, անունը, հայրանունը (առկայության դեպքում), հարկային համարը (Հայաստանի Հանրապետությունից և Բելառուսի Հանրապետությունից բացի) և հասցեն (բնակության վայրը).

օտարերկրյա կազմակերպության համար՝ լրիվ անվանումը և հասցեն (գտնվելու վայրը).

օտարերկրյա ֆիզիկական անձի համար՝ ազգանունը, անունը, հայրանունը (առկայության դեպքում) և հասցեն (բնակության վայրը)։

Հայտատուի հասցեի մասին տեղեկությունները նշվում են սույն կարգի 18-րդ կետին համապատասխան։

Հայտատուի հարկային համարի մասին տեղեկությունները նշվում են սույն կարգի 19-րդ կետին համապատասխան։

12. «Ապրանքի անվանումը» 5-րդ սյունակը լրացվում է հետևյալ կարգով։

Սյունակում նշվում են տեղեկություններ ապրանքի անվանման մասին, որոնք իրենց մեջ ներառում են որոշակի մակնիշ, մոդել, ապրանքատեսակ և ձևափոխություն։

(պարբերությունը հանվել է ԵՏՀԿ 07.09.18 թիվ 147)

(12-րդ կետը փոփ. ԵՏՀԿ 07.09.18 թիվ 147)

13. «Ապրանքի ծածկագիրը՝ ԵԱՏՄ ԱՏԳ ԱԱ-ին համապատասխան» 6-րդ սյունակը լրացվում է հետևյալ կարգով։

Վանդակում նշվում է ապրանքի տասանիշ ծածկագիրը՝ Եվրասիական տնտեսական միության արտաքին տնտեսական գործունեության միասնական ապրանքային անվանացանկին (այսուհետ՝ ԵԱՏՄ ԱՏԳ ԱԱ) համապատասխան:

(13-րդ կետը խմբ. ԵՏՀԿ 07.09.18 թիվ 147)

14. «Ապրանքի նկարագրությունը» 7-րդ սյունակը լրացվում է հետևյալ կարգով։

Սյունակում բերվում է ապրանքի մանրամասն նկարագրությունը՝ նշելով բոլոր այն տեղեկությունները, որոնք անհրաժեշտ են ապրանքի միանիշ դասակարգման և նախնական որոշման ձևի 6-րդ սյունակում նշված 10-անիշ ծածկագրին ապրանքը դասելու համար։

Չհավաքված կամ կազմատված տեսքով, այդ թվում՝ չկոմպլեկտավորված կամ անավարտ տեսքով մեկ կամ մի քանի տրանսպորտային միջոցներով որոշակի ժամանակահատվածի ընթացքում մաքսային տարանցում մաքսային ընթացակարգին համապատասխան Եվրասիական տնտեսական միության մաքսային սահմանով տեղափոխվող ապրանքի մասով նախնական որոշում ընդունելիս սյունակում նշվում են համալրված կամ ավարտուն տեսքով այդ ապրանքի բաղադրիչ մասեր հանդիսացող բաղադրիչները, եթե նախնական որոշման ընդունման մասին հայտում նշված է նախնական որոշման մեջ ապրանքի բաղադրիչների ցանկը նշելու անհրաժեշտությունը։

Ընդ որում, եթե նշված բաղադրիչների ցանկում կատարվում են փոփոխություններ, ապա համապատասխան փոփոխություններ են կատարվում նախնական որոշման մեջ՝ սույն կարգի III բաժնի դրույթներին համապատասխան։

15. «Նախնական որոշման ընդունման հիմնավորումը» 8-րդ սյունակը լրացվում է հետևյալ կերպ։

Սյունակում նշվում են ԱՏԳ ԱԱ-ի մեկնաբանության հիմնական կանոնները, ԵԱՏՄ ԱՏԳ ԱԱ-ի այն բաժինների, խմբերի, ենթադիրքերի ծանոթագրությունները, որոնց հիման վրա ընդունվել է նախնական որոշում։

16. «Ծառայողական նշումների համար» 9-րդ սյունակը լրացվում է հետևյալ կերպ։

9.1 թվի ներքո նշվում է մաքսային նպատակներով լրացուցիչ տեղեկատվությունը (անհրաժեշտության դեպքում), որը մաքսային մարմինը պետք է հաշվի առնի այն ապրանքի մաքսային հայտարարագրման ժամանակ, որի մասով ընդունվել է նախնական որոշում (օրինակ՝ անդամ պետությունների գործադիր իշխանության լիազորված մարմինների, ապրանք արտադրողների մասին տեղեկություններ, որոնցով հաստատվում է նախնական որոշման ձևի 6-րդ սյունակում նշված 10-անիշ ծածկագրին ապրանքի դասելը)։

Եվրասիական տնտեսական միության մաքսային օրենսգրքի 23-րդ հոդվածի 6-րդ կետին համապատասխան նախնական որոշման կրկնօրինակի տրման դեպքում 9.2 համարի ներքո կատարվում է «Կրկնօրինակ» գրառումը։

17. «Մաքսային մարմնի պաշտոնատար անձի ստորագրությունը, մաքսային մարմնի կնիքը» 10-րդ սյունակը լրացվում է հետևյալ կարգով։

Սյունակում նշվում է մաքսային մարմնի լիազորված անձի պաշտոնը, ազգանունը և սկզբնատառերը։

Նախնական որոշման ձևում նշված տեղեկությունները վավերացվում են սյունակում մաքսային մարմնի պաշտոնատար անձի ստորագրությամբ, և եթե դա նախատեսված է անդամ պետության օրենսդրությամբ՝ այդպիսի նախնական որոշում ընդունած մաքսային մարմնի կնիքի դրոշմվածքով։

18. Հայտատուի հասցեի մասին տեղեկությունները նշվում են՝ ստորակետով առանձնացվելով նախնական որոշման ձևի համապատասխան սյունակի առանձին տողում, և իրենց մեջ ներառում են.

1) երկրի կրճատ անվանումը՝ աշխարհի երկրների դասակարգչին համապատասխան.

2) վարչատարածքային միավորը (տարածաշրջանը, մարզը, շրջանը և այլն).

3) բնակավայրը.

4) փողոցը (զբոսայգին, պողոտան և այլն).

5) շենքի համարը.

6) մասնաշենքի (շինության) համարը.

7) բնակարանի (սենյակի, գրասենյակի) համարը։

19. Հայտատուի հարկային համար ասելով հասկացվում է՝

Հայաստանի Հանրապետությունում՝ հարկ վճարողի հաշվառման համարը (ՀՎՀՀ).

Բելառուսի Հանրապետությունում՝ վճարողի հաշվառման համարը (ՎՀՀ).

Ղազախստանի Հանրապետությունում՝ բիզնես-նույնականացման համարը (ԲՆՀ)՝ կազմակերպության (մասնաճյուղի և ներկայացուցչության) և համատեղ ձեռնարկատիրության տեսքով գործունեություն իրականացնող անհատ ձեռնարկատիրոջ համար, կամ անհատական նույնականացման համարը (ԱՆՀ)՝ ֆիզիկական անձի, այդ թվում անձնական ձեռնարկատիրության տեսքով գործունեություն իրականացնող անհատ ձեռնարկատիրոջ համար.

Ղրղզստանի Հանրապետությունում՝ հարկ վճարողի նույնականացման հարկային համարը (ՆՀՀ)՝ իրավաբանական անձի կամ անհատ ձեռնարկատիրոջ համար, կամ անհատական նույնականացման համարը (ԱՆՀ)՝ Ղրղզստանի Հանրապետության տարածքում առևտրային գործունեություն իրականացնող և որպես անհատ ձեռնարկատեր չգրանցված ֆիզիկական անձի համար.

Ռուսաստանի Դաշնությունում ՝ հարկ վճարողի նույնականացման համարը (ՀՎՆՀ) և իրավաբանական անձի համար՝ հաշվառման կանգնեցնելու պատճառի ծածկագիրը (ՀԿՊԾ), որը նշվում է՝ առանձնացվելով «/» բաժանիչ նշանով (իրավաբանական անձի առանձնացված ստորաբաժանման համար դրվում է ըստ առանձնացված ստորաբաժանման գտնվելու վայրի շնորհված ՀԿՊԾ)։

20. Նախնական որոշման մեջ փոփոխությունները (լրացումները) կատարվում են՝ մաքսային մարմինների կողմից անցկացված մաքսային հսկողության արդյունքներից ելնելով, այդ թվում՝ հայտատուի կողմից էլեկտրոնային փաստաթղթի կամ թղթային կրիչի վրա փաստաթղթի տեսքով մաքսային մարմին ներկայացված հիմնավորված հայտի (այսուհետ՝ հայտ) հիման վրա։

21. Հայտը ներկայացվում է այն մաքսային մարմին, որի կողմից ընդունվել է այն նախնական որոշումը, որում ենթադրվում է կատարել փոփոխություններ (լրացումներ):

Հայտը կազմվում է կամայական ձևով։ Հայտում նշվում է նախնական որոշման գրանցման համարը, որում ենթադրվում է ներառել փոփոխությունները (լրացումները), դրանում կատարվող փոփոխությունների (լրացումների) ցանկը և այդպիսի փոփոխություններ (լրացումներ) կատարելու անհրաժեշտության հիմնավորումը և հայտատուի էլեկտրոնային փոստի հասցեն (դրա առկայության դեպքում):

22. Հայտ ներկայացնելն ուղեկցվում է նախնական որոշման մեջ փոփոխություններ (լրացումներ) կատարելու անհրաժեշտությունը հաստատող՝ էլեկտրոնային փաստաթղթերի տեսքով փաստաթղթերի կամ թղթային կրիչով փաստաթղթերի ներկայացմամբ։ Թույլատրվում է փաստաթղթերի պատճեններ (այդ թվում՝ էլեկտրոնային փաստաթղթերի թղթային պատճեններ) ներկայացնելը։ Ներկայացված փաստաթղթերի պատճենները պետք է վավերացվեն հայտատուի կողմից։

Այն դեպքում, երբ նախնական որոշման մեջ փոփոխությունները (լրացումները) կատարվում են վրիպակների, ուղղագրական կամ քերականական սխալների հայտնաբերման հետ կապված, որոնք չեն ազդում ԵԱՏՄ ԱՏԳ ԱԱ-ին համապատասխան ապրանքի ծածկագրի մասին տեղեկությունների վրա, նախնական որոշման մեջ փոփոխություններ (լրացումներ) կատարելու անհրաժեշտությունը հաստատող փաստաթղթերը կարող են չներկայացվել։

Մաքսային մարմինն իրավասու է պահանջել այն անդամ պետության պետական լեզու չհանդիսացող լեզվով կազմված ներկայացված փաստաթղթերում պարունակվող տեղեկությունների թարգմանությունը, որի մաքսային մարմին ներկայացվել է հայտը։

23. Հայտը ներկայացնելիս մաքսային մարմինը գրանցում է այն ոչ ուշ, քան հայտը ներկայացնելու օրվան հաջորդող 1 աշխատանքային օրվա ընթացքում, այդ թվում՝ մաքսային մարմնի տեղեկատվական համակարգի օգտագործմամբ, կամ անդամ պետության օրենսդրությամբ սահմանված այլ ժամկետում։

24. Սույն կարգի 22-րդ կետի առաջին պարբերությանը համապատասխան ներկայացված հայտը և փաստաթղթերն ուսումնասիրող մաքսային մարմինն անցկացնում է մաքսային հսկողություն՝ Եվրասիական տնտեսական միության մաքսային օրենսգրքի 326-րդ հոդվածով սահմանված կարգով։

25. Այն դեպքում, երբ հայտատուի կողմից ներկայացված տեղեկությունները բավականաչափ չեն փոփոխություններ (լրացումներ) կատարելու համար, մաքսային մարմինը լրացուցիչ տեղեկատվություն ստանալու համար ոչ ուշ, քան հայտի գրանցման օրվանից 10 աշխատանքային օր հետո հայտատուին ուղղում է համապատասխան հարցում։ Այդ հարցումն ուղղվում է էլեկտրոնային կամ գրավոր ձևով։

Գրավոր ձևով նշված հարցումն ուղարկվում է պատվիրված փոստային առաքանու ձևով՝ հանձնման մասին ծանուցմամբ, կամ փոխանցվում է հայտատու կողմից այն ստանալու փաստի հաստատումը թույլ տվող այլ եղանակով։ Ընդ որում, էլեկտրոնային տեսքով տվյալ հարցումը միաժամանակ ուղղվում է հայտի մեջ նշված՝ հայտատուի էլեկտրոնային փոստի հասցեին (դրա առկայության դեպքում):

Լրացուցիչ տեղեկատվությունը ներկայացվում է ոչ ուշ, քան մաքսային մարմնի կողմից հարցումը գրանցելու օրվանից 30 աշխատանքային օր հետո։

26. Մաքսային մարմինը մերժում է հայտատուին նախնական որոշման մեջ փոփոխություններ (լրացումներ) կատարել հետևյալ հիմքերից մեկի առկայության դեպքում.

ա) չեն պահպանվել սույն կարգի 34-րդ կետի դրույթները.

բ) մաքսային հսկողություն անցկացնելիս մաքսային մարմինը բացահայտել է սույն կարգի 22-րդ կետի առաջին պարբերությանը համապատասխան հայտատուի կողմից ներկայացված հայտում կամ փաստաթղթերում տեղեկություններից տարբերվող տեղեկություններ.

գ) չի ներկայացվել սահմանված ժամկետում սույն կարգի 25-րդ կետին համապատասխան մաքսային մարմնի կողմից հարցված լրացուցիչ տեղեկատվությունը, կամ ներկայացված լրացուցիչ տեղեկատվությունը չի պարունակում փոփոխությունների (լրացումների) կատարման անհրաժեշտությունը հաստատող տեղեկություններ։

27. Սույն կարգի 26-րդ կետով նախատեսված՝ նախնական որոշման մեջ փոփոխություններ (լրացումներ) կատարելու առնչությամբ մերժման համար հիմքերից մեկի առկայության դեպքում մաքսային մարմինը ոչ ուշ, քան սույն կարգի 28-րդ կետով սահմանված ժամկետից հետո հայտատուին է ուղղում նախնական որոշման մեջ փոփոխություններ (լրացումներ) կատարելու առնչությամբ մերժման մասին ծանուցումը՝ նշելով մերժման պատճառները։ Այդպիսի ծանուցումն ուղղվում է էլեկտրոնային կամ գրավոր ձևով։

Գրավոր ձևով նախնական որոշման մեջ փոփոխություններ (լրացումներ) կատարելու առնչությամբ մերժման ծանուցումն ուղղվում է պատվիրված փոստային առաքանու ձևով՝ հանձնման մասին ծանուցմամբ կամ փոխանցվում է հայտատուի կողմից դրա ստացման փաստի հաստատումը թույլ տվող այլ եղանակով։ Ընդ որում, էլեկտրոնային տեսքով տվյալ ծանուցումը միաժամանակ ուղղվում է հայտի մեջ նշված՝ հայտատուի էլեկտրոնային փոստի հասցեին (դրա առկայության դեպքում):

28. Սույն կարգի 26-րդ կետով նախատեսված՝ նախնական որոշման մեջ փոփոխություններ (լրացումներ) կատարելու առնչությամբ մերժման համար հիմքերի բացակայության դեպքում մաքսային մարմինը ոչ ուշ, քան մաքսային մարմնի կողմից հայտը գրանցելու օրվանից 30 օրացուցային օր հետո որոշում է ընդունում նախնական որոշման մեջ փոփոխություններ (լրացումներ) կատարելու վերաբերյալ։

Սույն կարգի 25-րդ կետին համապատասխան լրացուցիչ տեղեկատվությունը ներկայացնելու անհրաժեշտության դեպքում սույն կետի առաջին պարբերությունում նշված ժամկետի ընթացքը կասեցվում է մաքսային մարմնի կողմից հայտի գրանցման օրվանից և վերականգնվում է մաքսային մարմնի կողմից լրացուցիչ տեղեկատվության ստացման օրվանից, իսկ այն դեպքում, երբ լրացուցիչ տեղեկատվությունը չի ներկայացվել սույն կարգի 25-րդ հոդվածի երրորդ պարբերությունում նշված ժամկետում՝ այդ ժամկետը լրանալու օրվանից։

29. Այն դեպքում, երբ նախնական որոշման մեջ փոփոխությունները (լրացումները) կատարվում են ոչ թե հայտի հիման վրա, այլ սեփական նախաձեռնությամբ մաքսային մարմնի կողմից անցկացված մաքսային հսկողության արդյունքներից ելնելով, մաքսային մարմինը ոչ ուշ, քան մաքսային հսկողության արդյունքների հիման վրա կազմված մաքսային փաստաթղթի գրանցման օրվանից 10 աշխատանքային օր հետո որոշում է ընդունում նախնական որոշման մեջ փոփոխություններ (լրացումներ) կատարելու վերաբերյալ։

30. Նախնական որոշման մեջ փոփոխություններ (լրացումներ) կատարելու մասին որոշումն ընդունվում է նոր նախնական որոշման ընդունման միջոցով։

Ընդ որում, նոր նախնական որոշման համապատասխան սյունակներ տեղափոխվում են նախնական որոշման մեջ արդեն նշված բոլոր տեղեկությունները՝ հաշվի առնելով կատարվող փոփոխությունները (լրացումները):

31. Նոր նախնական որոշումն ընդունվում է թղթային կրիչով փաստաթղթի տեսքով կամ էլեկտրոնային փաստաթղթի տեսքով, եթե դա նախատեսված է անդամ պետությունների օրենսդրությամբ։

32. Փոփոխություններ (լրացումներ) կատարելիս նոր նախնական որոշման սյունակները լրացվում են՝ հաշվի առնելով սույն կարգի 33-րդ կետով սահմանված առանձնահատկությունները։

33. Նոր նախնական որոշման մեջ նշվում են՝

1-ին սյունակում՝ հետևյալ սխեմայով ձևավորված նոր նախնական որոշման գրանցման համարը.

որտեղ՝

տարր 1՝ այն նախնական որոշման գրանցման համարի առաջին 4 տարրերը, որում կատարվում են փոփոխությունները (լրացումները).

տարր 2՝ կատարվող փոփոխությունների (լրացումների) հերթական համարը՝ սկսած «02» համարից.

9-րդ սյունակում 9.3 համարի ներքո՝ նախնական որոշման մեջ փոփոխություններ (լրացումներ) կատարելու հիմնավորման մասին տեղեկությունները (օրինակ՝ հայտի համարը (առկայության դեպքում) և ամսաթիվը, մաքսային հսկողության արդյունքների հիման վրա կազմված մաքսային փաստաթղթի համարը և ամսաթիվը և այլն)։

34. Փոփոխությունները (լրացումները) կատարվում են նախնական որոշման 2–9-րդ սյունակներում՝ բացառությամբ 6-րդ սյունակի, սխալների հայտնաբերման դեպքում, որոնք թույլ են տրվել այդ նախնական որոշումն ընդունելիս, և որոնք չեն ազդում ԵԱՏՄ ԱՏԳ ԱԱ-ին համապատասխան ապրանքի ծածկագրի մասին տեղեկությունների վրա։

Ընդ որում, նախնական որոշման 2-րդ, 3-րդ, 5-րդ, 7–9-րդ սյունակներում տեղեկությունները կարող են փոփոխվել (լրացվել) վրիպակների, ուղղագրական կամ քերականական սխալների հայտնաբերման դեպքում, որոնց ուղղումը չի փոփոխում մաքսային մարմնի կողմից նախնական որոշման ընդունման վրա ազդող տեղեկությունները։

Նախնական որոշման 4-րդ սյունակում կատարվող փոփոխությունները (լրացումները) չպետք է հանգեցնեն հայտատուի փոխարինմանը։

35. Թույլատրվում է նախնական որոշման 10-րդ սյունակում նշված տեղեկությունների տարբերությունն այն նախնական որոշման 10-րդ սյունակում նշված տեղեկություններից, որում կատարվում են փոփոխություններ (լրացումներ)։

36. Նոր նախնական որոշումն ուժի մեջ է մտնում այն նախնական որոշման ընդունման օրվանից, որում կատարվում են փոփոխություններ (լրացումներ):

37. Մաքսային մարմինը նոր նախնական որոշման ընդունման օրվան հաջորդող 1 աշխատանքային օրվանից ոչ ուշ հայտատուին է ուղարկում նախնական որոշման մեջ փոփոխություններ (լրացումներ) կատարելու մասին ծանուցումը՝ նշելով այդպիսի փոփոխությունների (լրացումների) պատճառները և կցելով նոր նախնական որոշումը։ Այդ ծանուցումն ուղարկվում է էլեկտրոնային կամ գրավոր ձևով։

Գրավոր ձևով նախնական որոշման մեջ փոփոխություններ (լրացումներ) կատարելու մասին ծանուցումն ուղարկվում է գրավոր ձևով պատվիրված փոստային առաքանու ձևով՝ հանձնման մասին ծանուցմամբ, կամ փոխանցվում է հայտատուի կողմից դրա ստացման փաստի հաստատումը թույլ տվող այլ եղանակով։ Ընդ որում, էլեկտրոնային տեսքով տվյալ ծանուցումը միաժամանակ ուղարկվում է հայտի մեջ նշված՝ հայտատուի էլեկտրոնային փոստի հասցեին (դրա առկայության դեպքում):

(կարգը փոփ., խմբ. ԵՏՀԿ 07.09.18 թիվ 147)

Պաշտոնական հրապարակման օրը՝ 22 հունիսի 2022 թվական: