ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ

ՏԵՂԱՄԱՍԱՅԻՆ ԸՆՏՐԱԿԱՆ ՀԱՆՁՆԱԺՈՂՈՎՈՒՄ ՄԵԿԻՑ ԱՎԵԼԻ ՏԵԽՆԻԿԱԿԱՆ ՍԱՐՔԱՎՈՐՈՒՄՆԵՐ ՕԳՏԱԳՈՐԾԵԼՈՒ, ՏԵԽՆԻԿԱԿԱՆ ՍԱՐՔԱՎՈՐՈՒՄՆԵՐԻ ԱՇԽԱՏԱՆՔՆ ՍՏՈՒԳԵԼՈՒ, ՏԵԽՆԻԿԱԿԱՆ ՍԱՐՔԱՎՈՐՈՒՄՆԵՐԸ ԳՈՐԾԱՐԿԵԼՈՒ ԵՎ ընտրատարածքային ԸՆՏՐԱԿԱՆ ՀԱՆՁՆԱԺՈՂՈՎ ՆԵՐԿԱՅԱՑՆԵԼՈՒ ԿԱՐԳԸ ՍԱՀՄԱՆԵԼՈՒ ՄԱՍԻՆ

 (վերնագիրը փոփ. 30.06.22 N 42-Ն)

Ղեկավարվելով «Հայաստանի Հանրապետության ընտրական օրենսգիրք» Հայաստանի Հանրապետության սահմանադրական օրենքի 60-րդ հոդվածի 5-րդ մասով, 64-րդ հոդվածի 2-րդ մասի առաջին պարբերությամբ, 71-րդ հոդվածի 9-րդ մասով` Հայաստանի Հանրապետության կենտրոնական ընտրական հանձնաժողովը որոշում է.

 (նախաբանը փոփ. 30.06.22 N 42-Ն)

1. Սահմանել տեղամասային ընտրական հանձնաժողովում մեկից ավելի տեխնիկական սարքավորումներ օգտագործելու, տեխնիկական սարքավորումների աշխատանքը ստուգելու, տեխնիկական սարքավորումները գործարկելու և ընտրատարածքային ընտրական հանձնաժողով ներկայացնելու կարգը` համաձայն հավելվածի:

 (1-ին կետը փոփ. 30.06.22 N 42-Ն)

Հայաստանի Հանրապետության կենտրոնական ընտրական հանձնաժողովի նախագահ

Տ. Մուկուչյան

Հավելված Հայաստանի Հանրապետության  կենտրոնական ընտրական հանձնաժողովի 2017թ. փետրվարի 22-ի N 45-Ն որոշման

Կ Ա Ր Գ

ՏԵՂԱՄԱՍԱՅԻՆ ԸՆՏՐԱԿԱՆ ՀԱՆՁՆԱԺՈՂՈՎՈՒՄ ՄԵԿԻՑ ԱՎԵԼԻ ՏԵԽՆԻԿԱԿԱՆ ՍԱՐՔԱՎՈՐՈՒՄՆԵՐ ՕԳՏԱԳՈՐԾԵԼՈՒ, ՏԵԽՆԻԿԱԿԱՆ ՍԱՐՔԱՎՈՐՈՒՄՆԵՐԻ ԱՇԽԱՏԱՆՔԸ ՍՏՈՒԳԵԼՈՒ, ՏԵԽՆԻԿԱԿԱՆ ՍԱՐՔԱՎՈՐՈՒՄԸ ԳՈՐԾԱՐԿԵԼՈՒ ԵՎ ԸՆՏՐԱՏԱՐԱԾՔԱՅԻՆ ԸՆՏՐԱԿԱՆ ՀԱՆՁՆԱԺՈՂՈՎ ՆԵՐԿԱՅԱՑՆԵԼՈՒ

 (վերնագիրը փոփ. 30.06.22 N 42-Ն)

1. Տեղամասային ընտրական հանձնաժողովում կարող են կիրառվել մեկից ավելի տեխնիկական սարքավորումներ՝ պայմանավորված տեղամասի ընտրողների ցուցակում ընդգրկված ընտրողների թվով:

2. Մեկից ավելի տեխնիկական սարքավորումներ օգտագործվելու դեպքում տեղամասային ընտրական հանձնաժողովին տրամադրվում է նաև անխափան սնուցման սարք (UPS), երթուղիչ (ռաութեր) և ցանցային լարեր: Անխափան սնուցման սարքին (UPS) միացվում է միայն երթուղիչը (ռաութեր): Տեխնիկական սարքավորումների էլեկտրասնուցումն իրականացվում է քվեարկության սենյակում առկա էլեկտրական հոսանքի սնուցման աղբյուրից: Տեխնիկական սարքավորումները երթուղիչին միացվում են ցանցային լարերով:

3. Մեկից ավելի տեխնիկական սարքավորումներ օգտագործելու դեպքում դրանց աշխատանքը պետք է լինի սինքրոնիզացված, որը հնարավորություն կտա ընտրողին գրանցվել տեղամասային ընտրական հանձնաժողովում օգտագործվող տեխնիկական սարքավորումներից յուրաքանչյուրով՝ բացառելով նաև նույն ընտրողի կրկնակի գրանցման հնարավորությունը մյուս տեխնիկական սարքավորման միջոցով:

4. Տեխնիկական սարքավորումների աշխատանքը ստուգվում է մասնագետի կողմից՝ քվեարկության նախորդ օրը տեղամասային ընտրական հանձնաժողովում:

5. Քվեարկության նախորդ օրը մասնագետը տեխնիկական սարքավորումը հանում է տուփից, տեղադրում քվեարկության սենյակում այդ նպատակով հատկացված սեղանին, միացնում է էլեկտրական հոսանքի սնուցման աղբյուրին և ստուգում տեխնիկական սարքավորման տպիչում համապատասխան թղթի առկայությունը, որից հետո միացնում է տեխնիկական սարքավորումը և մուտքագրում ստուգման վեցանիշ կոդը` 111111:

Եթե տեղամասային ընտրական հանձնաժողովում օգտագործվում են մեկից ավելի տեխնիկական սարքավորումներ, ապա տուփերից հանվելուց հետո բոլոր տեխնիկական սարքավորումները ցանցային լարերով միացվում են երթուղիչին (ռաութերին), որից հետո ստուգվում է նաև կապի առկայությունը տեխնիկական սարքավորումների միջև:

Քվեարկության նախորդ օրը մասնագետը պետք է անցկացնի տպիչի ստուգում, որի արդյունքում պետք է տպվի կտրոն: Կտրոնը պարունակում է տեղեկություն տպիչի ստուգումը բարեհաջող ավարտվելու, տեղամասի համարի, ստուգման ամսաթվի և ժամի վերաբերյալ: Տպիչի ստուգման արդյունքում տպված կտրոնը մասնագետը պետք է հեռացնի քվեարկության օրը՝ մինչև գրանցված ընտրողների բացակայությունը հավաստող տեղեկանքի տպելը:

 (5-րդ կետը լրաց. 30.06.22 N 42-Ն)

6. Քվեարկության նախորդ օրը տեխնիկական սարքավորումների աշխատանքն ստուգելուց հետո դրանք չեն անջատվում: Տեխնիկական սարքավորումները չեն անջատվում նաև էլեկտրական հոսանքի սնուցման աղբյուրից:

7. Մասնագետը տեղեկացնում է տեղամասային ընտրական հանձնաժողովի նախագահին տեխնիկական սարքավորման անխափանության և գործարկման պատրաստ լինելու մասին, որից հետո կարող է հեռանալ տեղամասային կենտրոնից:

Նշված աշխատանքների արդյունքների, ինչպես նաև ի հայտ եկած ցանկացած թերության մասին մասնագետն անհապաղ իրազեկում է ընտրատարածքային ընտրական հանձնաժողովի տարածքում տեխնիկական սարքավորումների կազմակերպված սպասարկումն իրականացնող մասնագետներին (այսուհետ՝ աջակցման կենտրոնի մասնագետ):

 (7-րդ կետը փոփ. 30.06.22 N 42-Ն)

7.1 Տեղամասային ընտրական հանձնաժողովի նախագահը տեխնիկական սարքավորումները, երթուղիչը (ռաութերը), անխափան սնուցման սարքը էլեկտրական հոսանքի սնուցման աղբյուրին միացված վիճակում պահպանության է հանձնում ոստիկանության ծառայողներին, որի մասին գրանցամատյանում կազմվում է արձանագրություն:

 (7.1-ին կետը փոփ. 30.06.22 N 42-Ն)

8. Քվեարկության օրը մասնագետները տեղամասային կենտրոն են ներկայանում ժամը 7.00-ին, ստուգում են բոլոր միացումները, հիշողության կրիչի կնքված լինելը: Տեղամասային ընտրական հանձնաժողովի նախագահի հանձնարարությամբ տեղամասային ընտրական հանձնաժողովի անդամների և քվեարկությանը ներկա գտնվելու իրավունք ունեցող անձանց ներկայությամբ մասնագետը մուտքագրում է տեխնիկական սարքավորման ակտիվացման վեցանիշ կոդը, ընտրական տեղամասի համարը և տպում տվյալ տեխնիկական սարքավորման միջոցով գրանցված ընտրողների բացակայությունը հավաստող տեղեկանք:

Նշված աշխատանքների արդյունքների, ինչպես նաև քվեարկության օրն ի հայտ եկած ցանկացած թերության մասին մասնագետներն անհապաղ իրազեկում են աջակցման կենտրոնի մասնագետներին:

 (8-րդ կետը փոփ. 30.06.22 N 42-Ն)

9. Քվեարկության ավարտից հետո ընտրատարածքային ընտրական հանձնաժողովի և ընտրական տեղամասի համարները, տեխնիկական սարքավորման միջոցով գրանցված ընտրողների համապատասխան ընտրական տեղամասի ընտրողների ցուցակում հերթական համարները պարունակող տեղեկանքը տպելուց հետո տեխնիկական սարքավորումն անջատվում է, տեղադրվում տուփում:

 (9-րդ կետը փոփ. 30.06.22 N 42-Ն)

10. Տեխնիկական սարքավորման միջոցով գրանցված ընտրողների բացակայությունը հավաստող տեղեկանքը, ինչպես նաև քվեարկության ավարտից հետո ընտրատարածքային ընտրական հանձնաժողովի և ընտրական տեղամասի համարները, տեխնիկական սարքավորման միջոցով գրանցված ընտրողների համապատասխան ընտրական տեղամասի ընտրողների ցուցակում հերթական համարները պարունակող տեղեկանքը տպվում է յուրաքանչյուր սարքի կողմից, եթե տեխնիկական սարքավորումը քվեարկությունն ավարտվելուց հետո անխափան է և միացած է երթուղիչին:

 (10-րդ կետը փոփ. 30.06.22 N 42-Ն)

11. Տեխնիկական սարքավորումների տուփերը, առկայության դեպքում՝ անխափան սնուցման սարքը (UPS) և երթուղիչը (ռաութերը), ինչպես նաև տեխնիկական սարքավորումների համար նախատեսված այլ պարագաները մասնագետը հանձնում է տեղամասային ընտրական հանձնաժողովի նախագահին, որից հետո կարող է հեռանալ տեղամասային կենտրոնից:

12. Տեղամասային ընտրական հանձնաժողովի նախագահը տեխնիկական սարքավորումը, առկայության դեպքում՝ անխափան սնուցման սարքը (UPS), երթուղիչը (ռաութերը) և մյուս պարագաները ընտրական փաստաթղթերի հետ միասին՝ քվեարկության ավարտից հետո՝ ոչ ուշ, քան 14 ժամվա ընթացքում ներկայացնում է ընտրատարածքային ընտրական հանձնաժողով և հանձնում աջակցման կենտրոնի մասնագետներին:

 (12-րդ կետը փոփ. 30.06.22 N 42-Ն)

13. Աջակցման կենտրոնի մասնագետը տեխնիկական սարքավորումն ընդունելիս ստուգում է տեխնիկական սարքավորման կոմպլեկտայնությունը, հիշողության կրիչի կնքված լինելը և կապիչի համարը: Տեխնիկական սարքավորումը և մյուս պարագաները հանձնվում են հանձնողի ու ընդունողի կողմից ստորագրվելու և ստացական տալու միջոցով:

 (13-րդ կետը փոփ. 30.06.22 N 42-Ն)

 (հավելվածը փոփ., լրաց. 30.06.22 N 42-Ն)