ԵՎՐԱՍԻԱԿԱՆ ՏՆՏԵՍԱԿԱՆ ՀԱՆՁՆԱԺՈՂՈՎ

ԽՈՐՀՈՒՐԴ

Ո Ր Ո Շ ՈՒ Մ

1 նոյեմբերի 2018 թվականի

թիվ 86

քաղ. Աստանա

Եվրասիական տնտեսական հանձնաժողովի խորհուրդը որոշեց.

1. Հավանություն տալ «Եվրասիական տնտեսական միության 2019 թվականի միջազգային գործունեության հիմնական ուղղությունների մասին» Եվրասիական տնտեսական բարձրագույն խորհրդի որոշման նախագծին (կցվում է) և այն ներկայացնել Եվրասիական տնտեսական բարձրագույն խորհրդի քննարկմանը:

2. Սույն որոշումն ուժի մեջ է մտնում դրա պաշտոնական հրապարակման օրվանից 10 օրացուցային օրը լրանալուց հետո:

Եվրասիական տնտեսական հանձնաժողովի խորհրդի անդամներ՝

Հայաստանի Հանրապետությունից՝	Բելառուսի Հանրապետությունից՝	Ղազախստանի Հանրապետությունից՝	Ղրղզստանի Հանրապետությունից՝	Ռուսաստանի Դաշնությունից՝
Մ. Գրիգորյան	Ի. Պետրիշենկո	Ա. Մամին	Ժ. Ռազակով	Ա. Սիլուանով

«Եվրասիական տնտեսական միության մասին» 2014 թվականի մայիսի 29-ի պայմանագրի 7-րդ հոդվածին և Եվրասիական տնտեսական բարձրագույն խորհրդի 2014 թվականի դեկտեմբերի 23-ի թիվ 99 որոշմամբ հաստատված՝ Եվրասիական տնտեսական միության կողմից միջազգային համագործակցություն իրականացնելու կարգի 5-րդ կետին համապատասխան՝ Եվրասիական տնտեսական բարձրագույն խորհուրդը որոշեց.

1. Հաստատել կից ներկայացվող՝ Եվրասիական տնտեսական միության 2019 թվականի միջազգային գործունեության հիմնական ուղղությունները:

2. Սահմանել, որ Եվրասիական տնտեսական միության միջազգային գործունեության հիմնական ուղղությունների նախագծերի նախապատրաստումը համապատասխան տարվա համար իրականացվում է՝ ելնելով Եվրասիական տնտեսական միության անդամ պետությունների առաջարկների վերլուծության արդյունքներից՝ պետությունների, միջազգային կազմակերպությունների և միջազգային ինտեգրացիոն միավորումների հետ Եվրասիական տնտեսական միության միջազգային համագործակցության գերակա ոլորտների որոշման և դրա նպատակային կողմնորոշիչների վերաբերյալ, ինչպես նաև հաշվի առնելով իրագործման մասին զեկույցները:

Եվրասիական տնտեսական բարձրագույն խորհրդի անդամներ՝

ՀԱՍՏԱՏՎԱԾ ԵՆ Եվրասիական տնտեսական բարձրագույն խորհրդի 20      թվականի թիվ      որոշմամբ

I. Եվրասիական տնտեսական միության միջազգային գործունեության վերաբերյալ հիմնական դրույթները

Սույն հիմնական ուղղությունները մշակված են Եվրասիական տնտեսական բարձրագույն խորհրդի 2014 թվականի դեկտեմբերի 23-ի թիվ 99 որոշմամբ հաստատված՝ Եվրասիական տնտեսական միության կողմից միջազգային համագործակցություն իրականացնելու կարգի 5-րդ կետին համապատասխան՝ հաշվի առնելով «Եվրասիական տնտեսական միության մասին» 2014 թվականի մայիսի 29-ի պայմանագրի 4-րդ հոդվածում նշված՝ Եվրասիական տնտեսական միության (այսուհետ՝ Միություն) նպատակները, և կոչված են նպաստելու Միության անդամ պետությունների (այսուհետ՝ անդամ պետություններ) տնտեսական աճին, դրանց արտահանման ներուժի բարձրացմանն ու իրականացմանը, Միության՝ որպես միջազգային ասպարեզում վստահելի, կանխատեսելի գործընկեր դիրքավորմանը և դրա միջազգային իրավասուբյեկտության ամրապնդմանը:

Սույն հիմնական ուղղություններում հաշվի են առնվել անդամ պետությունների առաջարկները, ինչպես նաև Եվրասիական տնտեսական միության 2017 թվականի միջազգային գործունեության հիմնական ուղղությունների իրագործման վերաբերյալ զեկույցի եզրահանգումները:

Միության միջազգային գործունեությունն իրականացվում է նշված պայմանագրով և Միության շրջանակներում միջազգային պայմանագրերով սահմանված լիազորությունների սահմաններում և ոլորտներում:

II. 2019 թվականի միջազգային գործունեության ուղղությունները

Միության կողմից միջազգային գործունեությունն իրականացնելիս 2019 թվականին առաջնահերթ են հետևյալ ուղղությունները`

փոխգործակցություն երրորդ երկրների կառավարությունների, տարածաշրջանային միավորումների, միջազգային կազմակերպությունների և երրորդ երկրների գործարար համայնքների հետ՝ համագործակցության առկա մեխանիզմները զարգացնելու նպատակով, այդ թվում՝ կնքված միջազգային բնույթի ակտերի, Միության իրավասության սահմաններում, ինչպես նաև Միության միջազգային գործունեության այլ ձևաչափերով առանձնաշնորհային և ոչ առանձնաշնորհային առևտրային համաձայնագրեր կնքելու նպատակով բանակցային գործընթացների շրջանակներում.

փոխգործակցություն Միության հետ համագործակցությամբ հետաքրքրված երրորդ երկրների կառավարությունների, տարածաշրջանային միավորումների, միջազգային կազմակերպությունների և երրորդ երկրների գործարար համայնքների հետ՝ փոխգործակցության հնարավոր ձևերը բացահայտելու, մասնավորապես՝ հուշագրեր և միջազգային բնույթի այլ ակտեր նախապատրաստելու և ստորագրելու, Եվրասիական տնտեսական հանձնաժողովի (այսուհետ՝ Հանձնաժողով) և անդամ պետությունների ներկայացուցիչների միջև՝ Միության իրավասության սահմաններում առանձնաշնորհային և ոչ առանձնաշնորհային առևտրային համաձայնագրեր կնքելու վերաբերյալ բանակցություններ վարելու (եթե բանակցային պատվիրակությունը համատեղ է վարում բանակցությունները) նպատակով.

փոխգործակցություն երրորդ երկրների կառավարությունների, տարածաշրջանային միավորումների, միջազգային կազմակերպությունների, երրորդ երկրների գործարար համայնքների ու փորձագիտական շրջանակների հետ՝ եվրասիական տնտեսական ինտեգրման մասին արդի տեղեկատվության տարածման և Միության մասին որպես տարածաշրջանային տնտեսական ինտեգրման ոլորտում արդյունավետ ու մրցունակ միջազգային կազմակերպություն դրական պատկերացում ձևավորելու նպատակով, մասնավորապես` միջազգային տարբեր հարթակներում Միության շնորհանդեսներ և համատեղ պրոֆիլային միջոցառումներ անցկացնելու միջոցով։

2019 թվականին Միության և դրա անդամ պետությունների միջազգային գործունեության բնագավառում հիմնական ջանքերը կենտրոնացված կլինեն փոխգործակցության զարգացման վրա`

Միության անդամ չհանդիսացող՝ Անկախ պետությունների համագործակցության (ԱՊՀ) մասնակից պետությունների, Անկախ պետությունների համագործակցության և Միութենական պետության հետ:

Նշված պետություններում կշարունակվի եվրասիական տնտեսական ինտեգրման գաղափարի մասսայականացման նպատակաուղղված աշխատանքը՝ կոնֆերանսների, ֆորումների, շնորհանդեսների, կլոր սեղանների և այլ միջոցառումների անցկացմամբ, որոնք նվիրված կլինեն եվրասիական տնտեսական ինտեգրման թեմային այն լրացուցիչ հնարավորությունների կոնտեքստում, որոնք այդ պետությունների տնտեսություններին է տրամադրում Միության միասնական շուկան, այդ թվում՝ գործարար համայնքների, փորձագիտական շրջանակների և ԶԼՄ-ների ներկայացուցիչների մասնակցությամբ:

Մոլդովայի Հանրապետության հետ փոխգործակցությունը կշարունակվի՝ «Եվրասիական տնտեսական հանձնաժողովի և Մոլդովայի Հանրապետության միջև համագործակցության մասին» 2017 թվականի ապրիլի 3-ի հուշագրի իրագործման շրջանակներում, ինչպես նաև հաշվի առնելով Մոլդովայի Հանրապետության՝ որպես Միությանը կից դիտորդ պետություն հանդիսանալու կարգավիճակը։

Հանձնաժողովը կշարունակի աշխատանքը հետևյալ տարածաշրջանային միությունների մշտապես գործող գործադիր մարմինների հետ փոխգործակցության արդյունավետությունը բարձրացնելու ուղղությամբ՝

ԱՊՀ գործադիր կոմիտեի հետ՝ «Եվրասիական տնտեսական հանձնաժողովի և Անկախ պետությունների համագործակցության գործադիր կոմիտեի միջև փոխգործակցության մասին» 2012 թվականի դեկտեմբերի 17-ին կնքված հուշագրի, ինչպես նաև այն լրացնող՝ «Եվրասիական տնտեսական հանձնաժողովի և Անկախ պետությունների համագործակցության գործադիր կոմիտեի միջև փոխգործակցությունը խորացնելու մասին» հուշագրի շրջանակներում, այդ թվում՝ Ստանդարտացման, չափագիտության և սերտիֆիկացման միջպետական խորհրդի հետ.

Միութենական պետության մշտական կոմիտեի հետ՝ այդ կազմակերպության իրավասությունների շրջանակներում գտնվող հարցերով.

եվրոպական պետությունների, Եվրոպական միության, Եվրոպայում այլ տարածաշրջանային միավորումների և Եվրոպական տարածաշրջանում գործող այլ կազմակերպությունների հետ։

Եվրոպական ուղղությամբ միջազգային գործունեության կառուցումը կիրականացվի՝ հաշվի առնելով Միության հետ համագործակցության մասով կառավարությունների, գործարար համայնքների և փորձագիտական շրջանակների հետաքրքրությունը, ինչպես նաև Միության և Եվրոպական միության փոխգործակցությանը նվիրված միջոցառումներ կազմակերպելու դրանց նախաձեռնությունները, և ուղղված կլինի փոխադարձ առևտրի զարգացման աջակցությանն ու անդամ պետությունների տնտեսավարող սուբյեկտների արտաքին տնտեսական գործունեության ազատականացմանը, այդ գործունեության ընթացքում ծագող հարցերի կարգավորման համար երկխոսության մեխանիզմների ստեղծմանը, ինչպես նաև պաշտոնական շրջանակների ներկայացուցիչների հետ կապերի հաստատմանն ու Եվրոպական տարածաշրջանի պետությունների կառավարությունների հետ համագործակցության ինստիտուցիոնալացմանը:

Հունաստանի Հանրապետության հետ փոխգործակցությունը կիրականացվի «Եվրասիական տնտեսական հանձնաժողովի և Հունաստանի Հանրապետության Կառավարության համագործակցության մասին» 2017 թվականի հունիսի 24-ի համատեղ հայտարարագրի շրջանակներում, Սերբիայի Հանրապետության հետ՝ անդամ պետությունների և Սերբիայի Հանրապետության միջև առևտրային ռեժիմի միասնականացմանն ուղղված՝ ազատ առևտրի մասին համաձայնագրի նախապատրաստման մասով բանակցային գործընթացի շրջանակներում, Հունգարիայի հետ՝ «Ագրոարդյունաբերական համալիրի ոլորտում համագործակցության վերաբերյալ Եվրասիական տնտեսական հանձնաժողովի և Հունգարիայի գյուղատնտեսության նախարարության միջև փոխըմբռնման մասին» 2016 թվականի սեպտեմբերի 26-ի հուշագրի շրջանակներում, տարածաշրջանի մյուս պետությունների հետ, ներառյալ՝ Ավստրիայի Հանրապետությունը, Գերմանիայի Դաշնային Հանրապետությունը, Իտալիայի Հանրապետությունը, Սլովակիայի Հանրապետությունը, Ֆրանսիայի Հանրապետությունը, Չեխիայի Հանրապետությունը և այլն՝ եվրասիական տնտեսական ինտեգրմանը նվիրված ավանդական միջոցառումների շրջանակներում փոխգործակցության հնարավոր ձևաչափերի բացահայտման և համագործակցության հետագա ինստիտուցիոնալացման նպատակով։

«Ինտեգրումների ինտեգրում» նախաձեռնության խթանման շրջանակներում կշարունակվի Հանձնաժողովի՝ Եվրոպական հանձնաժողովի հետ ուղիղ կապերի հաստատմանը, «Եվրասիական տնտեսական միություն՝ Եվրոպական միություն. համագործակցության ուրվագծեր» 2015 թվականի սեպտեմբերի 17-ի հուշանամակում ներկայացված առաջարկների իրագործմանն ուղղված աշխատանքը, ինչպես նաև Միության և Եվրոպական միության համագործակցության հարցերի շուրջ՝ անդամ պետությունների կառավարությունների օժանդակությամբ բարձր մակարդակով համաժողով անցկացնելու վերաբերյալ Ղազախստանի Հանրապետության նախագահ Ն.Ա. Նազարբաևի նախաձեռնությունները։

Միության և Եվրոպական միության համագործակցության հարցերին ուղղված գործունեության հեռանկարային ուղղություններից մեկը կդառնա իրավական կարգավորման հարցերի շուրջ փորձագիտական մակարդակով փոխգործակցության զարգացումը (ստանդարտացման, տեխնիկական կանոնակարգման, սպառողների շահերի պաշտպանության, մաքսային վարչարարության, մրցակցության և հակամենաշնորհային կարգավորման, տրանսպորտային և ենթակառուցվածքային համատեղ նախագծերի իրագործման, տնտեսական առևտրային վեճերի կարգավորման (մեդիացիայի) և ներքին շուկայի գործունեության, բուսասանիտարական հսկողության և դեղամիջոցների շրջանառության հետ կապված հարցերը)։

Հանձնաժողովը կշարունակի համագործակցությունը տարածաշրջանային տնտեսական ինտեգրման գործընթացների զարգացմանն աջակցություն ցուցաբերող՝ տարածաշրջանի միջազգային կազմակերպությունների, Եվրոպայում անվտանգության ու համագործակցության կազմակերպության (տնտեսական զամբյուղի և տարածաշրջանում տնտեսական փոխկապակցվածության հարցերի մասով), Ազատ առևտրի եվրոպական ասոցիացիայի և այլ կազմակերպությունների հետ.

Հյուսիսային Ամերիկայի պետությունների, տարածաշրջանային միավորումների և գործարար համայնքների հետ, առաջին հերթին՝ Ամերիկայի Միացյալ Նահանգների, Կանադայի, Մեքսիկայի Միացյալ Նահանգների հետ.

Ասիայի և Ասիական-խաղաղօվկիանոսյան տարածաշրջանի պետությունների, տարածաշրջանային միավորումների և միջազգային կազմակերպությունների հետ։

Հանձնաժողովի ջանքերն ուղղված կլինեն հետևյալ առանցքային գործընկերների հետ փոխգործակցությանը՝

Չինաստանի Ժողովրդական Հանրապետության հետ՝ «Եվրասիական տնտեսական միության և դրա անդամ պետությունների միջև`մի կողմից, և Չինաստանի Ժողովրդական Հանրապետության միջև՝ մյուս կողմից, առևտրատնտեսական համագործակցության մասին» 2018 թվականի մայիսի 17-ի համաձայնագրի, Միության և Չինաստանի Ժողովրդական Հանրապետության մաքսային սահմաններով տեղափոխվող ապրանքների և միջազգային փոխադրում իրականացնող տրանսպորտային միջոցների վերաբերյալ տեղեկությունների փոխանակման մասին համաձայնագիրը կնքելու առնչությամբ բանակցություններ վարելու շրջանակներում, ինչպես նաև Միության զարգացման և «Մեկ գոտի, մեկ ուղի» չինական նախաձեռնության զուգակցման գաղափարի իրագործման հարցերով.

Վիետնամի Սոցիալիստական Հանրապետության հետ, այդ թվում՝ «Եվրասիական տնտեսական միության և դրա անդամ պետությունների միջև՝ մի կողմից, և Վիետնամի Սոցիալիստական Հանրապետության միջև՝ մյուս կողմից, ազատ առևտրի մասին» 2015 թվականի մայիսի 29-ի համաձայնագրի իրագործման շրջանակներում.

Հնդկաստանի Հանրապետության, Սինգապուրի Հանրապետության հետ՝ Միության իրավասության սահմաններում ազատ առևտրի համաձայնագիր կնքելու վերաբերյալ բանակցությունների շրջանակներում.

Մոնղոլիայի, Սինգապուրի Հանրապետության, Կամբոջայի Թագավորության հետ՝ կնքված համագործակցության հուշագրերի իրագործման շրջանակներում.

Բանգլադեշի Ժողովրդական Հանրապետության Կառավարության հետ՝ համագործակցության հուշագրի կնքման նպատակով բանակցային գործընթացի շրջանակներում.

Կորեայի Հանրապետության առևտրի, արդյունաբերության և էներգետիկայի նախարարության, ինչպես նաև Պետական գնումների ծառայության հետ՝ կնքված փոխըմբռնման հուշագրերի իրագործման շրջանակներում.

տարածաշրջանի մյուս պետությունների հետ, ներառյալ՝ Ինդոնեզիայի Հանրապետությունը, Մալայզիան, Թաիլանդի Թագավորությունը, Ճապոնիան և այլն՝ համագործակցության հաստատման կամ ինստիտուցիոնալացման նպատակով.

Շանհայի համագործակցության կազմակերպության (ՇՀԿ), «Ասիական-խաղաղօվկիանոսյան տնտեսական համագործակցություն» (ԱԽՏՀ) ֆորումի հետ՝ նաև Միության զարգացման ներկա վիճակի և հեռանկարների մասին շնորհանդեսների կազմակերպման համար, Հարավարևելյան Ասիայի պետությունների ասոցիացիայի (ՀԱԱՊԱ) հետ՝ հարաբերությունների ձևայնացման և համագործակցության հուշագրերի ստորագրման նպատակով.

Լատինական Ամերիկայի պետությունների և տարածաշրջանային միավորումների հետ, այդ թվում՝

Կուբայի Հանրապետության, Պերուի Հանրապետության և Չիլիի Հանրապետության Կառավարությունների հետ՝ կնքված փոխըմբռնման հուշագրերի իրագործման շրջանակներում․

Էկվադորի Հանրապետության արտաքին առևտրի նախարարության հետ՝ 2017 թվականի նոյեմբերի 24-ին կնքված Առևտրատնտեսական համագործակցության հուշագրի շրջանակներում.

տարածաշրջանի մյուս պետությունների հետ, ներառյալ՝ Արգենտինայի Հանրապետությունը, Բրազիլիայի Դաշնային Հանրապետությունը, Կոլումբիայի Հանրապետությունը և այլն՝ համագործակցության հուշագրեր ստորագրելու միջոցով համագործակցության ձևայնացման հեռանկարները քննարկելու մասով.

Անդյան համայնքի գլխավոր քարտուղարության և Լատինամերիկյան տնտեսական համակարգի (ԼԱՏՀ) հետ՝ համապատասխան հուշագրերի իրագործման շրջանակներում, ինչպես նաև Հարավամերիկյան ընդհանուր շուկայի (ՄԵՐԿՈՍՈՒՐ), Կարիբյան համայնքի (ԿԱՐԻԿՈՄ), Կարիբյան պետությունների ասոցիացիայի հետ՝ նաև փոխըմբռնման հուշագրեր նախապատրաստելու և ստորագրելու մասով։ Կշարունակվի աշխատանքը Խաղաղօվկիանոսյան դաշինքի, Կենտրոնական Ամերիկայի ինտեգրացիոն համակարգի (ԿԱԻՀ), Լատինական Ամերիկայի և Կարիբյան ավազանի երկրների համայնքի (ՍԵԼԱԿ) հետ փոխգործակցության կարգավորման մասով:

Մերձավոր Արևելքի և Աֆրիկայի պետությունների և տարածաշրջանային միավորումների հետ, այդ թվում՝

Եգիպտոսի Արաբական Հանրապետության և Իսրայելի Պետության հետ՝ Միության իրավասության ներքո ազատ առևտրի մասին համաձայնագրեր կնքելու վերաբերյալ բանակցային գործընթացների շրջանակներում.

Իրանի Իսլամական Հանրապետության հետ՝ Եվրասիական տնտեսական միության ու դրա անդամ պետությունների միջև՝ մի կողմից, և Իրանի Իսլամական Հանրապետության միջև՝ մյուս կողմից, ազատ առևտրի գոտու ձևավորմանն ուղղված 2018 թվականի մայիսի 17-ի ժամանակավոր համաձայնագրի իրագործման շրջանակներում.

Հորդանանի Հաշիմյան Թագավորության և Մարոկկոյի Թագավորության հետ՝ կնքված համագործակցության հուշագրերի շրջանակներում.

Հաշվի առնելով Բրազիլիայի Դաշնային Հանրապետության, Հնդկաստանի Հանրապետության, Չինաստանի Ժողովրդական Հանրապետության և Հարավաֆրիկյան Հանրապետության հետ իրականացվող փոխգործակցությունը և համագործակցության զարգացման ծրագրերը՝ Հանձնաժողովն այդ պետությունների հրավերով կօգտագործի ԲՐԻԿՍ-ի ձևաչափն ու հարթակը՝ այդ պետությունների պաշտոնական ներկայացուցիչների հետ տնտեսական համագործակցության հարցերը քննարկելու համար։

Համագործակցության հուշագրերին համապատասխան ձևավորվող և գործող աշխատանքային խմբերի գործունեությունը կիրականացվի անդամ պետությունների գործադիր իշխանության մարմինների, Եվրասիական տնտեսական միության գործարար խորհրդի, ինչպես նաև անդամ պետությունների գործարար համայնքների ներկայացուցիչների ակտիվ մասնակցությամբ։

Անդամ պետություններն օժանդակություն կցուցաբերեն կնքված հուշագրերի շրջանակներում ֆորումների, համաժողովների, կլոր սեղանների և այլ միջոցառումների անցկացմանը՝ անդամ պետությունների գործարար համայնքների և գործադիր իշխանության մարմինների ներկայացուցիչների պատվիրակությունների ձևավորմանը տեղեկատվական ուղեկցության և աջակցության միջոցով։

Կշարունակվի երրորդ երկրների կառավարությունների ներկայացուցիչների հետ փոխգործակցությունը՝ երրորդ երկրների նկատմամբ հատուկ պաշտպանական, հակագնագցման և փոխհատուցման միջոցների կիրառման հարցերով, ներառյալ՝ հանդիպումները և խորհրդակցությունները, այդ թվում՝ երրորդ երկրների տարածքներում, ինչպես նաև երրորդ երկրների, տարածաշրջանային ինտեգրացիոն միավորումների և միջազգային կազմակերպությունների հետ փոխգործակցությունը՝ ներքին շուկայի պաշտպանության միջոցների կիրառման հարցերով:

Բազմակողմ համագործակցություն կզարգացվի հետևյալ միջազգային կազմակերպությունների հետ`

Միավորված ազգերի կազմակերպության համակարգի կազմակերպությունների հետ.

Միության իրավասությունների շրջանակներում՝ մասնագիտացված միջազգային կազմակերպությունների (այդ թվում՝ տարածաշրջանային), միությունների և այլն, դրանց ճյուղային մարմինների և հիմնարկների հետ, այդ թվում՝

Համաշխարհային մաքսային կազմակերպության հետ (ՀՄԿ)՝ Միության իրավասության շրջանակներում դրա աշխատանքային և կառավարման մարմիններում մասնակցության միջոցով, այդ թվում՝ Համաշխարհային մաքսային կազմակերպության խորհրդում, Մշտական տեխնիկական կոմիտեում, Կիոտոյի վերանայված կոնվենցիայի կառավարող կոմիտեում, Կիոտոյի վերանայված կոնվենցիայում համալրված փոփոխություններ կատարելու գծով աշխատանքային խմբում, Առևտրի համաշխարհային կազմակերպության՝ առևտրի ընթացակարգերի հեշտացման համաձայնագրի հարցերով աշխատանքային խմբում, Էլեկտրոնային առևտրի հարցերով աշխատանքային խմբում, Համաշխարհային առևտրի անվտանգության և դյուրացման պարփակ չափորոշիչների հարցերով աշխատանքային խմբում և այլն, ինչպես նաև Համաշխարհային մաքսային կազմակերպության կողմից անցկացվող միջոցառումներում:

Հանձնաժողովը կշարունակի 2016 թվականի հունիսի 17-ին կնքված՝ Եվրասիական տնտեսական հանձնաժողովի և Համաշխարհային մաքսային կազմակերպության միջև փոխըմբռնման հուշագրի իրագործման շրջանակներում Համաշխարհային մաքսային կազմակերպության հետ համագործակցությունն ամրապնդելու ուղին և անդամ պետությունների օժանդակությամբ երկխոսություն կվարի վերջինիս աշխատանքում լիարժեք մասնակցության մասին.

Առևտրի համաշխարհային կազմակերպության (ԱՀԿ) հետ, ներառյալ՝ աշխատանքն ինչպես ԱՀԿ-ի մշտական կոմիտեներում և ԱՀԿ-ի աշխատանքային խմբերում, այնպես էլ բազմակողմ առևտրային բանակցությունների շրջանակներում ստեղծվող՝ ԱՀԿ-ի մասնագիտացված աշխատանքային խմբերում և մշտական կոմիտեների հատուկ նստաշրջաններում, ինչպես նաև մասնակցությունն ԱՀԿ-ի վեճերի լուծման ընթացակարգերին՝ Միության իրավասությունների շրջանակում գտնվող միջոցների, առաջին հերթին՝ Միության շրջանակներում ազգային և վերազգային իրավասության բաժանմանը համապատասխան Միության ներքին շուկայի պաշտպանության միջոցների մասով.

Տնտեսական համագործակցության և զարգացման կազմակերպության (ՏՀԶԿ) հետ, այդ թվում՝ ՏՀԶԿ-ի դեպարտամենտների և աշխատանքային մարմինների աշխատանքի շրջանակներում:

Կշարունակվի փոխգործակցությունը միջազգային գործարար և փորձագիտական համայնքի հետ, այդ թվում՝ առևտրաարդյունաբերական պալատների, գործարար համագործակցության խորհուրդների, զարգացման տարածաշրջանային բանկերի և առանցքային միջազգային դիսկուսիոն հարթակների հետ, ներառյալ՝ Համաշխարհային տնտեսական ֆորումը, Կիրառական համակարգային վերլուծության միջազգային ինստիտուտը և այլն:

«Եվրասիական տնտեսական միության մասին» 2014 թվականի մայիսի 29-ի պայմանագրով սահմանված իրավասության շրջանակներում Հանձնաժողովը կշարունակի այլ ճյուղային ցուցահանդեսներին, ֆորումներին, համաժողովներին իր մասնակցության հետ կապված գործունեությունը, այդ թվում՝ տրանսպորտի, ավիացիայի, մետաղամշակման, հաստոցաշինության, գյուղատնտեսության, գյուղատնտեսական մեքենաշինության, տեխնիկական կանոնակարգման, մաքսային վարչարարության, մետալուրգիայի, տեղեկատվական անվտանգության, մտավոր սեփականության իրավունքների պաշտպանության, պետական գնումների, մրցակցության և հակամենաշնորհային կարգավորման, ներքին շուկայի գործունեության ոլորտներում՝ տնտեսության առանձին ոլորտների զարգացման համաշխարհային առաջատար փորձն ուսումնասիրելու նպատակով։

Գլոբալ համատեքստում եվրասիական տնտեսական ինտեգրման զարգացման արդիական հարցերը, ինչպես նաև Միության միջազգային գործունեության հարցերը 2019 թվականին կգտնվեն Պետերբուրգի միջազգային տնտեսական ֆորումի, Պետերբուրգի միջազգային իրավաբանական ֆորումի, Աստանայի տնտեսական ֆորումի, Արևելյան տնտեսական ֆորումի, «Եվրասիական շաբաթ» ցուցահանդեսային ֆորումի, ինչպես նաև անդամ պետությունների տարածքներում անցկացվող միջազգային մակարդակի նմանատիպ այլ միջոցառումների ուշադրության կիզակետում:

Միության միջազգային կապերի հաջող զարգացմանը հիմնականում կնպաստի այն միջոցների իրագործումը, որոնք ուղղված են անդամ պետությունների տնտեսությունների բազմազանեցմանը, ապրանքների և ծառայությունների առևտրի ծավալների ավելացմանը և կառուցվածքի բարելավմանը, ձեռնարկատիրական գործունեության ազատության ապահովմանը, ինչպես նաև անդամ պետությունների շուկաների փոխադարձ հասանելիության պայմանների վատթարացման կանխմանը, Միության ներքին շուկայում խոչընդոտների, առգրավումների և սահմանափակումների վերացմանը:

Սույն հիմնական ուղղությունների իրագործումը կապահովի համակարգային հիմքի վրա Միության միջազգային գործունեության իրականացումը և կնպաստի Եվրասիայի տարածքում լայն ինտեգրացիոն ուրվագծով տնտեսական գործընկերության ձևավորման համար նախադրյալների ստեղծմանը։

Պաշտոնական հրապարակման օրը՝ 22 հունիսի 2022 թվական: