դռնբաց դատական նիստում, քննության առնելով ՀՀ գլխավոր դատախազի տեղակալ Գ.Ջհանգիրյանի վճռաբեկ բողոքը Գագիկ Արամայիսի Ասատրյանի վերաբերյալ ՀՀ քրեական օրենսգրքի 179-րդ հոդվածի 3-րդ մասի 1-ին կետով քրեական գործով ՀՀ քրեական օրենսգրքի 315-րդ հոդվածի 2-րդ մասով Աղավնի Աղվանի Հովհաննիսյանի և Գագիկ Գառնիկի Բարսեղյանի վերաբերյալ քրեական գործի մասը կարճելու և քրեական հետապնդումը դադարեցնելու մասին Արագածոտնի մարզի առաջին ատյանի դատարանի 2005 թվականի մարտի 30-ի որոշման դեմ,

1.Գործի դատավարական նախապատմությունը.

Գագիկ Ասատրյանի կողմից առանձնապես խոշոր չափերի հափշտակություն կատարելու փաստի առթիվ ՀՀ քրեական օրենսգրքի 179-րդ հոդվածի 3-րդ մասի 1-ին կետի հատկանիշներով սույն քրեական գործը հարուցվել է 2004 թվականի հոկտեմբերի 20-ին։ 2004 թվականի հոկտեմբերի 22-ի որոշմամբ Գագիկ Արամայիսի Ասատրյանը ներգրավվել է որպես մեղադրյալ ՀՀ քրեական օրենսգրքի 179-րդ հոդվածի 3-րդ մասի 1-ին կետով։ 2004 թվականի դեկտեմբերի 13-ին ՀՀ քրեական օրենսգրքի 315-րդ հոդվածի 2-րդ մասով որպես մեղադրյալներ ներգրավվել են նաև Աղավնի Աղվանի Հովհաննիսյանը և Գագիկ Գառնիկի Բարսեղյանը։ 2004 թվականի դեկտեմբերի 23-ին քրեական գործը մեղադրական եզրակացությամբ ուղարկվել է Արագածոտնի մարզի առաջին ատյանի դատարան։

Արագածոտնի մարզի առաջին ատյանի դատարանի 2005 թվականի ապրիլի 4-ի դատավճռով Գագիկ Ասատրյանը ՀՀ քրեական օրենսգրքի 179-րդ հոդվածի 3-րդ մասի 1-ին կետով դատապարտվել է ազատազրկման 5 (հինգ) տարի ժամկետով` առանց գույքի բռնագրավման։

Արագածոտնի մարզի առաջին ատյանի դատարանում գործի քննության ընթացքում` մինչև դատաքննության ավարտը, դատախազը, հայտարարելով ամբաստանյալներ Գագիկ Բարսեղյանի և Աղավնի Հովհաննիսյանի նկատմամբ քրեական հետապնդում իրականացնելուց հրաժարվելու մասին, միջնորդել է վերջիններիս նկատմամբ քրեական գործի մասը կարճել նրանց արարքում հանցակազմի բացակայության պատճառաբանությամբ։ Դատարանի 2005 թվականի մարտի 30-ի որոշմամբ Գագիկ Բարսեղյանի և Աղավնի Հովհաննիսյանի նկատմամբ քրեական գործի մասը կարճվել է, և քրեական հետապնդումը դադարեցվել նրանց արարքում հանցակազմի բացակայության պատճառաբանությամբ։

«Արդշինինվեստբանկ» ՓԲԸ-ի խորհրդի նախագահի 2006 թվականի սեպտեմբերի 19-ին ՀՀ գլխավոր դատախազություն ներկայացված նյութերի հիման վրա դատարաններում քրեական գործերով մեղադրանքի պաշտպանության վարչությունում նոր ի հայտ եկած հանգամանքների փաստով վարույթ է հարուցվել «Արդշինինվեստբանկ» ՓԲԸ-ի «Թալին» մասնաճյուղի նախկին կառավարիչ Գագիկ Գառնիկին Բարսեղյանի և գլխավոր հաշվապահ Աղավնի Աղվանի Հովհաննիսյանի նկատմամբ, որի վերաբերյալ քննության կատարումը հանձնարարվել է ՀՀ գլխավոր դատախազության քննչական վարչությանը։

Նոր ի հայտ եկած հանգամանքների հետևանքով հարուցված վարույթի քննության արդյունքներով ՀՀ գլխավոր դատախազի տեղակալի կողմից բերված վճռաբեկ բողոքը Վճռաբեկ դատարանի 2006 թվականի նոյեմբերի 27-ի որոշմամբ ընդունվել է վարույթ։

2.Գործի փաստական հանգամանքները.

Նախաքննության մարմինը Գագիկ Արամայիսի Ասատրյանին ՀՀ քրեական օրենսգրքի 179-րդ հոդվածի 3-րդ մասի 1-ին կետով, իսկ Գագիկ Գառնիկի Բարսեղյանին և Աղավնի Աղվանի Հովհաննիսյանին` ՀՀ քրեական օրենսգրքի 315-րդ հոդվածի 2-րդ մասով մեղադրանք է առաջադրել հետևյալ արարքների համար.

Գագիկ Ասատրյանը, աշխատելով «Արդշինինվեստբանկ» ՓԲ ընկերության «Թալին» մասնաճյուղում որպես ավագ գանձապահ, 2004 թվականի հոկտեմբերի 4-ից 15-ն ընկած ժամանակահատվածում իր վստահության տակ գտնվող մասնաճյուղի ամենօրյա մնացորդային գումարներից հափշտակել է առանձնապես խոշոր չափերի հասնող 8.964.434 ՀՀ դրամ, 3.848.130 դրամին համարժեք 7.605 ԱՄՆ դոլար և 6.270 ՀՀ դրամին համարժեք 10 եվրո` ընդհանուր գումարով 12.818.834 ՀՀ դրամ, որն օգտագործել է տարբեր քաղաքացիներին ունեցած պարտքի գումարները մարելու համար։ Այսպես` Գագիկ Ասատրյանը, օգտվելով մասնաճյուղի կառավարիչ Գագիկ Բարսեղյանի և գլխավոր հաշվապահ Աղավնի Հովհաննիսյանի` ծառայության նկատմամբ անբարեխիղճ և անփույթ վերաբերմունքից, դրամական միջոցներն անձամբ ստուգելու և հաշվառելու պարտականությունների կատարման թերացումից, վերոհիշյալ ժամանակահատվածում` աշխատանքային օրվա ավարտից հետո, դրամարկղում հավաքված և իր վստահությանը հանձնված բանկի մնացորդային գումարներից` մինչև դրանց հաշվառելն ու դրամապահոց տեղափոխելը, վերցրել է իրեն անհրաժեշտ որոշակի չափաքանակ, իսկ գումարները հաշվելու ընթացքում հաշվառել է նաև հափշտակված դրամաչափը։ Այդ գումարներից Գագիկ Ասատրյանը վճարել է Թալին քաղաքի բնակիչներ Վ.Մնացականյանին, Ա.Սահակյանին, Լ.Խաչատրյանին, Ք.Պետրոսյանին, Ս.Եսայանին և այլոց ունեցած իր անձնական մեծաքանակ պարտքերի մի մասը։

Գագիկ Բարսեղյանը, աշխատելով «Արդշինինվեստբանկ» ՓԲ ընկերության «Թալին» մասնաճյուղում որպես կառավարիչ, իսկ Աղավնի Հովհաննիսյանը` որպես գլխավոր հաշվապահ, իրենց պաշտոնեական պարտականությունների կատարման նկատմամբ դրսևորել են հանցավոր անփույթ և անբարեխիղճ վերաբերմունք, պատշաճ կարգով չեն կատարել «Արդշինինվեստբանկ» ՓԲԸ համակարգում դրամարկղային գործառնությունների իրականացման կարգի 6.4 կետի պահանջները, անձամբ չեն ստուգել և հաշվառել դրամն ու մյուս արժեքները, որից օգտվելով` ավագ գանձապահ Գագիկ Ասատրյանը 2004 թվականի հոկտեմբերի 4-ից 15-ն ընկած ժամանակահատվածում բանկի ամենօրյա մնացորդային գումարներից հափշտակել է առանձնապես խոշոր չափերի հասնող 8.964.434 ՀՀ դրամ, 3.848.130 ՀՀ դրամին համարժեք 7.605 ԱՄՆ դոլար և 6.270 ՀՀ դրամին համարժեք 10 եվրո` ընդհանուր գումարով 12.818.834 ՀՀ դրամ, որն օգտագործել է տարբեր քաղաքացիներին ունեցած իր անձնական մեծաքանակ պարտքերի մի մասը մարելու համար։

3. Վճռաբեկ բողոքի հիմքերը, փաստարկները և պահանջը.

Վճռաբեկ բողոքը քննվում է հետևյալ հիմքերի սահմաններում ներքոհիշյալ հիմնավորումներով.

Վճռաբեկ բողոքում բողոքի հեղինակը նշել է, որ Գ.Ասատրյանի կողմից յուրացում կատարելու վերաբերյալ գործով Գ.Բարսեղյանի և Ա.Հովհաննիսյանի մասը կարճելիս Արագածոտնի մարզի առաջին ատյանի դատարանին անհայտ են մնացել գործի համար էական նշանակություն ունեցող մի շարք հանգամանքներ, որոնք հիմնավորում են այդ անձանց մեղավորությունը ՀՀ քրեական օրենսգրքի 214-րդ հոդվածի 2-րդ մասով նախատեսված հանցագործության կատարման մեջ, այն է` 2004 թվականի հոկտեմբերի 15-ին, հայտնաբերելով գանձապահ Գ.Ասատրյանի կողմից առանձնապես խոշոր չափերի հասնող գումարների յուրացման փաստը, այն կանխելու և նրան դրամարկղից մեկուսացնելու փոխարեն իրենց կարգադրիչ և այլ լիազորությունները հակառակ բանկի շահերին և հօգուտ գանձապահ Գ.Ասատրյանի օգտագործելով, օրվա հաշվառված գումարները թողել են նրա մոտ, ապա ինկասացիոն գումարները վստահել նրան, որից էլ օգտվելով` վերջինս կրկին հափշտակել է 2.000.000 ՀՀ դրամ և 2.400 ԱՄՆ դոլար` բանկին պատճառելով էական նյութական վնաս` բանկի համար առաջացնելով ծանր հետևանքներ։

Ելնելով վերոգրյալներից` բողոքի հեղինակը խնդրել է Գագիկ Ասատրյանի վերաբերյալ ՀՀ քրեական օրենսգրքի 179-րդ հոդվածի 3-րդ մասի 1-ին կետով քրեական գործով Գագիկ Բարսեղյանի և Աղավնի Հովհաննիսյանի մասով քրեական գործի մասը կարճելու և նրանց նկատմամբ քրեական հետապնդումը դադարեցնելու մասին որոշումը բեկանել և գործն ուղարկել լրացուցիչ նախաքննության` վերջիններիս ՀՀ քրեական օրենսգրքի 214-րդ հոդվածի 2-րդ մասով քրեական պատասխանատվության ենթարկելու համար։

4. Վճռաբեկ դատարանի պատճառաբանությունները և եզրահանգումը.

Վճռաբեկ բողոքում նշված հիմքերի սահմաններում վերլուծելով գործի նյութերը` Վճռաբեկ դատարանը գտավ, որ բողոքը պետք է բավարարել հետևյալ պատճառաբանությամբ.

Ինչպես երևում է դատախազության եզրակացությունից, որը հիմնված է «Արդշինինվեստբանկ» ՓԲԸ-ի խորհրդի նախագահի ներկայացրած նյութերի, դատապարտյալ Գագիկ Ասատրյանի, վկաներ Եղիշ Մարտիրոսյանի, Ազնիվ Հակոբյանի, Մանվել Քոչարյանի, Հասմիկ և Մանիկ Հարությունյանների ցուցմունքների, «Արմենթել» ՓԲԸ-ից վերցրած հեռախոսազանգերի վերծանումների վերաբերյալ տվյալների վրա, երբ 2004 թվականի հոկտեմբերի 15-ին բանկի դրամարկղում կատարված ստուգմամբ պարզվել է, որ ավագ գանձապահ Գագիկ Ասատրյանի մոտ առկա է 6 միլիոն ՀՀ դրամի պակասորդ, «Արդշինինվեստբանկ» ՓԲԸ առևտրային կազմակերպության ծառայողներ հանդիսացող բանկի մասնաճյուղի կառավարիչ Գագիկ Բարսեղյանը և գլխավոր հաշվապահ Աղավնի Հովհաննիսյանը ոչ միայն չեն կատարել «Արդշինինվեստբանկ» ՓԲԸ համակարգում գործառությունների իրականացման վերաբերյալ սահմանված կարգի 7.15 և 7.16 կետերով նախատեսված իրենց կարգադրիչ և այլ լիազորությունները, այն է` պակասորդի փաստի հայտնաբերումից հետո այդ մասին անմիջապես տեղյակ պահել և գրավոր հայտնել բանկի վարչության նախագահին, մեկուսացնել հափշտակություն կատարած անձին և կազմել համապատասխան ակտ, այլ այդ լիազորություններն օգտագործել են իրենց կազմակերպության շահերին հակառակ։ Ընդառաջելով գանձապահի խնդրանքին` նրանք հաշվառված գումարները թողել են նրա տնօրինության տակ, գնացել են իրենց աշխատասենյակները և սպասել ինկասացիոն գումարները ստանալուն։ Երբ որոշ ժամանակ անց ստացել են 3 միլիոն ՀՀ դրամ և 5.000 ԱՄՆ դոլար ինկասացիոն գումարները, հաշվապահությունում հաշվելուց հետո դարձյալ գործելով ծառայության շահերին հակառակ` Գ. Բարսեղյանն ու Ա.Հովհաննիսյանն այդ գումարները վստահել են Գ.Ասատրյանին` դրանք դրամարկղում գտնվող օրվա մնացորդային գումարների հետ դրամասայլակ տեղավորելու և դրամապահոց տեղափոխելու համար։ Օգտվելով ընձեռված հնարավորությունից` մինչև դրամարկղ գնալը Գ. Ասատրյանը հափշտակել է նաև այդ գումարներից` վերցնելով 2 միլիոն ՀՀ դրամ (մեկ արմատ 20.000-անոց թղթադրամներով) և 2.400 ԱՄՆ դոլար (5.000 ԱՄՆ դոլարի արմատից)։

Այսպիսով` Գ. Բարսեղյանի և Ա. Հովհաննիսյանի կողմից իրենց լիազորությունները բանկի շահերին հակառակ և ուրիշի անձանց օգտին օգտագործելու հետևանքով Գագիկ Ասատրյանը 2004 թվականի հոկտեմբերի 4-ից 15-ն ընկած ժամանակահատվածում «Արդշինինվեստբանկ» ՓԲ ընկերության «Թալին» մասնաճյուղից հափշտակել է առանձնապես խոշոր չափերի հասնող 8.964.434 ՀՀ դրամ, 3.848.130 ՀՀ դրամին համարժեք 7.605 ԱՄՆ դոլար և 6.270 ՀՀ դրամին համարժեք 10 եվրո` ընդհանուր գումարով 12.818.834 ՀՀ դրամ, որով էական վնաս է պատճառել բանկի օրինական շահերին` առաջացնելով ծանր հետևանքներ։

Չնայած վերը շարադրված հանգամանքները գոյություն են ունեցել սույն գործի նախաքննության և դատական քննության պահին, սակայն նախաքննության մարմնին և գործը քննող դատարանին հայտնի չեն եղել։ ՀՀ քրեական դատավարության օրենսգրքի 408-րդ հոդվածի 1-ին մասի 4-րդ կետի համաձայն` նոր երևան եկած հանգամանքների հետևանքով քրեական գործերը նորոգվում են, եթե ի հայտ են եկել դատավճիռ կամ որոշում կայացնելիս դատարանին անհայտ մնացած այլ հանգամանքներ, որոնք ինքնին կամ մինչ այդ պարզված հանգամանքների հետ ապացուցում են արդարացվածի կամ այն անձի մեղավորությունը, որի նկատմամբ քրեական հետապնդումը դադարեցվել է, կամ գործով վարույթը կարճվել է։

Գործի նյութերից երևում է, որ Արագածոտնի մարզի առաջին ատյանի դատարանի 2005 թվականի մարտի 30-ի որոշմամբ Գագիկ Բարսեղյանի և Աղավնի Հովհաննիսյանի վերաբերյալ ՀՀ քրեական օրենսգրքի 315-րդ հոդվածի 2-րդ մասով քրեական գործի մասը կարճվել է, և քրեական հետապնդումը դադարեցվել է նրանց արարքում հանցակազմի բացակայությամբ։ Քննության նյութերում առկա Գագիկ Բարսեղյանի և Աղավնի Հովհաննիսյանի մեղավորությանը վերաբերող փաստական տվյալները ՀՀ քրեական դատավարության օրենսգրքի 408-րդ հոդվածի 1-ին մասի 4-րդ կետով նախատեսված նոր երևան եկած հանգամանքներ են, որոնք գործի նորոգման հիմք են։

Ելնելով վերը շարադրվածից` Վճռաբեկ դատարանը գտնում է, որ Արագածոտնի մարզի առաջին ատյանի դատարանի 2005 թվականի մարտի 30-ի որոշումը, որով Գագիկ Բարսեղյանի և Աղավնի Հովհաննիսյանի նկատմամբ քրեական գործի մասը կարճվել, և քրեական հետապնդումը դադարեցվել է հանցակազմի բացակայության պատճառաբանությամբ, ՀՀ քրեական դատավարության օրենսգրքի 419-րդ հոդվածի 2-րդ կետի հիման վրա պետք է ամբողջությամբ բեկանել և այդ մասով գործն ուղարկել լրացուցիչ նախաքննության։

Վերոգրյալի հիման վրա և ղեկավարվելով ՀՀ Սահմանադրության 92-րդ հոդվածով, ՀՀ քրեական դատավարության օրենսգրքի 403-406-րդ, 408-րդ, 419-րդ, 421-424-րդ հոդվածներով` ՀՀ Վճռաբեկ դատարանը

Վճռաբեկ բողոքը բավարարել։

Գագիկ Գառնիկի Բարսեղյանի և Աղավնի Աղվանի Հովհաննիսյանի վերաբերյալ ՀՀ քրեական օրենսգրքի 315-րդ հոդվածի 2-րդ մասով քրեական գործի մասը կարճելու և քրեական հետապնդումը դադարեցնելու մասին Արագածոտնի մարզի առաջին ատյանի դատարանի 2005թվականի մարտի 30-ի որոշումը բեկանել և գործն այդ մասով ուղարկել լրացուցիչ նախաքննության։

Որոշումն ուժի մեջ է մտնում հրապարակման պահից և ենթակա չէ բողոքարկման։

Նախագահող`	Տ. ՍԱՀԱԿՅԱՆ
Դատավորներ`	Հ. ԱՍԱՏՐՅԱՆ
	Հ. ՂՈՒԿԱՍՅԱՆ
	Մ. ՍԻՄՈՆՅԱՆ