ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

3 փետրվարի 2022 թվականի N 119-Ն

Հիմք ընդունելով «Հայաստանի Հանրապետության պետական մրցանակների մասին» Հայաստանի Հանրապետության օրենքի 7-րդ հոդվածի 9-րդ, 13-րդ և 14-րդ մասերը՝ Հայաստանի Հանրապետության կառավարությունը որոշում է.

1. Սահմանել Հայաստանի Հանրապետության պետական մրցանակների մրցանակակիրներ ընտրող հանձնաժողովների և մրցանակաբաշխության կոմիտեի ձևավորման և գործունեության կարգերը, ինչպես նաև հանձնաժողովների կազմում ընդգրկվող հասարակական կազմակերպություններին ներկայացվող պահանջները, հասարակական կազմակերպություններից ընտրվող անդամների թափուր տեղերի համար մրցույթի անցկացման և հանձնաժողովի անդամների ընտրության կարգը` համաձայն հավելվածի:

Հայաստանի Հանրապետության վարչապետ	Ն. ՓԱՇԻՆՅԱՆ
Երևան

03.02.2022 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ

Հավելված ՀՀ կառավարության 2022 թվականի փետրվարի 3-ի N 119-Ն որոշման

1. Հայաստանի Հանրապետության պետական մրցանակի (այսուհետ՝ մրցանակ) հայցման համար ներկայացված ստեղծագործությունները, հայտնագործությունները (գյուտերը) և աշխատանքները քննարկում, մրցանակի հավակնորդների ընտրությունը կազմակերպում և անցկացնում են Հայաստանի Հանրապետության պետական մրցանակների մրցանակակիր ընտրող հանձնաժողովները (այսուհետ՝ հանձնաժողով):

2. Հանձնաժողովը կազմված է 10 անդամից, որոնց լիազորությունների ժամկետը երեք տարի է: Հանձնաժողովի անդամներն իրենց պարտականությունները կատարում են հասարակական հիմունքներով և իրենց կազմից ընտրում են հանձնաժողովի նախագահ:

3. Հանձնաժողովի կազմում ընդգրկվում են «Հայաստանի Հանրապետության պետական մրցանակների մասին» ՀՀ օրենքով (այսուհետ՝ օրենք) նախատեսված նախարարությունների, մարմինների և կազմակերպությունների կողմից՝ սահմանված կարգով և նախատեսված թվաքանակով ներկայացված (առաջադրված) թեկնածուները:

4. Հասարակական կազմակերպությունները ՀՀ կառավարության քաղաքականությունը մշակող և իրականացնող նախարարություն են ներկայացնում հասարակական կազմակերպությունը ներկայացնող անձի անունը, ազգանունը (նշելով կազմակերպության լրիվ անվանումը և այդ կազմակերպությունում նրա զբաղեցրած պաշտոնը), հեռախոսահամարը, անձը հաստատող փաստաթղթի (անձնագրի կամ նույնականացման քարտի) պատճենը, էլեկտրոնային փոստի հասցեն՝ նկատի ունենալով թեկնածուի բարձր մասնագիտական որակներ ունենալու և ոլորտի հեղինակավոր մասնագետ լինելու կամ հանրային հեղինակություն վայելելու հանգամանքները (առկայության դեպքում՝ ներկայացնելով համապատասխան փաստաթղթերը), ինչպես նաև կցելով օրենքի 7-րդ հոդվածի 5-րդ մասով նախատեսված սահմանափակումների բացակայության վերաբերյալ փաստաթուղթ և հասարակական կազմակերպության պետական գրանցման վկայականի պատճենը կամ պետական գրանցման համարը, կազմակերպության վերջին 3 տարվա գործունեության հակիրճ նկարագրությունը և կազմակերպության պետական գրանցման օրվանից առնվազն երեք տարվա համապատասխան գործունեության վերաբերյալ տեղեկատվությունը:

5. Կառավարության քաղաքականությունը մշակող և իրականացնող նախարարությունը հասարակական կազմակերպությունների կողմից ներկայացված հայտերը և կից փաստաթղթերը ուսումնասիրում է և ներկայացված պահանջներին բավարարող հասարակական կազմակերպությանը մեկամսյա ժամկետում տեղեկացնում է հանձնաժողովի կազմում նրա ներկայացուցչի ընդգրկվելու վերաբերյալ: Մերժելու դեպքում ներկայացնում է մերժման հիմքը՝ ելնելով սույն հավելվածի 4-րդ և 6-րդ կետերի պահանջներից:

6. Հանձնաժողովների անդամ չի կարող նշանակվել այն անձը, որի մոտ առկա է օրենքի 7-րդ հոդվածի 5-րդ մասով նախատեսված սահմանափակումներից որևէ մեկը:

7. Հանձնաժողովի նախագահի բացակայության կամ պաշտոնեական պարտականությունները կատարելու անհնարինության դեպքում նրա հանձնարարությամբ նրան փոխարինում է հանձնաժողովի անդամներից որևէ մեկը, իսկ հանձնարարություն տալու անհնարինության դեպքերում` հանձնաժողովի տարիքով ավագ անդամը:

8. Հանձնաժողովն աշխատանքը կազմակերպում է նիստերի միջոցով:

9. Հանձնաժողովի նիստն իրավազոր է, եթե դրան մասնակցում է հանձնաժողովի անդամների կեսից ավելին:

10. Հանձնաժողովի նիստերն արձանագրվում են: Արձանագրությունն ստորագրում են հանձնաժողովի նախագահը և անդամները։

11. Հանձնաժողովի նախագահը`

1) հրավիրում և վարում է հանձնաժողովի նիստը.

2) նշանակում է հանձնաժողովի նիստի անցկացման վայրը, օրը և ժամը.

3) ստորագրում է հանձնաժողովի որոշումները.

4) ստորագրում է հանձնաժողովի արձանագրությունը, որը ներկայացվում է Հայաստանի Հանրապետության վարչապետի աշխատակազմ.

5) իրականացնում է հանձնաժողովի գործառույթներից բխող այլ կազմակերպական աշխատանքներ:

12. Համաձայն օրենքի 5-րդ հոդվածի 4-րդ մասի՝ մրցանակների հավակնորդների ընտրությունն իրականացվում է՝ հիմք ընդունելով ստեղծագործությունների, հայտնագործությունների (գյուտերի) և աշխատանքների արժեքավորությունը, նշանակությունը տվյալ ոլորտի զարգացման համար և այլ չափանիշներ, որոնք սահմանում են հանձնաժողովները:

13. Ճշգրիտ և բնական գիտությունների, հումանիտար և հասարակական գիտությունների բնագավառների մրցանակի թեկնածուների հայտնագործությունները (գյուտերը) և աշխատանքները, ինչպես նաև դրանց կցված նյութերը հանձնաժողովի կողմից կարող են ուղարկվել անկախ փորձաքննության՝ ելնելով հանձնաժողովի կողմից սահմանված չափանիշներից:

14. Փորձաքննությունն անցկացվում է համապատասխան ոլորտի առաջատար կազմակերպությունների կամ առանձին փորձագետների կողմից, որոնց ցանկը յուրաքանչյուր տարի որոշում է համապատասխան հանձնաժողովը:

15. Փորձաքննության արդյունքները հանձնաժողովին ներկայացվում են հիմնավորված գրավոր եզրակացության ձևով, որն ստորագրում է այն կատարած անձը, իսկ կազմակերպության կողմից կատարվելու դեպքում` տվյալ կազմակերպության ղեկավարը:

16. Մրցանակի յուրաքանչյուր թեկնածուի համար անցկացվում է առանձին քվեարկություն: Եթե քվեարկության արդյունքներով հայցողներից և ոչ մեկը չի ստացել նիստին մասնակցած անդամների ձայների առնվազն երկու երրորդը, ապա անցկացվում է քվեարկության երկրորդ փուլ: Եթե մեկից ավելի թեկնածուներ ստացել են ձայների երկու երրորդը և ավելին, ապա այդ հայցողների թեկնածության համար նույնպես անցկացվում է քվեարկության երկրորդ փուլ: Քվեարկության երկրորդ փուլի արդյունքներով ընտրված է համարվում այն թեկնածուն, որն ստացել է առավելագույն թվով ձայներ: Այն դեպքում, երբ հայցողը մեկն է, և նա չի ստացել անհրաժեշտ թվով ձայներ, ապա քվեարկության երկրորդ փուլ չի անցկացվում, և հանձնաժողովն ընդունում է որոշում տվյալ տարում մրցանակի թեկնածու չընտրելու մասին:

17. Հանձնաժողովը մրցանակի դափնեկրի թեկնածուին ընտրելու վերաբերյալ որոշումն ընդունում է փակ քվեարկությամբ, հանձնաժողովի նիստին մասնակցած անդամների ձայների առնվազն երկու երրորդով:

18. Մրցանակների շնորհման վերաբերյալ առաջարկությունները Հայաստանի Հանրապետության վարչապետի աշխատակազմ են ներկայացվում սահմանված կարգով:

19. Հանձնաժողովների անդամներն իրենց ստեղծագործությունների, հայտնագործությունների (գյուտերի) և աշխատանքների համար չեն կարող հավակնել օրենքով սահմանված պետական մրցանակներ ստանալուն:

20. Հասարակական կազմակերպությունների կողմից առաջադրված՝ հանձնաժողովի անդամի թափուր տեղ առաջանալուց համապատասխան ոլորտում Կառավարության քաղաքականությունը մշակող և իրականացնող նախարարությունը առնվազն 30 օր առաջ հայտարարում է մրցույթ, որի շրջանակներում հասարակական կազմակերպությունները ներկայացնում են մեկական թեկնածու` սույն հավելվածի 4-րդ կետին համապատասխան, որի պահանջներն ընդունվում են որպես մրցույթի անցկացման և հանձնաժողովի անդամի ընտրության պայմաններ: Ընտրվում են այն թեկնածուները, որոնց թեկնածությունը ներկայացվել է առաջադրված պահանջներին համապատասխան և ըստ ներկայացված փաստաթղթերի ունեն ավելի բարձր մասնագիտական որակներ և առկա են ոլորտի հեղինակավոր մասնագետ լինելու կամ հանրային հեղինակություն վայելելու հանգամանքները հավաստող (հիմնավորող) փաստաթղթեր և որոնց թեկնածությունը ներկայացնող կազմակերպությունը պետական գրանցման օրվանից, սահմանված ժամկետից ավելի երկար ժամանակ է իրականացրել (իրականացնում) համապատասխան գործունեություն:

21. Մրցույթի արդյունքում ընտրված թեկնածուների վերաբերյալ տվյալները ներկայացվում են ՀՀ վարչապետի աշխատակազմ:

22. Կառավարության քաղաքականությունը մշակող և իրականացնող նախարարության կողմից համապատասխան ոլորտում ավանդ ունեցած հեղինակավոր մասնագետներից առաջադրված հանձնաժողովի անդամի թափուր տեղ առաջանալուց նախարարությունը առնվազն 30 օր առաջ կարող է հայտարարություն տարածել հանձնաժողովների անդամի թեկնածու ընտրվելու համար ինքնաառաջադրում իրականացնելու հնարավորության վերաբերյալ:

23. Հանձնաժողովների անդամների լիազորությունների ժամկետի ավարտից առնվազն մեկ շաբաթ առաջ թեկնածուների վերաբերյալ տվյալները առաջադրող մարմինները ներկայացնում են ՀՀ վարչապետի աշխատակազմ՝ հաստատման:

24. Բարձր տեխնոլոգիաների ոլորտում համաշխարհային ներդրման համար պետական մրցանակի թեկնածուների հավակնորդների ընտրությունն իրականացնում է հանձնաժողովների ձևավորման կարգով ձևավորված և հանձնաժողովների գործունեության կարգով գործող մրցանակաբաշխության կոմիտեն (այսուհետ՝ կոմիտե)՝ հիմք ընդունելով ստեղծագործությունների, հայտնագործությունների (գյուտերի) և աշխատանքների արժեքավորությունը, նշանակությունը տվյալ ոլորտի զարգացման համար և այլ չափանիշներ՝ սահմանված կոմիտեի կողմից: Կոմիտեի կազմում ընդգրկվում են բարձր մասնագիտական որակներով օժտված, անաչառ, ոլորտի հեղինակավոր մասնագետներ կամ հանրային հեղինակություն վայելող անձինք:

Հայաստանի Հանրապետության վարչապետի աշխատակազմի ղեկավար

Ա. Հարությունյան

03.02.2022 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ

Պաշտոնական հրապարակման օրը՝ 3 փետրվարի 2022 թվական: