ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

4 նոյեմբերի 2021 թվականի N 1799-Ա

Հիմք ընդունելով Հայաստանի Հանրապետության քաղաքացիական օրենսգրքի 605-րդ հոդվածը՝ Հայաստանի Հանրապետության կառավարությունը որոշում է.

1. Հայաստանի Հանրապետության սեփականություն հանդիսացող, քաղաք Երևան, Կենտրոն, Ա. Մանուկյան փողոց 11 հասցեում գտնվող, 2021 թվականի սեպտեմբերի 6-ի դրությամբ 1 398 635 000 դրամ շուկայական արժեքով գնահատված, 0.47 հեկտար մակերեսով հողամասն (այսուհետ՝ գույք) ամրացնել Հայաստանի Հանրապետության տարածքային կառավարման և ենթակառուցվածքների նախարարության պետական գույքի կառավարման կոմիտեին (այսուհետ՝ կոմիտե)՝ համաձայն «Հայաստանի ֆուտբոլի ֆեդերացիա» հասարակական կազմակերպության (այսուհետ՝ կազմակերպություն. հասցե՝ քաղաք Երևան, Խանջյան փողոց, շ. 27, պետական գրանցման վկայական՝ 211.171.1039517, գրանցման ամսաթիվ՝ 02.10.2018 թվական) կողմից ներկայացված գործունեության ծրագրի՝ վերջինիս նվիրաբերելու համար։

2. Կոմիտեի նախագահին՝

1) սույն որոշումն ուժի մեջ մտնելուց հետո երկամսյա ժամկետում, «Հայաստանի ֆիզիկական կուլտուրայի և սպորտի պետական ինստիտուտ» հիմնադրամի հետ համատեղ, ապահովել վերջինիս անվամբ գույքի նկատմամբ գրանցված անհատույց օգտագործման իրավունքի դադարեցման գործընթացը.

2) սույն որոշումն ուժի մեջ մտնելուց հետո երկամսյա ժամկետում ապահովել գույքի միակողմանի ընդունման և հաշվառման աշխատանքների կատարումը.

3) սույն կետի 2-րդ ենթակետում նշված աշխատանքների ավարտից հետո մեկամսյա ժամկետում կազմակերպության հետ կնքել սույն որոշման 1-ին կետից բխող նվիրաբերության պայմանագիր՝ դրանում սահմանելով, որ պայմանագրի նոտարական վավերացման և գույքի նկատմամբ իրավունքի պետական գրանցման հետ կապված ծախսերը ենթակա են իրականացման կազմակերպության միջոցների հաշվին.

4) սույն կետի 3-րդ ենթակետում նշված աշխատանքների ավարտից հետո մեկամսյա ժամկետում ապահովել գույքի հանձնումը կազմակերպությանը։

Հայաստանի Հանրապետության վարչապետ	Ն. ՓԱՇԻՆՅԱՆ
Երևան

04.11.2021 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ