ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

31 մարտի 2020 թվականի N 416-Լ

ԿՈՐՈՆԱՎԻՐՈՒՍԻ ՏՆՏԵՍԱԿԱՆ ՀԵՏԵՎԱՆՔՆԵՐԻ ՉԵԶՈՔԱՑՄԱՆ ԱՌԱՋԻՆ, ԵՐԿՐՈՐԴ ԵՎ ԵՐՐՈՐԴ ՄԻՋՈՑԱՌՈՒՄՆԵՐԻ ՇՐՋԱՆԱԿՈՒՄ ՏՐԱՄԱԴՐՎՈՂ ՕԺԱՆԴԱԿՈՒԹՅԱՆ ԳՈՐԾԻՔՆԵՐԻ ԿԻՐԱՌՄԱՆ ԿԱՐԳԵՐԸ ՀԱՍՏԱՏԵԼՈՒ ՄԱՍԻՆ

Հիմք ընդունելով Հայաստանի Հանրապետության Սահմանադրության 1-ին հոդվածը, 146-րդ հոդվածի 4-րդ մասը, Հայաստանի Հանրապետության կառավարության 2020 թվականի մարտի 26-ի NN 355-Լ, 356-Լ, 357-Լ որոշումները, «Հայաստանի Հանրապետության կենտրոնական բանկի մասին» Հայաստանի Հանրապետության օրենքի 32-րդ հոդվածը՝ Հայաստանի Հանրապետության կառավարությունը որոշում է.

1. Հաստատել`

1) Հայաստանի Հանրապետության կառավարության 2020 թվականի մարտի 26-ի N 355-Լ որոշմամբ հաստատված` կորոնավիրուսի տնտեսական հետևանքների չեզոքացման առաջին միջոցառման շրջանակում տրամադրվող օժանդակության գործիքների կիրառման կարգը՝ համաձայն N 1 հավելվածի.

2) Հայաստանի Հանրապետության կառավարության 2020 թվականի մարտի 26-ի N 356-Լ որոշմամբ հաստատված` կորոնավիրուսի տնտեսական հետևանքների չեզոքացման երկրորդ միջոցառման շրջանակում տրամադրվող օժանդակության գործիքների կիրառման կարգը՝ համաձայն N 2 հավելվածի.

3) Հայաստանի Հանրապետության կառավարության 2020 թվականի մարտի 26-ի N 357-Լ որոշմամբ հաստատված՝ կորոնավիրուսի տնտեսական հետևանքների չեզոքացման երրորդ միջոցառման շրջանակում տրամադրվող օժանդակության գործիքների կիրառման կարգը՝ համաձայն N 3 հավելվածի:

2. Սահմանել, որ`

1) սույն որոշման N 1 հավելվածով հաստատված կարգով սահմանված Հայաստանի Հանրապետության կառավարության լիազորած մարմինների և Հայաստանի Հանրապետության կենտրոնական բանկի միջև սույն որոշման շրջանակում կնքվում է ֆինանսական գործակալության պայմանագիր, որի համաձայն Հայաստանի Հանրապետության կենտրոնական բանկը հանդես է գալու որպես Հայաստանի Հանրապետության կառավարության ֆինանսական գործակալ.

2) սույն որոշման N 1 հավելվածով հաստատված կարգով սահմանված միջոցառումների ֆինանսավորման համար ծախսերի կատարման հետ կապված հարցերով Հայաստանի Հանրապետության կառավարության լիազոր մարմին է համարվում Հայաստանի Հանրապետության ֆինանսների նախարարությունը, իսկ միջոցառումների իրականացման պատասխանատու մարմին է հանդիսանում Հայաստանի Հանրապետության էկոնոմիկայի նախարարությունը.

3) սույն որոշման NN 2 և 3 հավելվածներով հաստատված կարգով սահմանված միջոցառումների համար ֆինանսական միջոցների հետ կապված հարցերով Հայաստանի Հանրապետության կառավարության լիազոր մարմին է Հայաստանի Հանրապետության ֆինանսների նախարարությունը, իսկ միջոցառման իրականացման պատասխանատու մարմին` Հայաստանի Հանրապետության էկոնոմիկայի նախարարությունը:

4) սույն որոշման N 2 հավելվածով հաստատված կարգով Հայաստանի Հանրապետության ֆինանսների նախարարության և Հայաստանի Հանրապետության կենտրոնական բանկի միջև սույն որոշման շրջանակում կնքվում է ֆինանսական գործակալության պայմանագիր, որի համաձայն Հայաստանի Հանրապետության կենտրոնական բանկը հանդես է գալու որպես Հայաստանի Հանրապետության կառավարության ֆինանսական գործակալ:

(2-րդ կետը լրաց. 21.04.20 N 585-Լ)

3. Սույն որոշումն ուժի մեջ է մտնում հրապարակումից հետո անմիջապես։

Հայաստանի Հանրապետության վարչապետ	Ն. Փաշինյան
2020 թ. մարտի 31 Երևան

Հավելված N 1 ՀՀ կառավարության 2020 թվականի մարտի 31-ի N 416-Լ որոշման

ԿՈՐՈՆԱՎԻՐՈՒՍԻ ՏՆՏԵՍԱԿԱՆ ՀԵՏԵՎԱՆՔՆԵՐԻ ՉԵԶՈՔԱՑՄԱՆ ԱՌԱՋԻՆ ՄԻՋՈՑԱՌՄԱՆ ՇՐՋԱՆԱԿՈՒՄ ՏՐԱՄԱԴՐՎՈՂ ՕԺԱՆԴԱԿՈՒԹՅԱՆ ԳՈՐԾԻՔԻ ԿԻՐԱՌՄԱՆ ԿԱՐԳ

(վերնագիրը խմբ. 22.05.20 N 774-Լ, 18.06.20 N 990-Լ)

1. Օժանդակության նպատակն է տնտեսավարողների համար ստեղծել մատչելի ֆինանսական միջոցների հասանելիության հնարավորություն՝ պահանջարկի փոփոխվող պայմաններին արձագանքելու, արտաքին մարտահրավերներին դիմակայելու և ըստ այդմ գործունեությունը շարունակելու կամ վերադասավորվելու ու փոփոխված տնտեսական իրավիճակին հարմարվելու և զարգացման ռազմավարությունը ճշգրտելու գործողություններ իրականացնելու համար։

2. Սույն հավելվածում «տնտեսավարող» եզրույթն օգտագործվում է միջոցառման մեջ կիրառված իմաստով:

3. Օժանդակությունը տրամադրվում է տնտեսավարողներին՝ Հայաստանի Հանրապետության տարածքում գործող և լիցենզավորված բանկերից կամ վարկային կազմակերպություններից (այսուհետ՝ ֆինանսական կազմակերպություն) ստացվող նպատակային վարկերի տոկոսադրույքի սուբսիդավորման ձևով: Ընդ որում, վարկերի վերադարձի ռիսկն ամբողջությամբ կրում է ֆինանսական կազմակերպությունը:

4. Օժանդակության ձևերը կիրառելի են այն վարկերի համար, որոնք տրամադրվում են տնտեսավարողներին հետևյալ ծախսերից մեկի կամ մի քանիսի իրականացման նպատակով՝

- տնտեսավարողի աշխատակիցներին աշխատավարձ կամ դրան հավասարեցված վճարումներ (ընդ որում, վճարում են համարվում նաև 2020 թվականի ապրիլի 1-ից հետո նույն նպատակով և փաստացի չափով իրականացված ծախսերը), բայց յուրաքանչյուր աշխատակցի դեպքում ոչ ավելի, քան ամսական 500 000 դրամ գումարի չափով՝ առավելագույնը վեց ամսվա համար (այսուհետ՝ աշխատակիցների վարկեր), ընդ որում սույն հավելվածի իմաստով աշխատակիցներ են համարվում այն անձինք, որոնց մասով օրենսդրությամբ սահմանված կարգով մինչև 2020 թվականի փետրվարի 29-ը ներառյալ ներկայացվել են գրանցման հայտեր: Միաժամանակ միջոցառման շրջանակում ֆինանսավորվող աշխատավարձերը ենթակա չեն բարձրացման այդ աջակցության ամբողջ ընթացքում: Տնտեսավարողի աշխատողներին աշխատավարձի մասով ցուցաբերվող օժանդակության գումարը յուրաքանչյուր ամսվա հաշվով չի կարող գերազանցել 2020 թվականի փետրվար ամսվա համար հարկային մարմին ներկայացված՝ եկամտային հարկի և սոցիալական վճարի ամսական հաշվարկով արտացոլված՝ աշխատավարձի ընդհանուր գումարը,

- պետական կամ համայնքի բյուջե հարկերի, տուրքերի և պարտադիր վճարների վճարումներ՝ ընդ որում, վճարում են համարվում նաև 2020 թվականի ապրիլի 1-ից հետո նույն նպատակով և փաստացի չափով իրականացված ծախսերը՝ առավելագույնը վեց ամսվա համար, բացառությամբ կանխավճարների և գերավճարների (այսուհետ՝ հարկերի, տուրքերի և պարտադիր վճարների վարկեր),

- հումքի գնում կամ ներմուծում (այդ թվում՝ մեկից ավելի պայմանագրերի գծով, որոնց մասով ստացված վարկավորման ընդհանուր գումարը չպետք է գերազանցի սույն որոշման 5-րդ կետի 4-րդ ենթակետով սահմանված վարկի առավելագույն գումարը), պայմանով, որ պայմանագիրը կնքվել է 2020 թվականի փետրվարի 1-ից հետո կամ պայմանագիրը կնքվել է մինչև 2020 թվականի փետրվարի 1-ը, սակայն հաշվարկային փաստաթղթերը տրվել (թողարկվել) են 2020 թվականի փետրվարի 1-ից հետո, և հումքի ամբողջ ծավալը պետք է օգտագործվի Հայաստանի Հանրապետությունում՝ պատրաստի արտադրանք ստանալու նպատակով, և տնտեսավարողը տնօրինում է անհրաժեշտ և համապատասխան արտադրական հզորություններ (այսուհետ՝ հումքի վարկեր),

- նոր սարքերի և սարքավորումների գնում կամ ներմուծում, պայմանով, որ պայմանագիրը կնքվել է 2020 թվականի փետրվարի 1-ից հետո, և տվյալ սարքերը և սարքավորումները պետք է օգտագործվեն Հայաստանի Հանրապետությունում արտադրություն կազմակերպելու կամ արտադրությունն ընդլայնելու նպատակով (այսուհետ՝ սարքավորումների վարկեր/լիզինգ),

- հանրային ծառայությունների վճարումներ (էլեկտրաէներգիայի, ջրի, գազի, կապի և հեռահաղորդակցության գծով ծախսերի իրականացում (ընդ որում, ծախսերի իրականացում են համարվում 2020 թվականի մարտի 1-ից հետո նույն նպատակով և փաստացի չափով իրականացված ծախսերը), բայց յուրաքանչյուր ծառայության դեպքում ոչ ավելի, քան ամսական 5 000 000 դրամ գումարի չափով՝ առավելագույնը վեց ամսվա համար, բացառությամբ կանխավճարների և գերավճարների (այսուհետ՝ կոմունալ վճարների վարկեր),

- ձեռնարկատիրությամբ զբաղվող ընկերությունների կողմից սննդի (բացառությամբ ալկոհոլի և ծխախոտի) և դեղերի ներմուծում (այդ թվում՝ մեկից ավելի պայմանագրերի գծով, որոնց մասով ստացված վարկավորման ընդհանուր գումարը չպետք է գերազանցի սույն հավելվածի 5-րդ կետի 4-րդ ենթակետով սահմանված վարկի առավելագույն մեծությունը), պայմանով, որ պայմանագիրը կնքվել է 2020 թվականի փետրվարի 1-ից հետո, և գնված կամ ներմուծված ապրանքը պետք է իրացվի Հայաստանի Հանրապետությունում (այսուհետ՝ սննդի (բացառությամբ ալկոհոլի և ծխախոտի) և դեղերի վարկեր):

5. Օժանդակության գործիքի կիրառմամբ տրամադրվող վարկերը պետք է համապատասխանեն հետևյալ պահանջներին՝

- արժույթը՝ դրամով կամ արտարժույթով (արտարժույթով վարկերի նկատմամբ սուբսիդավորման գործիքը կարող է կիրառվել միայն այն դեպքում, եթե վարկառուն իր ձեռնարկատիրական գործունեության արդյունքում կստանա տվյալ վարկի սպասարկման համար բավարար չափով արտարժույթով հասույթ),

- ժամկետը՝ մինչև 60 ամիս, սակայն սույն միջոցառմամբ սահմանված սուբսիդավորումն իրականացվում է միայն վարկի մինչև 24 ամիս ժամանակահատվածի համար, իսկ արտարժույթով վարկերի դեպքում՝ 6-ամսյա ժամանակահատվածի համար,

- վարկի մայր գումարի մարման արտոնյալ ժամանակահատված՝ մինչև 6 ամիս, իսկ արտարժույթով վարկերի դեպքում՝ մինչև 3 ամիս,

- մեկ տնտեսավարողի՝ օժանդակության գործիքի ներքո տրամադրվելիք վարկերի՝ սույն միջոցառման շրջանակներում սուբսիդավորվող մասի առավելագույն գումարը՝ 250 մլն դրամ, իսկ արտարժույթով վարկավորման դեպքում՝ 125 մլն դրամին համարժեք,

- վարկային միջոցների օգտագործման կարգը՝ միայն անկանխիկ և բանկային փոխանցումներով,

- առավելագույն փաստացի տոկոսադրույքը տարեկան 12 % դրամով վարկերի և տարեկան 9 % արտարժույթով վարկերի դեպքում:

6. Սույն hավելվածի շրջանակում նախկինում կնքված ֆինանսական գործակալության պայմանագիրը գործում է մինչև 2022 թվականի հունիսի 30-ը ներառյալ ժամկետով:

7. Միջոցառման չափանիշներին բավարարող տնտեսավարողները կարող են հայտ ներկայացնել ֆինանսական կազմակերպություն, որով տալիս են նաև իրենց համաձայնությունը՝ տրամադրվող օժանդակության վերաբերյալ տվյալները հրապարակելու վերաբերյալ: Հայտի բավարարման դեպքում սույն միջոցառմամբ սահմանված կանոնների համաձայն կիրականացվի տվյալ վարկի տոկոսների սուբսիդավորում` սույն հավելվածի 8-րդ և 9-րդ կետերով սահմանված չափերով, վարկի ժամկետի 24-ամսյա ժամանակահատվածի համար, իսկ արտարժույթով վարկերի դեպքում՝ 6-ամսյա ժամանակահատվածի համար:

(7-րդ կետը խմբ. 08.10.20 N 1658-Լ)

8. Հայաստանի Հանրապետության դրամով վարկերի սուբսիդավորման չափերը կախված նպատակից հետևյալն են՝

Վարկի նպատակը	Սուբսիդավորման չափը
Աշխատակիցների	ամբողջությամբ
Հարկերի, տուրքերի և պարտադիր վճարների	ամբողջությամբ
Հումքի	7%
Սարքավորումների	6%
Կոմունալ վճարների	10%
Սննդի	8%

9. Արտարժույթով վարկերի սուբսիդավորման չափերը կախված նպատակից հետևյալն են՝

Վարկի նպատակը	Սուբսիդավորման չափը
Աշխատակիցների	ամբողջությամբ
Հարկերի, տուրքերի և պարտադիր վճարների	ամբողջությամբ
Հումքի	6%
Սարքավորումների	5%
Կոմունալ վճարների	8%
Սննդի	6%

10. Տնտեսավարողը, որի կանոնադրական կապիտալում 50 մլն դրամ և ավելի գումարի չափով ներդրում է կատարվել 2020 թվականի ընթացքում, օգտվում է հետևյալ հավելյալ բոլոր արտոնություններից՝

1) սույն հավելվածի 5-րդ կետի 2-րդ ենթակետով նախատեսված սուբսիդավորումն իրականացվում է վարկի մինչև 36 ամիս ժամանակահատվածի համար, իսկ արտարժույթով վարկերի դեպքում՝ 12-ամսյա ժամանակահատվածի համար.

2) սույն հավելվածի 5-րդ կետի 4-րդ ենթակետով նախատեսված օժանդակության գործիքի ներքո տրամադրվելիք վարկերի սուբսիդավորվող մասի առավելագույն գումարը սահմանվում է 400 մլն դրամ, իսկ արտարժույթով վարկավորման դեպքում՝ 200 մլն դրամին համարժեք.

3) սույն հավելվածի 8-րդ և 9-րդ կետերով նախատեսված սուբսիդավորման չափերն ավելանում են 0,5 % չափով (բացառությամբ ամբողջությամբ սուբսիդավորման դեպքերի):

11. Տնտեսավարողը, որի կանոնադրական կապիտալում 100 մլն դրամ և ավելի գումարի չափով ներդրում է կատարվել 2020 թվականի ընթացքում, օգտվում է հետևյալ հավելյալ բոլոր արտոնություններից՝

1) սույն հավելվածի 5-րդ կետի 2-րդ ենթակետով նախատեսված սուբսիդավորումն իրականացվում է վարկի մինչև 48 ամիս ժամանակահատվածի համար, իսկ արտարժույթով վարկերի դեպքում՝ 24-ամսյա ժամանակահատվածի համար.

2) սույն հավելվածի 5-րդ կետի 4-րդ ենթակետով նախատեսված օժանդակության գործիքի ներքո տրամադրվելիք վարկերի սուբսիդավորվող մասի առավելագույն գումարը սահմանվում է 500 մլն դրամ, իսկ արտարժույթով վարկավորման դեպքում՝ 250 մլն դրամին համարժեք.

3) սույն հավելվածի 8-րդ և 9-րդ կետերով նախատեսված սուբսիդավորման չափերն ավելանում են 1 % չափով (բացառությամբ ամբողջությամբ սուբսիդավորման դեպքերի):

12. Սույն հավելվածի 10-րդ և 11-րդ կետերում նշված կանոնադրական կապիտալի ավելացումները պետք է իրականացված լինեն դրամական միջոցների տեսքով ներդրումների հաշվին: Ընդ որում, սուբսիդավորման ողջ ժամանակահատվածում կանոնադրական կապիտալի նվազեցում չի թույլատրվում:

13. Սույն հավելվածի 12-րդ կետում նշված պայմանի խախտման դեպքում տվյալ տնտեսավարողին տրամադրված վարկը ենթակա է մարման բացահայտումից հետո անհապաղ, իսկ պետության կողմից վճարված սուբսիդավորման գումարները բանկի միջոցով ենթակա են վերադարձման կրկնակիի չափով:

14. Ֆինանսական կազմակերպություններն ինքնուրույն են իրականացնում վարկառուների վարկունակության գնահատումը և վարկերի տրամադրումը, որոնք պետք է համապատասխանեն միջոցառմամբ սահմանված չափանիշներին և նպատակներին։ Վարկերը ֆինանսական կազմակերպությունների կողմից պետք է տրամադրվեն բացառապես անկանխիկ եղանակով: Ընդ որում, շահառուները ստացված վարկային միջոցների հաշվին իրականացվող վճարումները նույնպես պետք է իրականացնեն անկանխիկ եղանակով:

15. Օժանդակության դեպքում վարկի տոկոսադրույքի սուբսիդավորման գումարը Հայաստանի Հանրապետության էկոնոմիկայի նախարարության կողմից փոխանցվում է ֆինանսական կազմակերպության համապատասխան հաշվին՝ ֆինանսական կազմակերպության հայտի հիման վրա: Տոկոսադրույքների սուբսիդավորման գործընթացը կարգավորվում է ֆինանսական կազմակերպությունների և Հայաստանի Հանրապետության էկոնոմիկայի նախարարության միջև կնքվող պայմանագրերով:

16. Միջոցառման շրջանակում տրամադրված օժանդակության գործիքի կիրառման մոնիթորինգն իրականացնում է Հայաստանի Հանրապետության էկոնոմիկայի նախարարությունը՝ եռամսյա կտրվածքով:

17. Սույն միջոցառման շրջանակներում օժանդակություն ստացած տնտեսավարողների ցանկը հրապարակվում է Հայաստանի Հանրապետության էկոնոմիկայի նախարարության պաշտոնական կայքէջում:

(17-րդ կետը լրաց. 08.10.20 N 1658-Լ)

(հավելվածը փոփ. 03.04.20 N 464-Լ, փոփ., լրաց., խմբ. 09.04.20 N 503-Լ, խմբ. 14.04.20 N 554-Լ,  լրաց., փոփ. 22.04.20 N 586-Լ, խմբ. 22.05.20 N 774-Լ, 18.06.20 N 990-Լ, խմբ., լրաց. 08.10.20 N 1658-Լ)

Հայաստանի Հանրապետության վարչապետի աշխատակազմի ղեկավար

Է. Աղաջանյան

 

Հավելված N 2 ՀՀ կառավարության 2020 թվականի մարտի 31-ի N 416-Լ որոշման

ԿՈՐՈՆԱՎԻՐՈՒՍԻ ՏՆՏԵՍԱԿԱՆ ՀԵՏԵՎԱՆՔՆԵՐԻ ՉԵԶՈՔԱՑՄԱՆ ԵՐԿՐՈՐԴ ՄԻՋՈՑԱՌՄԱՆ ՇՐՋԱՆԱԿՈՒՄ ՏՐԱՄԱԴՐՎՈՂ ՕԺԱՆԴԱԿՈՒԹՅԱՆ ԳՈՐԾԻՔՆԵՐԻ ԿԻՐԱՌՄԱՆ ԿԱՐԳ

1. Օժանդակության նպատակն է տնտեսավարողների համար ստեղծել ֆինանսական միջոցների ժամանակավոր հասանելիության հնարավորություն՝ պահանջարկի փոփոխվող պայմաններին արձագանքելու, արտաքին մարտահրավերներին դիմակայելու և ըստ այդմ գործունեությունը շարունակելու կամ վերադասավորվելու ու փոփոխված տնտեսական իրավիճակին հարմարվելու և զարգացման ռազմավարությունները ճշգրտելու գործողություններ իրականացնելու համար։

1.1. Սույն hավելվածի շրջանակում, Միջոցառման N 3 աղյուսակով նախատեսված ֆիզիկական անձանց միկրովարկավորման նպատակով, ֆինանսական գործակալության պայմանագիրը կնքվում է մինչև 2024 թվականի ապրիլի 30-ը ներառյալ ժամկետով՝ հաշվի առնելով, որ նշված վարկերի ժամկետը լինելու է մինչև 2 տարի (24 ամիս), իսկ այդ վարկերի մարումների հաշվին հնարավոր են նաև նոր վարկերի վերաֆինանսավորումներ ևս 2 տարի ժամկետով: Նշված գործակալության պայմանագրի շրջանակում Հայաստանի Հանրապետության կենտրոնական բանկին հատկացվող գումարը կազմելու է 2 մլրդ դրամ, տարեկան 5,7 տոկոսով:

(1.1-ին կետը լրաց. 21.04.20 N 585-Լ)

1.2. Սույն hավելվածի շրջանակում՝ Միջոցառման Աղյուսակ 3-ով նախատեսված՝ ֆիզիկական անձանց միկրովարկավորման նպատակով ֆինանսական գործակալության պայմանագիրը կնքվում է մինչև 2024 թվականի մայիսի 7-ը ներառյալ ժամկետով՝ հաշվի առնելով, որ նշված վարկերի մայր գումարի առնվազն 50 տոկոսը ֆինանսավորվելու է տրամադրող ֆինանսական կազմակերպության միջոցների հաշվին, վարկի ժամկետը լինելու է մինչև 2 տարի (24 ամիս), իսկ այդ վարկերի մարումների հաշվին հնարավոր են նաև նոր վարկերի վերաֆինանսավորումներ ևս 2 տարի ժամկետով: Նշված գործակալության պայմանագրի շրջանակում ՀՀ կենտրոնական բանկին հատկացվող գումարը կազմելու է 2 մլրդ. դրամ՝ տարեկան 2,7 տոկոսով:

(1.2-րդ կետը լրաց. 11.05.20 N 720-Լ)

1.3. Սույն hավելվածի շրջանակում՝ միջոցառման N 3 աղյուսակով նախատեսված՝ ֆիզիկական անձանց միկրովարկավորման նպատակով ֆինանսական գործակալության պայմանագիրը կնքվում է մինչև 2025 թվականի մարտի 31-ը ներառյալ ժամկետով՝ հաշվի առնելով, որ նշված վարկերի մայր գումարի առնվազն 50 տոկոսը ֆինանսավորվելու է տրամադրող ֆինանսական կազմակերպության միջոցների հաշվին, վարկի ժամկետը լինելու է մինչև 2 տարի (24 ամիս), իսկ այդ վարկերի մարումների հաշվին հնարավոր են նաև նոր վարկերի վերաֆինանսավորումներ ևս 2 տարի ժամկետով: Նշված գործակալության պայմանագրի շրջանակում Հայաստանի Հանրապետության կենտրոնական բանկին հատկացվող գումարը կազմելու է 5 մլրդ դրամ՝ տարեկան 2,7 տոկոսով:

(1.3-րդ կետը լրաց. 25.03.21 N 417-Լ)

2. Սույն հավելվածում «տնտեսավարող» եզրույթն օգտագործվում է միջոցառման մեջ կիրառված իմաստով:

(2-րդ կետը փոփ., խմբ. 03.04.20 N 464-Լ, խմբ. 30.04.20 N 644-Լ)

3. Օժանդակությունը տրամադրվում է տնտեսավարողներին՝ ՀՀ տարածքում գործող բանկերից կամ վարկային կազմակերպություններից (այսուհետև՝ Ֆինանսական կազմակերպություն) ստացվող նպատակային վարկերի համաֆինանսավորման ձևով:

 Ընդ որում, Միջոցառմանը մասնակցել կարող են այն վարկային կազմակերպությունները, որոնք ունեն առնվազն 1 մլրդ ՀՀ դրամի չափով ընդհանուր կապիտալ։ Նշված վարկային կազմակերպությունների նկատմամբ պետք է տարածվեն ՀՀ կենտրոնական բանկի խորհրդի 2002 թվականի նոյեմբերի 5-ի թիվ 347 Ն որոշմամբ հաստատված՝ «Վարկային կազմակերպությունների գործունեության կարգավորումը, վարկային կազմակերպությունների գործունեության տնտեսական նորմատիվները» կանոնակարգ 14-ով սահմանված բոլոր տնտեսական նորմատիվները:

4․ Համաֆինանսավորումը վարկի գծով տնտեսավարողի մոտ ապահովման միջոցի ոչ բավարար մակարդակի և արժութային ռիսկի մասնակի չեզոքացման նպատակով ՀՀ կառավարության կողմից Ֆինանսական կազմակերպությանը տրամադրվող անտոկոս փոխառություն է:

 Ընդ որում, համաֆինանսավորում տրվում է այն դեպքում, եթե յուրաքանչյուր գործարքի ֆինանսավորման դեպքում Ֆինանսական կազմակերպությունների միջոցներով ֆինանսավորվող մասի փաստացի տոկոսադրույքը չի գերազանցում ՀՀ դրամով 14%-ը, իսկ արտարժույթով՝ 9%-ը։

5. Համաֆինանսավորվել կարող են այն Ֆինանսական կազմակերպությունների կողմից ներկայացվող վարկերը, որոնք ՀՀ էկոնոմիկայի նախարարության Գյուղական տարածքների տնտեսական զարգացման ԾԻԳ ՊՀ Գյուղական ֆինանսավորման կառույցի (այսուհետ՝ Կառույց) հետ կնքել են Միջոցառմանը մասնակցության վերաբերյալ պայմանագրեր (այսուհետ՝ Պայմանագիր)։

6. Միջոցառման չափանիշներին բավարարող շահառուները վարկավորման/լիզինգի նպատակով դիմում են Կառույցի հետ Պայմանագրեր կնքած Ֆինանսական կազմակերպություններին՝ ներկայացնելով Միջոցառման ներքո օժանդակության կոնկրետ ուղղություններով գումարների օգտագործման մասին տեղեկատվություն՝ համաձայն գյուղատնտեսության ոլորտի աջակցման գործող պետական ծրագրերի պահանջների:

7. Ֆինանսական կազմակերպություններն իրականացնում են վարկառուների վարկունակության գնահատումը և կայացնում են նախնական որոշում՝ Միջոցառման ներքո վարկ/լիզինգ տրամադրելու վերաբերյալ (վարկի նախահաստատում):

8. Սույն աջակցության նպատակով վարկի նախահաստատում չի կարող իրականացվել այն դեպքում, եթե Գյուղատնտեսական կոոպերատիվի փոխկապակցված անդամների փայերի հանրագումարը գերազանցում է փայատիրական կապիտալի 40%-ը։ Սույն կարգի իմաստով անձինք համարվում են փոխկապակցված` «Բաժնետիրական ընկերությունների մասին» ՀՀ օրենքով սահմանված կարգով։

9․ Ֆինանսական կազմակերպությունները վարկի նախահաստատումից հետո, Պայմանագրով սահմանված ընթացակարգով՝ Կառույցին են ներկայացնում համապատասխան հայտ:

10. Կառույցը ստուգում է ներկայացված հայտի համապատասխանությունը Միջոցառման ներքո սահմանված պահանջներին։ Եթե համաֆինանսավորման ընդհանուր գումարը չի գերազանցում 15 մլն դրամը, ապա Կառույցը Ֆինանսական կազմակերպություններին տրամադրում է համապատասխան եզրակացություն:

11․ Միջոցառման ներքո վարկը Ֆինանսական կազմակերպության կողմից տրամադրվում է Կառույցի դրական եզրակացության առկայության դեպքում: Վարկը տրամադրվում է բացառապես անկանխիկ եղանակով:

12. Գյուղատնտեսական կոոպերատիվների համար համաֆինանսավորման նախապայման է համարվում ՀՀ էկոնոմիկայի նախարարության կողմից սահմանված կարգով Գյուղատնտեսական կոոպերատիվի նախագահին տրված համապատասխան հավաստագրի առկայությունը:

13. Վարկը տրամադրելուց հետո՝ Ֆինանսական կազմակերպությունը Պայմանագրով սահմանված ընթացակարգով Կառույցին է ներկայացնում վարկի համաֆինանսավորման հայտ:

14.Կառույցը բավարարված հայտերի գծով դիմում է ՀՀ Էկոնոմիկայի նախարարությանը՝ հայտերով պահանջվող գումարները ստանալու և Ֆինանսական կազմակերպությունների համապատասխան հաշիվներին փոխանցելու նպատակով: Ընդ որում, բավարարված հայտերի և դրանցով հատկացված ընդհանուր ֆինանսավորման մեծության 3 մլրդ ՀՀ դրամը լրանալուց հետո ՀՀ էկոնոմիկայի նախարարությունը համապատասխան գրությամբ տեղեկացնում է ՀՀ ֆինանսների նախարարությանը:

14.1. ՀՀ էկոնոմիկայի նախարարությունը Կառույցի դիմումն ստանալուց հետո մեկ աշխատանքային օրվա ընթացքում կազմում է վճարման հանձնարարական և այն ներկայացնում ՀՀ ֆինանսների նախարարություն՝ հայտերով պահանջվող գումարները Կառույցին փոխանցելու նպատակով։ Վճարման հանձնարարականը ներկայացվելու օրվանից հետո մեկ աշխատանքային օրվա ընթացքում համաֆինանսավորման գումարը փոխանցվում է Կառույցի բանկային հաշվին:

(14.1-ին կետը լրաց. 17.04.20 N 576-Լ)

14.2. Նպատակային վարկերի համաֆինանսավորման գումարը Կառույցին փոխան-ցելու նպատակով ՀՀ էկոնոմիկայի նախարարության կողմից ՀՀ ֆինանսների նախարարություն ներկայացվող վճարման հանձնարարականում նշվում են հետևյալ տվյալները՝

1) Կառույցի անվանումը.

2) Կառույցի ՀՎՀՀ-ն.

3) հաշվի համարը.

4) համաֆինանսավորման գումարի չափը:

(14.2-րդ կետը լրաց. 17.04.20 N 576-Լ)

15. Ֆինանսական կազմակերպության կողմից 15 մլն ՀՀ դրամը չգերազանցող համաֆինանսավորման նպատակով հայտը Կառույցին կարող է ներկայացվել այն դեպքում, եթե շահառուների սեփական ֆինանսական մասնակցությունը պակաս չէ համաֆինանսավորման գումարի 30 տոկոսից:

16. 15 մլն ՀՀ դրամը գերազանցող չափով պետության համաֆինանսավորման վերաբերյալ դրական եզրակացություն տրվում է այդ մասին ՀՀ կառավարության համապատասխան որոշման ընդունմամբ:

17. Ֆինանսական կազմակերպությունների կողմից տրամադրված վարկերի համաֆինանսավորման նպատակով հայտերի ներկայացման, դրանց բավարարման կարգն ու ժամկետները, ինչպես նաև միջոցների նպատակային օգտագործման, պետության նկատմամբ ստանձնած պարտավորությունների կատարման ընթացակարգերը կարգավորվում են Կառույցի և Ֆինանսական կազմակերպությունների միջև կնքվող պայմանագրերով։

18. Միջոցառման ներքո տրամադրված վարկերի մոնիտորինգն իրականացնում է ՀՀ էկոնոմիկայի նախարարությունը:

(հավելվածը փոփ., խմբ. 03.04.20 N 464-Լ, լրաց. 17.04.20 N 576-Լ, 21.04.20 N 585-Լ, խմբ. 30.04.20 N 644-Լ, լրաց. 11.05.20 N 720-Լ, 25.03.21 N 417-Լ)

Հայաստանի Հանրապետության վարչապետի աշխատակազմի ղեկավար

Է. Աղաջանյան

Հավելված N 3 ՀՀ կառավարության 2020 թվականի մարտի 31-ի N 416-Լ որոշման

Կորոնավիրուսի տնտեսական հետևանքների չեզոքացման երրորդ միջոցառման շրջանակում տրամադրվող օժանդակության գործիքների կիրառման կարգ

1. Օժանդակության նպատակն է տնտեսավարողների համար ստեղծել ֆինանսական միջոցների ժամանակավոր հասանելիության հնարավորություն՝ պահանջարկի փոփոխվող պայմաններին արձագանքելու, արտաքին մարտահրավերներին դիմակայելու, ըստ այդմ` գործունեությունը շարունակելու կամ վերադասավորվելու ու փոփոխված տնտեսական իրավիճակին հարմարվելու և զարգացման ռազմավարությունը ճշգրտելու գործողություններ իրականացնելու համար։

2. Սույն կարգի իմաստով տնտեսավարող է համարվում ՀՀ տարածքում ստեղծված իրավաբանական անձը կամ անհատ ձեռնարկատերը:

3. Օժանդակությունը տրամադրվում է տնտեսավարողներին՝ ՀՀ տարածքում գործող բանկերից կամ վարկային կազմակերպություններից (այսուհետև՝ ֆինանսական կազմակերպություն) ստացվող նպատակային արտոնյալ վարկերի տեսքով։

4. Սույն կարգի իմաստով արտոնյալ վարկ է համարվում բանկերի կամ վարկային կազմակերպությունների միջոցով Միջոցառման շրջանակում Շահառուներին տրամադրվող վարկը։

5. Սույն կարգի շրջանակում ֆինանսական գործակալության պայմանագիրը կնքվում է մինչև 2023 թվականի դեկտեմբերի 31-ը ներառյալ ժամկետով՝ հաշվի առնելով, որ Միջոցառման ներքո նախատեսվող վարկերի ժամկետը լինելու է 36 ամիս:

6. ՀՀ Էկոնոմիկայի նախարարությունը և Ներդրումների աջակցման կենտրոնը (այսուհետ` ՆԱԿ)՝ Միջոցառմանը մասնակցելու ցանկություն հայտնած Ֆինանսական կազմակերպությունների հետ կնքում են ֆինանսական գործակալության պահանջներին բավարարող գլխավոր պայմանագիր։

Ընդ որում, Միջոցառմանը մասնակցելու ցանկություն հայտնած վարկային կազմակերպություններն առնվազն պետք է ունենան 1 մլրդ ՀՀ դրամի չափով ընդհանուր կապիտալ։ Նշված վարկային կազմակերպությունների նկատմամբ պետք է տարածվեն ՀՀ կենտրոնական բանկի խորհրդի 2002 թվականի նոյեմբերի 5-ի թիվ 347 Ն որոշմամբ հաստատված՝ «Վարկային կազմակերպությունների գործունեության կարգավորումը, վարկային կազմակերպությունների գործունեության տնտեսական նորմատիվները» կանոնակարգ 14-ով սահմանված բոլոր տնտեսական նորմատիվները:

7. Ֆինանսական գործակալության պայմանագիր կարող է ստորագրվել այն Ֆինանսական կազմակերպությունների հետ, որոնց կողմից Միջոցառման շրջանակում վարկի տարեկան սպասարկման վճարը չի գերազանցի վարկի մայր գումարի 0.3%-ը։ Վարկի սպասարկման վճարը Ֆինանսական կազմակերպությանը վճարում է Ներդրումների աջակցման կենտրոնը։

8. Միջոցառման չափանիշներին բավարարող Շահառուները վարկավորման նպատակով դիմում են ՆԱԿ՝ ներկայացնելով նրանց ընտրության համար ՀՀ էկոնոմիկայի նախարարության կողմից սահմանված տեղեկատվությունը։

9. ՆԱԿ-ը Շահառուների ընտրության նպատակով ստացված տեղեկատվության նախնական համապատասխանության ստուգումն իրականացնում է երկու աշխատանքային օրվա ընթացքում։ Թերությունների կամ մերժման հիմքերի առկայության դեպքում դրանց վերաբերյալ Շահառուին տեղեկացումը կատարվում է էլեկտրոնային եղանակով՝ նույն ժամկետում։

10. Վարկային հայտի ստացման ժամկետ է համարվում ամբողջական տեղեկատվության ստացման ամսաթիվը։

11. Վարկային հայտի ստացումից մեկ աշխատանքային օրվա ընթացքում ՆԱԿ-ը դիմում է ՀՀ պետական եկամուտների կոմիտե (այսուհետ՝ ՊԵԿ)՝ Շահառուի ընտրության համար սահմանված բարվոք հարկային պատմության պահանջների համապատասխանությունը հաստատելու նպատակով։ ՀՀ ՊԵԿ-ը սահմանված պահանջների համապատասխանության հաստատումը կամ հերքումը ՆԱԿ-ին է տրամադրում հարցումը ստանալուց երկու աշխատանքային օրվա ընթացքում։

12. ՊԵԿ-ի կողմից Շահառուի բարվոք հարկային պատմության հերքում ստանալու դեպքում ՆԱԿ-ը որոշում է ընդունում հայտի մերժման վերաբերյալ և այդ մասին մեկ աշխատանքային օրվա ընթացքում էլեկտրոնային կարգով ծանուցում է Շահառուին:

13. Շահառուի բարվոք հարկային պատմության վերաբերյալ ՊԵԿ-ի դրական հաստատումը ստանալու դեպքում ՆԱԿ-ը մեկ աշխատանքային օրվա ընթացքում կայացնում է արտոնյալ վարկավորումը հաստատելու վերաբերյալ որոշում և այդ մասին էլեկտրոնային կարգով ծանուցում Շահառուին՝ տրամադրելով նաև այն Ֆինանսական կազմակերպությունների վերաբերյալ տվյալները, որոնց միջոցով կարող է հաստատվել արտոնյալ վարկի ստացումը։

14. Շահառուն ՆԱԿ-ի արտոնյալ վարկավորման որոշման վերաբերյալ ծանուցումը ստանալուն հաջորդող աշխատանքային օրվա ընթացքում ՆԱԿ է ներկայացնում այն Ֆինանսական կազմակերպության վերաբերյալ տեղեկությունը, որի միջոցով ցանկանում է իրականացնել իր վարկի սպասարկումը։

15. Ֆինանսական կազմակերպության ընտրության վերաբերյալ Շահառուի հաստատումը ստանալուց և նրան առնչվող երաշխավորության պայմանագրերը ստորագրելուց հետո մեկ աշխատանքային օրվա ընթացում ՆԱԿ-ը ՀՀ էկոնոմիկայի նախարարություն և համապատասխան Ֆինանսական կազմակերպություն է ներկայացնում այդ տվյալները։

16. Ֆինանսական կազմակերպությունը տեղեկացումը ստանալուց հետո գործակալության պայմանագրով սահմանված ժամկետում Շահառուի հետ կնքում է վարկավորման պայմանագիր կամ ՆԱԿ-ին և Շահառուին տեղեկացնում է դրանից հրաժարվելու պատճառների վերաբերյալ։

17. ՀՀ էկոնոմիկայի նախարարությունը վարկային պայմանագրի կնքման վերաբերյալ տեղեկատվությունն ստանալուց հետո մեկ աշխատանքային օրվա ընթացքում կազմում է վճարման հանձնարարական և այն ներկայացնում ՀՀ ֆինանսների նախարարություն՝ արտոնյալ վարկի գումարը Ֆինանսական կազմակերպությանը փոխանցելու նպատակով։ Վճարման հանձնարարականը ներկայացվելու օրվանից հետո մեկ աշխատանքային օրվա ընթացքում արտոնյալ վարկի գումարը փոխանցվում է Ֆինանսական կազմակերպության բանկային հաշվին։

(17-րդ կետը խմբ. 17.04.20 N 576-Լ)

17.1. Արտոնյալ վարկի գումարը Ֆինանսական կազմակերպությանը փոխանցելու նպատակով ՀՀ էկոնոմիկայի նախարարության կողմից ՀՀ ֆինանսների նախարարություն ներկայացվող վճարման հանձնարարականում նշվում են հետևյալ տվյալները՝

1) Ֆինանսական կազմակերպության անվանումը.

2) Ֆինանսական կազմակերպության ՀՎՀՀ-ն.

3) հաշվի համարը.

4) վարկի գումարի չափը:

(17.1-ին կետը լրաց. 17.04.20 N 576-Լ)

18. Արտոնյալ Վարկը Շահառուին տրամադրում է բացառապես անկանխիկ եղանակով՝ Միջոցառմամբ սահմանված ծախսային ուղղություններով։

19. Արտոնյալ վարկերի տրամադրման կարգն ու ժամկետները, ինչպես նաև միջոցների նպատակային օգտագործման, կողմերի ստանձնած պարտավորությունների կատարման ընթացակարգերը կարգավորվում են ՀՀ էկոնոմիկայի նախարարության, Ներդրումների աջակցման կենտրոնի և ֆինանսական կազմակերպության միջև եռակողմ պայմանագրով՝ հաշվի առնելով Վարկերի մարման կարգի վերաբերյալ ՀՀ Էկոնոմիկայի նախարարության սահմանած նվազագույն պահանջները։

20. Միջոցառման շրջանակում տրամադրված օժանդակության գործիքների կիրառման մշտադիտարկումն իրականացնում է ՀՀ էկոնոմիկայի նախարարությունը՝ եռամսյա պարբերականությամբ։

(հավելվածը խմբ., լրաց. 17.04.20 N 576-Լ)

Հայաստանի Հանրապետության վարչապետի աշխատակազմի ղեկավար

Է. Աղաջանյան