27.11.2020 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

26 նոյեմբերի 2020 թվականի N 1859-Ա

ՆԵՐԴՐՈՒՄԱՅԻՆ ԾՐԱԳՐԻՆ ՀԱՎԱՆՈՒԹՅՈՒՆ ՏԱԼՈՒ, «ՀԱՅԿ-88» ՍԱՀՄԱՆԱՓԱԿ ՊԱՏԱՍԽԱՆԱՏՎՈՒԹՅԱՄԲ ԸՆԿԵՐՈՒԹՅԱՆԸ ԿԱՌՈՒՑԱՊԱՏՄԱՆ ԻՐԱՎՈՒՆՔՈՎ ՀՈՂԱՄԱՍԵՐ ՏՐԱՄԱԴՐԵԼՈՒՆ ՀԱՄԱՁԱՅՆՈՒԹՅՈՒՆ ՏԱԼՈՒ ՄԱՍԻՆ

Ղեկավարվելով Հողային օրենսգրքի 48.1-ին հոդվածով, 76-րդ հոդվածի 5-րդ մասով, Հայաստանի Հանրապետության կառավարության 2001 թվականի ապրիլի 12-ի N 286 որոշմամբ հաստատված կարգի 46.2-րդ կետի «է» ենթակետով՝ Հայաստանի Հանրապետության կառավարությունը որոշում է.

1. Հավանության տալ «Հայկ-88» սահմանափակ պատասխանատվությամբ ընկերության (այսուհետ՝ ընկերություն) կողմից ներկայացված` Կոմիտասի պողոտայի հ.49/9 և հ.49/10 հասցեներում գտնվող, համապատասխանաբար՝ 2016.0 քմ և 10028.29 քմ մակերեսներով հողամասերում իրականացվող ներդրումային ծրագրին (այսուհետ՝ ծրագիր)` համաձայն N 1 հավելվածի:

2. Համաձայնություն տալ Երևան համայնքի Արաբկիր վարչական շրջանի տարածքում գտնվող՝ Կոմիտասի պողոտայի հ. 49/9 և հ. 49/10 հասցեներում գտնվող, համապատասխանաբար՝ 2016.0 քմ և 10028.29 քմ մակերեսներով հողամասերն ուղղակի ձևով կառուցապատման իրավունքով, ծրագրով նախատեսված՝ շենք-շինությունների կառուցման և պուրակի կազմակերպման նպատակով ընկերությանը տրամադրելուն՝ համաձայն N 2 հավելվածի։

3. Սահմանել, որ սույն որոշման 2-րդ կետում նշված, համապատասխանաբար՝ 2016.0 քմ և 10028.29 քմ մակերեսներով հողամասերը կարող են օգտագործվել բացառապես ծրագրով նախատեսված շենք-շինությունների կառուցման, պուրակի կազմակերպման նպատակով և դրանց նպատակային նշանակություններին համապատասխան:

4. Առաջարկել Երևանի քաղաքապետին՝ ընկերության հետ համատեղ ապահովել սույն որոշման 2-րդ կետում նշված հողամասերի կառուցապատման իրավունքով տրամադրման պայմանագրերի սահմանված կարգով կնքումը՝ պայմանագրում նախատեսելով հետևյալ պայմանները՝

1) հողամասերի ուղղակի ձևով կառուցապատման իրավունքի տրամադրման պայմանագրերի ժամկետը՝ 60 տարի.

2) կառուցապատման իրավունքով տրամադրվող 10028.29 քմ մակերեսով հողամասում ընկերությունը պարտավորվում է իրականացնել պուրակի կազմակերպում՝ ծառերի, թփերի, բույսերի տնկում, կառուցել ամֆիթատրոն, շատրվաններ, մանկական զարգացման և ՏՏ կենտրոն, ինչպես նաև ստորգետնյա ավտոկայանատեղի.

3) ընկերությունը պարտավորվում է պայմանագրի գործողության ամբողջ ընթացքում իրականացնել պուրակի պահպանման, բարեկարգման և խնամելու աշխատանքներ, ապահովել լուսավորությունը.

4) ընկերությունը պարտավորվում է հողամասերի նկատմամբ կառուցապատման իրավունքի պետական գրանցման աշխատանքների ավարտից հետո մեկ ամսվա ընթացքում դիմել Երևանի քաղաքապետարան համապատասխան ճարտարապետաշինարարական առաջադրանքի տրամադրման նպատակով․

5) ընկերությունը պարտավոր է իրականացնել ծրագիրն ամբողջությամբ համապատասխան շինարարության թույլտվություն ստանալուց հետո 48 ամսվա ընթացքում, ծրագիրը չկատարելու (չիրագործելու) դեպքում կառուցապատման պայմանագրերը կարող են լուծարվել, ինչպես նաև ներդրողը պարտավորվում է վճարել տուգանք՝ 100.000.000 (հարյուր միլիոն) դրամի չափով.

6) ծրագրով նախատեսված շինարարական աշխատանքների ավարտից հետո երեք ամսվա ընթացքում դիմել Երևանի քաղաքապետարան՝ Կոմիտասի պողոտան հատող վերնանցում (վերգետնյա հետիոտնային անցում) կառուցելու նպատակով համապատասխան քաղաքաշինական փաստաթղթերի տրամադրման համար.

5. Առաջարկել Երևանի քաղաքապետին՝ Հայաստանի Հանրապետության օրենսդրությամբ սահմանված կարգով ապահովել ծրագրի շրջանակներում համապատասխան քաղաքաշինական փաստաթղթերի փաթեթի տրամադրումը:

6. Ընդունել ի գիտություն, որ պայմանագրի նոտարական վավերացման և դրանից բխող գույքային իրավունքների պետական գրանցման հետ կապված` օրենքով սահմանված համապատասխան վճարներն ու տուրքերը պետք է վճարվեն ընկերության միջոցների հաշվին:

Հայաստանի Հանրապետության վարչապետ

Ն. Փաշինյան

27.11.2020 ՀԱՎԱՍՏՎԱԾ Է ԷԼԵԿՏՐՈՆԱՅԻՆ ՍՏՈՐԱԳՐՈՒԹՅԱՄԲ

Հավելված N 1 ՀՀ կառավարության 2020 թվականի նոյեմբերի 26-ի N 1859-Ա որոշման

«ՀԱՅԿ-88» ՍԱՀՄԱՆԱՓԱԿ ՊԱՏԱՍԽԱՆԱՏՎՈՒԹՅԱՄԲ ԸՆԿԵՐՈՒԹՅԱՆ ԿՈՂՄԻՑ ԻՐԱԿԱՆԱՑՎՈՂ ՆԵՐԴՐՈՒՄԱՅԻՆ ԾՐԱԳԻՐ

Երևանում առկա այգիներն ու պուրակները հիմնականում կառուցվել են խորհրդային տարիներին: Ժամանակի ընթացքում անցնելով փորձությունների միջով՝ դրանք կորցրել են իրենց նախնական տեսքը և շատ դեպքերում վերածվել չորային, ոչ բուսածածկ գոտիների:

Ըստ նախատեսված ծրագրի՝ այստեղ կյանքի կկոչվի նոր նախագիծ, որը ենթադրում է պուրակի կազմակերպում, բազմաֆունկցիոնալ կենտրոնի կառուցում: Նախագծի շրջանակում 10028.29 քմ մակերեսով հողամասում կկազմակերպվի պուրակ, որտեղ նախ խնամվելու, էտվելու և նոր տեսքի են բերվելու գոյություն ունեցող ծառերը, ինչպես նաև նախատեսվում է շուրջ 5 հազար տարատեսակ բույսերի, բուսատեսակների, ծառերի, թփերի տնկում: Կառուցվելու են նաև շատրվան, մանկական զարգացման և ՏՏ կենտրոն, ամֆիթատրոն, որը տրամադրվելու է համերգային, թատերական երիտասարդ խմբերին, որոնք հանդես կգան այգու այցելուների համար:

Ծրագրի հաջորդ կարևոր հատվածը բազմաֆունկցիոնալ կենտրոնի կառուցումն է: Մեկ ծածկի տակ համախմբվելու են բազմաֆունկցիոնալ կենտրոնի բոլոր տիպի սպասարկման հատվածները՝ ապահովելով ժամանակակից միջազգային ստանդարտներին համապատասխան միջավայր, հարմար ժամանցի, սննդի, ցուցահանդեսների, առևտրի, երիտասարդների և երեխաների զարգացման և զվարճանքի համար։ Կառույցի հետնամասում մոտ 60-70 մետր հատված լինելու է ապակեպատ, որտեղից մուտք է բացվելու դեպի այգի: Այնտեղ կլինի փոքր հրապարակ, որը նույնպես նախատեսվում է օգտագործել փառատոնների, միջոցառումների, համերգների համար: Նախատեսված են նաև բազմաֆունկցիոնալ դահլիճներ՝ մարզվելու, պարի, երգի, նկարչության, քանդակագործության, ծրագրավորման դասարանների համար:

Ծրագրով նախատեսվում է.