ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Օ Ր Ե Ն Ք Ը

Ընդունված է 2001 թվականի դեկտեմբերի 14-ին

«ՀԱՍՏԱՏԱԳՐՎԱԾ ՎՃԱՐՆԵՐԻ ՄԱՍԻՆ» ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՕՐԵՆՔՈՒՄ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ

Հոդված 1. «Հաստատագրված վճարների մասին» Հայաստանի Հանրապետության օրենքի 7-րդ հոդվածը լրացնել հետևյալ բովանդակությամբ «ժը» և «ժթ» ենթակետերով`

«ժը) բաղնիքների և ցնցուղարանների կազմակերպումը.

ժթ) ավտոտրանսպորտային միջոցների գազալցման (գազալիցքավորման) գործունեությունը.»:

Հոդված 2. Օրենքի 10-րդ հոդվածը լրացնել հետևյալ բովանդակությամբ 9-րդ կետով`

«9. Սույն հոդվածի դրույթները չեն տարածվում սույն օրենքի 7 հոդվածի «ժէ» ենթակետով նախատեսված գործունեություն իրականացնող վճարողների վրա: Այդ վճարողներն իրենց հաշվառման վայրի հարկային տեսչության մարմին են ներկայացնում ելակետային տվյալի մասին հայտարարություն` Հայաստանի Հանրապետության պետական եկամուտների նախարարության սահմանած ձևով:»:

Հոդված 3. Օրենքի 13-րդ հոդվածում`

ա) 2-րդ կետը լրացնել հետևյալ բովանդակությամբ նոր մասով`

«Սույն օրենքի 7 հոդվածի «ժէ» ենթակետով նախատեսված գործունեության իրականացման դեպքում վճարողները ելակետային տվյալի մասին հայտարարությունը ներկայացնում են իրենց հաշվառման վայրի հարկային տեսչության մարմին յուրաքանչյուր ամսվա համար` մինչև տվյալ ամսվան հաջորդող ամսվա 15-ը ներառյալ:».

բ) 3-5-րդ կետերում «25» թիվը փոխարինել «15» թվով.

գ) ավելացնել հետևյալ բովանդակությամբ 6-րդ կետ`

«6. Սույն օրենքի 28 հոդվածի 2-րդ մասով նախատեսված տեղեկությունները, յուրաքանչյուր ամսվա արդյունքներով, վճարողները ներկայացնում են մինչև հաջորդ ամսվա 15-ը ներառյալ:»:

Հոդված 4. Օրենքի 19-րդ հոդվածի 1-ին կետում «25» թիվը փոխարինել «15» թվով:

Հոդված 5. Օրենքի 20-րդ հոդվածում «, «գ» » տառակապակցությունը փոխարինել «(բացառությամբ Երևան քաղաքում առևտրի իրականացման վայրերից դուրս գտնվող` 7 քառակուսի մետր, այլ վայրերում առևտրի իրականացման վայրերից դուրս գտնվող` 10 քառակուսի մետր առևտրական տարածքը չգերազանցող կրպակների միջոցով իրականացվող առևտրական գործունեության, և բնակելի տարածքից անմիջական վաճառքի)» բառերով:

Հոդված 6. Օրենքի 25-րդ հոդվածում`

ա) 2-րդ կետի «առևտրական գործունեությունից ստացված հասույթի նկատմամբ» բառերը փոխարինել «առևտրական գործունեություն իրականացնելու համար» բառերով.

բ) ուժը կորցրած ճանաչել 4-րդ կետը:

Հոդված 7. Օրենքի 28-րդ հոդվածում`

ա) վերնագիրը «տրամադրումը» բառից հետո լրացնել «և տեղեկությունների ներկայացումը» բառերով.

բ) ավելացնել հետևյալ բովանդակությամբ երկրորդ մաս`

«Վճարողները հարկային տեսչության մարմիններ են ներկայացնում Հայաստանի Հանրապետության կառավարության կողմից սահմանված տեղեկություններ` առևտրի իրականացման վայրում առևտրական գործունեություն իրականացնողների վերաբերյալ:»:

Հոդված 8. Օրենքի 34-րդ հոդվածը շարադրել հետևյալ խմբագրությամբ`

«Հոդված 34. Հանրային սննդի ոլորտում գործունեություն իրականացնելու համար հաստատագրված վճարների չափը

Հաստատագրված վճարի ամսական չափը հաշվարկվում է ելակետային տվյալի և ուղղիչ գործակցի (գործակիցների) արտադրյալի 2000-ապատիկի չափով` դրամական արտահայտությամբ:»:

Հոդված 9. Օրենքի 35-րդ հոդվածի 1-ին կետը շարադրել հետևյալ խմբագրությամբ`

«1. Հաստատագրված վճարի հաշվարկման համար ելակետային տվյալ է համարվում հանրային սննդի գործունեության իրականացման վայրի զբաղեցրած սպասարկման սրահի մակերեսը` քառակուսի մետրերով:»:

Հոդված 10. Օրենքի 36-րդ հոդվածում`

- «բ» ենթակետը շարադրել հետևյալ խմբագրությամբ`

«բ) բար-վարիետեների, բեմական ցուցադրումներ ունեցող հանրային սննդի այլ վայրերի (օբյեկտների), ինչպես նաև գիշերային ժամերին (24⁰⁰-ից մինչև 6⁰⁰-ը) աշխատող բարերի համար լրացուցիչ` 2.0.»,

- «դ» ենթակետում «1.2» թիվը փոխարինել «1.5» թվով,

- ավելացնել հետևյալ բովանդակությամբ «ե» և «զ» ենթակետեր`

«ե) հանրային սննդի գործունեության իրականացման վայրի (օբյեկտի) զբաղեցրած սպասարկման սրահի (սրահների) մակերեսը 50 քառակուսի մետրը չգերազանցելու դեպքում` լրացուցիչ` 0.75,

զ) Սյունիքի, Վայոց ձորի, Շիրակի, Լոռու, Տավուշի մարզերում գտնվող հանրային սննդի գործունեության իրականացման վայրերի (օբյեկտների) համար լրացուցիչ` 0.7.»:

Հոդված 11. Օրենքը 4-րդ գլխից հետո լրացնել հետևյալ բովանդակությամբ 4¹-րդ գլխով`

«ԳԼՈՒԽ  4¹. ԲԱՂՆԻՔՆԵՐԻ ԵՎ ՑՆՑՈՒՂԱՐԱՆՆԵՐԻ ԿԱԶՄԱԿԵՐՊՄԱՆ ՈԼՈՐՏՈՒՄ ԻՐԱԿԱՆԱՑՎՈՂ ԳՈՐԾՈՒՆԵՈՒԹՅԱՆ ՀԱՄԱՐ ՀԱՍՏԱՏԱԳՐՎԱԾ ՎՃԱՐՆԵՐԸ

Հոդված 36¹. Բաղնիքների և ցնցուղարանների կազմակերպման ոլորտում գործունեություն իրականացնելու համար հաստատագրված վճարների հաշվարկման համար օգտագործվող հասկացությունները

Սույն օրենքի իմաստով` բաղնիքների և ցնցուղարանների կազմակերպում հասկացությունն իր մեջ ներառում է մասնավորապես ցնցուղարանների, սաունաների, բաղնիքների և շոգեբաղնիքների կազմակերպումը:

Հոդված 36². Բաղնիքների և ցնցուղարանների կազմակերպման ոլորտում գործունեություն իրականացնելու համար հաստատագրված վճարներ վճարողները

Վճարողներ են համարվում բաղնիքների և ցնցուղարանների կազմակերպման ոլորտում գործունեություն իրականացնող իրավաբանական և ֆիզիկական անձինք` վճարովի ծառայությունների մատուցման մասով:

Հոդված 36³. Բաղնիքների և ցնցուղարանների կազմակերպման ոլորտում գործունեություն իրականացնելու համար հաստատագրված վճարների չափը

Հաստատագրված վճարը հաշվարկվում է յուրաքանչյուր ամսվա համար` ելակետային տվյալի և ուղղիչ գործակցի արտադրյալի 2000-ապատիկի չափով` դրամական արտահայտությամբ:

Հոդված 36⁴. Բաղնիքների և ցնցուղարանների կազմակերպման ոլորտում գործունեություն իրականացնելու համար հաստատագրված վճարների հաշվարկման ելակետային տվյալը

Հաստատագրված վճարի հաշվարկման համար ելակետային տվյալ է համարվում բաղնիքների և ցնցուղարանների գործունեության կազմակերպման շենք-շինությունների ընդհանուր մակերեսը` քառակուսի մետրերով:

Հոդված 36⁵. Բաղնիքների և ցնցուղարանների կազմակերպման ոլորտում գործունեություն իրականացնելու համար հաստատագրված վճարի հաշվարկման ուղղիչ գործակիցը

Հաստատագրված վճարի հաշվարկման համար ուղղիչ գործակիցներն են`

ա) սաունաների և (կամ) շոգեբաղնիքների համար` 1.

բ) սաունաներում և (կամ) շոգեբաղնիքներում չընդգրկված բաղնիքների և (կամ) ցնցուղարանների համար` 0.5:»:

Հոդված 12. Օրենքի 38-րդ հոդվածի 1-ին կետից հանել «սահմանված կարգով լիցենզավորման ենթակա» բառերը:

Հոդված 13. Օրենքի 39-րդ հոդվածում`

ա) 1-ին կետը շարադրել հետևյալ խմբագրությամբ`

«1. Հաստատագրված վճարի ամսական չափը հաշվարկվում է ելակետային տվյալի և համապատասխան ուղղիչ գործակցի (գործակիցների) արտադրյալի 2000-ապատիկի չափով` դրամական արտահայտությամբ:».

բ) 2-րդ կետում «տվյալներ» և «տվյալները» բառերը փոխարինել համապատասխանաբար` «տվյալ» և «տվյալը» բառերով:

Հոդված 14. Օրենքի 40-րդ հոդվածը շարադրել հետևյալ խմբագրությամբ`

«Հոդված 40. Ավտոտրանսպորտային գործունեություն իրականացնելու համար հաստատագրված վճարի հաշվարկման ելակետային տվյալը

Ավտոտրանսպորտային գործունեության միջոցի հետ կապված հաստատագրված վճարի հաշվարկման ելակետային տվյալ է համարվում`

- թեթև մարդատար ավտոմեքենաներով ուղևորներ փոխադրելու նպատակով գործունեություն իրականացնելու համար` 1.0,

- բեռնատար ավտոմեքենաներով գործունեություն իրականացնելու համար` ավտոմեքենայի բեռնատարողությունը` արտահայտված տոննաներով,

- ավտոբուսներով գործունեություն իրականացնելու համար` նստատեղերի քանակը:»:

Հոդված 15. Օրենքը 9-րդ գլխից հետո լրացնել հետևյալ բովանդակությամբ 9¹-րդ գլխով`

«ԳԼՈՒԽ 9¹. ԱՎՏՈՏՐԱՆՍՊՈՐՏԱՅԻՆ ՄԻՋՈՑՆԵՐԻ ԳԱԶԱԼՑՄԱՆ (ԳԱԶԱԼԻՑՔԱՎՈՐՄԱՆ) ԳՈՐԾՈՒՆԵՈՒԹՅԱՆ ՀԱՄԱՐ ՀԱՍՏԱՏԱԳՐՎԱԾ ՎՃԱՐՆԵՐԸ

Հոդված 59¹. Ավտոտրանսպորտային միջոցների գազալցման կայան (կետ) հասկացությունը

Սույն օրենքի իմաստով գազալցման կայան (կետ) է համարվում ավտոտրանսպորտային միջոցների գազալցման (գազալիցքավորման) համար հարմարեցված սարքավորումների ամբողջությունը:

Հոդված 59². Ավտոտրանսպորտային միջոցների գազալցման (գազալիցքավորման) գործունեության համար հաստատագրված վճար վճարողները

Վճարողներ են համարվում գազալցման կայանների (կետերի) միջոցով ավտոտրանսպորտային միջոցների գազալցման (գազալիցքավորման) գործունեություն իրականացնողները:

Հոդված 59³. Ավտոտրանսպորտային միջոցների գազալցման (գազալիցքավորման) գործունեության համար հաստատագրված վճարի չափը

Ավտոտրանսպորտային միջոցների գազալցման (գազալիցքավորման) գործունեության հաստատագրված վճարի ամսական չափը հաշվարկվում է ելակետային տվյալի և ուղղիչ գործակցի արտադրյալի 500,000-ապատիկի չափով` դրամական արտահայտությամբ:

Հոդված 59⁴. Ավտոտրանսպորտային միջոցների գազալցման (գազալիցքավորման) գործունեության համար հաստատագրված վճարի հաշվարկման ելակետային տվյալը

Ավտոտրանսպորտային միջոցների գազալցման (գազալիցքավորման) գործունեության հաստատագրված վճարի հաշվարկման ելակետային տվյալ է համարվում գազալցման կայանում (կետում) տեղակայված գազալցման (գազալիցքավորման) խողովակների քանակը:

Հոդված 59⁵. Ավտոտրանսպորտային միջոցների գազալցման (գազալիցքավորման) գործունեության համար հաստատագրված վճարի հաշվարկման ուղղիչ գործակիցները

Գազալցման կայանի (կետի) գտնվելու վայրի հետ կապված հաստատագրված վճարի հաշվարկման համար ուղղիչ գործակիցներն են`

- Երևան քաղաքի վարչական սահմանում և դրանից դուրս` ուղիղ գծով 25 կիլոմետր հեռավորության վրա գտնվող գազալցման կայանի (կետի) համար` 1.0,

- այլ վայրերում գտնվող գազալցման կայանի (կետի) համար` 0.8:»:

Հոդված 16. Օրենքի 85-րդ հոդվածի «բ» ենթակետը «ավտոմատների» բառից առաջ լրացնել «տեղադրված (առկա)» բառերով:

Հոդված 17. Օրենքի 94-րդ հոդվածի 1-ին կետի «բ» ենթակետը «(վերսկսելը)» բառից հետո լրացնել «, ինչպես նաև վիճակախաղ կազմակերպողների համար» բառերը:

Հոդված 18. Օրենքը 94-րդ հոդվածից հետո լրացնել հետևյալ բովանդակությամբ 94¹-րդ հոդվածով`

«Հոդված 94¹. Պատասխանատվությունը տեղեկություններ չտրամադրելու համար

Վճարողի կողմից օրենքի 28 հոդվածի համաձայն ներկայացվող տեղեկություններում առևտրի իրականացման վայրում յուրաքանչյուր առևտրական գործունեություն իրականացնողի վերաբերյալ տեղեկություն չներառելու կամ կեղծ տեղեկություն ներառելու դեպքում վճարողը վճարում է տուգանք` 100.000 դրամի չափով:»:

Հոդված 19. Օրենքի 98-րդ հոդվածը «7 հոդվածի» բառերից հետո լրացնել « «գ», «դ», » ենթակետերի թվարկմամբ, իսկ «և «ժզ»» բառերը փոխարինել «, «ժզ», «ժը» և «ժթ»» ենթակետերի թվարկմամբ:

Հոդված 20. Սույն օրենքն ուժի մեջ է մտնում 2002 թվականի հունվարի 1-ից:

Սույն օրենքն ուժի մեջ մտնելու պահից հետո` քսան օրվա ընթացքում, օրենքի 7-րդ հոդվածի «ա», «գ», «դ», «ժդ», «ժը», «ժթ» ենթակետերով նախատեսված գործունեություն իրականացնող վճարողները պարտավոր են իրենց հաշվառման վայրի հարկային տեսչության մարմին ներկայացնել հայտարարություն` ելակետային տվյալների և ուղղիչ գործակիցների վերաբերյալ:

Հայաստանի Հանրապետության Նախագահ	Ռ. Քոչարյան
Երևան 27 դեկտեմբերի 2001 թ. ՀՕ-277