ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
Օ Ր Ե Ն Ք Ը
Ընդունված է 2000 թվականի հոկտեմբերի 11-ին
ԱՂԵՏԻ ԳՈՏՈՒ ՎԵՐԱԿԱՆԳՆՄԱՆ ՄԱՍԻՆ
|
Հոդված 1. |
ՕՐԵՆՔԻ ՆՊԱՏԱԿԸ |
Սույն օրենքը սահմանում է Աղետի գոտու վերականգնման պետական քաղաքականության մշակման հիմնական սկզբունքները, այդ քաղաքականության իրականացման ծրագրային հիմունքները և կարգավորում է դրանց հետ կապված հարաբերությունները:
|
Հոդված 2. |
ԱՂԵՏԻ ԳՈՏՈՒ ՀԱՍԿԱՑՈՒԹՅՈՒՆԸ |
Սույն օրենքի իմաստով Աղետի գոտի են համարվում Հայաստանի Հանրապետության այն տարածքները, որոնցում տեղաբաշխված բնակելի, արտադրական, սոցիալական, պատմամշակութային, կոմունալ և այլ նշանակության օբյեկտներն ու ենթակառուցվածքները տուժել են 1988 թվականի դեկտեմբերի 7-ի երկրաշարժի հետևանքով:
|
Հոդված 3. |
ԱՂԵՏԻ ԳՈՏՈՒ ՎԵՐԱԿԱՆԳՆՄԱՆ ՄԱՍԻՆ ԻՐԱՎԱԿԱՆ ԱԿՏԵՐԸ |
Աղետի գոտու վերականգնման գործընթացը և դրա հետ կապված հարաբերությունները կանոնակարգվում են սույն օրենքով և իրավական այլ ակտերով:
|
Հոդված 4. |
ԱՂԵՏԻ ԳՈՏՈՒ ՎԵՐԱԿԱՆԳՆՄԱՆ ՊԵՏԱԿԱՆ ՔԱՂԱՔԱԿԱՆՈՒԹՅԱՆ ԾՐԱԳՐԱՅԻՆ ՀԻՄՈՒՆՔՆԵՐԸ |
1. Աղետի գոտու վերականգնողական աշխատանքներն իրականացվում են Աղետի գոտու վերականգնման համալիր ծրագրով (այսուհետ` Համալիր ծրագիր) սահմանված ժամկետներում և կարգով:
2. Համալիր ծրագիրը կառավարության ներկայացմամբ հաստատում է Ազգային ժողովը` համապատասխան օրենքի ընդունմամբ:
3. Համալիր ծրագրով նախատեսված աշխատանքների իրականացման տարեկան համամասնությունները սահմանվում են կառավարության կողմից և արտացոլվում Աղետի գոտու վերականգնման տարեկան ծրագրերում (այսուհետ` Տարեկան ծրագիր):
Տարեկան ծրագիրը մշակվում է կառավարության կողմից:
4. Տարեկան ծրագրի կատարման համար անհրաժեշտ ֆինանսավորման գումարն առանձին տողով արտացոլվում է համապատասխան տարվա պետական բյուջեի ծախսերում` որպես պաշտպանված հոդված:
|
Հոդված 5. |
ՀԱՄԱԼԻՐ և ՏԱՐԵԿԱՆ ԾՐԱԳՐԵՐԻ ԲՈՎԱՆԴԱԿՈՒԹՅՈՒՆԸ և ԴՐԱՆՑ ՄՇԱԿՄԱՆ ՍԿԶԲՈՒՆՔՆԵՐԸ |
1. Համալիր և Տարեկան ծրագրերը ներառում են`
ա) հիմնական խնդիրները.
բ) նախատեսված վերականգնողական աշխատանքների ծավալները և իրականացման ժամանակացույցը` ըստ մարզերի և բնակավայրերի.
գ) Աղետի գոտու բնակավայրերի կառուցապատման հատակագծային փաստաթղթերի համալրում և ճշգրտում` թաղամասերի համալիր սպասարկման ենթակառուցվածքների և բարեկարգման միջոցառումների ներառմամբ.
դ) վերականգնողական աշխատանքների ծավալները` ըստ վերականգնման ենթակա օբյեկտների նշանակության.
ե) վերականգնողական աշխատանքների ֆինանսավորման սկզբունքները.
զ) վերականգնողական աշխատանքների ֆինանսավորման ծավալները` ըստ դրանց ստացման աղբյուրների.
է) ծրագրերի կատարման սկզբունքները և նախատեսված աշխատանքների իրականացման առաջնայնությունները.
ը) այլ պայմաններ, որոնք անհրաժեշտ են ծրագրերի համակողմանի ներկայացման համար:
2. Սույն հոդվածի 1-ին կետով սահմանվածից բացի, Համալիր ծրագիրը ներառում է նաև`
ա) տեղեկանք` Աղետի գոտում 1989 թվականից իրականացված վերականգնողական աշխատանքների, երկրաշարժի հետևանքով անօթևան մնացած և բնակարանային հերթում գտնվող ընտանիքների քանակի, ինչպես նաև կրթության, առողջապահության, մշակութային, կոմունալ տնտեսության, արդյունաբերական և այլ ոլորտներում առկա վիճակի վերաբերյալ.
բ) վերականգնողական աշխատանքները համակարգող լիազորված պետական մարմնի գործառույթները, իրավունքներն ու պարտականությունները.
գ) վերականգնողական աշխատանքների իրականացման նպատակով կապալառու կազմակերպությունների ընտրության կարգը.
դ) բնակչությանը և տնտեսվարող սուբյեկտներին տրամադրվող արտոնությունները.
ե) վերականգնողական աշխատանքների ֆինանսավորման վճարահաշվարկային սպասարկման կարգը.
զ) վերականգնողական աշխատանքների և դրանց ֆինանսավորման գործընթացի վերահսկողության կարգը:
3. Տարեկան ծրագիրը ներառում է վերականգնողական աշխատանքների ընթացքի և սպասվելիք կատարողականի վերլուծությունը:
4. Համալիր և Տարեկան ծրագրերը մշակվում են այդ ծրագրերի համապատասխանության ապահովման, անկախ բյուջետային տարվա ընթացքում պետական բյուջեի եկամուտների հավաքագրման մակարդակից` ծրագրերով սահմանված վերականգնողական աշխատանքների պարտադիր ֆինանսավորման, վերականգնողական աշխատանքների և դրանց ֆինանսական ապահովման հաշվեկշռվածության, Համալիր և Տարեկան ծրագրերի համադրելիության և հաշվետվության սկզբունքների պահպանմամբ:
|
Հոդված 6. |
ՀԱՄԱԼԻՐ և ՏԱՐԵԿԱՆ ԾՐԱԳՐԵՐԻ ՀԱՍՏԱՏՈՒՄԸ |
1. Տարեկան ծրագրի նախագիծը կառավարության կողմից Ազգային ժողովի քննարկմանն է ներկայացվում մինչև 2000 թվականի նոյեմբերի 15-ը:
2. Տարեկան ծրագիրն ընդգրկվում է յուրաքանչյուր տարվա պետական բյուջեի նախագծում:
3. Համալիր ծրագիրը կառավարությունը սույն օրենքն ուժի մեջ մտնելուց հետո եռամսյա ժամկետում ներկայացնում է Ազգային ժողովի հաստատմանը:
|
Հոդված 7. |
ՏԱՐԵԿԱՆ ԾՐԱԳՐԻ և ԴՐԱ ԿԱՏԱՐՄԱՆ ՄԱՍԻՆ ՀԱՇՎԵՏՎՈՒԹՅԱՆ ՔՆՆԱՐԿՄԱՆ և ՀԱՍՏԱՏՄԱՆ ԿԱՐԳԸ |
1. Տարեկան ծրագիրն Ազգային ժողովի կողմից քննարկվում և հաստատվում է հերթական տարվա պետական բյուջեի մասին օրենքի նախագծի հետ միասին` որպես պետական բյուջեի բացատրագրի բաղկացուցիչ մաս:
2. Տարեկան ծրագրի կատարման մասին կառավարությունը ներկայացնում է ամենամյա հաշվետվություն:
3. Տարեկան ծրագրի կատարման մասին հաշվետվությունը հանդիսանում է հերթական տարվա պետական բյուջեի կատարման մասին հաշվետվության բաղկացուցիչ մասը:
4. Տարեկան ծրագրի կատարման մասին հաշվետվությունը ներառում է սույն օրենքի 5 հոդվածի 1-ին կետով սահմանված դրույթների շուրջ վերլուծականներ և Տարեկան ծրագրի կատարման գնահատականը:
5. Տարեկան ծրագրի կատարման արդյունքներով վերականգնողական աշխատանքների թերակատարված ծավալները ներառվում են հաջորդ տարվա Տարեկան ծրագրում, բայց ոչ ուշ, քան Համալիր ծրագրով նախատեսված վերջին ժամկետը:
6. Տարեկան ծրագրի կատարման ընթացքի վերահսկողության նպատակով Ազգային ժողովում կազմակերպվում են խորհրդարանական լսումներ` ոչ պակաս, քան տարեկան երկու անգամ:
|
Հոդված 8. |
ԱՆՑՈՒՄԱՅԻՆ ԴՐՈՒՅԹ |
Տարեկան ծրագիրն ընդգրկում է նաև 1997 թվականի հուլիսի 17-ի Նոյեմբերյանի երկրաշարժի հետևանքների վերացման շինարարական-վերականգնողական աշխատանքները:
|
Հոդված 9. |
ՕՐԵՆՔԻ ՈՒԺԻ ՄԵՋ ՄՏՆԵԼԸ |
Սույն օրենքն ուժի մեջ է մտնում պաշտոնական հրապարակման պահից:
|
Հայաստանի Հանրապետության |
Ռ. Քոչարյան |
|
|