ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

Օ Ր Ե Ն Ք Ը

Օրինագիծն ընդունված է ՀՀ Գերագույն խորհրդի

կողմից «29» մարտի 1994թ. Հ.Ն-1029-I

ՄԱՐՏԱԿԱՆ ԽԱՉ ՇՔԱՆՇԱՆԻ ՄԱՍԻՆ

ՀՈԴՎԱԾ 1. Մարտական խաչ շքանշանը շնորհվում է հայրենիքի պաշտպանության ու անվտանգության ապահովման գործում ցուցաբերած բացառիկ արիության, անձնուրացության ու հմտության համար:

ՀՈԴՎԱԾ 2. Մարտական խաչ շքանշանն ունի երկու աստիճան`

1-ին աստիճանի Մարտական խաչ շքանշան,

2-րդ աստիճանի Մարտական խաչ շքանշան:

Մարտական խաչ շքանշանի բարձրագույն աստիճանը 1-ին աստիճանն է:

ՀՈԴՎԱԾ 3. 1-ին աստիճանի Մարտական խաչ շքանշանով պարգևատրվում են`

ա) Հայաստանի Հանրապետության զինված ուժերի և այլ զորատեսակների զինծառայողները` հայրենիքի պաշտպանության գործում ցուցաբերած բացառիկ խիզախության և անձնական արիության համար, ինչպես նաև այլ անձինք` պաշտպանության գործին բերած նշանակալի նպաստի համար.

 բ) Հայաստանի Հանրապետության զինված ուժերի և այլ զորատեսակների ավագ հրամանատարները` մարտական գործողությունների ընթացքում ձեռք բերված նշանակալի հաջողությունների համար:

ՀՈԴՎԱԾ 4. 2-րդ աստիճանի Մարտական խաչ շքանշանով պարգևատրվում են`

ա) Հայաստանի Հանրապետության զինված ուժերի և այլ զորատեսակների զինծառայողները և ավագ հրամանատարները` մարտական առաջադրանքների հմուտ կատարման համար, ինչպես նաև այլ անձինք` դրանց կատարմանը բերած նշանակալի նպաստի համար.

բ) Հայաստանի Հանրապետության ներքին գործերի նախարարության, ազգային անվտանգության պետական վարչության, մաքսային մարմինների աշխատակիցները, ինչպես նաև այլ անձինք` հասարակական կարգի պահպանության գործում ցուցաբերած անձնական արիության համար:

ՀՈԴՎԱԾ 5. 1-ին աստիճանի Մարտական խաչ շքանշանով և 2-րդ աստիճանի Մարտական խաչ շքանշանով պարգևատրելու միջնորդությունը հարուցվում է Հայաստանի Հանրապետության պաշտպանության և ներքին գործերի նախարարությունների, ազգային անվտանգության և արտակարգ իրավիճակների պետական վարչությունների և մաքսային վարչության կողմից:

ՀՈԴՎԱԾ 6. Մարտական խաչ շքանշանը կրում են կրծքի ձախ կողմում` Հայրենիքի շքանշանից հետո:

Հայաստանի Հանրապետության Նախագահ	Լ. Տեր-Պետրոսյան
Երևան 22 ապրիլի 1994 թ. ՀՕ-97