ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ

Ո Ր Ո Շ ՈՒ Մ

29 հունվարի 2015 թվականի N 58-Ա

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ՅՈՒՆԵՍԿՕ-Ի ԱԶԳԱՅԻՆ ՀԱՆՁՆԱԺՈՂՈՎ ՍՏԵՂԾԵԼՈՒ ԵՎ ՀԱՆՁՆԱԺՈՂՈՎԻ ԿԱՆՈՆԱԴՐՈՒԹՅՈՒՆՆ ՈՒ ԿԱԶՄԸ ՀԱՍՏԱՏԵԼՈՒ ՄԱՍԻՆ

 Ղեկավարվելով «Հայաստանի Հանրապետության միջազգային պայմանագրերի մասին» Հայաստանի Հանրապետության օրենքի 51-րդ հոդվածով, հիմք ընդունելով Միավորված ազգերի կազմակերպության կրթության, գիտության և մշակույթի կազմակերպությանը (ՅՈՒՆԵՍԿՕ) Հայաստանի Հանրապետության անդամակցությունը` միջազգային պարտավորությունների արդյունավետ կատարումն ապահովելու նպատակով՝

1. Ստեղծել Հայաստանի Հանրապետությունում ՅՈՒՆԵՍԿՕ-ի ազգային հանձնաժողով:

2. Հաստատել`

1) Հայաստանի Հանրապետությունում ՅՈՒՆԵՍԿՕ-ի ազգային հանձնաժողովի կանոնադրությունը՝ համաձայն N 1 հավելվածի.

2) Հայաստանի Հանրապետությունում ՅՈՒՆԵՍԿՕ-ի ազգային հանձնաժողովի կազմը` համաձայն N 2 հավելվածի:

Հայաստանի Հանրապետության վարչապետ	Հ. Աբրահամյան
2015 թ. հունվարի 29 Երևան

Հավելված N 1 ՀՀ վարչապետի 2015 թ. հունվարի 29-ի N 58-Ա որոշման

Կ Ա Ն Ո Ն Ա Դ Ր ՈՒ Թ Յ ՈՒ Ն

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ՅՈՒՆԵՍԿՕ-Ի ԱԶԳԱՅԻՆ ՀԱՆՁՆԱԺՈՂՈՎԻ

I. ԸՆԴՀԱՆՈՒՐ ԴՐՈՒՅԹՆԵՐ

1. Հայաստանի Հանրապետությունում ՅՈՒՆԵՍԿՕ-ի ազգային հանձնաժողովը (այսուհետ` հանձնաժողով) միջգերատեսչական խորհրդակցական մարմին է, որի գործունեության հիմնական նպատակը Միավորված ազգերի կրթության, գիտության և մշակույթի կազմակերպության հետ (այսուհետ` ՅՈՒՆԵՍԿՕ) կրթության, գիտության, մշակույթի, հաղորդակցության ու տեղեկատվության ոլորտներում Հայաստանի Հանրապետութան պետական մարմինների, հաստատությունների և հասարակական կազմակերպությունների համագործակցության համակարգումն ու ապահովումն է:

2. Հանձնաժողովն իր գործունեության ընթացքում ղեկավարվում է Հայաստանի Հանրապետության Սահմանադրությամբ, Հայաստանի Հանրապետության օրենսդրությամբ, սույն կանոնադրությամբ, ՅՈՒՆԵՍԿՕ-ի սահմանադրությամբ (կանոնադրությամբ), ինչպես նաև ՅՈՒՆԵՍԿՕ-ի համապատասխան իրավական ակտերով:

II. ՀԱՆՁՆԱԺՈՂՈՎԻ ՀԻՄՆԱԿԱՆ ԽՆԴԻՐՆԵՐԸ

3. Հանձնաժողովի հիմնական խնդիրներն են`

1) ՅՈՒՆԵՍԿՕ-ի հետ Հայաստանի Հանրապետության համագործակցության առաջնային ուղղությունների սահմանումը, նշված համագործակցության Հայաստանի երկամյա ծրագրերի մշակումն ու հաստատումը.

2) Հայաստանի Հանրապետության կառավարության առջև որպես ՅՈՒՆԵՍԿՕ-ի հարցերով խորհրդատու հանդես գալը` ուղղորդելով և կողմնորոշելով Հայաստանի Հանրապետության պետական մարմինների գործունեությունը ՅՈՒՆԵՍԿՕ-ի շրջանակներում.

3) ՅՈՒՆԵՍԿՕ-ի շրջանակներում ընդունված համապատասխան իրավական ակտերի կիրարկումը և տեղայնացումը Հայաստանի Հանրապետությունում ապահովելու վերաբերյալ առաջարկություններ ներկայացնելը.

4) քաղաքացիական հասարակության և ՅՈՒՆԵՍԿՕ-ի միջև համագործակցության ամրապնդմանը նպաստելը:

III. ՀԱՆՁՆԱԺՈՂՈՎԻ ԳՈՐԾԱՌՈՒՅԹՆԵՐԸ

4. Հանձնաժողովն իր առջև դրված խնդիրների լուծման համար`

1) հանդես է գալիս Հայաստանի Հանրապետությունում որպես ՅՈՒՆԵՍԿՕ-ի հիմնական գործընկեր` ապահովելով կապն ու համագործակցությունը Հայաստանի Հանրապետության և ՅՈՒՆԵՍԿՕ-ի միջև.

2) Հայաստանի Հանրապետության կառավարություն է ներկայացնում առաջարկություններ ՅՈՒՆԵՍԿՕ-ի ծրագրերի շրջանակներում միջազգային համագործակցության հնարավոր ուղղությունների վերաբերյալ.

3) ապահովում է Հայաստանի Հանրապետության մասնակցությունը ՅՈՒՆԵՍԿՕ-ի ծրագրերին ու նախաձեռնություններին, որոնք ուղղված են կրթության, գիտության, մշակույթի, հաղորդակցության և տեղեկատվության զարգացմանը.

4) հասարակայնության լայն շրջանակներին ներկայացնում և պարզաբանում է ՅՈՒՆԵՍԿՕ-ի նպատակներն ու խնդիրները՝ ՅՈՒՆԵՍԿՕ-ի և իր գործունեության մասին համապատասխան տեղեկատվություն տարածելու միջոցով.

5) խթանում է կապն ու համագործակցությունը կրթության, գիտության, մշակույթի, հեռահաղորդակցության և տեղեկատվական տեխնոլոգիաների բնագավառներում գործող պետական ու հասարակական կազմակերպությունների, ուսումնական հաստատությունների և անհատների միջև՝ վերջիններիս ներգրավելով ՅՈՒՆԵՍԿՕ-ի գործունեության մեջ.

6) կապեր է հաստատում և համագործակցություն ծավալում այլ պետությունների` ՅՈՒՆԵՍԿՕ-ի գործերով ազգային հանձնաժողովների հետ՝ համատեղ իրականացնելով Հայաստանի Հանրապետության համար հետաքրքրություն ներկայացնող ծրագրեր և միջոցառումներ.

7) անհրաժեշտության դեպքում Հայաստանի Հանրապետության պետական մարմիններին և հաստատություններին տրամադրում է իր գործունեության մասին տեղեկատվություն և ցուցաբերում է համապատասխան օժանդակություն.

8) ՅՈՒՆԵՍԿՕ-ի գլխավոր համաժողովի և այլ միջկառավարական հանդիպումների շրջանակներում ապահովում է համապատասխան խորհրդատվություն Հայաստանի Հանրապետությունը ներկայացնող պատվիրակությունների համար.

9) քննարկում և ՅՈՒՆԵՍԿՕ-ի հաստատմանն է ներկայացնում վերջինիս կողմից ֆինանսավորվող նախագծերը.

10) ընտրում և ՅՈՒՆԵՍԿՕ-ի գլխավոր քարտուղարի հաստատմանն է ներկայացնում բարի կամքի դեսպանների թեկնածություններ.

11) Հայաստանի Հանրապետության արտաքին գործերի նախարարության հետ համատեղ քննարկում և ՅՈՒՆԵՍԿՕ-ի քարտուղարություն է ներկայացնում ՅՈՒՆԵՍԿՕ-ի համապատասխան մարմիններում Հայաստանի Հանրապետությունից թեկնածություններ:

 5. Հանձնաժողովի բացարձակ իրավասության ներքո է գտնվում ՅՈՒՆԵՍԿՕ-ի խորհրդանիշի տրամադրման գործընթացը:

IV. ՀԱՆՁՆԱԺՈՂՈՎԻ ԿԱԶՄԱՎՈՐՈՒՄԸ ԵՎ ԳՈՐԾՈՒՆԵՈՒԹՅԱՆ ԿԱԶՄԱԿԵՐՊՈՒՄԸ

6. Հանձնաժողովը կազմված է հանձնաժողովի նախագահից, գլխավոր քարտուղարից և անդամներից, ովքեր իրենց գործունեությունն իրականացնում են հասարակական հիմունքներով:

7. Հանձնաժողովն իր աշխատանքներն իրականացնում է նիստերի միջոցով, որոնք գումարվում են առնվազն տարեկան մեկ անգամ։ Անհրաժեշտության դեպքում կարող են արտահերթ նիստեր գումարվել հանձնաժողովի նախագահի կամ անդամների երկու երրորդի նախաձեռնությամբ։

8. Հանձնաժողովի նիստերը վարում է հանձնաժողովի նախագահը:

9. Հանձնաժողովի նիստի օրակարգն ու քննարկվելիք հարցերին վերաբերող անհրաժեշտ նյութերը հանձնաժողովի անդամներին են ուղարկվում նիստից մեկ շաբաթ առաջ։

10. Հանձնաժողովի նիստն իրավազոր է, եթե դրան մասնակցում է հանձնաժողովի անդամների առնվազն կեսից ավելին: Հանձնաժողովի քննարկմանը ներկայացվող նյութերի հիման վրա հանձնաժողովն ընդունում է որոշում։ Հանձաժողովի յուրաքանչյուր անդամ ունի մեկ ձայնի իրավունք: Հանձնաժողովի որոշումներն ընդունվում են նիստին մասնակցող` հանձնաժողովի անդամների ձայների պարզ մեծամասնությամբ։ Հավասար ձայների առկայության դեպքում հանձնաժողովի նախագահի ձայնը վճռորոշ է։ Հանձնաժողովի ընդունած որոշումների մասին կազմվում է արձանագրություն, որն ստորագրում են հանձնաժողովի նախագահը և գլխավոր քարտուղարը։ Հանձնաժողովի որոշմանը դեմ քվեարկած հանձնաժողովի անդամների հատուկ գրավոր կարծիքները կցվում են արձանագրությանը։

11. Հանձնաժողովի նախագահի հրավերով` նիստին կարող են ներկա լինել այլ մասնակիցներ:

12. Հանձնաժողովն իր գործառույթներն իրականացնելու նպատակով կարող է ստեղծել աշխատանքային խմբեր:

13. Հանձնաժողովի նախագահը Հայաստանի Հանրապետության արտաքին գործերի նախարարն է:

14. Հանձնաժողովի նախագահը`

1) իրականացնում է հանձնաժողովի ընդհանուր ղեկավարումը.

2) հրավիրում է հանձնաժողովի նիստները, նշանակում հանձնաժողովի նիստի անցկացման օրը, վայրը և հաստատում նիստի օրակարգը.

3) ստորագրում է հանձնաժողովի ընդունած որոշումները, արձանագրությունները, հանձնաժողովի գործունեության հետ կապված գրագրությունները.

4) ներկայացնում է հանձնաժողովն այլ մարմինների և անձանց հետ հարաբերություններում.

5) իրականացնում է սույն կանոնադրությունից բխող այլ գործառույթներ:

15. Հանձնաժողովի անդամը`

1) մասնակցում է հանձնաժողովի աշխատանքներին.

2) հարցեր է ներկայացնում հանձնաժողով` քննարկման.

3) ներկայացնում է առաջարկություններ հանձնաժողովի գործունեության և նիստի օրակարգում ընդգրկված հարցերի վերաբերյալ.

4) կատարում է հանձնաժողովի ընդունած ընթացակարգային որոշումները։

16. Հանձնաժողովի գլխավոր քարտուղարն ի պաշտոնե Հայաստանի Հանրապետության արտաքին գործերի նախարարության միջազգային կազմակերպությունների վարչության պետն է, որը՝

1) ապահովում է հանձնաժողովի աշխատանքների, նիստերի օրակարգերի, անհրաժեշտ նյութերի, ինչպես նաև որոշումների նախագծերի նախապատրաստումը և դրանք տրամադրում հանձնաժողովի անդամներին.

2) ղեկավարում է հանձնաժողովի քարտուղարության ընթացիկ աշխատանքները.

3) հանձնաժողովի նիստերի միջև ընկած ժամանակահատվածում ձեռնարկում է միջոցներ` հանձնաժողովի ծրագրերի ու գործունեության իրականացումը պատշաճ մակարդակով ապահովելու համար.

4) մասնակցում է ՅՈՒՆԵՍԿՕ-ի գլխավոր համաժողովի աշխատանքներին.

5) ներկայացնում է հաձնաժողովն այլ երկրների ազգային հանձնաժողովների գլխավոր քարտուղարների հանդիպումներում.

6) աշխատանքային հարաբերություններ է հաստատում ՅՈՒՆԵՍԿՕ-ի քարտուղարության, ինչպես նաև այլ երկրների ազգային հանձնաժողովների հետ.

7) պատրաստում և հանձնաժողովի հաստատմանն է ներկայացնում տարեկան հաշվետվությունները.

8) հանձնաժողովի նախագահի հետ միասին ստորագրում է հանձնաժողովի որոշումներն ու արձանագրությունները.

9) հանձնաժողովի նախագահի հանձնարարությամբ` իրականացնում է այլ գործառույթներ.

10) կազմում է հանձնաժողովի նիստերի արձանագրությունները.

11) ՅՈՒՆԵՍԿՕ-ի մասնակցությամբ և այլ ծրագրերի շրջանակներում կազմակերպության քննարկմանն է ներկայացնում Հայաստանի Հանրապետության պետական և հասարակական կազմակերպությունների, ինչպես նաև անհատների կողմից մշակված ու հանձնաժողովի քննարկմանը ներկայացված և վերջինիս կողմից հաստատված ազգային, տարածաշրջանային ու միջազգային ծրագրերի վերաբերյալ առաջարկությունները.

12) ՅՈՒՆԵՍԿՕ-ի գլխավոր համաժողովների և այլ կարևոր հանդիպումների ժամանակ ընդունված որոշումներից բխող առաջարկություններ ու տեղեկատվություն է ներկայացնում հանձնաժողովին.

13) ուսումնասիրում և ամփոփում է ՅՈՒՆԵՍԿՕ-ի շրջանակներում հանդիպումներին մասնակցած Հայաստանի Հանրապետության պատվիրակների հաշվետվությունները, որոնք պետք է ներկայացվեն քարտուղարություն` մասնակցի վերադարձից հետո 5 աշխատանքային օրվա ընթացքում։

17. Սույն կանոնադրության 16-րդ կետում նշված գործառույթները հանձնաժողովի գլխավոր քարտուղարն իրականացնում է հանձնաժողովի աշխատանքային մարմնի` քարտուղարության միջոցով, որը Հայաստանի Հանրապետության արտաքին գործերի նախարարության ՅՈՒՆԵՍԿՕ-ի բաժինն է, և ՅՈՒՆԵՍԿՕ-ում Հայաստանի Հանրապետության մշտական ներկայացուցչության միջոցով:

 18. Հանձնաժողովի նախագահի առաջարկությամբ` հանձնաժողովը կարող է ունենալ պատվավոր անդամներ, որոնք սփյուռքի և Հայաստանի Հանրապետության հանրության կողմից ճանաչված, բարձր հեղինակություն ունեցող և բարեգործական գործունեության շնորհիվ հանրության հարգանքը վայելող անհատներ են, ովքեր աջակցում են հանձնաժողովի գործունեությանը և խորհրդակցական ձայնի իրավունքով մասնակցում են հանձնաժողովի նիստերին։

19. Հանձնաժողովի ծրագրերի վերաբերյալ առաջարկությունների իրականացման համար ֆինանսական միջոցների ձևավորման աղբյուր կարող են լինել ՅՈՒՆԵՍԿՕ-ի բյուջետային և արտաբյուջետային միջոցներից հատկացված գումարները և օրենքով չարգելված այլ միջոցներ: Հանձնաժողովը ֆինանսական միջոցներն օգտագործում է միայն սույն կանոնադրությամբ սահմանված նպատակով:

20. Հանձնաժողովը Հայաստանի Հանրապետության կառավարություն է ներկայացնում իր գործունեության վերաբերյալ ամենամյա հաշվետվություն։

Հայաստանի Հանրապետության կառավարության աշխատակազմի ղեկավար-նախարարի առաջին տեղակալ

Գ. Դումանյան

Հավելված N 2 ՀՀ վարչապետի 2015 թ. հունվարի 29-ի N 58-Ա որոշման

 Կ Ա Զ Մ

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ՅՈՒՆԵՍԿՕ-Ի ԱԶԳԱՅԻՆ ՀԱՆՁՆԱԺՈՂՈՎԻ

Հայաստանի Հանրապետության արտաքին գործերի նախարար (հանձնաժողովի նախագահ)

Հայաստանի Հանրապետության Նախագահի աշխատակազմի ղեկավար (համաձայնությամբ)

Հայաստանի Հանրապետության վարչապետի աշխատակազմի ղեկավար

(պարբերությունն ուժը կորցրել է 29.08.19 N 1216-Ա)

Հայաստանի Հանրապետության կրթության, գիտության, մշակույթի և սպորտի նախարար

Հայաստանի Հանրապետության էկոնոմիկայի նախարար

Հայաստանի Հանրապետության շրջակա միջավայրի նախարար

Հայաստանի Հանրապետության արդարադատության նախարար

(պարբերությունն ուժը կորցրել է 29.08.19 N 1216-Ա)

Հայաստանի Հանրապետության գիտությունների ազգային ակադեմիայի նախագահ (համաձայնությամբ)

Երևանի քաղաքապետ (համաձայնությամբ)

Մայր Աթոռ Սուրբ Էջմիածնի թանգարանների և արխիվի տնօրեն (համաձայնությամբ)

Մեսրոպ Մաշտոցի անվան հին ձեռագրերի գիտահետազոտական ինստիտուտի (Մատենադարան) տնօրեն (համաձայնությամբ)

Հայաստանի Հանրապետությունում ՅՈՒՆԵՍԿՕ-ի ազգային հանձնաժողովի գլխավոր քարտուղար

(հավելվածը փոփ. 29.08.19 N 1216-Ա)

Հայաստանի Հանրապետության կառավարության աշխատակազմի ղեկավար-նախարարի առաջին տեղակալ

Գ. Դումանյան