030.0543.04.04.2000

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻ

Հ Ր Ա Մ Ա Ն Ա Գ Ի Ր Ը

ԳՐԱԿԱՆՈՒԹՅԱՆ ԵՎ ԱՐՎԵՍՏԻ ԲՆԱԳԱՎԱՌՈՒՄ ՊԵՏԱԿԱՆ ՄՐՑԱՆԱԿՆԵՐ ՀԻՄՆԵԼՈՒ ԵՎ ՇՆՈՐՀԵԼՈՒ ԿԱՐԳԻ ՄԱՍԻՆ

Հայրենական գրականության և արվեստի լավագույն ստեղծագործությունները պետականորեն գնահատելու և հիշյալ բնագավառի ստեղծագործողներին խրախուսելու նպատակով որոշում եմ.

1. Հիմնել պետական մրցանակներ` գրականության և արվեստի բնագավառում իրագործված բացառիկ արժեքավոր ստեղծագործությունների համար, հետևյալ համամասնությամբ`

ա) գրականության բնագավառում` մեկ մրցանակ.

բ) երաժշտության բնագավառում` մեկ մրցանակ.

գ) կերպարվեստի բնագավառում` մեկ մրցանակ.

դ) թատերական արվեստի բնագավառում` մեկ մրցանակ.

ե) կինոարվեստի բնագավառում` մեկ մրցանակ.

զ) ճարտարապետության և քաղաքաշինության բնագավառում (ինքնուրույն նախագծով և ավարտված շինության կամ համալիրի համար)` մեկ մրցանակ:

Որպես մրցանակ շնորհվում են` հուշանվեր, մրցանակի դափնեկրի վկայագիր, կրծքանշան և դրամական պարգև` 2500000 դրամի չափով:

2. Հաստատել գրականության և արվեստի բնագավառում պետական մրցանակների շնորհման կարգը և պետական մրցանակների հանձնաժողովի կազմը` համաձայն հավելվածների:

3. Սահմանել, որ գրականության և արվեստի բնագավառում պետական մրցանակների հանձնաժողովի պահպանման, մրցանակաբաշխության կազմակերպման, մրցանակների մաս կազմող հուշանվերների, կրծքանշանների և վկայագրերի պատրաստման հետ կապված ծախսերի ֆինանսավորումը, ինչպես նաև մրցանակների մաս կազմող դրամական պարգևների վճարումը կատարվում է Հայաստանի Հանրապետության Նախագահի` պետական բյուջեով նախատեսված ֆոնդի միջոցների հաշվին:

4. Հայաստանի Հանրապետության Նախագահի աշխատակազմին` ապահովել պետական մրցանակների մաս կազմող հուշանվերների, կրծքանշանների և վկայագրերի պատրաստումը:

5. Ուժը կորցրած ճանաչել Հայաստանի Հանրապետության Նախագահի 1998 թվականի դեկտեմբերի 24-ի «Պետական գրական մրցանակներ հիմնելու և շնորհելու մասին« ՆՀ-195 հրամանագիրը:

6. Սույն հրամանագիրն ուժի մեջ է մտնում պաշտոնական հրապարակման պահից:

Հայաստանի Հանրապետության Նախագահ	Ռ. Քոչարյան
Երևան 4 ապրիլի 2000 թ.  ՆՀ-543

Հավելված 1 ՀՀ Նախագահի 2000թ. ապրիլի 4-ի ՆՀ-543 հրամանագրի

ԳՐԱԿԱՆՈՒԹՅԱՆ ԵՎ ԱՐՎԵՍՏԻ ԲՆԱԳԱՎԱՌՈՒՄ ՊԵՏԱԿԱՆ ՄՐՑԱՆԱԿՆԵՐԻ ՇՆՈՐՀՄԱՆ ԿԱՐԳԸ

1. Գրականության և արվեստի բնագավառում պետական մրցանակները (այսուհետ` մրցանակ) շնորհվում են հիշյալ բնագավառի բացառիկ արժեքավոր ստեղծագործությունների հեղինակներին:

2. Մրցանակաբաշխության հերթական տարում մրցանակի հայցման կարող են ներկայացվել միայն այն ստեղծագործությունները, որոնք առաջին անգամ իրագործվել (հրատարակվել, կատարվել, ցուցադրվել, կառուցվել - ավարտվել, բեմադրվել) են այդ տարվա մրցանակի հայցման առաջարկությունների ներկայացման ժամկետն ավարտվելու օրվան նախորդած երկու տարվա ընթացքում:

3. Մրցանակը շնորհվում է երկու տարին մեկ անգամ, որպես կանոն, մրցանակաբաշխության տարվա դեկտեմբեր ամսվա վերջին 10 օրվա ընթացքում:

4. Մրցանակի հայցման ներկայացված ստեղծագործությունները քննարկում, մրցանակի հավակնորդների ընտրությունը կազմակերպում և նրանց մրցանակ շնորհելու մասին առաջարկությունները Հայաստանի Հանրապետության Նախագահին է ներկայացնում գրականության և արվեստի բնագավառում պետական մրցանակների հարցերով հանձնաժողովը (այսուհետ` հանձնաժողով), որը կազմավորում է Հայաստանի Հանրապետության Նախագահը` 6 տարվա գործունեության ժամկետով:

5. Հանձնաժողովի անդամները, բացառությամբ հանձնաժողովի քարտուղարի և գործավարի, իրենց պարտականությունները կատարում են հասարակական հիմունքներով:

6. Հանձնաժողովը մրցանակաբաշխության յուրաքանչյուր տարվա մարտի 10-ից ոչ ուշ մամուլում և զանգվածային լրատվության մյուս միջոցներով տեղեկացնում է մրցանակաբաշխության անցկացման, ինչպես նաև մրցանակի հայցման առաջարկությունների ներկայացման մասին:

7. Հանձնաժողովի աշխատանքների կազմակերպման կարգը, մրցանակաբաշխության անցկացման կարգը, ինչպես նաև մրցանակի հավակնորդների ընտրության չափանիշները և կարգը սահմանում է հանձնաժողովը:

8. Մրցանակի շնորհման մասին առաջարկությունները հանձնաժողովը Հայաստանի Հանրապետության Նախագահին է ներկայացնում ոչ շուտ, քան մրցանակաբաշխության տարվա դեկտեմբերի 1-ը և ոչ ուշ, քան դեկտեմբերի 15-ը:

9. Մրցանակի շնորհման մասին հանձնաժողովի առաջարկությունների հիման վրա մրցանակները շնորհում է Հայաստանի Հանրապետության Նախագահը` համապատասխան հրամանագրով:

10. Մրցանակը ստեղծագործության համահեղինակներին շնորհելու դեպքում մրցանակի մաս կազմող դրամական պարգևը հավասար բաշխվում է համահեղինակների միջև` յուրաքանչյուրին հանձնելով նաև հուշանվեր, կրծքանշան և վկայագիր:

11. Մահացած դափնեկրի հուշանվերը, կրծքանշանն ու վկայագիրը հանձնվում են նրա ընտանիքին, իսկ դրամական պարգևը փոխանցվում է նրա ժառանգներին` Հայաստանի Հանրապետության օրենսդրությամբ սահմանված կարգով:

12. Մրցանակի արժանացած անձանց մրցանակները հանձնում է Հայաստանի Հանրապետության Նախագահը` հանդիսավոր պայմաններում:

Հայաստանի Հանրապետության նախագահի աշխատակազմի ղեկավար

Ս. Սարգսյան

Հավելված 2 ՀՀ Նախագահի 2000 թ. ապրիլի 4-ի ՆՀ-543 հրամանագրի

ԳՐԱԿԱՆՈՒԹՅԱՆ ԵՎ ԱՐՎԵՍՏԻ ԲՆԱԳԱՎԱՌՈՒՄ ՊԵՏԱԿԱՆ ՄՐՑԱՆԱԿՆԵՐԻ ՀԱՆՁՆԱԺՈՂՈՎԻ ԿԱԶՄԸ

Սերժ Սարգսյան Խորեն Աբրահամյան Կարեն Աղամյան Ռոբերտ Ամիրխանյան Գառնիկ Անանյան Զավեն Ավետիսյան Գևորգ Արամյան Զորի Բալայան Ալեքսանդր Գրիգորյան Գեղամ Գրիգորյան Ռուբեն Գևորգյանց Ռազմիկ Դավոյան Օհան Դուրյան Ալբերտ Զուրաբյան Էդվարդ Թադևոսյան Ջիմ Թորոսյան Արամ Իսաբեկյան Սերգեյ Իսրայելյան Արմեն Խանդիկյան Գրիգոր Խանջյան Համլետ Խաչատրյան Հարություն Խաչատրյան Սիլվա Կապուտիկյան Ռոլանդ Շառոյան Հրանտ Մաթևոսյան Ֆելիքս Մելոյան Երվանդ Ղազանչյան Դավիթ Ղազարյան Խաչիկ Մանուկյան Մկրտիչ Մինասյան Ալբերտ Մկրտչյան Սարգիս Մուրադյան Ալիկ Յավուրյան Վահե Շահվերդյան Արա Շիրազ Հովհաննես Չեքիջյան Ռոմեո Ջուլհակյան Սոս Սարգսյան Սերգեյ Սարինյան Արմեն Սմբատյան Ռուդոլֆ Վատինյան

Հայաստանի Հանրապետության նախագահի աշխատակազմի ղեկավար

Ս. Սարգսյան