ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

7 մայիսի 2015 թվականի N 515-Ն

ՀԻՍՈՒՆ ԵՎ ԱՎԵԼԻ ՏՈԿՈՍ ՊԵՏԱԿԱՆ ՄԱՍՆԱԿՑՈՒԹՅԱՄԲ ԱՌԵՎՏՐԱՅԻՆ ԿԱԶՄԱԿԵՐՊՈՒԹՅՈՒՆՆԵՐՈՒՄ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԵՓԱԿԱՆՈՒԹՅՈՒՆԸ ՀԱՆԴԻՍԱՑՈՂ ԲԱԺՆԵՏՈՄՍԵՐՈՎ ՀԱՎԱՍՏՎԱԾ ԻՐԱՎՈՒՆՔՆԵՐԸ ՀԱՎԱՏԱՐՄԱԳՐԱՅԻՆ ԿԱՌԱՎԱՐՄԱՆ ՀԱՆՁՆԵԼՈՒ ԿԱՐԳԸ ՀԱՍՏԱՏԵԼՈՒ ՄԱՍԻՆ

Հիմք ընդունելով Հայաստանի Հանրապետության քաղաքացիական օրենսգրքի 954-968-րդ հոդվածները՝ Հայաստանի Հանրապետության կառավարությունը որոշում է.

1. Հաստատել հիսուն և ավելի տոկոս պետական մասնակցությամբ առևտրային կազմակերպություններում Հայաստանի Հանրապետության սեփականությունը հանդիսացող բաժնետոմսերով հավաստված իրավունքները հավատարմագրային կառավարման հանձնելու կարգը՝ համաձայն հավելվածի:

2. Սահմանել, որ հիսուն և ավելի տոկոս պետական մասնակցությամբ առևտրային կազմակերպություններում Հայաստանի Հանրապետության սեփականությունը հանդիսացող բաժնետոմսերով հավաստված իրավունքները հավատարմագրային կառավարման հանձնելու մասին պայմանագրերը Հայաստանի Հանրապետության անունից կնքում է Հայաստանի Հանրապետության կառավարությանն առընթեր պետական գույքի կառավարման վարչությունը:

3. Հայաստանի Հանրապետության կառավարությանն առընթեր պետական գույքի կառավարման վարչության պետին` երկամսյա ժամկետում հաստատել հիսուն և ավելի տոկոս պետական մասնակցությամբ առևտրային կազմակերպություններում Հայաստանի Հանրապետության սեփականությունը հանդիսացող բաժնետոմսերով հավաստված իրավունքները հավատարմագրային կառավարման հանձնելու մրցույթի կանոնակարգը:

4. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Հայաստանի Հանրապետության վարչապետ	Հ. Աբրահամյան
2015 թ. մայիսի 20 Երևան

Հավելված ՀՀ կառավարության 2015 թվականի մայիսի 7-ի N 515-Ն որոշման

Կ Ա Ր Գ

ՀԻՍՈՒՆ ԵՎ ԱՎԵԼԻ ՏՈԿՈՍ ՊԵՏԱԿԱՆ ՄԱՍՆԱԿՑՈՒԹՅԱՄԲ ԱՌԵՎՏՐԱՅԻՆ ԿԱԶՄԱԿԵՐՊՈՒԹՅՈՒՆՆԵՐՈՒՄ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԵՓԱԿԱՆՈՒԹՅՈՒՆԸ ՀԱՆԴԻՍԱՑՈՂ ԲԱԺՆԵՏՈՄՍԵՐՈՎ ՀԱՎԱՍՏՎԱԾ ԻՐԱՎՈՒՆՔՆԵՐԸ ՀԱՎԱՏԱՐՄԱԳՐԱՅԻՆ ԿԱՌԱՎԱՐՄԱՆ ՀԱՆՁՆԵԼՈՒ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով կարգավորվում են հիսուն և ավելի տոկոս պետական մասնակցությամբ առևտրային կազմակերպություններում (այսուհետ՝ կազմակերպություն) Հայաստանի Հանրապետության սեփականությունը հանդիսացող բաժնետոմսերով հավաստված իրավունքները (այսուհետ՝ բաժնետոմս) այլ առևտրային կազմակերպությունների և անհատ ձեռնարկատիրոջ (այսուհետ` անձ) հավատարմագրային կառավարման հանձնելու հետ կապված հարաբերությունները:

2. Հայաստանի Հանրապետության կառավարությանն առընթեր պետական գույքի կառավարման վարչության (այսուհետ՝ վարչություն) ներկայացմամբ՝ կազմակերպության բաժնետոմսերը կառավարող պետական լիազորված մարմնի հետ համաձայնեցնելուց հետո ընդունվում է յուրաքանչյուր կազմակերպության բաժնետոմսերը հավատարմագրային կառավարման հանձնելու վերաբերյալ Հայաստանի Հանրապետության կառավարության որոշում, որը պետք է նախատեսի տվյալ կազմակերպության բաժնետոմսերը հավատարմագրային կառավարման հանձնելու, ինչպես նաև այդ նպատակով կազմակերպվող մրցույթի բոլոր էական պայմանները:

3. Սահմանել, որ հավատարմագրային կառավարման կարող են հանձնվել «Պետական գույքի մասնավորեցման 2006-2007 թվականների ծրագրի մասին» Հայաստանի Հանրապետության օրենքով հաստատված՝ մասնավորեցման ենթակա կազմակերպությունների ցանկերում չընդգրկված կազմակերպությունների բաժնետոմսերը:

II. ԿԱԶՄԱԿԵՐՊՈՒԹՅԱՆ ԲԱԺՆԵՏՈՄՍԵՐԸ ՀԱՎԱՏԱՐՄԱԳՐԱՅԻՆ ԿԱՌԱՎԱՐՄԱՆ ՀԱՆՁՆԵԼՈՒ ԳՈՐԾԸՆԹԱՑԻ ԿԱԶՄԱԿԵՐՊՈՒՄԸ

4. Կազմակերպության բաժնետոմսերը հավատարմագրային կառավարման են հանձնվում Հայաստանի Հանրապետության կառավարության որոշման հիման վրա կազմակերպված մրցույթի արդյունքում՝ տվյալ որոշմամբ ստեղծված մրցութային հանձնաժողովի որոշմամբ հաղթող ճանաչված անձին:

5. Կազմակերպության բաժնետոմսերը հավատարմագրային կառավարման հանձնելու մասին Հայաստանի Հանրապետության կառավարության որոշումը պետք է ներառի առնվազն հետևյալ տեղեկությունները՝

1) կազմակերպության անվանումը, գտնվելու վայրը, հիմնադրի լիազորություններն իրականացնող պետական մարմնի անվանումը.

2) հավատարմագրային կառավարման ժամկետները.

3) կազմակերպության աշխատողների աշխատանքային և սոցիալական երաշխիքներին վերաբերող պահանջները՝ ըստ ուղղությունների և ծավալի.

4) կազմակերպության ակտիվների և պարտավորությունների մեծության մասին տեղեկատվությունը` համաձայն Հայաստանի Հանրապետության կառավարության որոշմանը նախորդող վերջին ժամանակահատվածի հաշվապահական հաշվառման հաշվետվության.

5) կազմակերպության բաժնետոմսերը հավատարմագրային կառավարման հանձնելու դիմաց պահանջվող ներդրումների չափը, ուղղությունները և դրանց իրականացման ժամկետները, եթե կազմակերպության բաժնետոմսերը հավատարմագրային կառավարման հանձնելու մրցույթի մասին հրապարակային ծանուցման մեջ առկա է նման պահանջ.

6) սեփականատիրոջ այն լիազորությունները, որոնք նախատեսվում է փոխանցել հավատարմագրային կառավարչին.

7) կազմակերպության բաժնետոմսերը հավատարմագրային կառավարման հանձնելու նպատակով ստեղծվող մրցութային հանձնաժողովի կազմը.

8) այլ պայմաններ:

6. Կազմակերպության բաժնետոմսերը հավատարմագրային կառավարման են հանձնվում հավատարմագրային կառավարման հիմնադրի (ի դեմս վարչության) և մրցույթի արդյունքում հաղթող ճանաչված անձի միջև կնքված պայմանագրով:

7. Հավատարմագրային կառավարման պայմանագրով ստանձնած պարտավորությունների կատարումն ապահովվում է հավատարմագրային կառավարչի կողմից օրենքով սահմանված կարգով տրամադրված գրավով և (կամ) բանկի կողմից տրամադրված երաշխիքով:

8. Հավատարմագրային կառավարչին փոխանցվում են սեփականատիրոջ այն լիազորությունները, որոնք նախատեսված են Հայաստանի Հանրապետության կառավարության որոշմամբ ու ամրագրված են հավատարմագրային կառավարման հիմնադրի և մրցույթի արդյունքում հաղթող ճանաչված անձի միջև կնքված հավատարմագրային կառավարման մասին պայմանագրում:

III. ԿԱԶՄԱԿԵՐՊՈՒԹՅԱՆ ԲԱԺՆԵՏՈՄՍԵՐԸ ՀԱՎԱՏԱՐՄԱԳՐԱՅԻՆ ԿԱՌԱՎԱՐՄԱՆ ՀԱՆՁՆԵԼՈՒ ՆՊԱՏԱԿՈՎ ՄՐՑՈՒՅԹԻ ԱՆՑԿԱՑՈՒՄԸ

9. Կազմակերպության բաժնետոմսերը հավատարմագրային կառավարման հանձնելու հետ կապված գործառույթներն իրականացվում են Հայաստանի Հանրապետության կառավարության որոշմամբ ստեղծված մրցութային հանձնաժողովների (այսուհետ՝ մրցութային հանձնաժողով) միջոցով:

10. Կազմակերպության բաժնետոմսերը հավատարմագրային կառավարման հանձնելու մրցույթները (այսուհետ՝ մրցույթ) բաց են մրցույթի պայմանները բավարարող բոլոր անձանց համար:

11. Մրցութային հանձնաժողովում ընդգրկվում է կազմակերպության հիմնադրի լիազորություններն իրականացնող պետական մարմնի, Հայաստանի Հանրապետության ֆինանսների նախարարության, Հայաստանի Հանրապետության էկոնոմիկայի նախարարության, Հայաստանի Հանրապետության արդարադատության նախարարության, Հայաստանի Հանրապետության կառավարությանն առընթեր պետական գույքի կառավարման վարչության և պետական կառավարման այլ շահագրգիռ մարմինների 2-ական ներկայացուցիչ:

12. Կազմակերպության բաժնետոմսերը հավատարմագրային կառավարման հանձնելու նպատակով ներկայացված մրցութային առաջարկների գնահատման համար, Հայաստանի Հանրապետության կառավարության որոշմամբ սահմանված լինելու դեպքում, մրցութային հանձնաժողովը կարող է անվճար հիմունքներով, առանց ձայնի իրավունքի՝ մրցութային հանձնաժողովի աշխատանքներում ներգրավել մասնագիտացած խորհրդատուների և համապատասխան ոլորտի փորձագետների (համաձայնությամբ):

13. Մրցույթի մասին հրապարակային ծանուցումը մրցույթին մասնակցելու համար հայտերի ընդունման օրվանից ոչ ուշ, քան 60 օր առաջ պարտադիր տեղադրվում է վարչության պաշտոնական ինտերնետային կայքում, http://www.azdarar.am հասցեում գտնվող Հայաստանի Հանրապետության հրապարակային ծանուցումների պաշտոնական ինտերնետային կայքում, իսկ մրցութային հանձնաժողովի որոշմամբ՝ նաև օտարալեզու կայքերում:

14. Կազմակերպության բաժնետոմսերը հավատարմագրային կառավարման հանձնելու մրցույթի մասին հրապարակային ծանուցման մեջ նշվում են՝

1) կազմակերպության անվանումը, գտնվելու վայրը, հիմնադրի լիազորություններն իրականացնող պետական մարմնի անվանումը.

2) հավատարմագրային կառավարման առաջարկվող ժամկետը.

3) կազմակերպության աշխատողների աշխատանքային և սոցիալական երաշխիքներին վերաբերող պահանջները՝ ըստ ուղղությունների և ծավալի.

4) կազմակերպության բաժնետոմսերը հավատարմագրային կառավարման հանձնելու դիմաց պահանջվող ներդրումների չափը, ուղղությունները և դրանց իրականացման ժամկետները, եթե նշված չափանիշները համարվում են մրցույթին մասնակցելու նախապայման.

5) սեփականատիրոջ այն լիազորությունները, որոնք նախատեսվում է փոխանցել հավատարմագրային կառավարչին.

6) հավատարմագրային կառավարման ծրագրին ներկայացվող պահանջները.

7) կազմակերպության ակտիվների և պարտավորությունների մեծության մասին տեղեկատվությունը՝ համաձայն հրապարակային ծանուցմանը նախորդող վերջին ժամանակահատվածի հաշվապահական հաշվառման հաշվետվության.

8) կազմակերպության գույքի նկատմամբ բռնագանձում տարածելու վերաբերյալ հայցերի առկայության կամ կազմակերպության՝ սնանկության վարույթում գտնվելու մասին տեղեկատվությունը.

9) մրցութային հանձնաժողովի գործունեության վայրը, մրցույթի կազմակերպման վայրը և օրը (նշելով ժամը).

10) մրցույթին մասնակցելու համար հայտերի ընդունման վայրը, ժամանակահատվածը (նշելով ժամերը՝ ըստ օրերի) և վերջնաժամկետը.

11) մրցույթի ձևը և անցկացման կարգը.

12) մրցույթին մասնակցելու համար ներկայացված հայտերի գնահատման չափանիշները՝ ներառյալ մրցութային հանձնաժողովի կողմից որոշված՝

ա. մրցույթին մասնակցելու համար ներկայացված ծրագրերի յուրաքանչյուր բաղադրիչի գնահատման սկզբունքները,

բ. տեխնիկական ու ֆինանսական ցուցանիշների գնահատման համար սահմանված կշռային գործակիցները.

13) հավատարմագրային կառավարչի պարտավորությունների կատարումն ապահովող գրավի չափը.

14) մրցույթի հաղթողին որոշելու, ինչպես նաև առանց հաղթողին որոշելու մրցույթը դադարեցնելու կարգը.

15) մրցույթի մասնակցության վճարի և մրցույթի նախավճարի չափը, վճարելու կարգը և ժամկետները.

16) մրցույթին մասնակցելու համար անհրաժեշտ փաստաթղթերի ցանկը.

17) մրցույթի հայտերը բացելու, ինչպես նաև մրցույթի հայտերն ամփոփելու նիստերի օրը և ժամը.

18) մրցույթի մասին լրացուցիչ տեղեկություններ ստանալու կարգը, մրցույթի կանոնակարգին ծանոթանալու վայրը և կանոնակարգի պատճենը տրամադրելու կարգը.

19) Հայաստանի Հանրապետության կառավարության որոշմամբ սահմանված այլ պայմաններ:

15. Մրցույթին մասնակցության վճարը սահմանվում է մրցույթի անցկացման համար կատարված ծախսերի փոխհատուցման նպատակով, իսկ մրցույթի նախավճարը մրցույթին մասնակցելու երաշխիքային վճար է:

16. Մրցույթին մասնակցության վճարի չափը սահմանվում է մրցույթի անցկացման պահին Հայաստանի Հանրապետությունում սահմանված նվազագույն ամսական աշխատավարձի 50-ապատիկի չափով և ենթակա չէ վերադարձման՝ անկախ մրցույթում հաղթելու կամ հաղթող չճանաչվելու հանգամանքից:

17. Մրցույթի նախավճարը սահմանվում է մրցույթի անցկացման պահին Հայաստանի Հանրապետությունում սահմանված նվազագույն ամսական աշխատավարձի 1000-ապատիկի չափով և ենթակա է վերադարձման՝

1) մրցույթում հաղթող չճանաչված անձանց՝ մրցույթի արդյունքներն ամփոփելուց հետո 10 աշխատանքային օրվա ընթացքում.

2) մրցույթում հաղթող ճանաչված անձին՝ վարչության և տվյալ անձի միջև հավատարմագրային կառավարման մասին պայմանագրի կնքումից հետո 10 աշխատանքային օրվա ընթացքում:

18. Մրցույթին մասնակցելու համար հայտատուն մրցութային հանձնաժողովին ներկայացնում է փակ ծրարով գրավոր հայտ, որը պետք է ներառի հետևյալ փաստաթղթերը՝

1) եթե հայտատուն առևտրային կազմակերպություն է՝

ա. կազմակերպության պետական գրանցման համարը, տեղեկատվություն կազմակերպության մասնակիցների, փայատերերի, կազմակերպության գտնվելու և գործունեության իրականացման վայրի մասին: Եթե կազմակերպությունն օտարերկրյա առևտրային կազմակերպություն է, ապա պետք է նշվեն նաև այն պետությունը, որի օրենքների հիման վրա ստեղծվել և գործում է տվյալ կազմակերպությունը, այդ օտարերկրյա առևտրային կազմակերպության՝ օրենքին համապատասխան ստեղծման և գործունեության դադարման, վերակազմակերպման՝ ներառյալ իրավահաջորդության, իրավունակության բովանդակության, քաղաքացիական իրավունքներ ձեռք բերելու և քաղաքացիական պարտականություններ կրելու կարգը, կազմակերպության ներսում ծավալվող հարաբերությունների՝ ներառյալ առևտրային կազմակերպության հարաբերություններն իր մասնակիցների հետ, պատասխանատվության հարցերի մասին տեղեկությունները,

բ. մրցույթին մասնակցության վճարի և մրցույթի նախավճարի՝ մրցութային հանձնաժողովի կողմից նշված բանկային հաշվին կատարված վճարման անդորրագրերի պատճենները,

գ. սույն կարգի պահանջներին համապատասխանող հավատարմագրային կառավարման ծրագիրը,

դ. կառավարման բնագավառում առևտրային կազմակերպության փորձի մասին վկայող փաստաթղթերը,

ե. մրցույթի մասին հրապարակային ծանուցման մեջ նշված մյուս փաստաթղթերը.

2) եթե հայտատուն անհատ ձեռնարկատեր է՝

ա. անձնագրի տվյալները (ազգանունը, անունը, հայրանունը, քաղաքացիությունը և բնակության վայրը), անհատ ձեռնարկատիրոջ պետական հաշվառման համարը,

բ. մրցույթին մասնակցության վճարի և մրցույթի նախավճարի՝ մրցութային հանձնաժողովի կողմից նշված բանկային հաշվին կատարված վճարման անդորրագրերի պատճենները,

գ. սույն կարգի պահանջներին համապատասխանող հավատարմագրային կառավարման ծրագիրը,

դ. կառավարման բնագավառում անհատ ձեռնարկատիրոջ փորձի մասին վկայող փաստաթղթերը,

ե. մրցույթի մասին հրապարակային ծանուցման մեջ նշված մյուս փաստաթղթերը:

19. Սույն կարգի 18-րդ կետով պահանջվող հավատարմագրային կառավարման ծրագիրը պետք է ներառի՝

1) առաջարկություններ ներդրումներ կատարելու վերաբերյալ (այդ թվում՝ ներդրումների ուղղությունները և չափերը, ինչպես նաև ներդրումների իրականացման արդյունքում ակնկալվող արդյունքը (ներառյալ կազմակերպության սպասվելիք շահույթը)` տարիների կտրվածքով), եթե նշված տեղեկությունները ներկայացնելու պահանջը նախատեսված է սույն կարգի 14-րդ կետի 4-րդ ենթակետով.

2) հավատարմագրային կառավարման հանձնվող կազմակերպության զարգացման համար իրականացվելիք միջոցառումները, դրանց կատարման ժամկետները, ուղիները, պահանջվող ֆինանսական միջոցները և աղբյուրները.

3) տեղեկություններ և փաստաթղթեր անձի տեխնիկական և մասնագիտական ապահովվածության մասին.

4) հավատարմագրային կառավարումն ապահովող գրավի առարկան և չափը, որը չի կարող կազմակերպության ակտիվների 5 տոկոսից պակաս լինել.

5) հավատարմագրային կառավարչի վարձատրության չափի վերաբերյալ առաջարկություններ.

6) Հայաստանի Հանրապետության կառավարության որոշմամբ սահմանված` մրցույթի այլ պայմաններին վերաբերող առաջարկություններ:

20. Մրցույթին մասնակցելու համար հայտատուների կողմից մրցութային հանձնաժողովին ներկայացված հայտերում առկա տվյալներն ու տեղեկությունները (ներառյալ հավատարմագրային կառավարման ծրագրի բովանդակությունը) մինչև մրցույթի ավարտը հրապարակման ենթակա չեն:

21. Մրցույթին մասնակցելու համար հայտերի ընդունման ժամկետը հայտերի ընդունման օրվանից հաշված՝ չի կարող 30 օրացուցային օրվանից պակաս և 45 օրացուցային օրվանից ավելի լինել:

22. Մրցույթին մասնակցելու համար հայտի ընդունման մերժումն արգելվում է:

23. Մրցույթն անցկացվում է հայտերի ընդունման ժամկետը լրանալու օրը:

24. Մրցույթի օրը մրցութային հանձնաժողովը բացում է բոլոր ներկայացված ծրարները, ստուգում ներկայացված պահանջներին հայտերի համապատասխանությունը և գնահատում առաջարկները:

25. Մրցույթի հաղթող է ճանաչվում այն հայտատուն, որը, մրցութային հանձնաժողովի որոշմամբ, առաջարկել է լավագույն պայմանները: Լավագույն պայմաններ են համարվում մրցույթին մասնակցելու համար ներկայացված հայտերի գնահատման չափանիշներին համապատասխանող՝ առավելագույն միավորներով գնահատված ծրագրերը:

26. Մի քանի հայտատուների կողմից հավասար լավագույն պայմանների առաջարկման դեպքում նախապատվությունը տրվում է այն անձին, որի ներկայացրած հավատարմագրային կառավարման ծրագրով նախատեսվում է նվազագույն ծախսերով կազմակերպության առավելագույն զուտ շահույթի ապահովումը:

27. Մրցութային հանձնաժողովի անդամներից յուրաքանչյուրն ունի մեկ ձայնի իրավունք: Մրցութային հանձնաժողովի որոշումներն ընդունվում են ձայների պարզ մեծամասնությամբ:

28. Կողմ և դեմ քվեարկած մրցութային հանձնաժողովի անդամների ձայների հավասարության դեպքում մրցութային հանձնաժողովի նախագահն ունի վճռորոշ ձայնի իրավունք:

29. Մրցույթի հայտերն ամփոփելու օրը մրցութային հանձնաժողովը կազմում է մրցույթի արդյունքների մասին արձանագրություն, որտեղ նշում է`

1) մրցույթի հայտերի բացման, մրցույթի հայտերի ամփոփման վայրը, ամսաթիվը և ժամը, ինչպես նաև մրցութային հանձնաժողովի անդամների անուններն ու ազգանունները.

2) մրցույթի մասնակիցների անունները, ազգանունները (անվանումները) և գտնվելու (բնակության) վայրը.

3) տեղեկություններ մրցույթի հայտերի վերաբերյալ հարցումների և դրանց պատասխանների մասին.

4) մրցույթում հաղթող ճանաչված անձի անունը, ազգանունը (անվանումը).

5) այլ անհրաժեշտ տեղեկություններ:

30. Մրցույթի արդյունքների մասին ամփոփ տեղեկատվությունը մրցույթի արդյունքներն ամփոփելուց հետո ոչ ուշ, քան 5 աշխատանքային օրվա ընթացքում հրապարակվում է վարչության պաշտոնական ինտերնետային կայքում, http://www.azdarar.am հասցեում գտնվող Հայաստանի Հանրապետության հրապարակային ծանուցումների պաշտոնական ինտերնետային կայքում, իսկ անհրաժեշտության դեպքում՝ նաև այն օտարալեզու կայքերում, որի միջոցով մրցույթին մասնակցելու համար հայտ ներկայացրած անձը տեղեկացել է մրցույթի մասին:

31. Հավատարմագրային կառավարման հիմնադիրը, ի դեմս վարչության, մրցույթի արդյունքների հրապարակումից հետո երկամսյա ժամկետում՝ մրցույթի հաղթող ճանաչված անձի հետ կնքում է հավատարմագրային կառավարման մասին պայմանագիր:

32. Մրցույթին մասնակցելու համար ստացված մեկ հայտը չի կարող մրցույթը չկայացած համարելու պատճառ համարվել:

33. Մրցույթին մասնակցելու համար հայտերի բացակայության կամ «Հրապարակային սակարկությունների մասին» Հայաստանի Հանրապետության օրենքի 27-րդ հոդվածով սահմանված այլ պատճառով մրցույթը չկայանալու դեպքում տվյալ կազմակերպության բաժնետոմսերը հավատարմագրային կառավարման հանձնելու վերաբերյալ նոր մրցույթի կազմակերպման մասին որոշումն ընդունում է Հայաստանի Հանրապետության կառավարությունը:

IV. ՀԱՎԱՏԱՐՄԱԳՐԱՅԻՆ ԿԱՌԱՎԱՐՄԱՆ ՄԱՍԻՆ ՊԱՅՄԱՆԱԳՐԻ ՊԱՀԱՆՋՆԵՐԸ, ՊԱՅՄԱՆԱԳՐԻ ԳՈՐԾՈՂՈՒԹՅԱՆ ՎԱՂԱԺԱՄԿԵՏ ԴԱԴԱՐԵՑՄԱՆ ՀԻՄՔԵՐԸ ԵՎ ՊԱՅՄԱՆԱԳՐԻ ՊԱՀԱՆՋՆԵՐԻ ԿԱՏԱՐՄԱՆ ՆԿԱՏՄԱՄԲ ՀՍԿՈՂՈՒԹՅՈՒՆԸ

34. Սույն կարգին համապատասխան մրցույթի հաղթող ճանաչված անձի հավատարմագրային կառավարման ծրագիրը համարվում է հավատարմագրային կառավարման մասին պայմանագրի անբաժանելի մասը:

35. Վարչության և մրցույթի արդյունքում հաղթող ճանաչված անձի (այսուհետ՝ հավատարմագրային կառավարիչ) միջև կնքված հավատարմագրային կառավարման մասին պայմանագրում, բացի Հայաստանի Հանրապետության քաղաքացիական օրենսգրքի 958-րդ հոդվածով սահմանված պայմանագրի էական պայմաններից, պետք է ներառվեն՝

1) վարչության կողմից հավատարմագրային կառավարման մասին պայմանագրով սահմանված պարտավորությունների կատարման մոնիթորինգի կարգը՝ առանց միջամտելու հավատարմագրային կառավարչի գործունեությանը, ինչպես նաև հավատարմագրային կառավարչից կազմակերպության կառավարմանը վերաբերող ցանկացած փաստաթուղթ ստանալու իրավունքը.

2) հավատարմագրային կառավարման մասին պայմանագրի գործողության սկզբին հաջորդող յուրաքանչյուր տարի՝ մինչև տվյալ տարվա մարտի 1-ը՝ հավատարմագրային կառավարչի գործունեության ծրագրով ամրագրված գործողությունների ընթացքի վերաբերյալ վարչությանը տարեկան հաշվետվություն (վարչության հետ համաձայնեցված ձևաչափով և բովանդակությամբ), ինչպես նաև կազմակերպության ֆինանսատնտեսական գործունեության արդյունքների վերաբերյալ անկախ աուդիտորական ծառայություններ իրականացնող անձի եզրակացությունը ներկայացնելու պահանջը.

3) հավատարմագրային կառավարման մասին պայմանագրի գործողության սկզբին հաջորդող յուրաքանչյուր տարի՝ մինչև տվյալ տարվա դեկտեմբերի 1-ը՝ հավատարմագրային կառավարչի գործունեության ծրագրից բխող տարեկան գործարար ծրագիրը (եռամսյակային կտրվածքով), իսկ յուրաքանչյուր եռամսյակի ավարտից հետո՝ մինչև հաջորդ եռամսյակի երկրորդ ամսվա 1-ը՝ գործարար ծրագրով նախատեսված միջոցառումների իրականացման մասին եռամսյակային հաշվետվությունը վարչություն ներկայացնելու պահանջը:

36. Վարչության և հավատարմագրային կառավարչի միջև կնքված հավատարմագրային կառավարման մասին պայմանագրում պետք է սահմանվի, որ հավատարմագրային կառավարիչը, առանց վարչության համաձայնության, հավատարմագրային կառավարման ընթացքում իրավունք չունի՝

1) օտարելու հավատարմագրային կառավարման հանձնված բաժնետոմսերը.

2) հավատարմագրային կառավարման մասին պայմանագրով իրեն վերապահված իրավունքների և պարտականությունների կատարումը վերապահելու երրորդ անձանց.

3) սահմանելու կազմակերպության ղեկավար անձանց աշխատանքի վարձատրության չափերը.

4) իրականացնելու «Բաժնետիրական ընկերությունների մասին» Հայաստանի Հանրապետության օրենքով և «Սահմանափակ պատասխանատվությամբ ընկերությունների մասին» Հայաստանի Հանրապետության օրենքով սահմանված կարգով խոշոր գործարքների մասին ընդունված որոշումները:

37. Սույն կարգին համապատասխան կնքված հավատարմագրային կառավարման մասին պայմանագրի գործողությունը կարող է վաղաժամկետ դադարեցվել հետևյալ հիմքերից յուրաքանչյուրով՝

1) հավատարմագրային կառավարման մասին պայմանագրի կողմերի փոխադարձ համաձայնությամբ.

2) եթե վարչությունը խախտել է կամ չի կատարել հավատարմագրային կառավարման մասին պայմանագրով ստանձնած իր պարտավորություններից որևէ մեկը կամ խախտել է կառավարման հիմնադրի կամ իր կողմից տրված՝ երաշխիք պարունակող պայման, և նշված խախտման մասին հավատարմագրային կառավարչի ծանուցումն ստանալուց հետո 15 օրացուցային օրվա ընթացքում կառավարման հիմնադրի կամ վարչության կողմից խախտումը չի վերացվել.

3) հավատարմագրային կառավարիչը խախտել է կամ չի կատարել հավատարմագրային կառավարման մասին պայմանագրով ստանձնած իր պարտավորություններից որևէ մեկը կամ խախտել է հավատարմագրային կառավարման մասին պայմանագրով իր կողմից երաշխիք պարունակող պայմանը, և նշված խախտման մասին վարչության ծանուցումն ստանալուց հետո 15 օրացուցային օրվա ընթացքում հավատարմագրային կառավարչի կողմից խախտումը չի վերացվել:

38. Սույն կարգի 37-րդ կետի 2-րդ և 3-րդ ենթակետերով նախատեսված դեպքերում հավատարմագրային կառավարման մասին պայմանագրի կողմն իրավասու է վաղաժամկետ դադարեցնելու հավատարմագրային կառավարման մասին պայմանագրի գործողությունը՝ պայմանագրի մյուս կողմին երկու ամիս առաջ գրավոր ծանուցելով իր կրած վնասներն ու բաց թողնված օգուտները փոխհատուցելու անհրաժեշտության մասին:

39. Հավատարմագրային կառավարման մասին պայմանագրի գործողությունը վաղաժամկետ դադարեցվելու դեպքում կողմերը պետք է միմյանց վերադարձնեն տվյալ պայմանագրին առնչվող բոլոր փաստաթղթերն ու միջոցները` սահմանված ժամկետում և առանց վերապահումների:

40. Սույն կարգին համապատասխան կնքված հավատարմագրային կառավարման մասին պայմանագրերի պայմանների կատարման նկատմամբ հսկողությունն իրականացնում է վարչությունը՝ կազմակերպության բաժնետոմսերը հավատարմագրային կառավարման հանձնելու մասին կնքված պայմանագրի դրույթներին համապատասխան:

Հայաստանի Հանրապետության կառավարության աշխատակազմի ղեկավար-նախարար

Դ. Հարությունյան