ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ

Ո Ր Ո Շ ՈՒ Մ

31 մարտի 2015 թվականի N 235-Ա

ՄԻՋԳԵՐԱՏԵՍՉԱԿԱՆ ՀԱՆՁՆԱԺՈՂՈՎԻ ԳՈՐԾԱՌՈՒՅԹՆԵՐԻ ՄԱՍԻՆ

Համաձայն «Տեսչական մարմինների մասին» Հայաստանի Հանրապետության օրենքի 19-րդ հոդվածի 7-րդ մասի՝

1. Սահմանել, որ Հայաստանի Հանրապետության վարչապետի 2015 թվականի փետրվարի 9-ի N 90-Ա որոշմամբ ստեղծված միջգերատեսչական հանձնաժողովն իրականացնում է հետևյալ գործառույթները՝

1) հաստատում է նոր տեսչական համակարգին անցնելու նախնական ծրագիրը և ներկայացնում Հայաստանում տեսչական բարեփոխումների համակարգման խորհրդի հավանությանը.

2) Հայաստանի Հանրապետության կառավարության հաստատմանն է ներկայացնում նոր տեսչական համակարգին անցնելու ծրագիրը.

3) հետևում է Հայաստանի Հանրապետության վարչապետի 2015 թվականի մարտի 10-ի N 187-Ա որոշման հավելվածով նախատեսված միջոցառումների կատարման ընթացքին.

4) սույն կետի 3-րդ ենթակետով նախատեսված միջոցառումների կատարման ապահովման նպատակով, ինչպես նաև նոր տեսչական համակարգին անցնելու ռազմավարական քայլերի վերաբերյալ առաջարկություններ է ներկայացնում Հայաստանում տեսչական բարեփոխումների համակարգման խորհրդին.

5) ըստ անհրաժեշտության կազմակերպում է աշխատանքային քննարկումներ «Տեսչական մարմինների մասին» Հայաստանի Հանրապետության օրենքի կիրարկումն ապահովող միջոցառումների վերաբերյալ.

6) քննարկում է հանձնաժողովի գործունեությանը վերաբերող ընթացիկ հարցերը:

Հայաստանի Հանրապետության վարչապետ	Հ. Աբրահամյան
2015 թ. մարտի 31 Երևան