ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

11 սեպտեմբերի 2014 թվականի N 1058-Ն

ՄՇԱԿՈՒԹԱՅԻՆ ԱՐԺԵՔՆԵՐԻ ԷԼԵԿՏՐՈՆԱՅԻՆ ՏԵՂԵԿԱՏՎԱԿԱՆ ՇՏԵՄԱՐԱՆԻ ՍՏԵՂԾՄԱՆ ԿԱՐԳԸ ԵՎ ՇՏԵՄԱՐԱՆԻՆ ՏԵՂԵԿՈՒՅԹ ՏՐԱՄԱԴՐՈՂ ԿԱԶՄԱԿԵՐՊՈՒԹՅՈՒՆՆԵՐԻ ՑԱՆԿԸ ՀԱՍՏԱՏԵԼՈՒ ՄԱՍԻՆ

Հայաստանի Հանրապետության կառավարությունը որոշում է.

1. Հաստատել`

1) մշակութային արժեքների էլեկտրոնային տեղեկատվական շտեմարանի ստեղծման կարգը` համաձայն N 1 հավելվածի.

2) մշակութային արժեքների էլեկտրոնային տեղեկատվական շտեմարանին տեղեկույթ տրամադրող կազմակերպությունների ցանկը՝ համաձայն N 2 հավելվածի:

2. Մշակութային արժեքների էլեկտրոնային տեղեկատվական շտեմարանի ստեղծման, համալրման և օգտագործման գործընթացների ապահովումը վերապահել Հայաստանի Հանրապետության մշակույթի նախարարությանը:

3. Հայաստանի Հանրապետության մշակույթի նախարարին`

1) սույն որոշումն ուժի մեջ մտնելուց հետո մեկամսյա ժամկետում հաստատել մշակութային արժեքների էլեկտրոնային տեղեկատվական շտեմարանի ստեղծման տեխնիկական առաջադրանքը` համաձայն N 1 հավելվածով սահմանված պահանջների.

2) Հայաստանի Հանրապետության 2015 թվականի պետական բյուջեի շրջանակներում նախատեսել մշակութային արժեքների էլեկտրոնային տեղեկատվական շտեմարանի ծրագրային ապահովման, ծրագրերի ներդրման, համապատասխան տեխնիկական սարքաշարերի ու կապի միջոցների ձեռքբերման և տեղակայման, մալուխային առանձին կապի ծառայության վարձակալման ու շտեմարանի ստեղծման և դրա հետագա գործունեության ապահովման համար անհրաժեշտ այլ ծախսեր.

3) մինչև 2015 թվականի օգոստոսի 1-ը ապահովել մշակութային արժեքների էլեկտրոնային տեղեկատվական շտեմարանի ստեղծման և դրա գործունեության կազմակերպման համար անհրաժեշտ տեխնիկական սարքաշարերի ու կապի միջոցների ձեռքբերումը և կապուղու վարձակալումը.

4) 2015 թվականից սկսած` յուրաքանչյուր տարվա նոյեմբերին կազմակերպել վերապատրաստման դասընթացներ` շտեմարանին տեղեկույթ տրամադրող կազմակերպությունների համապատասխան մասնագետների համար.

5) մինչև 2020 թվականն ավարտել մշակութային արժեքների էլեկտրոնային տեղեկատվական շտեմարանում կազմակերպությունների տրամադրած տեղեկույթի մուտքագրումը:

4. Հանձնարարել Հայաստանի Հանրապետության տարածքային կառավարման նախարարին, Հայաստանի Հանրապետության պաշտպանության նախարարին, Հայաստանի Հանրապետության կրթության և գիտության նախարարին, Հայաստանի Հանրապետության քաղաքաշինության նախարարին, Հայաստանի Հանրապետության բնապահպանության նախարարին, Հայաստանի Հանրապետության մարզպետներին և առաջարկել Երևանի քաղաքապետին՝

1) Հայաստանի Հանրապետության 2015 թվականի պետական բյուջեի շրջանակներում նախատեսել իրենց ենթակայությամբ գործող կազմակերպությունների հիմնական ֆոնդերի հավաքածուների տեղեկույթը թվայնացնելու գործընթացն ապահովելու համար անհրաժեշտ ֆինանսական միջոցները, ինչպես նաև այդ աշխատանքների իրականացման համար անհրաժեշտ տեխնիկական սարքաշարերի ու կապի միջոցների ձեռքբերման ծախսերը.

2) 2015 թվականի ընթացքում իրենց ենթակայությամբ գործող կազմակերպություններն ապահովել հաշվառված հիմնական ֆոնդերի հավաքածուները թվայնացնելու համար անհրաժեշտ տեխնիկական սարքաշարերով ու կապի միջոցներով և ստեղծել համապատասխան պայմաններ՝ նշված հավաքածուները սույն որոշման N 1 հավելվածով սահմանված պահանջների համաձայն թվայնացնելու համար.

3) 2015 թվականից սկսած` յուրաքանչյուր տարվա նոյեմբերին ապահովել իրենց ենթակայությամբ գործող կազմակերպությունների համապատասխան մասնագետների մասնակցությունը Հայաստանի Հանրապետության մշակույթի նախարարության կողմից կազմակերպվող վերապատրաստման դասընթացներին.

4) համաձայն N 1 հավելվածով սահմանված պահանջների` 2016 թվականի հունվարից սկսած` ապահովել իրենց ենթակայությամբ գործող կազմակերպությունների կողմից հաշվառված հիմնական ֆոնդերի հավաքածուների տեղեկույթի թվայնացման աշխատանքների իրականացումը.

5) 2016 թվականից սկսած` յուրաքանչյուր եռամսյակին հաջորդող 15 աշխատանքային օրվա ընթացքում ապահովել իրենց ենթակայությամբ գործող կազմակերպությունների կողմից հաշվառված հիմնական ֆոնդերի հավաքածուների թվայնացված տեղեկույթի տրամադրումը Հայաստանի Հանրապետության մշակույթի նախարարությանը` համաձայն սույն որոշման N 1 հավելվածով սահմանված պահանջների.

6) մինչև 2020 թվականն ավարտել 2013 թվականի տվյալներով առկա հիմնական ֆոնդերի հավաքածուների թվայնացման և տեղեկույթի տրամադրման գործընթացը:

5. Հայաստանի Հանրապետության գործադիր իշխանության հանրապետական մարմինների ղեկավարներին` մշակութային արժեքների էլեկտրոնային տեղեկատվական շտեմարանում տեղադրելու համար Հայաստանի Հանրապետության մշակույթի նախարարությանը տրամադրել այլ պետությունների տարածքում առկա ազգային մշակութային արժեքների վերաբերյալ իրենց տրամադրության տակ գտնվող տեղեկույթը:

6. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Կ Ա Ր Գ

ՄՇԱԿՈՒԹԱՅԻՆ ԱՐԺԵՔՆԵՐԻ ԷԼԵԿՏՐՈՆԱՅԻՆ ՏԵՂԵԿԱՏՎԱԿԱՆ ՇՏԵՄԱՐԱՆԻ ՍՏԵՂԾՄԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով կարգավորվում են մշակութային արժեքների էլեկտրոնային տեղեկատվական շտեմարանի (այսուհետ` շտեմարան) ստեղծման հետ կապված հարաբերությունները:

2. Շտեմարանն էլեկտրոնային (թվային) համակարգ է, որն ընդգրկելու է մշակութային շարժական արժեքների վերաբերյալ թվայնացված, հանրության համար հասանելի տեղեկույթը (անկախ դրանց սեփականության ձևից և ստեղծման ժամանակից): Մշակութային շարժական արժեքները (այսուհետ` արժեք) ներառում են պետական, ինչպես նաև պետական սեփականություն չհանդիսացող թանգարանային, արխիվային և ձեռագիր ու տպագիր հավաքածուները:

3. Շտեմարանում արժեքների վերաբերյալ տեղեկույթը ներկայացվելու է դրանց մասին ընդհանուր պատկերացում կազմելու սահմաններում: Այն կարող է ներկայացվել նաև անգլերեն և ռուսերեն տարբերակներով:

4. Շտեմարանի ստեղծման հիմնական նպատակը Հայաստանի Հանրապետության մշակութային շարժական ժառանգության, ինչպես նաև այլ պետությունների տարածքում գտնվող ազգային մշակութային արժեքների վերաբերյալ տեղեկույթը միասնական ձևաչափով մեկ համակարգում հավաքելը, համակարգելը և հանրահռչակելն է:

5. Շտեմարանի ստեղծումը ներառում է համապատասխան ծրագրերի մշակումն ու ներդրումը, անհրաժեշտ սարքաշարերի ձեռքբերումը և տեղակայումը, առանձին կապուղու վարձակալումը, արժեքների վերաբերյալ տեղեկույթին տիրապետող ու այն տրամադրող անձանցից (այսուհետ` սուբյեկտ) այդ տեղեկույթի ստացումը, միասնական ձևաչափին համապատասխանեցումն ու մուտքագրումը և կայքէջում այն ներկայացնելը, ինչպես նաև անհրաժեշտ տեղեկույթը ձեռք բերելու ուղիների նշումը:

6. Շտեմարանը կազմված է կենտրոնական սպասարկող հանգույցից (սերվեր), դրա ծրագրային ապահովումից և սուբյեկտների համակարգչային տեղեկատվական ցանցերին միացնող կապուղիներից (այսուհետ` կապուղի):

7. Շտեմարանի կենտրոնական հանգույցն ունենալու է արժեքների վերաբերյալ ստացված տեղեկույթը միասնական ձևաչափին համապատասխանեցնող և սպասարկող ծրագրեր ու համապատասխան գործիքներ:

8. Սուբյեկտները շտեմարանին տեղեկույթը տրամադրում են Հայաստանի Հանրապետության մշակույթի նախարարության կողմից վարձակալված կապուղով (վերջինին միացված չլինելու դեպքում` էլեկտրոնային կրիչով):

9. Շտեմարանը վարում է Հայաստանի Հանրապետության մշակույթի նախարարությունը: Շտեմարանը վարող անձն իրականացնում է միայն մշակութային շարժական ժառանգության հանրահռչակման անվճար ծառայություն:

10. Շտեմարանը գործելու է շուրջօրյա` ապահովելով պահպանվող տեղեկույթի անվտանգությունն ու սուբյեկտների հետ անխափան կապը:

11. Սուբյեկտներից վերցված տեղեկույթը շտեմարանում մշակվելուց և համակարգվելուց հետո անվտանգության նպատակով վերարտադրվում ու պահպանվում է համապատասխան կրիչների վրա, ապա ներկայացվում կայքէջում:

12. Շտեմարանի տեղեկույթն այցելուների համար պետք է դիտելի լինի համապատասխան կայքէջի միջոցով` սույն կարգի 23-րդ կետի պահանջների սահմաններում:

II. ՇՏԵՄԱՐԱՆՈՒՄ ՏԵՂԵԿՈՒՅԹԻ ԸՆԴԳՐԿՈՒՄԸ

13. Շտեմարանում ընդգրկվելու են՝

1) պետական սեփականություն հանդիսացող արժեքների վերաբերյալ տեղեկույթը.

2) համայնքային սեփականություն հանդիսացող արժեքների վերաբերյալ տեղեկույթը (կամավորության սկզբունքով).

3) կամավորության սկզբունքով՝ ֆիզիկական և իրավաբանական անձանց սեփականությունը հանդիսացող արժեքների վերաբերյալ տեղեկույթը.

4) այլ պետությունների տարածքում գտնվող ազգային մշակութային արժեքների վերաբերյալ տեղեկույթը:

III. ՇՏԵՄԱՐԱՆՈՒՄ՝ ՊԵՏԱԿԱՆ ՍԵՓԱԿԱՆՈՒԹՅՈՒՆ ՀԱՆԴԻՍԱՑՈՂ ԱՐԺԵՔՆԵՐԻ ՎԵՐԱԲԵՐՅԱԼ ՏԵՂԵԿՈՒՅԹԻ ԸՆԴԳՐԿՈՒՄԸ

14. Շտեմարանում ընդգրկվող՝ պետական սեփականություն հանդիսացող արժեքների վերաբերյալ տեղեկույթը ներառում է՝

1) թանգարանների հիմնական ֆոնդերում հաշվառված հավաքածուների վերաբերյալ տեղեկույթը.

2) ձեռագիր և տպագիր հավաքածուների վերաբերյալ տեղեկույթը.

3) արխիվային հավաքածուների վերաբերյալ տեղեկույթը:

IV. ՇՏԵՄԱՐԱՆՈՒՄ՝ ՊԵՏԱԿԱՆ ՍԵՓԱԿԱՆՈՒԹՅՈՒՆ ՉՀԱՆԴԻՍԱՑՈՂ ԱՐԺԵՔՆԵՐԻ ՎԵՐԱԲԵՐՅԱԼ ՏԵՂԵԿՈՒՅԹԻ ԸՆԴԳՐԿՈՒՄԸ

15. Շտեմարանում կամավորության սկզբունքով կարող է ընդգրկվել նաև պետական սեփականություն չհանդիսացող արժեքների վերաբերյալ տեղեկույթը` համաձայն սեփականատերերի հայտերի: Հայտի ձևը հաստատվում է Հայաստանի Հանրապետության մշակույթի նախարարի հրամանով:

16. Պետական սեփականություն չհանդիսացող արժեքների վերաբերյալ տեղեկույթը շտեմարանում կարող է ընդգրկվել, եթե այն համապատասխանում է սույն կարգի 19-րդ, 20-րդ և 21-րդ կետերով սահմանված չափանիշներից որևէ մեկին:

17. Պետական սեփականություն չհանդիսացող, ինչպես նաև այլ պետությունների տարածքում գտնվող ազգային մշակութային արժեքների վերաբերյալ տեղեկույթը շտեմարանում ընդգրկելու գործընթացը կարգավորվում է համապատասխան պայմանագրերով կամ համաձայնագրերով, եթե դրանք համապատասխանում են սույն կարգի 19-րդ, 20-րդ և 21-րդ կետերով սահմանված չափանիշներից որևէ մեկին:

V. ՇՏԵՄԱՐԱՆՈՒՄ ԱՐԺԵՔՆԵՐԻ ՎԵՐԱԲԵՐՅԱԼ ՏԵՂԵԿՈՒՅԹԻ ԸՆԴԳՐԿՄԱՆ ՉԱՓԱՆԻՇՆԵՐԸ

18. Արժեքների վերաբերյալ տեղեկույթը շտեմարանում ընդգրկվելու է ըստ դրանց տեսակների` անկախ սեփականության ձևից և ստեղծման ժամանակից:

19. Շտեմարանում թանգարանների հավաքածուների վերաբերյալ տեղեկույթի ընդգրկման չափանիշներն են`

1) Հայաստանի Հանրապետության թանգարանային ֆոնդի առարկայացուցակում (ռեեստր) հաշվառված լինելը.

2) ազգային մշակութային արժեքների` այլ պետությունների թանգարանների հիմնական ֆոնդերի հաշվառման մատյաններում հաշվառված լինելը:

20. Շտեմարանում ձեռագիր և տպագիր հավաքածուների վերաբերյալ տեղեկույթի ընդգրկման չափանիշներն են`

1) ձեռագիր գիրք համարվելը.

2) գրավոր հուշարձան (հնատիպ, հնագույն և հազվագյուտ տպագիր գրականություն) համարվելը.

3) փորձաքննությամբ արժևորված փաստաթուղթ (գրականություն) համարվելը:

21. Շտեմարանում արխիվային հավաքածուների վերաբերյալ տեղեկույթի ընդգրկման չափանիշներն են`

1) ժողովրդի կյանքի հիշարժան դեպքերը, կենցաղը, մշակույթը, հասարակության և պետության զարգացումը, գիտության և ճարտարագիտության պատմությունը ներկայացնող` առանձնապես արժեքավոր և հազվագյուտ փաստաթուղթ, կինո-, ֆոտո-, ֆոնո-, տեսանյութ լինելը,

2) նշանավոր մարդկանց (պետական, քաղաքական, հասարակական, մշակութային գործիչների, ազգային հերոսների) կյանքն ու գործունեությունը ներկայացնելու գործում առանձնապես արժեքավոր և հազվագյուտ փաստաթուղթ, կինո-, ֆոտո-, ֆոնո-, տեսանյութ լինելը:

VI. ՇՏԵՄԱՐԱՆԻՆ ՏՐԱՄԱԴՐՎՈՂ ՏԵՂԵԿՈՒՅԹԻ ՊԱՀԱՆՋՆԵՐԸ

22. Շտեմարանին տեղեկույթը տրամադրվում է արժեքի հետևյալ բնութագրիչներով`

1) թեմատիկ պատկանելությունը կամ դասակարգումը (թեման, ենթաթեման, տեսակը` ըստ շտեմարանի ծրագրի ընտրանու).

2) անվանումը (անունը, վերնագիրը, խորագիրը).

3) ստեղծողի (ստեղծողների` հեղինակի, վարպետի, կազմողի, գրչի, ծաղկողի, պատվիրողի և (կամ) ստացողի, կատարողի, թարգմանչի, սցենարի հեղինակի, բեմադրող ռեժիսորի, օպերատորի, նկարչի, հնչյունային օպերատորի, պրոդյուսերի, բանասացի, գրառողի և ուրիշների) անունը, ազգանունը, ծածկանունը (եթե այդպիսիք կան) կամ արտադրողի անվանումը.

4) ստեղծման և (կամ) արտադրման վայրը.

5) ստեղծման և (կամ) արտադրման ժամանակը (թվագրումը).

6) նյութը.

7) չափսը (քաշ, ծավալ, էջ, սյունակ, տող, լայնություն, երկարություն (մետրաժ) և այլն` ըստ արժեքի առանձնահատկությունների).

8) քանակը (բաղադրիչները` լրակազմ, ներդիրներ, պատկերներ, ձևավորման և (կամ) զարդարման տարրեր, մասեր և այլն` ըստ արժեքի առանձնահատկությունների).

9) նկարագրությունը (բնութագրում, բովանդակություն, լեզու, գրային և (կամ) թվային և (կամ) պատկերային նշումներ ու նշաններ, ձևավորումը` նկարներ, պատկերներ, խորաններ, կիսախորաններ, ճակատազարդեր, զարդագրեր, լուսանցազարդեր, գույներ, գունային լուծումներ և այլն` ըստ արժեքի առանձնահատկությունների).

10) պատրաստման (ստեղծման) տեխնիկան (տեխնոլոգիա, գրատեսակ, ժապավենի տեսակ և այլն` ըստ արժեքի առանձնահատկությունների).

11) վիճակը.

12) պատկերը կամ լուսանկարը (տպագրման համար ոչ պիտանի խտությամբ, ձեռագրերի և ձայնագրությունների դեպքում` ընտրովի հատված կամ կադր, իսկ գրքերի դեպքում` տիտղոսաթերթ).

13) սուբյեկտի տառային պայմանանիշը (շիֆր) և հաշվառանիշը (գույքահամար), այլ պետություններում գտնվելու դեպքում` նաև պետությունը, պահպանողը:

VII. ՇՏԵՄԱՐԱՆԻ ՏԵՂԵԿՈՒՅԹԻ ՀԱՍԱՆԵԼԻՈՒԹՅՈՒՆԸ

23. Շտեմարանի կայքէջ այցելած անձանց համար դիտելի է արժեքների՝ միայն սույն կարգի 22-րդ կետի 1-7-րդ և 12-13-րդ ենթակետերով նախատեսված տեղեկույթը: Այցելուն դիտելի բնութագրիչներից յուրաքանչյուրով կարող է կատարել շտեմարանում ընդգրկված արժեքների փնտրում:

24. Բացի շտեմարանի արժեքների վերաբերյալ սույն կարգի 23-րդ կետով նախատեսված տեղեկույթից` այցելուն այլ տվյալներ կարող է ստանալ միայն դրանք պահպանող կազմակերպություններից` վերջիններիս կողմից ներկայացվող պայմաններով և փոխադարձ համաձայնությամբ:

VIII. ՇՏԵՄԱՐԱՆԻՆ ՏՐԱՄԱԴՐՎՈՂ ՏԵՂԵԿՈՒՅԹԻ ԹՎԱՅՆԱՑՈՒՄԸ

25. Պետական սեփականություն հանդիսացող արժեքների վերաբերյալ տեղեկույթը թվայնացնում են դրանք պահպանող կազմակերպությունները` սույն կարգի 22-րդ կետի պահանջների համաձայն:

26. Այն արժեքները, որոնց վերաբերյալ բացակայում է կամ ամբողջական չէ սույն կարգով սահմանված տեղեկույթը, Հայաստանի Հանրապետության մշակույթի նախարարության միջոցով ենթարկվում են փորձաքննության, և արդյունքում ստացված տեղեկույթը թվայնացվում է սույն կարգի 22-րդ կետի պահանջների համաձայն:

27. Պետական սեփականություն չհամարվող օբյեկտների վերաբերյալ տեղեկույթը թվայնացվում է դրանց սեփականատիրոջ կողմից կամ նրա և շտեմարանը վարող անձի միջև կնքված պայմանագրի հիման վրա:

Ց Ա Ն Կ

ՄՇԱԿՈՒԹԱՅԻՆ ԱՐԺԵՔՆԵՐԻ ԷԼԵԿՏՐՈՆԱՅԻՆ ՏԵՂԵԿԱՏՎԱԿԱՆ ՇՏԵՄԱՐԱՆԻՆ ՏԵՂԵԿՈՒՅԹ ՏՐԱՄԱԴՐՈՂ ԿԱԶՄԱԿԵՐՊՈՒԹՅՈՒՆՆԵՐԻ

Հայաստանի Հանրապետության կառավարության աշխատակազմի ղեկավար-նախարար

Դ. Հարությունյան