ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
Ո Ր Ո Շ ՈՒ Մ
4 սեպտեմբերի 2014 թվականի N 947-Ն
ՍԵՎԱՆԱ ԼՃԻ ԵՎ ՆՐԱ ՋՐՀԱՎԱՔ ԱՎԱԶԱՆԻ ՄՇՏԱԴԻՏԱՐԿՈՒՄՆԵՐԻ ՏՎՅԱԼՆԵՐԻ ՄԻԱՍՆԱԿԱՆ ԷԼԵԿՏՐՈՆԱՅԻՆ ՇՏԵՄԱՐԱՆԻ ՍՏԵՂԾՄԱՆ, ՏԵՂԵԿԱՏՎՈՒԹՅԱՆ ՀԱՎԱՔԱԳՐՄԱՆ, ԳՐԱՆՑՄԱՆ, ԱՄՓՈՓՄԱՆ ԵՎ ՏՐԱՄԱԴՐՄԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ
Հայաստանի Հանրապետության կառավարությունը որոշում է.
1. Հաստատել Սևանա լճի և նրա ջրհավաք ավազանի մշտադիտարկումների տվյալների միասնական էլեկտրոնային շտեմարանի ստեղծման, տեղեկատվության հավաքագրման, գրանցման, ամփոփման և տրամադրման կարգը` համաձայն հավելվածի:
2. Առաջարկել Հայաստանի Հանրապետության Նախագահին առընթեր Սևանա լճի հիմնահարցերի հանձնաժողովի նախագահին մշտադիտարկումների միասնական էլեկտրոնային շտեմարանի ստեղծումից հետո եռամսյա ժամկետում Հայաստանի Հանրապետության կառավարություն ներկայացնել`
1) Սևանա լճի և նրա ջրհավաք ավազանի մշտադիտարկումների տվյալների (դիտարկվող ցուցանիշների) ցանկը, ընտրված մշտադիտարկումների կետերը.
2) Սևանա լճի և նրա ջրհավաք ավազանի մշտադիտարկումների տվյալների գրառման գրանցամատյանների ձևերն ու դրանց վարման կարգը` համաձայնեցնելով մշտադիտարկումներ կատարող կազմակերպությունների հետ.
3) շտեմարանի տվյալների հայտատուներին տրամադրվող էլեկտրոնային փաստաթղթերի ձևերը:
3. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:
|
Հայաստանի Հանրապետության |
Հ. Աբրահամյան |
|
2014 թ. սեպտեմբերի 11 Երևան |
|
Հավելված ՀՀ կառավարության 2014 թվականի սեպտեմբերի 4-ի N 947-Ն որոշման |
Կ Ա Ր Գ
ՍԵՎԱՆԱ ԼՃԻ ԵՎ ՆՐԱ ՋՐՀԱՎԱՔ ԱՎԱԶԱՆԻ ՄՇՏԱԴԻՏԱՐԿՈՒՄՆԵՐԻ ՏՎՅԱԼՆԵՐԻ ՄԻԱՍՆԱԿԱՆ ԷԼԵԿՏՐՈՆԱՅԻՆ ՇՏԵՄԱՐԱՆԻ ՍՏԵՂԾՄԱՆ, ՏԵՂԵԿԱՏՎՈՒԹՅԱՆ ՀԱՎԱՔԱԳՐՄԱՆ, ԳՐԱՆՑՄԱՆ, ԱՄՓՈՓՄԱՆ ԵՎ ՏՐԱՄԱԴՐՄԱՆ
I. ԸՆԴՀԱՆՈՒՐ ԴՐՈՒՅԹՆԵՐ
1. Սույն կարգով կարգավորվում են Հայաստանի Հանրապետության Սևանա լճի և նրա ջրհավաք ավազանի, մշտադիտարկումների միասնական էլեկտրոնային շտեմարանի ստեղծման, տեղեկատվության հավաքագրման, գրանցման, ամփոփման և տրամադրման գործընթացի հետ կապված հարաբերությունները:
2. Սևանա լճի և նրա ջրհավաք ավազանի մշտադիտարկումների միասնական էլեկտրոնային շտեմարանի (այսուհետ՝ շտեմարան) ստեղծման նպատակը Սևանա լճին վերաբերող մշտադիտարկումների տվյալների հավաքագրման, գրանցման, ամփոփման և տրամադրման միասնականության ապահովումն է, տվյալների միասնական հենքի ստեղծումը:
3. Շտեմարանի ամբողջությունն ու անվտանգությունն ապահովվում են օգտագործողների հասանելիության սահմանափակման (օգտագործողի անվան, գաղտնաբառի և (կամ) էլեկտրոնային հավաստագրի միջոցով) և տվյալների փոփոխման պատմության պահպանման միջոցով: Պարբերաբար (շաբաթական, ամսական, տարեկան) պահպանվում են շտեմարանում առկա պահուստային տվյալները:
4. Շտեմարանի տեխնիկական սպասարկումն իրականացնում ու անվտանգությունն ապահովում է «Հայաստանի Հանրապետության գիտությունների ազգային ակադեմիայի ինֆորմատիկայի և ավտոմատացման պրոբլեմների ինստիտուտ» պետական ոչ առևտրային կազմակերպությունը (համաձայնությամբ) (այսուհետ՝ ինստիտուտ):
II. ՏԵՂԵԿԱՏՎՈՒԹՅԱՆ ՀԱՎԱՔԱԳՐՄԱՆ ԿԱՐԳԸ
5. Մշտադիտարկման ենթակա ցուցանիշների ցանկը կազմվում է Եվրոպական միության Ջրային շրջանակային դիրեկտիվով (ՋՇԴ) (2000/60/EC) ընդունված մակերևութային ջրերի ընդհանուր ցուցանիշների, առաջնային և երկրորդական աղտոտիչների ու ստանդարտների ցանկին համապատասխան` այն տեղայնացնելով` հաշվի առնելով Սևանա լճի առանձնահատկությունները: Շտեմարանում գրանցվող տվյալները տրամադրում են Հայաստանի Հանրապետության կառավարության կողմից լիազորված` Սևանա լճում և նրա ջրհավաք ավազանում մշտադիտարկումներ կատարող «Սևան» ազգային պարկ» պետական ոչ առևտրային կազմակերպությունը, «Շրջակա միջավայրի վրա ներգործության մոնիթորինգի կենտրոն» պետական ոչ առևտրային կազմակերպությունը, «Հիդրոերկրաբանական մոնիթորինգի կենտրոն» պետական ոչ առևտրային կազմակերպությունը, «Հիդրոօդերևութաբանության և մոնիթորինգի պետական ծառայություն» պետական ոչ առևտրային կազմակերպությունը, Հայաստանի Հանրապետության գիտությունների ազգային ակադեմիայի հիդրոէկոլոգիայի և ձկնաբանության ինստիտուտը (այսուհետ՝ կազմակերպություններ): Մշտադիտարկումների կատարման ժամանակ մշտադիտարկումների կետերի ընտրման մեթոդաբանությունը պետք է համապատասխանի Եվրոպական միության Ջրի շրջանակային դիրեկտիվով (ՋՇԴ) ընդունված մեթոդաբանությանը: Մշտադիտարկումների կատարման ընթացքում նմուշառման և նմուշներում ցուցանիշների չափման մեթոդաբանությունը պետք է համապատասխանի Եվրոպական միության Ջրի շրջանակային դիրեկտիվով (ՋՇԴ) ընդունված չափումների ու անալիզների կատարման մեթոդաբանությանը:
6. Շտեմարանում գրանցվող Սևանա լճի և նրա ջրհավաք ավազանի մշտադիտարկման տվյալները պետք է բովանդակեն դիտարկվող ցուցանիշների՝
1) անվանումները.
2) չափի միավորները.
3) մեծության հնարավոր սահմանները.
4) չափման ճշտությունը.
5) չափման վայրը և (կամ) աշխարհագրական կոորդինատները.
6) չափման ամսաթիվը և ժամանակը:
7. Մշտադիտարկումները կատարելու և ստացված արդյունքները ներկայացնելու հաճախականությունն ու պարբերականությունը սահմանվում են մշտադիտարկումներ կատարող կազմակերպությունների կողմից սահմանված կարգով:
8. Տվյալները շտեմարանում գրանցվում են դիտարկումների կատարումից և ստացված արդյունքների մշակումից հետո երեք աշխատանքային օրվա ընթացքում:
9. Գրանցված և հաստատված տվյալները կարող են փոփոխության ենթարկվել միայն դրանք տրամադրած կազմակերպության կողմից, եթե՝
1) ճշգրտվել են հերթական մշտադիտարկման արդյունքում.
2) գրանցված և հաստատված տվյալներում տեղ են գտել մեխանիկական սխալներ:
III. ՄՇՏԱԴԻՏԱՐԿՈՒՄՆԵՐԻ ՏՎՅԱԼՆԵՐԻ ԳՐԱՆՑՄԱՆ ԿԱՐԳԸ
10. Մշտադիտարկումներ կատարող կազմակերպությունները սույն կարգի 6-րդ կետով նախատեսված ցուցանիշները գրանցում են շտեմարանի համապատասխան մասում:
IV. ԳՐԱՆՑՎԱԾ ՏՎՅԱԼՆԵՐԻ ԱՄՓՈՓՄԱՆ ԿԱՐԳԸ
11. Գրանցված տվյալներն ամփոփվում են մշտադիտարկումներ կատարող կազմակերպությունների կողմից հաստատված կարգերի համաձայն:
V. ՏԵՂԵԿԱՏՎՈՒԹՅԱՆ ՏՐԱՄԱԴՐՄԱՆ ԿԱՐԳԸ
12. Շտեմարանում գրանցված մշտադիտարկումների տվյալները տրամադրվում են Սևանա լճում և նրա ջրհավաք ավազանում մշտադիտարկումներ կատարող կազմակերպություններին, պետական կառավարման մարմիններին և տեղական ինքնակառավարման մարմիններին:
13. Նախագծահետախուզական, գիտահետազոտական հաստատություններին, հասարակական կազմակերպություններին, իրավաբանական ու ֆիզիկական անձանց և այլ հայտատուներին տեղեկատվությունը տրամադրվում է տվյալների ամփոփ հենքից:
14. Շտեմարանի տվյալները Սևանա լճում և նրա ջրհավաք ավազանում մշտադիտարկումներ կատարող կազմակերպություններին տրամադրվում են տեքստային, թվային, գրաֆիկական տվյալներով, դրանցից կատարված քաղվածքներով, հատկանշական աղյուսակներով՝ էլեկտրոնային փաստաթղթի ձևով:
15. Պետական և ծառայողական գաղտնիք պարունակող տեղեկատվությունները տրամադրվում են «Պետական և ծառայողական գաղտնիքի մասին» Հայաստանի Հանրապետության օրենքով սահմանված կարգով:
|
Հայաստանի Հանրապետության |
Դ. Հարությունյան |