Հայաստանի Հանրապետության նախագահի

հ ր ա մ ա ն ա գ ի ր ը

1992 թվականին տնտեսական կապերի, արտադրանքի եվ ապրանքների առաքումների մասին

Հայաստանի Հանրապետության տարածքում գտնվող ձեռնարկությունների ու կազմակերպությունների համար, անկախ նրանց սեփականության ձևից և գերատեսչական ենթակայությունից, 1992 թվականին տնտեսական կապեր հաստատելու և արտադրատեխնիկական նշանակություն ունեցող արտադրանքի ու ապրանքների /աշխատանքների, ծառայությունների/ առաքումների համար անհրաժեշտ պայմաններ ստեղծելու նպատակով որոշում եմ.

1. Սահմանել, որ արտադրանքի ու ապրանքների /աշխատանքների, ծառայությունների/ մատակարարման կապերը հաստատվում են մատակարարների և գնորդների /սպառողների/ միջև անմիջականորեն կնքված պայմանագրերի հիման վրա:

Պետականորեն կարգավորվող արտադրանքի գծով մատակարարները ինքնուրույն են իրացնում իրենց արտադրանքը ու ապրանքները /աշխատանքները, ծառայությունները/ գնորդներին /սպառողներին/` կողմերի փոխշահավետ և փոխադարձ պատասխանատվությունը սահմանող պայմանագրերի հիման վրա, Հայաստանի Հանրապետության կառավարության կողմից սահմանված կարգով:

2. Արտադրանքի և ապրանքների /աշխատանքների, ծառայությունների/ մատակարարման պայմանագրեր կնքելիս, մատակարարներն առաջին հերթին պետք է հաշվի առնեն այն գնորդների /սպառողների/ շահերը, որոնց հետ արդեն ձևավորված են հաստատուն /նախորդ երկու և ավելի տարիների ընթացքում անընդհատ գործող/ տնտեսական կապեր:

Ձևավորված տնտեսական կապերի հարկադրական պահպանումը գնորդի /սպառողի/ միակողմանի պահանջով կարող է իրականացվել միայն այն դեպքում, եթե այդ արտադրանքի և ապրանքների /աշխատանքների, ծառայությունների/ մատակարարումը նպաստում է աղետի գոտու վերականգնմանը:

3. Հայաստանի Հանրապետության կառավարությանը` մեկշաբաթյա ժամկետում սահմանել`

ա/ Հայաստանի Հանրապետության պետական կարիքների համար արտադրանքի և ապրանքների /աշխատանքների, ծառայությունների/ կենտրոնացված կարգավորման կարգը, նկատի ունենալով 1992 թվականի հունվար ամսից սկսած Հայաստանի Հանրապետությունից անկախ պետությունների համագործակցության անդամ պետություններ առաքվող արտադրանքի և ապրանքների /աշխատանքների, ծառայությունների/ քվոտավորում ու լիցենզավորում մտցնելը.

 բ/ Արտադրանքի և ապրանքների /աշխատանքների, ծառայությունների/ առաքումների հաշվարկներում գների կիրառման կարգը. ստեղծել տնտեսական կարգավորիչների համակարգ` ուղղված կնքված պայմանագրերով մատակարարումների ապահովմանը, ինչպես նաև մենաշնորհատեր արտադրողների թելադրանքի խոչընդոտմանը:

4. Սույն հրամանագիրը ուժի մեջ է մտնում 1992 թվականի հունվարի 5-ից:

Հայաստանի Հանրապետության Նախագահ`	Լ. Տեր-Պետրոսյան
Երևան 4 հունվարի 1992 թ. ՆՀ-57