ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՎՃՌԱԲԵԿ ԴԱՏԱՐԱՆ

ՀՀ վերաքննիչ քաղաքացիական դատարանի որոշում  Քաղաքացիական գործ թիվ ԵԿԴ/2171/02/09	Քաղաքացիական գործ թիվ ԵԿԴ/2171/02/09 2012 թ.
Նախագահող դատավոր՝   Տ. Սահակյան

Դատավորներ՝	Կ. Հակոբյան
	Տ. Նազարյան

Հայաստանի Հանրապետության վճռաբեկ դատարանի քաղաքացիական և վարչական պալատը
(այսուհետ՝ Վճռաբեկ դատարան)

2012 թվականի դեկտեմբերի 25-ին

դռնբաց դատական նիստում, քննելով «Երևան Ջուր» ՓԲԸ-ի (այսուհետ` Ընկերություն) վճռաբեկ բողոքը ՀՀ վերաքննիչ քաղաքացիական դատարանի 09.07.2012 թվականի որոշման դեմ՝ ըստ «Արարատ-Լադա» ՓԲԸ-ի (այսուհետ` Կազմակերպություն) հայցի ընդդեմ Ընկերության, «Էն Էլ Ջի» ՍՊԸ-ի և ՀՀ ֆինանսների նախարարության` վնասը հատուցելու և գումար բռնագանձելու պահանջների մասին,

Պ Ա Ր Զ Ե Ց

1. Գործի դատավարական նախապատմությունը

Դիմելով դատարան՝ Կազմակերպությունը պահանջել է Ընկերությունից բռնագանձել 34.763.483 ՀՀ դրամ` որպես պատճառված վնասի հատուցում և 3.400.000 ՀՀ դրամ` որպես փաստաբանի վարձատրության գումար:

Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի (դատավոր Գ.Կարախանյան) (այսուհետ` Դատարան) 02.02.2012 թվականի վճռով Ընկերության դեմ ուղղված պահանջների մասով հայցը մերժվել է, իսկ «Էն Էլ Ջի» ՍՊԸ-ի և ՀՀ ֆինանսների նախարարության դեմ ուղղված պահանջների մասով քաղաքացիական գործի վարույթը կարճվել է` հայցից հրաժարվելու հիմքով:

ՀՀ վերաքննիչ քաղաքացիական դատարանի (այսուհետ` Վերաքննիչ դատարան) 09.07.2012 թվականի որոշմամբ Կազմակերպության վերաքննիչ բողոքը բավարարվել է` Դատարանի 02.02.2012 թվականի վճիռը մասնակիորեն` հայցը մերժելու մասով բեկանվել է և փոփոխվել` հայցը բավարարվել է:

Սույն գործով վճռաբեկ բողոք է ներկայացրել Ընկերությունը:

Վճռաբեկ բողոքի պատասխան չի ներկայացվել:

Կազմակերպությունը և Ընկերությունը Վճռաբեկ դատարան են ներկայացրել 26.10.2012 թվականի հաշտության համաձայնությունը:

2. Վճռաբեկ դատարանի պատճառաբանությունները և եզրահանգումը

ՀՀ քաղաքացիական դատավարության օրենսգրքի 33-րդ հոդվածի համաձայն՝ կողմերը դատավարության ցանկացած փուլում կարող են գործն ավարտել հաշտության համաձայնությամբ։

Կողմերի միջև կայացված հաշտության համաձայնությունը ձևակերպվում է գրավոր։

ՀՀ քաղաքացիական դատավարության օրենսգրքի 109-րդ հոդվածի 7-րդ կետի համաձայն՝ դատարանը կարճում է գործի վարույթը, եթե դատարանը հաստատել է կնքված հաշտության համաձայնությունը։

Ուսումնասիրելով Կազմակերպության և Ընկերության 26.10.2012 թվականի հաշտության համաձայնությունը` Վճռաբեկ դատարանը գտնում է, որ այն չի հակասում օրենքին և այլ իրավական ակտերին, չի խախտում այլ անձանց իրավունքներն ու օրինական շահերը։

Այսպիսով, Վճռաբեկ դատարանը գտնում է, որ Կազմակերպության և Ընկերության ներկայացրած հաշտության համաձայնությունը պետք է հաստատել։

Ելնելով վերոգրյալից և ղեկավարվելով ՀՀ քաղաքացիական դատավարության օրենսգրքի 33-րդ, 240-241²-րդ հոդվածներով` Վճռաբեկ դատարանը

Ո Ր Ո Շ Ե Ց

1. Հաստատել «Արարատ-Լադա» ՓԲԸ-ի և «Երևան Ջուր» ՓԲԸ-ի միջև կնքված 26.10.2012 թվականի հաշտության համաձայնությունը հետևյալ բովանդակությամբ.

«Հաշտության համաձայնություն»

ք. Երևան

«26» հոկտեմբերի 2012 թ.

«Արարատ-Լադա» ՓԲ ընկերությունը, ի դեմս տնօրեն Կ.Շախմուրադյանի, որը գործում է ընկերության կանոնադրության հիման վրա, մի կողմից և «Երևան Ջուր» ՓԲ ընկերությունը, ի դեմս ներկայացուցիչ Լևոն Բաղդասարյանի (լիազորագիր` տրված «Երևան Ջուր» ՓԲ ընկերության գլխավոր տնօրենի կողմից առ 02.11.2011 թիվ), մյուս կողմից, քաղաքացիական գործով ըստ հայցի «Արարատ-Լադա» ՓԲ ընկերության ընդդեմ «Երևան Ջուր» ՓԲ ընկերության` գումար բռնագանձելու պահանջի մասին, կնքեցինք սույն հաշտության համաձայնությունը հետևյալի մասին.

1. «Երևան Ջուր» ՓԲ ընկերությունը սույն հաշտության համաձայնությունը դատարանի կողմից հաստատվելուց հետո 30 (երեսուն) բանկային օրվա ընթացքում «Արարատ-Լադա» ՓԲ ընկերությանը վճարում է 13.784.800 (տասներեք միլիոն յոթ հարյուր ութսունչորս հազար ութ հարյուր) ՀՀ դրամ` փլված պատի վերականգման շինարարական աշխատանքների համար և 345.000 (երեք հարյուր քառասունհինգ հազար) ՀՀ դրամ` որպես հայցվորի կողմից հայցադիմումի ներկայացման համար նախապես վճարված պետական տուրքի մասնակի հատուցում:

2. Կողմերը համաձայնվում են, որ սույն քաղաքացիական գործով վճռաբեկ բողոքի համար սահմանված 1.000.000 (մեկ միլիոն) ՀՀ դրամ և վերաքննիչ բողոքի համար սահմանված 1.420.903 (մեկ միլիոն չորս հարյուր քսան հազար ինն հարյուր երեք) ՀՀ դրամ պետական տուրքի գումարները վճարում է «Երևան Ջուր» ՓԲ ընկերությունը:

3. Կողմերը հավաստում են, որ սույն հաշտության համաձայնությամբ չեն խախտվում երրորդ անձանց իրավունքները և օրինական շահերը:

4. Կողմերը հավաստում են, որ հաշտության համաձայնության 1-ին կետով նախատեսված պարտավորության կատարումից բացի սույն քաղաքացիական գործով միմյանց նկատմամբ որևէ այլ գույքային կամ ոչ գույքային, այդ թվում` փաստաբանական ծառայության հետ կապված, պահանջներ չունեն, իսկ «Արարատ-Լադա» ՓԲ ընկերությունը հրաժարվում է թիվ ԵԿԴ/2171/02/09 քաղաքացիական գործով իր բոլոր պահանջներից:

5. Կողմերն ընդունում են, որ սույն հաշտության համաձայնությունը կամովին չկատարելու դեպքում այն օրենքով սահմանված կարգով կկատարվի ՀՀ ԱՆ ԴԱՀԿ ծառայության միջոցով:

6. Կողմերին հայտնի է սույն հաշտության համաձայնությունը դատարանի կողմից հաստատվելու դատավարական հետևանքները:

7. Կողմերը խնդրում են հաստատել սույն հաշտության համաձայնությունը և կարճել թիվ ԵԿԴ/2171/02/09 քաղաքացիական գործի վարույթը:

«Արարատ-Լադա» ՓԲԸ –ի տնօրեն` Կ.Շախմուրադյան (ստորագրություն, կնիք)

«Երևան Ջուր» ՓԲԸ-ի ներկայացուցիչ` Լ.Բաղդասարյան (ստորագրություն)»:

2. ՀՀ վերաքննիչ քաղաքացիական դատարանի 09.07.2012 թվականի որոշումը բեկանել և քաղաքացիական գործի վարույթը կարճել։

3. Դատական ծախսերի բաշխման հարցը համարել լուծված` այն հաշտության համաձայնության մեջ նախատեսված լինելու հիմքով:

4. Որոշումն օրինական ուժի մեջ է մտնում հրապարակման պահից, վերջնական է և ենթակա չէ բողոքարկման։

Նախագահող`	Ե. Խունդկարյան
Դատավորներ`	Գ. Հակոբյան
	Վ. ԱԲԵԼՅԱՆ
	Ս. Անտոնյան
	Վ. Ավանեսյան
	Ա. Բարսեղյան
	Մ. Դրմեյան
	Է. Հայրիյան
	Տ. Պետրոսյան
	Ե. Սողոմոնյան