ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

8 սեպտեմբերի 2011 թվականի N 1396-Ն

ՀՈՂԻ ԲԵՐՐԻ ՇԵՐՏԻ OԳՏԱԳՈՐԾՄԱՆ ԿԱՐԳԸ ՀԱՍՏԱՏԵԼՈՒ, ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2002 ԹՎԱԿԱՆԻ ՍԵՊՏԵՄԲԵՐԻ 19-Ի N 1622-Ն ՈՐՈՇՈՒՄՆ ՈՒԺԸ ԿՈՐՑՐԱԾ ՃԱՆԱՉԵԼՈՒ ԵՎ 2001 ԹՎԱԿԱՆԻ ԱՊՐԻԼԻ 12-Ի N 286-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ

Հայաստանի Հանրապետության հողային օրենսգրքի 36-րդ հոդվածի 5-րդ կետին համապատասխան` Հայաստանի Հանրապետության կառավարությունը որոշում է.

1. Հաստատել՝

1) հողի բերրի շերտի օգտագործման կարգը` համաձայն N 1 հավելվածի.

2) հողի բերրի շերտի օգտագործման հաշվառման ձևը` համաձայն N 2 հավելվածի:

2. Ուժը կորցրած ճանաչել Հայաստանի Հանրապետության կառավարության 2002 թվականի սեպտեմբերի 19-ի «Հողի բերրի շերտի օգտագործման կարգը հաստատելու մասին» N 1622-Ն որոշումը։

3. Հայաստանի Հանրապետության կառավարության 2001 թվականի ապրիլի 12-ի «Պետական և համայնքային սեփականություն հանդիսացող հողամասերի օտարման, կառուցապատման իրավունքի և օգտագործման տրամադրման կարգը հաստատելու մասին» N 286-Ն որոշման մեջ կատարել փոփոխություն՝ ուժը կորցրած ճանաչել որոշման հավելվածի 65-րդ կետը:

4. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

Հայաստանի Հանրապետության վարչապետ	Տ. Սարգսյան
2011 թ. հոկտեմբերի 7 Երևան

Հավելված N 1 ՀՀ կառավարության 2011 թվականի սեպտեմբերի 8-ի N 1396-Ն որոշման

Կ Ա Ր Գ

ՀՈՂԻ ԲԵՐՐԻ ՇԵՐՏԻ OԳՏԱԳՈՐԾՄԱՆ

1. Սույն կարգով սահմանվում են Հայաստանի Հանրապետության տարածքում հողի բերրի շերտի (այսուհետ` բերրի շերտ) նպատակային և արդյունավետ օգտագործման հետ կապված հարաբերությունները:

2. Բերրի շերտի արդյունավետ օգտագործումը ներառում է նաև դրա հանումը, տեղափոխումը, պահպանումը և հաշվառումը:

3. Բերրի շերտը հողային ծածկույթի վերին շերտի բուսահողն է, որն օգտագործվում է հողերի բարելավման, կանաչապատման, ռեկուլտիվացման նպատակներով: Այն կարող է օգտագործվել նաև ջերմոցային տնտեսությունների վարման նպատակներով:

4. Հողամասերի սեփականատերերը, օգտագործողները պարտավոր են հողերի խախտման հետ կապված աշխատանքներ կատարելիս իրականացնել բերրի շերտի հանումը, պահպանումն ու օգտագործումը:

5. Բերրի շերտի օգտագործման ժամանակ պետք է բացառվեն բարելավվող տարածքների աղտոտումը վնասատուներով, մարդու, կենդանիների և բույսերի վարակիչ հիվանդությունների հարուցիչներով, մոլախոտերի սերմերով, վտանգավոր քիմիական նյութերով, այդ թվում` թունաքիմիկատներով, բույսերի վնասատուների դեմ պայքարի այլ միջոցներով:

6. Բերրի շերտը հանելու, պահեստավորելու և պահպանելու ընթացքում ձեռնարկվում են միջոցներ, որոնք բացառում են դրա որակական հատկանիշների վատթարացումը: Ջրային և հողմնային հողատարումից զերծ պահելու համար պահեստավորված հողաթմբերը ծածկվում են խոտաբույսերով կամ իրականացվում են այլ միջոցառումներ` հողաթմբերի ամրացում, ծածկում և այլն:

7. Բերրի շերտը կարող է հանվել քաղաքաշինական գործունեության իրականացման, օգտակար հանածոների արդյունահանման դեպքերում, ինչպես նաև այն գյուղատնտեսական նշանակության հողամասերից, որոնց հզորությունը կազմում է 1,5 մետր և ավելի:

8. Այն դեպքերում, երբ օգտագործվող հողամասը գյուղատնտեսական շրջանառության վերադարձնել հնարավոր չէ (քաղաքաշինական և այլ շինարարական աշխատանքների դեպքերում), ապա բերրի շերտը տեղափոխվում է այնտեղ, որտեղ հողի բարելավման կամ իրացման անհրաժեշտություն կա:

9. Այն դեպքերում, երբ հողամասը ենթակա է վերականգնման (օգտակար հանածոների արդյունահանում, երկրաբանահետախուզական և այլ ժամանակավոր աշխատանքներ), ապա բերրի շերտը տեղափոխվում և պահպանվում է վերականգնվող հողամասի մոտ, որպես կանոն, գյուղատնտեսության համար ոչ պիտանի հողերի վրա:

10. Այն դեպքերում, երբ բերրի շերտը հանվում է գյուղատնտեսական հողամասերից, որոնց հզորությունը կազմում է 1,5 մետր և ավելի, ապա բերրի շերտի հանելուց հետո հողի հզորությունը չի կարող պակաս լինել քան 1.0 մետրը:

11. Բերրի շերտի պահպանությունն իրականացվում է հողի սեփականատիրոջ կամ օգտագործողի միջոցների հաշվին:

12. Պետական կամ համայնքային սեփականություն հանդիսացող հողամասերից բերրի շերտը հանելու դեպքում բերրի շերտի տեղափոխումն իրականացվում է այն անձի հաշվին, ում կարիքների համար օգտագործվելու է բերրի շերտը, այլ անձանց սեփականությունը հանդիսացող հողամասերից բերրի շերտը հանելու դեպքում բերրի շերտի տեղափոխման ծախսերի բաշխումն իրականացվում է պայմանագրով սահմանված կարգով:

13. Մեկ հողամասի կամ նույն սեփականատիրոջը պատկանող տարբեր հողամասերի սահմաններում գյուղատնտեսական գործունեություն իրականացնելու համար հողի բերրի շերտը կարելի է հանել ու տեղափոխել առանց սահմանափակման:

14. Բերրի շերտը հողամասից հողամաս տեղափոխելու համար, դրա նախաձեռնողը, համապատասխան գրավոր համաձայնություն է ստանում հողամասի սեփականատիրոջից, որտեղ նշվում են տեղափոխվող բերրի շերտի ծավալը, տեղափոխելու նպատակն ու ժամկետները: Համայնքային սեփականություն հանդիսացող հողամասերից բերրի շերտի տեղափոխման համաձայնությունը տալիս է համայնքի ղեկավարը, իսկ պետական սեփականության հողամասերից` Հայաստանի Հանրապետության համապատասխան մարզպետը:

15. Եթե հողամասի սեփականատերը հանդիսանում է պետությունը կամ համայնքը, ապա համապատասխան համայնքի ղեկավարը կամ մարզպետը 5 աշխատանքային օրվա ընթացքում պատասխանում է նախաձեռնողին` բերրի շերտը հողամասից հողամաս տեղափոխելու համար իր համաձայնության կամ անհամաձայնության մասին: Հինգ աշխատանքային օրվա ընթացքում չպատասխանելու դեպքում համաձայնությունը համարվում է տրված՝ բացառությամբ սույն կարգի 17-րդ կետում նշված հողերի:

16. Բերրի շերտը տեղափոխելու համաձայնությունը չի կարող տրվել այն դեպքում, երբ սեփականատերն ունի`

1) հողերի յուրացման ծրագիր.

2) վերականգնման (ռեկուլտիվացիայի) ենթակա խախտված հողեր.

3) գյուղատնտեսական նշանակության հող, որի հզորությունը 1,5 մետրից պակաս է.

4) աղտոտված հող` վնասատուներով, մարդու, կենդանիների և բույսերի վարակիչ հիվանդությունների հարուցիչներով, մոլախոտերի սերմերով, վտանգավոր քիմիական նյութերով, այդ թվում` թունաքիմիկատներով, բույսերի վնասատուների դեմ պայքարի այլ միջոցներով:

17. Հողամասի սեփականատերը բերրի շերտի տեղափոխման գրավոր համաձայնության մասին գրավոր իրազեկում է Հայաստանի Հանրապետության համապատասխան մարզպետին՝ մինչև տեղափոխման գործընթացն սկսելը` նշելով տեղափոխվող բերրի շերտի ծավալը, տեղափոխելու նպատակն ու ժամկետները:

18. Բերրի շերտի հանման, պահպանման, տեղափոխման և օգտագործման մասին տվյալները հաշվառվում ու գրանցվում են Հայաստանի Հանրապետության մարզպետարաններում` տարեկան տվյալների հաշվառման համապատասխան մատյանում:

19. Հաշվառման մատյանի բոլոր էջերը համարակալվում են, վերջին էջում կատարվում է նշում էջերի քանակի մասին և կնքվում Հայաստանի Հանրապետության համապատասխան մարզպետի կողմից:

20. Հաշվառման մատյանը պարունակում է բերրի շերտը հողամասից հողամաս տեղափոխելու նպատակով դրա նախաձեռնողի անունը, ազգանունը, հասցեն, սեփականատիրոջ կողմից տրված համաձայնության ամսաթիվը և բերրի շերտի օգտագործման հաշվառման ձևի հերթական համարը` համաձայն Հայաստանի Հանրապետության կառավարության 2011 թվականի սեպտեմբերի 8-ի N 1396-Ն որոշման N 2 հավելվածի:

21. Սույն կարգին համապատասխան բերրի շերտը հանելիս` դրա տեղափոխման և պահպանման աշխատանքները չիրականացնող հողի սեփականատերը և օգտագործողը պատասխանատվության են ենթարկվում Հայաստանի Հանրապետության օրենքով սահմանված կարգով:

Հայաստանի Հանրապետության կառավարության աշխատակազմի ղեկավար

Դ. Սարգսյան

Հ Ա Շ Վ Ա Ռ Մ Ա Ն  Ձ ԵՎ

ՀՈՂԻ ԲԵՐՐԻ ՇԵՐՏԻ ՕԳՏԱԳՈՐԾՄԱՆ

Մարզը (համայնքը) ___________________________________________________

Հանված հողի բերրի շերտի`

    մակերեսը (քառ. մետր) _________________________________________

    ծավալը (խոր. մետր) ___________________________________________

Տեղափոխված բերրի հողի ծավալը (խոր. մետր) ____________________________

Կուտակված (պահպանվող)

 բերրի հողի ծավալը (խոր. մետր) ___________________________

Ում է թույլատրվել ____________________________________________________

Թույլտվության ամսաթիվը _____________________________________________

Մարզպետը _________________________________ _______________________

                       (անունը, ազգանունը)                          (ստորագրությունը)

Կատարողը _________________________________ _______________________

                      (անունը, ազգանունը)                            (ստորագրությունը)

Հայաստանի Հանրապետության կառավարության աշխատակազմի ղեկավար

Դ. Սարգսյան