«Վավերացնում եմ»
Հայաստանի Հանրապետության
Նախագահ Ռ. Քոչարյան
24 հուլիսի 2006 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

16 հունիսի 2006 թվականի N 983-Ն

ԱՅԼ ՎԱՅՐ ԱՇԽԱՏԱՆՔԻ ԳՈՐԾՈՒՂՎՈՂ ԳՈՐԾԱԶՈՒՐԿԻ ԵՎ ԱՇԽԱՏԱՆՔ ՓՆՏՐՈՂ` ՉԶԲԱՂՎԱԾ ՀԱՇՄԱՆԴԱՄԻ ՆՅՈՒԹԱԿԱՆ ԾԱԽՍԵՐԻ ՀԱՏՈՒՑՄԱՆ ԿԱՐԳԸ ՍԱՀՄԱՆԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 1997 ԹՎԱԿԱՆԻ ՀՈՒՆԻՍԻ 25-Ի N 222 ՈՐՈՇՄԱՆ ՄԵՋ ՓՈՓՈԽՈՒԹՅՈՒՆ ԿԱՏԱՐԵԼՈՒ ՄԱՍԻՆ
(Վերնագիրը փոփ. 10.06.11 N 818-Ն)

Համաձայն «Բնակչության զբաղվածության և գործազրկության դեպքում սոցիալական պաշտպանության մասին» Հայաստանի Հանրապետության օրենքի 15-րդ հոդվածի 2-րդ մասի 16-րդ կետի` Հայաստանի Հանրապետության կառավարությունը որոշում է.

1. Սահմանել այլ վայր աշխատանքի գործուղվող գործազուրկի և աշխատանք փնտրող` չզբաղված հաշմանդամի նյութական ծախսերի հատուցման կարգը` համաձայն հավելվածի:

(1-ին կետը խմբ. 10.06.11 N 818-Ն)

2. Հայաստանի Հանրապետության աշխատանքի և սոցիալական հարցերի նախարարին` սույն որոշումն ուժի մեջ մտնելու օրվանից մեկամսյա ժամկետում հաստատել Հայաստանի Հանրապետության աշխատանքի և սոցիալական հարցերի նախարարության «Զբաղվածության պետական ծառայություն» գործակալության տարածքային (մարզային) կենտրոնի, գործազուրկի և գործատուի միջև կնքվող թափուր աշխատատեղը համալրելու մասին եռակողմ պայմանագրի օրինակելի և այլ վայր աշխատանքի գործուղվող գործազուրկի նյութական ծախսերի հատուցման ֆինանսավորման մասին հայտ-պահանջագրի ձևերը:

(2-րդ կետը լրաց. 20.03.08 N 260-Ն)

3. Ուժը կորցրած ճանաչել Հայաստանի Հանրապետության կառավարության 1997 թվականի հունիսի 25-ի «Բնակչության զբաղվածության մասին» Հայաստանի Հանրապետության օրենքի առանձին հոդվածների կիրարկումն ապահովող միջոցառումների մասին» N 222 որոշման 1-ին կետը:

4. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը։

Հայաստանի Հանրապետության վարչապետ	Ա. Մարգարյան
2006 թ. հուլիսի 15 Երևան

Հավելված ՀՀ կառավարության 2006 թվականի հունիսի 16-ի N 983-Ն որոշման

Կ Ա Ր Գ

ԱՅԼ ՎԱՅՐ ԱՇԽԱՏԱՆՔԻ ԳՈՐԾՈՒՂՎՈՂ ԳՈՐԾԱԶՈՒՐԿԻ ԵՎ ԱՇԽԱՏԱՆՔ ՓՆՏՐՈՂ` ՉԶԲԱՂՎԱԾ ՀԱՇՄԱՆԴԱՄԻ ՆՅՈՒԹԱԿԱՆ ԾԱԽՍԵՐԻ ՀԱՏՈՒՑՄԱՆ
(Վերնագիրը խմբ. 10.06.11 N 818-Ն)

I. ԸՆԴՀԱՆՈՒՐ ԴՐՈՒՅԹՆԵՐ

1. Սույն կարգով կարգավորվում են Հայաստանի Հանրապետության աշխատանքի և սոցիալական հարցերի նախարարության աշխատակազմի «Զբաղվածության պետական ծառայություն» գործակալության (այսուհետ` գործակալություն) զբաղվածության մարզային կամ տարածքային կենտրոնի (այսուհետ` տարածքային կենտրոն) առաջարկությամբ այլ վայր (Հայաստանի Հանրապետության տարածքում) աշխատանքի գործուղվող գործազուրկի նյութական ծախսերի հատուցման հետ կապված հարաբերությունները:

(1-ին կետը լրաց. 20.03.08 N 260-Ն, 10.06.11 N 818-Ն)

2. Սույն կարգի իմաստով այլ վայր աշխատանքի գործուղումը տարածքային կենտրոնի առաջարկությամբ գործազուրկի բնակության վայրից (համայնքից) դուրս աշխատանքի ընդունվելն է:

Սույն կարգի դրույթները չեն տարածվում Երևան քաղաքի տարածքային կենտրոնի առաջարկությամբ մեկ թաղային համայնքից մեկ այլ թաղային համայնք, ինչպես նաև այլ տարածքային կենտրոնի առաջարկությամբ Երևան քաղաք աշխատանքի գործուղված գործազուրկի վրա:

(2-րդ կետը լրաց. 20.03.08 N 260-Ն, փոփ. 10.06.11 N 818-Ն)

3. Գործազուրկը տարածքային կենտրոնի առաջարկությամբ կարող է գործուղվել այլ վայր աշխատանքի 30 կիլոմետրից ավելի հեռավորությամբ այլ բնակավայրում (համայնքում)` ժամանակավոր (ոչ պակաս մեկ տարի ժամկետով) կամ մշտական բնակության պայմանով:

4. Այլ վայր աշխատանքի գործուղվող գործազուրկի նյութական ծախսերը հատուցվում են Հայաստանի Հանրապետության պետական բյուջեի միջոցների հաշվին:

(4-րդ կետը փոփ. 20.03.08 N 260-Ն)

5. Գործազուրկին այլ վայր աշխատանքի գործուղման համար նյութական ծախսերի հատուցում տրվում է մեկ անգամ:

6. Թափուր աշխատատեղը կարող է առաջարկվել այլ վայր աշխատանքի գործուղվող գործազուրկին միայն այն դեպքում, եթե տարածքային կենտրոնում տվյալ աշխատատեղի վերաբերյալ տեղեկատվությունն ստացվելուց հետո այն առնվազն 1 ամիս չի համալրվել:

(6-րդ կետը փոփ. 20.03.08 N 260-Ն)

II. ԱՅԼ ՎԱՅՐ ԱՇԽԱՏԱՆՔԻ ԳՈՐԾՈՒՂՎՈՂ ԳՈՐԾԱԶՈՒՐԿԻ ԵՎ ԱՇԽԱՏԱՆՔ ՓՆՏՐՈՂ` ՉԶԲԱՂՎԱԾ ՀԱՇՄԱՆԴԱՄԻ ՆՅՈՒԹԱԿԱՆ ԾԱԽՍԵՐԻ ՀԱՏՈՒՑՄԱՆ ԵՐԱՇԽԻՔՆԵՐԸ
(Վերնագիրը փոփ. 10.06.11 N 818-Ն)

7. Այլ վայր ժամանակավոր կամ մշտական բնակության մեկնող գործազուրկին և աշխատանք փնտրող` չզբաղված հաշմանդամին և նրա հետ մեկնող ընտանիքի անդամներին հատուցվում են`

ա) իր և իր ընտանիքի անդամների տեղափոխման տրանսպորտային ծախսերը` միայն միկրոավտոբուսային երթուղի լինելու դեպքում` միկրոավտոբուսային երթուղիների համար սահմանված սակագնի չափով, իսկ միկրոավտոբուսային և ավտոբուսային երթուղիներ լինելու դեպքում` ավտոբուսային երթուղիների համար սահմանված սակագնի չափով.

բ) իր և իր ընտանիքի անդամների անհրաժեշտ գույքի տեղափոխման տրանսպորտային ծախսերը` 30-50 կմ ճանապարհի համար` 10000 դրամ, 50 կմ-ից ավելի յուրաքանչյուր 50 կմ-ի համար` 8000 դրամ, բայց ոչ ավելի, քան 50000 դրամ.

գ) 30 կիլոմետրից ավելի հեռավորությամբ այլ վայր աշխատանքի մեկնելու դեպքում` իր և իր ընտանիքի անդամների օրապահիկը` յուրաքանչյուրին Հայաստանի Հանրապետության կառավարության 2005 թվականի դեկտեմբերի 29-ի «Ծառայողական գործուղման մեկնած աշխատողների գործուղման ծախսերի հատուցման համար կատարվող վճարումների նվազագույն և առավելագույն չափերն ու վճարման կարգը սահմանելու մասին» N 2335-Ն որոշմամբ սահմանված չափով:

(7-րդ կետը փոփ. 10.06.11 N 818-Ն)

8. Այլ վայր աշխատանքի գործուղվող գործազուրկին և աշխատանք փնտրող` չզբաղված հաշմանդամին տրվում է`

1) միանվագ ֆինանսական աջակցություն` «Նվազագույն ամսական աշխատավարձի մասին» Հայաստանի Հանրապետության օրենքի 1-ին հոդվածով սահմանված ամսական աշխատավարձի եռապատիկի չափով.

2) մեկ տարվա ընթացքում 4 անգամ մշտական բնակավայր այցելելու համար տրանսպորտային ծախս միկրոավտոբուսային երթուղի լինելու դեպքում` միկրոավտոբուսային երթուղիների համար սահմանված սակագնի չափով, իսկ միկրոավտոբուսային և ավտոբուսային երթուղիներ լինելու դեպքում` ավտոբուսային երթուղիների համար սահմանված սակագնի չափով.

3) ամսական գումար` բնակարանային վարձի և կոմունալ ծախսերի համար` «Նվազագույն ամսական աշխատավարձի մասին» Հայաստանի Հանրապետության օրենքի 1-ին հոդվածով սահմանված ամսական աշխատավարձի չափով:

(8-րդ կետը խմբ. 20.03.08 N 260-Ն, փոփ. 10.06.11 N 818-Ն)

III. ԱՅԼ ՎԱՅՐ ԱՇԽԱՏԱՆՔԻ ԳՈՐԾՈՒՂՎՈՂ ԳՈՐԾԱԶՈՒՐԿԻ ԵՎ ԱՇԽԱՏԱՆՔ ՓՆՏՐՈՂ` ՉԶԲԱՂՎԱԾ ՀԱՇՄԱՆԴԱՄԻ ՆՅՈՒԹԱԿԱՆ ԾԱԽՍԵՐԻ ՀԱՏՈՒՑՄԱՆ ՊԱՅՄԱՆՆԵՐԸ
(Վերնագիրը փոփ. 10.06.11 N 818-Ն)

9. Գործակալությունը յուրաքանչյուր ամիս տարածքային կենտրոններից ստացված տեղեկատվության համաձայն ամփոփում է առնվազն 1 ամիս թափուր մնացած աշխատատեղերի մասին տեղեկատվությունը և տրամադրում տարածքային կենտրոններին:

Տարածքային կենտրոնը, յուրաքանչյուր ամիս, տարածքային կենտրոնի վարչական շենքի տեսանելի վայրում, տեղադրում է առնվազն 1 ամիս թափուր մնացած աշխատատեղերի մասին տեղեկատվությունը` նշելով գործատուի հասցեն, աշխատանքի բնույթը, պահանջվող մասնագիտական որակավորումը, աշխատանքի պայմանները, աշխատաժամանակը և աշխատավարձի չափը:

(9-րդ կետը փոփ. 20.03.08 N 260-Ն)

10. Այլ վայր աշխատանքի գործուղվելու համաձայնություն հայտնած գործազուրկին և աշխատանք փնտրող` չզբաղված հաշմանդամին տարածքային կենտրոնի կողմից տրամադրվում է խորհրդատվություն այլ վայրում առկա թափուր աշխատատեղերի և այլ վայր աշխատանքի գործուղվելու կապակցությամբ գործազուրկի և աշխատանք փնտրող` չզբաղված հաշմանդամի նյութական ծախսերի հատուցման ծրագրի վերաբերյալ:

(10-րդ կետը փոփ. 10.06.11 N 818-Ն)

11. Այլ վայր աշխատանքի գործուղվելու ցանկություն ունեցող գործազուրկը և աշխատանք փնտրող` չզբաղված հաշմանդամը գրավոր դիմում է տարածքային կենտրոն` նշելով համայնքի, գործատուի և թափուր աշխատատեղի անվանումները:

(11-րդ կետը փոփ. 10.06.11 N 818-Ն)

12. Եթե գործազուրկին և աշխատանք փնտրող` չզբաղված հաշմանդամին առաջարկվող աշխատանքը գտնվում է այն տարածքային կենտրոնի սպասարկման համայնքում, որտեղ հաշվառված է գործազուրկը և աշխատանք փնտրող` չզբաղված հաշմանդամը, ապա տվյալ տարածքային կենտրոնի տնօրենը գործատուի հետ քննարկում է թափուր աշխատատեղը գործազուրկով և աշխատանք փնտրող` չզբաղված հաշմանդամով համալրելու, գործատուի, գործազուրկի և աշխատանք փնտրող` չզբաղված հաշմանդամի և տարածքային կենտրոնի հետ եռակողմ պայմանագիր կնքելու հետ կապված հարաբերությունները:

(12-րդ կետը փոփ. 10.06.11 N 818-Ն)

13. Եթե գործազուրկի և աշխատանք փնտրող` չզբաղված հաշմանդամի դիմումում նշված գործատուն գործունեություն է իրականացնում տվյալ տարածքային կենտրոնի սպասարկման համայնքից դուրս գտնվող համայնքում, ապա տարածքային կենտրոնը գործազուրկի և աշխատանք փնտրող` չզբաղված հաշմանդամի դիմումի պատճենը և գործազուրկի և աշխատանք փնտրող` չզբաղված հաշմանդամի հաշվառման քարտի քաղվածքը` կից գրությամբ, ուղարկում է տվյալ գործատուին սպասարկող տարածքային կենտրոն: Վերջինս գործատուի մոտ առկա թափուր աշխատատեղն այլ համայնքի գործազուրկով և աշխատանք փնտրող` չզբաղված հաշմանդամով համալրելու, գործատուի, գործազուրկի և աշխատանք փնտրող` չզբաղված հաշմանդամի և տարածքային կենտրոնի հետ եռակողմ պայմանագիր կնքելու հետ կապված հարցերը քննարկում է գործատուի հետ: Տարածքային կենտրոնը քննարկման արդյունքների մասին եռօրյա ժամկետում տեղեկատվություն է տրամադրում իրեն դիմած տարածքային կենտրոնին:

(13-րդ կետը փոփ. 10.06.11 N 818-Ն)

14. Թափուր աշխատատեղը գործազուրկով և աշխատանք փնտրող` չզբաղված հաշմանդամով համալրելու և առնվազն մեկ տարի անընդմեջ տվյալ գործատուի մոտ աշխատելու հարցում տարածքային կենտրոնի և գործատուի միջև համաձայնություն ձեռք բերվելու դեպքում` գործազուրկի և աշխատանք փնտրող` չզբաղված հաշմանդամի, գործատուին և գործազուրկին և աշխատանք փնտրող` չզբաղված հաշմանդամին հաշվառած տարածքային կենտրոնի միջև կնքվում է թափուր աշխատատեղը համալրելու մասին եռակողմ պայմանագիր:

(14-րդ կետը փոփ. 10.06.11 N 818-Ն)

15. Սույն կարգի 14-րդ կետում նշված պայմանագիրը կնքելուց հետո գործատուն գործազուրկի և աշխատանք փնտրող` չզբաղված հաշմանդամի հետ կնքում է աշխատանքային պայմանագիր` Հայաստանի Հանրապետության օրենսդրությամբ սահմանված կարգով:

(15-րդ կետը փոփ. 10.06.11 N 818-Ն)

IV. ԱՅԼ ՎԱՅՐ ԱՇԽԱՏԱՆՔԻ ԳՈՐԾՈՒՂՎՈՂ ԳՈՐԾԱԶՈՒՐԿԻ ԵՎ ԱՇԽԱՏԱՆՔ ՓՆՏՐՈՂ` ՉԶԲԱՂՎԱԾ ՀԱՇՄԱՆԴԱՄԻ ՆՅՈՒԹԱԿԱՆ ԾԱԽՍԵՐԻ ՀԱՏՈՒՑՄԱՆ ՖԻՆԱՆՍԱՎՈՐՈՒՄԸ
(Վերնագիրը փոփ. 10.06.11 N 818-Ն)

16. Այլ վայր աշխատանքի գործուղվող գործազուրկը և աշխատանք փնտրող` չզբաղված հաշմանդամը սույն կարգի 14-րդ և 15-րդ կետերում նշված պայմանագրերը կնքելուց հետո առևտրային բանկում բացում է բանկային հաշիվ և իրեն հաշվառած տարածքային կենտրոն է ներկայացնում հետևյալ տեղեկանքները`

ա) նոր բնակության վայրում մշտական կամ ժամանակավոր բնակության մասին.

բ) իր անվամբ բացված բանկային հաշվի համարի և բանկի ռեկվիզիտների մասին:

(16-րդ կետը փոփ. 10.06.11 N 818-Ն)

17. Տարածքային կենտրոնը սույն կարգի 16-րդ կետում նշված փաստաթղթերն ստանալուց հետո կազմում և 3 աշխատանքային օրվա ընթացքում` կից գրությամբ, գործակալություն է ներկայացնում ֆինանսավորման մասին հայտ-պահանջագիր: Կից գրության մեջ նշվում են տվյալ գործազուրկին և աշխատանք փնտրող` չզբաղված հաշմանդամին ֆինանսական միջոցներ տրամադրելու հիմնավորումը, ինչպես նաև գործազուրկի և աշխատանք փնտրող` չզբաղված հաշմանդամի բանկային հաշվի համարը:

(17-րդ կետը փոփ. 10.06.11 N 818-Ն)

18. Գործակալությունը 3 աշխատանքային օրվա ընթացքում Հայաստանի Հանրապետության աշխատանքի և սոցիալական հարցերի նախարարություն (այսուհետ` նախարարություն) է ներկայացնում ըստ տարածքային կենտրոնների կազմված ֆինանսավորման մասին հայտ-պահանջագիրը:

(18-րդ կետը փոփ. 20.03.08 N 260-Ն, 10.06.11 N 818-Ն)

19. Նախարարությունը գործակալությունից ֆինանսավորման մասին հայտ-պահանջագիրն ստանալուց հետո 5 աշխատանքային օրվա ընթացքում զբաղվածության պետական նպատակային ծրագրերի իրականացման համար Հայաստանի Հանրապետության ֆինանսների նախարարության գանձապետական բաժիններում նախարարության աշխատակազմի անվամբ բացված գանձապետական հաշիվներին է փոխանցում ֆինանսավորման մասին հայտ-պահանջագրով նախատեսված միջոցները:

(19-րդ կետը փոփ. 20.03.08 N 260-Ն, խմբ. 10.06.11 N 818-Ն)

20. (20-րդ կետն ուժը կորցրել է 10.06.11 N 818-Ն)

21. Սույն կարգի 19-րդ կետում նշված գումարն ստացվելուց հետո տարածքային կենտրոնը 5 աշխատանքային օրվա ընթացքում փոխանցում է այլ վայր աշխատանքի գործուղվող գործազուրկի և աշխատանք փնտրող` չզբաղված հաշմանդամի բանկային հաշվի համարին

(21-րդ կետը փոփ., լրաց. 10.06.11 N 818-Ն)

22. Տարածքային կենտրոնը յուրաքանչյուր ամիս գործակալություն է ներկայացնում հաշվետվություն ֆինանսական միջոցներ ստացած գործազուրկների և աշխատանք փնտրող` չզբաղված հաշմանդամների և ստացված միջոցների մասին:

(22-րդ կետը փոփ. 10.06.11 N 818-Ն)

23. Գործակալությունն ամփոփում է տարածքային կենտրոններից ստացված հաշվետվությունները և այլ վայր աշխատանքի գործուղվող գործազուրկին և աշխատանք փնտրող` չզբաղված հաշմանդամին վճարված գումարների մասին հաշվետվությունը յուրաքանչյուր ամիս ներկայացնում է Հայաստանի Հանրապետության աշխատանքի և սոցիալական հարցերի նախարարին:

(23-րդ կետը փոփ. 20.03.08 N 260-Ն, 10.06.11 N 818-Ն)

24. Այլ վայր աշխատանքի գործուղվելու կապակցությամբ գործազուրկին և գործատուին հատուցված նյութական ծախսերը ենթակա են վերադարձման` սույն կարգի 14-րդ կետում նշված պայմանագրով սահմանված դեպքերում:

(24-րդ կետը խմբ. 10.06.11 N 818-Ն)

25. Սույն կարգի պահանջների խախտմամբ տրամադրված ֆինանսական միջոցները ենթակա են վերադարձման` Հայաստանի Հանրապետության օրենսդրությամբ սահմանված կարգով:

Հայաստանի Հանրապետության կառավարության աշխատակազմի ղեկավար-նախարար

Մ. Թոփուզյան