ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

13 հունվարի 2011 թվականի N 33-Ն

«ՄԵՂՐԻ» ՀԻԴՐՈԷԼԵԿՏՐԱԿԱՅԱՆԻ ԿԱՌՈՒՑՄԱՆ ՔԱՂԱՔԱՇԻՆԱԿԱՆ ՓԱՍՏԱԹՂԹԵՐԻ ՀԱՏՈՒԿ ՀԱՄԱԼԻՐ ՓՈՐՁԱՔՆՆՈՒԹՅՈՒՆ ԱՆՑԿԱՑՆԵԼՈՒ ՄԱՍԻՆ

Հիմք ընդունելով «Քաղաքաշինության մասին» Հայաստանի Հանրապետության օրենքի 17-րդ հոդվածի դրույթները և Հայաստանի Հանրապետության կառավարության 2010 թվականի մայիսի 6-ի N 711-Ն որոշմամբ հաստատված կարգի 10-րդ կետը` Հայաստանի Հանրապետության կառավարությունը որոշում է.

1. «Մեղրի» հիդրոէլեկտրակայանի կառուցման քաղաքաշինական փաստաթղթերի (այսուհետ` նախագիծ) հատուկ համալիր փորձաքննություն անցկացնելու նպատակով ստեղծել միջգերատեսչական ժամանակավոր փորձաքննական հանձնաժողով (այսուհետ` հանձնաժողով) և հաստատել դրա անհատական կազմը` համաձայն հավելվածի:

2. Հանձնաժողովին` նախագիծը հանձնաժողովին ներկայացնելուց հետո երկամսյա ժամկետում ավարտել հատուկ համալիր փորձաքննության անցկացման աշխատանքները:

3. Հայաստանի Հանրապետության էներգետիկայի և բնական պաշարների նախարարին` հատուկ համալիր փորձաքննության աշխատանքների անցկացման ավարտից հետո մեկամսյա ժամկետում հանձնաժողովի ամփոփ եզրակացությունը ներկայացնել Հայաստանի Հանրապետության կառավարություն` քննարկման:

4. «Մեղրի» հիդրոէլեկտրակայանի կառուցման նախագծի հատուկ համալիր փորձաքննություն անցկացնելու համար անհրաժեշտ ծախսերն իրականացնել 2010 թվականի հոկտեմբերի 16-ին Հայաստանի Հանրապետության կառավարության և «Թավան Աբ Արազ Քոմպանի» ընկերության միջև ստորագրված` «Մեղրի» հիդրոէլեկտրակայանի կառուցումը` կառուցում-տնօրինում-շահագործում-փոխանցում հիմունքներով» թույլտվության պայմանագրով նախատեսված միջոցների հաշվին:

5. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

Հայաստանի Հանրապետության վարչապետ	Տ. Սարգսյան
2011 թ. հունվարի 26 Երևան

Հավելված  ՀՀ կառավարության 2011 թվականի հունվարի 13-ի N 33-Ն որոշման

Ա Ն Հ Ա Տ Ա Կ Ա Ն  Կ Ա Զ Մ

«ՄԵՂՐԻ» ՀԻԴՐՈԷԼԵԿՏՐԱԿԱՅԱՆԻ ԿԱՌՈՒՑՄԱՆ ՔԱՂԱՔԱՇԻՆԱԿԱՆ ՓԱՍՏԱԹՂԹԵՐԻ ՀԱՏՈՒԿ ՀԱՄԱԼԻՐ ՓՈՐՁԱՔՆՆՈՒԹՅՈՒՆ ԻՐԱԿԱՆԱՑՆՈՂ ՄԻՋԳԵՐԱՏԵՍՉԱԿԱՆ ԺԱՄԱՆԱԿԱՎՈՐ ՓՈՐՁԱՔՆՆԱԿԱՆ ՀԱՆՁՆԱԺՈՂՈՎԻ

Ա. Սիմոնյան	- ՀՀ էներգետիկայի և բնական պաշարների նախարարի տեղակալ (հանձնաժողովի նախագահ)
Ռ. Ալավերդյան	- ՀՀ քաղաքաշինության նախարարի տեղակալ
Ա. Գիլոյան	- ՀՀ տարածքային կառավարման նախարարության աշխատակազմի տեղական ինքնակառավարման վարչության պետ
Գ. Պողոսյան	- ՀՀ արտակարգ իրավիճակների նախարարության աշխատակազմի արտակարգ իրավիճակների քաղաքականության ծրագրերի մշակման վարչության պետ
Ա. Գրիգորյան	- ՀՀ բնապահպանության նախարարության աշխատակազմի ջրային ռեսուրսների կառավարման գործակալության հարավային ջրավազանային տարածքային կառավարման բաժնի պետ
Վ. Արզումանյան	- ՀՀ արտակարգ իրավիճակների նախարարության «Սեյսմիկ պաշտպանության ազգային ծառայություն» գործակալության դիտացանցի բաժնի պետ
Ա. Ալբերտյան	- ՀՀ ֆինանսների նախարարության աշխատակազմի հանրային ծառայությունների ոլորտների ծրագրերի վարչության վառելիքաէներգետիկ համալիրի ծրագրերի բաժնի պետ
Ս. Կարապետյան	- ՀՀ առողջապահության նախարարության «Հիվանդությունների վերահսկման և կանխարգելման կենտրոն» ՓԲԸ-ի սանիտարահիգիենիկ բաժնի վարիչ
Մ. Ջալալյան	- ՀՀ հանրային ծառայությունները կարգավորող հանձնաժողովի լիցենզավորված գործունեության մոնիթորինգի և ներդրումային ծրագրերի վարչության պետ (համաձայնությամբ)
Ա. Ուստաբաշյան	- ՀՀ Սյունիքի մարզպետարանի աշխատակազմի քաղաքաշինության վարչության պետ
Կ. Մովսիսյան	- «Բնապահպանական փորձաքննություն» ՊՈԱԿ-ի ներկայացուցիչ` փորձագետ-գլխավոր մասնագետ
Ս. Ավագյան	- «ՀՀ նախագծերի պետական արտագերատեսչական փորձաքննություն» ՓԲԸ-ի գլխավոր ճարտարագետ (համաձայնությամբ)
Մ. Բարխուդարյան	- «Որոտանի ՀԷԿՀ» ՓԲԸ-ի գլխավոր տնօրենի  տեղակալ
Դ. Ստեփանյան	- ՀՀ էներգետիկայի և բնական պաշարների նախարարության աշխատակազմի զարգացման վարչության վերականգնվող էներգետիկայի բաժնի պետ (հանձնաժողովի քարտուղար)

Հայաստանի Հանրապետության կառավարության աշխատակազմի ղեկավար

Դ. Սարգսյան