Հ Ա Մ Ա Ձ Ա Յ Ն Ա Գ Ի Ր

Հայաստանի Հանրապետության կառավարությունը և Ռուսաստանի Դաշնության կառավարությունը, այսուհետև՝ Կողմեր

ղեկավարվելով երկու պետությունների միջև բարեկամական, բարիդրացիական հարաբերությունների, տնտեսական, առևտրային, գիտատեխնիկական, մշակութային և այլ կապերի զարգացման նպաստելու ցանկությամբ,

իրենց պետության քաղաքացիների այցելությունների իրավական կարգավորման նպատակով,

համաձայնեցին ներքոհիշյալի մասին.

Հոդված 1

Մի կողմի պետության քաղաքացիները կարող են մուտք գործել, դուրս գալ, տեղաշարժվել և գտնվել մյուս Կողմի պետության տարածքում առանց արտոնագրերի՝ սույն Համաձայնագրի 1-ին և 2-րդ Հավելվածներում նշված՝ անձը և քաղաքացիությունը հաստատող որևէ փաստաթղթերով:

Կողմերի պետությունների քաղաքացիների մուտքն ու ելքը իրականացվում է միջազգային ուղևորափոխադրումների համար բաց անցակետերով:

Հոդված 2

Կողմերի պետության քաղաքացիները, որոնք բնակվում են երրորդ պետություններում կարող են մուտք գործել, դուրս գալ, տեղաշարժվել կամ տարանցիկով երթևեկել Կողմերի պետությունների տարածքով առանց վիզաների՝ Համաձայնագրի 1-ին և 2-րդ Հավելվածներում նշված անձը և քաղաքացիությունը հաստատող որևէ փաստաթղթով՝ ցանկին համաձայն:

Հոդված 3

Կողմերը կանոնավոր կերպով կտեղեկացնեն միմյանց սույն Համաձայնագրի դրույթների կիրառման ոլորտին վերաբերող հարցերի, մասնավորապես՝ անձը և քաղաքացիությունը հաստատող գործող փաստաթղթերի, դրանց տրման և օգտագործման կարգում փոփոխությունների, Կողմերի պետությունների տարածքում օտարերկրյա քաղաքացիների կացության կանոնների, ինչպես նաև համապատասխան օրենսդրական ակտերի մասին:

Գործող ճամփորդական փաստաթղթերում փոփոխության կամ անձը և քաղաքացիությունը հաստատող նոր փաստաթղթեր գործածության մեջ մտցնելու դեպքում Կողմերը դիվանագիտական ուղիներով կփոխանակեն դրանց նմուշները՝ դրանց գործածության մեջ մտնելու առնվազն երեսուն օր առաջ:

Կողմերը, փոխադարձ համաձայնությամբ, դիվանագիտական ուղիներով հայտագրերի փոխանակմամբ, Համաձայնագրի 1-ին և 2-րդ Հավելվածներում կարող են կատարել նշված փաստաթղթերի ցանկի փոփոխություններ: Այդ փոփոխությունները ուժի մեջ կմտնեն համապատասխան հայտագրերի՝ դիվանագիտական ուղիներով փոխանակման օրվանից:

Հոդված 4

Կողմերի պետության քաղաքացիները պարտավոր են մյուս Կողմի պետության տարածքում սույն Համաձայնագրին համապատասխան մուտք գործելուց հետո կատարել Կողմերի պետությունների օրենսդրությամբ նախատեսված կացության վերաբերյալ պահանջները:

Կողմերի պետության այն քաղաքացիները, որոնք խախտել են սույն Համաձայնագրի դրույթները կամ Կողմերի պետության տարածքում կացության կանոնները, ենթակա են վերադարձման իրենց քաղաքացիության պետություն՝ Կողմերի պետությունների օրենսդրությամբ սահմանված կարգով:

Հոդված 5

 Սույն Համաձայնագիրը չի շոշափում Կողմերի իրավունքը՝ լիովին կամ մասամբ դադարեցնել սույն Համաձայնագրի առանձին դրույթների գործողությունը, եթե դա արտակարգ իրավիճակների դեպքում անհրաժեշտ է իրենց պետությունների սահմանների և տարածքի պաշտպանության համար, մասնավորապես՝ Կողմերի պետության անվտանգությանը, հասարակական կարգի պահպանմանը կամ բնակչության առողջության պաշտպանությանը վտանգ սպառնալու դեպքում:

 Այս դեպքում շահագրգիռ Կողմը կարող է համապատասխան սահմանափակումներ մտցնել մյուս Կողմի պետության քաղաքացիների՝ առանց արտոնագրի մուտքի, ելքի, կացության, տեղաշարժման և տարանցիկ երթևեկության համար՝ մյուս Կողմին դիվանագիտական ուղիներով տեղեկացնելով այդ մասին նշված սահմանափակումները մտցնելուց 72 ժամ առաջ:

Հոդված 6

 Կողմերը սույն Համաձայնագրի դրույթների կիրառման հետ կապված հարցերով կփոխանակեն տեղեկություններ և կխորհրդակցեն ըստ անհրաժեշտության:

 Սույն Համաձայնագիրը ժամանակավոր ուժի մեջ է մտնում ստորագրման օրվանից և ուժի մեջ է մտնում դրա համար անհրաժեշտ Կողմերի ներպետական ընթացակարգերի կատարման ավարտի մասին վերջին գրավոր ծանուցման օրվանից:

 Սույն Համաձայնագրի գործողությունը դադարում է Կողմերից մեկի Համաձայնագրից դուրս գալու մտադրության մասին համապատասխան գրավոր ծանուցումը մյուս Կողմի ստանալուց հետո իննսուն օր անց:

 Կատարված է Մոսկվա քաղաքում 2000թ. սեպտեմբերի 25-ին, երկու բնօրինակով, յուրաքանչյուրը՝ հայերեն և ռուսերեն, ընդ որում բոլոր տեքստերը հավասարազոր են:

1-ին հավելված

«Հայաստանի Հանրապետության կառավարության և
Ռուսաստանի Դաշնության կառավարության միջև
Հայաստանի Հանրապետության քաղաքացիների և Ռուսաստանի
Դաշնության քաղաքացիների առանց արտոնագրերի
այցելությունների մասին» Համաձայնագրի

Ռուսաստանի Դաշնության քաղաքացիների՝ Հայաստանի Հանրապետության տարածքով մուտքի, ելքի, կացության և տեղաշարժի համար փաստաթղթերի ցանկ

1. ԽՍՀՄ քաղաքացու անձնագիր' Ռուսաստանի Դաշնության քաղաքացիության մասին ներդիրով կամ տեղեկանքով (նշումով), կամ Ռուսաստանի Դաշնության քաղաքացիություն ունենալու մասին տեքստով, կամ 1992թ. փետրվարի 6-ի դրությամբ Ռուսաստանի Դաշնության տարածքում գրանցման (մշտական բնակության) մասին դրոշմակնիքով (մինչև 2005թ. դեկտեմբերի 31-ը):

2. Ռուսաստանի Դաշնության քաղաքացու անձնագիր:

3. Կորցրած անձնագրի փոխարեն Ռուսաստանի ՆԳՆ կողմից հաստատված կարգով տրամադրված Ռուսաստանի Դաշնության քաղաքացու ժամանակավոր վկայական:

4. Ծննդյան վկայական (մինչև 14 տարեկան երեխաների համար):

5. Ռուսաստանի Դաշնության զինված ուժերի, Ռուսաստանի Դաշնության դաշնային սահմանապահ ծառայության զինծառայողի, Ռուսաստանի Դաշնության ներքին գործերի նախարարության, Ռուսաստանի Դաշնության արդարադատության նախարարության, Ռուսաստանի Դաշնության դաշնային անվտանգության ծառայության աշխատակցի, Ռուսաստանի Դաշնության դատավորի և դատարանի ապարատի, Ռուսաստանի Դաշնության դատախազի և դատախազության աշխատողի վկայական:

6. Դիվանագիտական անձնագիր:

7. Ծառայողական անձնագիր:

8. Ռուսաստանի Դաշնության քաղաքացու անձնագիր (արտասահմանյան անձնագիր):

9. Արտասահմանյան անձնագիր' ԽՍՀՄ խորհրդանշանով, Ռուսաստանի Դաշնության քաղաքացիության մասին գրառումով կամ նշումով:

10. Նավաստու անձնագիր (նավային դերի կամ դրանից գրառումի առկայության դեպքում):

11. Օդանավի անձնակազմի անդամի թռիչքի վկայական (անձնակազմի կազմում երթևեկության ժամանակ):

12. Երկաթուղային տրանսպորտի աշխատակցի վկայական (գնացքի անձնակազմի կազմում երթևեկության ժամանակ):

13. Ռուսաստանի Դաշնություն վերադարձի վկայական (միայն Ռուսաստանի Դաշնություն վերադարձի համար):

2-րդ հավելված

«Հայաստանի Հանրապետության կառավարության և
Ռուսաստանի Դաշնության կառավարության միջև Հայաստանի
Հանրապետության քաղաքացիների և Ռուսաստանի Դաշնության
քաղաքացիների առանց արտոնագրերի այցելությունների մասին»
Համաձայնագրի

Հայաստանի Հանրապետության քաղաքացիների՝ Ռուսաստանի Դաշնության տարածքով մուտքի, ելքի, կացության և տեղաշարժի համար փաստաթղթերի ցանկ

1. Հայաստանի Հանրապետության քաղաքացու անձնագիր:

2. Ծննդյան վկայական (մինչև 16 տարեկան երեխաների համար):

3. Դիվանագիտական անձնագիր:

4. Հայաստանի Հանրապետության զինված ուժերի, Հայաստանի Հանրապետության ներքին գործերի նախարարության, Հայաստանի Հանրապետության արդարադատության նախարարության, Հայաստանի Հանրապետության ազգային անվտանգության նախարարության աշխատակցի, Հայաստանի Հանրապետության դատավորի և դատարանի ապարատի, Հայաստանի Հանրապետության դատախազի և դատախազության աշխատողի վկայական (սույն փաստաթղթերի մեջ ռուսերեն լեզվով տեքստի բացակայության դեպքում, դրանք ապահովվում են նոտարով հաստատված ռուսերեն թարգմանությամբ):

5. Օդանավի անձնակազմի անդամի թռիչքի վկայական (անձնակազմի կազմում երթևեկության ժամանակ):

6. Երկաթուղային տրանսպորտի աշխատակցի վկայական (գնացքի անձնակազմի կազմում երթևեկության ժամանակ):

7. Հայաստանի Հանրապետություն վերադարձի վկայական (միայն Հայաստանի Հանրապետություն վերադարձի համար):

2000 թվականի սեպտեմբերի 25-ի՝ «Հայաստանի Հանրապետության կառավարության և Ռուսաստանի Դաշնության կառավարության միջև Հայաստանի Հանրապետության քաղաքացիների և Ռուսաստանի Դաշնության քաղաքացիների առանց արտոնագրերի այցելությունների մասին» Համաձայնագրի 3-րդ հոդվածի վերջնական ձևակերպումը՝ հայերեն և ռուսերեն տեքստերում

Հոդված 3

Կողմերը կանոնավոր կերպով կտեղեկացնեն միմյանց սույն Համաձայնագրի դրույթների կիրառման ոլորտին վերաբերող հարցերի, մասնավորապես՝ անձը և քաղաքացիությունը հաստատող գործող փաստաթղթերի, դրանց տրման և օգտագործման կարգում փոփոխությունների, Կողմերի պետությունների տարածքում օտարերկրյա քաղաքացիների կացության կանոնների, ինչպես նաև համապատասխան օրենսդրական ակտերի մասին:

Տերերի ինքնությունը և քաղաքացիությունը հաստատող նոր փաստաթղթեր մտցնելու կամ գործող փաստաթղթերում փոփոխություններ կատարելու դեպքում, Կողմերը դիվանագիտական ուղիներով կփոխանակեն դրանց նմուշները՝ դրանց գործածության մեջ մտնելուց ոչ ուշ, քան երեսուն օր առաջ:

Կողմերը, փոխադարձ համաձայնությամբ, դիվանագիտական ուղիներով հայտագրերի փոխանակմամբ, Համաձայնագրի 1-ին և 2-րդ Հավելվածներում կարող են կատարել նշված փաստաթղթերի ցանկի փոփոխություններ: