ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

Ո Ր Ո Շ ՈՒ Մ

16 սեպտեմբերի 2010 թվականի N 1213-Ա

ՄԻԱՎՈՐՎԱԾ ԱԶԳԵՐԻ ԿԱԶՄԱԿԵՐՊՈՒԹՅԱՆ ԱՂԵՏՆԵՐԻ ԳՆԱՀԱՏՄԱՆ ԵՎ ՀԱՄԱԿԱՐԳՄԱՆ ՀԱՄԱԿԱՐԳԻՆ (ՄԱԿԱԳՀ) ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆԴԱՄԱԿՑՈՒԹՅՈՒՆԸ ՀԱՍՏԱՏԵԼՈՒ ՄԱՍԻՆ

 Հայաստանի Հանրապետության կողմից Միավորված ազգերի կազմակերպության Գլխավոր ասամբլեայի 1971 թվականի դեկտեմբերի 14-ի «Աջակցություն` տարերային և այլ արտակարգ իրավիճակների դեպքում» XXVI, 1991 թվականի դեկտեմբերի 19-ի «Միավորված ազգերի արտակարգ իրավիճակների մարդասիրական աջակցության համակարգման հզորացում» 46/182 բանաձևերի իրագործումն ապահովելու նպատակով և հիմք ընդունելով «Հայաստանի Հանրապետության միջազգային պայմանագրերի մասին» Հայաստանի Հանրապետության օրենքի 55-րդ հոդվածի 5-րդ մասը` Հայաստանի Հանրապետության կառավարությունը որոշում է.

 1. Լիազորել Հայաստանի Հանրապետության արտակարգ իրավիճակների նախարարին`

 1) հաստատել Միավորված ազգերի կազմակերպության աղետների գնահատման և համակարգման համակարգին Հայաստանի Հանրապետության անդամակցությունը.

 2) նշանակել Միավորված ազգերի կազմակերպության աղետների գնահատման և համակարգման համակարգի հետ կապված համագործակցության հարցերով Հայաստանի Հանրապետության ազգային կապի պատասխանատու.

 3) Միավորված ազգերի կազմակերպության աղետների գնահատման և համակարգման համակարգի ազգային անդամներին ահազանգելու համար Հայաստանի Հանրապետության արտակարգ իրավիճակների նախարարությունում նախարարության համակարգի աշխատողներից ստեղծել մոբիլիզացիոն ազգային կենտրոն` աշխատանքային խմբի տեսքով:

Հայաստանի Հանրապետության վարչապետ	Տ. Սարգսյան
2010 թ. սեպտեմբերի 22  Երևան