Կ Ա Ր Գ

ՀԱՓՇՏԱԿՎԱԾ, ԿՈՐԱԾ ԵՎ ՀԱՅՏՆԱԲԵՐՎԱԾ ԶԵՆՔԻ ՈՒ ՌԱԶՄԱՄԹԵՐՔԻ ՀԱՇՎԱՌՄԱՆ

1. Սույն կարգով սահմանվում են հափշտակված, կորած և հայտնաբերված զենքն ու ռազմամթերքը հաշվառելու, հաշվառումից հանելու հիմքերը և կարգը:

2. Սույն կարգում օգտագործվող հիմնական հասկացություններն են`

1) հաշվառման օբյեկտներ` հափշտակված, կորած և հայտնաբերված (առգրավված, գտնված, կամավոր հանձնած) մարտական, ծառայողական, քաղաքացիական զենքի ու ռազմամթերքի բոլոր տեսակները, որոնք ունեն անհատական համարներ.

2) հաշվառման օբյեկտների հաշվառման քարտ (այսուհետ` քարտ) (N 1 ձև)` հաշվառման փաստաթուղթ, որը քրեական հետապնդման մարմինը լրացնում է անհատական համար ունեցող հաշվառման օբյեկտների վերաբերյալ և ուղարկում Հայաստանի Հանրապետության կառավարությանն առընթեր Հայաստանի Հանրապետության ոստիկանության ինֆորմացիոն կենտրոն (այսուհետ` ինֆորմացիոն կենտրոն)՝ հաշվառման վերցնելու համար.

3) հաշվառման օբյեկտների հաշվառման քարտի դասակարգիչ (այսուհետ` դասակարգիչ) (N 2 ձև)` պայմանական ծածկագրերի ամբողջություն, որոնք անհրաժեշտ են քարտը լրացնելու և քարտում նշված տեղեկություններն ինֆորմացիոն կենտրոնի կողմից քարտադարան մուտքագրելու համար.

4) հաշվառում` հաշվառման օբյեկտների վերաբերյալ լրացված հաշվառման փաստաթղթի ընդունմանը, դրանում նշված տեղեկությունների մշակմանը, համակարգմանն ու պահպանմանն ուղղված գործողություններ.

5) հաշվառման օբյեկտների քարտադարան (այսուհետ` քարտադարան)` պահոց, որտեղ հավաքվում, համակարգվում, մշակվում ու պահպանվում են հաշվառման օբյեկտների մասին տեղեկությունները:

3. Հաշվառման օբյեկտները հաշվառման վերցնելու հիմքերն են`

1) հաշվառման օբյեկտների հափշտակված լինելը.

2) հաշվառման օբյեկտների կորած լինելը.

3) հաշվառման օբյեկտների հայտնաբերված լինելը:

4. Սույն կարգի 3-րդ կետով նախատեսված հիմքերի առկայության դեպքում քրեական հետապնդման մարմինը լրացնում է N 1 ձևի քարտը` դասակարգչի համաձայն:

5. Քարտը, այն լրացնելուց հետո մեկ աշխատանքային օրվա ընթացքում, ուղարկվում է ինֆորմացիոն կենտրոն՝ հաշվառման օբյեկտները հաշվառման վերցնելու համար:

6. Հավաքովի զենքի յուրաքանչյուր տարբեր համար ունեցող միավորի (դետալի) համար լրացվում է առանձին քարտ:

7. Քրեական հետապնդման մարմինը հայտնաբերված հաշվառման օբյեկտների վերաբերյալ քարտը լրացնում է հաշվառման օբյեկտների վերաբերյալ փորձագիտական եզրակացությունն ստանալուց հետո մեկ աշխատանքային օրվա ընթացքում:

8. Եթե հաշվառման օբյեկտների անհատական համարը հայտնի չէ, ապա հաշվառման օբյեկտներն ինֆորմացիոն կենտրոնում ենթակա չեն հաշվառման:

9. Քարտում լրացվում են քրեական հետապնդման մարմնի կողմից հարուցված գործի կամ կազմված փաստաթղթի անվանումը և համարը, փաստաթուղթը կազմելու (հարուցելու) ամսաթիվը, քրեական հետապնդման մարմնի անվանումը (պարտադիր), հաշվառման օբյեկտների տեսակը (պարտադիր), մոդելը (պարտադիր), արտադրող (պատրաստող) երկիրը, դետալի ծածկագիրը, դետալի սերիան, դետալի համարը (պարտադիր), տրամաչափը (պարտադիր), արտադրման (պատրաստման) տարեթիվը, հաշվառման օբյեկտների մանրամասն նկարագրությունը (հատուկ նշաններ, վնասվածքներ), հաշվառման վերցնելու հիմքը (պարտադիր), թե հաշվառման օբյեկտներն ում կողմից են կորել, հաշվառման օբյեկտները կորցնելու, հափշտակելու, հայտնաբերելու ժամանակը և վայրը, զենքի շրջանառության հետ կապված լիցենզիայի կամ թույլտվության համարն ու ժամկետը, լիցենզիա կամ թույլտվություն տված մարմնի անվանումը, հաշվառման օբյեկտների պատկանելությունը, պետական մարմնի, կազմակերպության, իրավաբանական անձի անվանումը, ֆիզիկական անձի անունը, ազգանունը, հայրանունը, ծննդյան տարեթիվը, անձնագրային տվյալները, պետական մարմնի, կազմակերպության կամ իրավաբանական անձի գտնվելու վայրը կամ ֆիզիկական անձի բնակության վայրը, հաշվառման օբյեկտները կորցնելու, հափշտակելու, հայտնաբերելու հանգամանքների նկարագրությունը:

10. Հաշվառման օբյեկտները հաշվառման վերցնելուց առաջ ինֆորմացիոն կենտրոնն ստուգում է դրանց վերաբերյալ ստացված քարտերում պարունակվող տվյալները:

11. Եթե պարզվում է, որ հաշվառման օբյեկտն արդեն իսկ հաշվառված է, կամ քարտում նշված տեղեկությունները մասամբ համընկնում են հաշվառված հաշվառման օբյեկտների տվյալների հետ, ապա հաշվառման օբյեկտները հաշվառման չեն վերցվում, և ինֆորմացիոն կենտրոնը դրա մասին անմիջապես հայտնում է քրեական հետապնդման մարմնին (հետախուզում նախաձեռնող և հայտնաբերող կամ իրեղեն ապացույց ճանաչող մարմնին):

12. Սույն կարգի 11-րդ կետում նշված դեպքերում ինֆորմացիոն կենտրոնի կողմից տրված տվյալների հիման վրա հետախուզում նախաձեռնող և հայտնաբերող կամ իրեղեն ապացույց ճանաչող քրեական հետապնդման մարմինները համատեղ պարզում են հաշվառման ուղարկված և հաշվառման մեջ գտնվող հաշվառման օբյեկտների նույնությունը:

13. Սույն կարգի 12-րդ կետով նախատեսված կարգով հաշվառման օբյեկտների նույնությունը պարզվելու դեպքում՝ հետախուզում նախաձեռնող քրեական հետապնդման մարմինը գրություն է ուղարկում ինֆորմացիոն կենտրոն՝ հաշվառման օբյեկտները սույն կարգի 17-րդ կետով նախատեսված կարգով հաշվառումից հանելու համար:

14. Ինֆորմացիոն կենտրոնում ստացվող քարտերի հիման վրա ձևավորվում է քարտադարանը:

15. Հաշվառման օբյեկտները հաշվառումից հանելու հիմքերն են`

1) հաշվառման օբյեկտների հայտնաբերումը.

2) հաշվառման օբյեկտների պատկանելության պարզումը.

3) քրեական գործով վերջնական որոշում ընդունելը կամ հաշվառման վերցնելու պահից 10 տարին լրանալը, եթե քրեական գործ չի հարուցվել։

16. Քրեական հետապնդման մարմինը սույն կարգի 15-րդ կետով նախատեսված հիմքերի առկայության դեպքում մեկ աշխատանքային օրվա ընթացքում գրություն է ուղարկում ինֆորմացիոն կենտրոն՝ հաշվառման օբյեկտները հաշվառումից հանելու համար, նշելով հաշվառումից հանելու հիմքը և հայտնաբերման (պատկանելության պարզման, քրեական գործով վերջնական որոշման ընդունման) ամսաթիվը:

17. Ինֆորմացիոն կենտրոնը սույն կարգի 15-րդ կետի 1-ին և 2-րդ ենթակետերով նախատեսված հիմքերի առկայության դեպքում՝ հաշվառման օբյեկտները հաշվառումից հանում է անմիջապես, իսկ քրեական գործով վերջնական որոշման ընդունման հիմքով հաշվառումից հանելու դեպքում` ոչ շուտ, քան քրեական գործով վերջնական որոշում ընդունելու օրվանից 5 տարի հետո:

18. Սույն կարգի 17-րդ կետով նախատեսված կարգով հաշվառումից հանված քարտերը հանվում են քարտադարանից և պահվում արխիվում՝ 5 տարի, որից հետո ոչնչացվում են: